អង្គការសមាគមខ្មែរក្រោមដើម្បីសិទ្ធិមនុស្សនិងអភិវឌ្ឍន៍ គ្រោងដាក់របាយការណ៍ផ្លូវការមួយទៅក្រសួងការបរទេសកម្ពុជា ដើម្បីឱ្យអន្តរាគមន៍ទៅរដ្ឋាភិបាលវៀតណាម ឱ្យដោះលែងបុរសខ្មែរក្រោមម្នាក់ដែលអាជ្ញាធរវៀតណាមចាប់ខ្លួនក្នុងករណីជម្លោះដីធ្លី។
អគ្គលេខាធិការសមាគមខ្មែរក្រោមដើម្បីសិទ្ធិមនុស្សនិងអភិវឌ្ឍន៍ លោក សឺន ជុំជួន ឱ្យអាស៊ីសេរីដឹងនៅថ្ងៃទី១៣ខែមិថុនា ថា ពេលនេះសមាគមលោកកំពុងប្រមូលភស្តុតាង និងឯកសារនានា ដើម្បីធ្វើជារបាយការណ៍មួយដាក់ទៅក្រសូងការបរទេសកម្ពុជា ទាក់ទងករណីអាជ្ញាធរវៀតណាមចាប់ខ្លួនពលរដ្ឋខ្មែរក្រោមលោក ហ្វិន យ៉ាងដៀប។ លោករំពឹងថា រដ្ឋាភិបាលកម្ពុជាមិនបោះបង់ចោលសាច់ឈាមរបស់ខ្លួនដែលកំពុងជួបទុក្ខបែបនេះទេ៖ «ទោះបីគាត់ ( រដ្ឋាភិបាលកម្ពុជា ) មិនយកចិត្តទុកដាក់ គាត់មិនខ្វល់ក៏ដោយ ប៉ុន្តែយើងនៅតែជំរុញទៅរដ្ឋាភិបាលជានិច្ច បងប្អូនកម្ពុជាក្រោមនៅតែរំពឹងគិតថា បងប្អូនរដ្ឋាភិបាលកម្ពុជាយើងគឺជាអាណាព្យាបាល»។
លោក សឺន ជុំជួន លើកឡើងថា ផ្អែកតាមព្រះរាជសាររបស់អតីតព្រះមហាក្សត្រ សម្ដេច នរោត្ដម សីហនុ និងច្បាប់សញ្ជាតិកម្ពុជាចែងថា ពលរដ្ឋខ្មែរទោះនៅទីណាក៏ត្រូវតែទទួលបានសញ្ជាតិខ្មែរ ដូច្នេះពលរដ្ឋខ្មែរក្រោមនៅតែជាជនជាតិខ្មែរ និងមានសញ្ជាតិខ្មែរហើយរដ្ឋាភិបាលកម្ពុជាមិនអាចនៅស្ងៀមចំពោះករណីនេះទៀតឡើយ។
អាស៊ីសេរីមិនទាន់អាចសុំការឆ្លើយតបរឿងនេះពីរដ្ឋមន្ត្រីក្រសួងការបរទេស លោក ប្រាក់ សុខុន និង អ្នកនាំពាក្យ លោក កុយ គួង បានទេ នៅថ្ងៃទី១៣ មិថុនា ដោយទូរស័ព្ទហៅចូលជាច្រើនដង ប៉ុន្តែគ្មានអ្នកទទួល។
អាជ្ញាធរវៀតណាមនៅខេត្តក្រមួនស ដែលវៀតណាមបានប្ដូរឈ្មោះជា កៀនយ៉ាង (Kien Giang) បានសម្រុកចុះចាប់ខ្លួនពលរដ្ឋខ្មែរក្រោម លោក ហ្វិន យ៉ាងដៀប ជាអ្នកស៊ីឈ្នួលឈូសឆាយដីឱ្យពលរដ្ឋក្នុងភូមិប៉ប្រក់ ដែលជាកន្លែងមានជម្លោះដីធ្លី និងបានចោទប្រកាន់លោកថា ជាអ្នកដឹកនាំការបះបោរទន្ទ្រានយកដី ទំហំជាង បីពាន់ហិកតារដែលកំពុងមានជម្លោះនោះ។
អង្គការសមាគមខ្មែរក្រោមទាំងក្នុង និងក្រៅប្រទេស បានហៅទង្វើនេះថាជាអំពើសាហាវព្រៃផ្សៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។