មន្ត្រីសិទ្ធិមនុស្សនៃសមាគមអាដហុក(Adhoc) សោកស្ដាយដែលសាលាឧទ្ធរណ៍លើកពេលសវនាការលើពួកគេ ខណៈពួកគេរង់ចាំសវនាការនេះជិត៥ឆ្នាំមកហើយ។ តុលាការសម្រេចលើកពេលសវនាការដោយសារ មេធាវីអគ្គលេខារងនៃ គ.ជ.ប លោក នី ចរិយា និងជាអតីតមន្ត្រីអាដហុកផងនោះ ជាប់ពាក់ព័ន្ធជំងឺកូវីដ១៩។
សវនាការសាលាឧទ្ធរណ៍ភ្នំពេញ ថ្ងៃទី២៥ ខែមីនា ជំនុំជម្រះលើបណ្ដឹងក្រុមមន្ត្រីសិទ្ធិមនុស្ស ប្រឆាំងនឹងការសម្រេចរបស់សាលាដំបូងរាជធានីភ្នំពេញ ដែលបានផ្ដន្ទាទោសលើពួកគេឲ្យជាប់ពន្ធគារ៥ឆ្នាំ។ ទោះយ៉ាងណា សវនាការបានចាប់ផ្ដើមតែបន្តិចក៏ត្រូវតុលាការលើកពេល ដែលធ្វើឲ្យការទន្ទឹងរង់ចាំយុត្តិធម៌របស់មន្ត្រីសិទ្ធិមនុស្សកាន់តែអូសបន្លាយតទៅទៀត។
ប្រធានសមាគមអាដហុក លោក នី សុខា ដែលជាអ្នករងការចោទប្រកាន់ម្នាក់ក្នុងសំណុំរឿងនេះប្រាប់អ្នកសារព័ត៌មានថា ទោះទោសរបស់លោកនិងមិត្តរួមការងារលោកផ្សេងទៀតបានបញ្ចប់ទៅហើយ ប៉ុន្តែលោកនៅតែមានឆន្ទៈចង់ឲ្យតុលាការបើកសវនាការ។ លោកសោកស្ដាយថា ក្រុមលោកប្ដឹងជិត៥ឆ្នាំមកហើយ ប៉ុន្តែ សាលាឧទ្ធរណ៍ទើបចាប់ផ្ដើមសវនាការនៅពេលនេះ។ លោក នី សុខា រិះគន់ថា សំណុំរឿងចោទប្រកាន់ពួកគាត់ គឺជារឿងរបស់អ្នកនយោបាយ ដូច្នេះគួរឲ្យអ្នកនយោបាយដោះស្រាយគ្នា មិនគួរយកបញ្ហានេះមកធ្វើទុក្ខបុកម្នេញលើមន្ត្រីសង្គមស៊ីវិល៖ «យើងគិតថា រយៈពេលនៃការពន្យារនេះយូរពេកហើយ ខ្ញុំបានជម្រាបហើយថា នេះជាការមួយឲ្យយើងសោកស្ដាយចំពោះពន្យារដោយសារនេះជារឿងមួយដែលយូរហួសធ្វើឲ្យទន្ទឹងរង់ចាំយុត្តិធម៌យូរពេកគួរណាស់តុលាការដំណើរការនីតិវិធីហ្នឹងឲ្យឆាប់នៅពេលយើងបានប្ដឹងឧទ្ធរណ៍កាលពីដំបូងនោះបាទ»។
មន្ត្រីសិទ្ធិមនុស្សនៃសមាគមអាដហុកម្នាក់ទៀត អ្នកស្រី លឹម មុន្នី និយាយថា អ្នកស្រីមិនសប្បាយចិត្តនៅពេលតុលាការអូសបន្លាយសវនាការនេះ។ អ្នកស្រីស្នើទៅតុលាការផ្ដល់យុត្តិធម៌ដល់អ្នកធ្វើការងារបម្រើសង្គម ប៉ុន្តែបែរត្រូវសាលាដំបូងរាជធានី ភ្នំពេញកាត់ទោសទាំងអយុត្តិធម៌ និងបានជាប់ឃុំក្នុងយ៉ាងយូរក្នុងពន្ធនាគារ៖ «ចំពោះខ្ញុំ ខ្ញុំគិតថា គឺជាការរុកគួនដល់ក្រុមសង្គមស៊ីវិលដែលពួកយើងអត់មានធ្វើនយោបាយអីទាំងអស់ ពួកយើងធ្វើការងារបម្រើសង្គមហើយជួយរំលែកទុក្ខលំបាករបស់រដ្ឋាភិបាលនៅក្នុងការជួយជនរងគ្រោះប៉ុណ្ណោះ»។
កាលពីឆ្នាំ២០១៦ អង្គភាពប្រឆាំងអំពើពុករលួយបានកសាងសំណុំរឿងចោទមន្ត្រីសមាគមការពារសិទ្ធិមនុស្សអាដហុកទាំង៣រូបគឺលោក នី សុខា លោក យី សុខសាន្ត អ្នកស្រី លឹម មុន្នី និងមន្ត្រីសិទ្ធិមនុស្សម្នាក់ទៀតគឺលោក ណៃ វ៉ង់ដា ដែលកាលនោះលោកជាមន្ត្រីសមាគមអាដហុក រួមអគ្គលេខាធិការរងនៃគ.ជ.ប លោក នី ចរិយា ដែលលោកជាអតីតមន្ត្រីសមាគមអាដហុកទាក់ទងការសូកប៉ាន់សាក្សី។ នាង ខុម ចាន់តារាទី ហៅ ស្រីមុំ ដែលជាប់ពាក់ព័ន្ធនឹងសំណុំរឿងប្រធានគណបក្សប្រឆាំង លោក កឹម សុខា បានប្រកាន់អ្នកទាំង៥រូបនេះ។ តុលាការក៏បានផ្ដន្ទាទោសដាក់ពន្ធនាគារ ៥ឆ្នាំ ប៉ុន្តែអនុវត្តទោសក្នុងពន្ធនាគារ១៤ទោសនៅសល់ព្យួរក្រោមបទចោទសមគំនិត និងសូកប៉ាន់សាក្សី។ អ្នកទាំងអស់ក៏សម្រេចប្ដឹងទាស់ការសម្រេចរបស់សាលាដំបូងមកសាលឧទ្ធរណ៍កាលពីខែតុលា ឆ្នាំ២០១៨។
អ្នកតាមដានដំណើររឿងនេះ នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព និយាយថា នៅពេលតុលាការចាប់ផ្ដើមសវនាការគឺមានការរឹតបន្តឹង លើអ្នកសារព័ត៌មាន។ ទោះយ៉ាងណា តុលាការបានអនុញ្ញាតឲ្យមន្ត្រីអង្គការភាពប្រឆាំងអំពើពុករលួយ ដែលជាភាគីចោទប្រកាន់លើមន្ត្រីសង្គមសង្គមស៊ីវិលអាចចូលក្នុងសវនាការ និងថតវីដេអូនៅក្នុងបន្ទប់សវនាការថែមទៀតផង៖ «យើងដឹងហើយថា ករណីចោទប្រកាន់លើពួកគាត់ទាំងប្រាំរូបនេះ គឺមានការដាក់សំណុំរឿងចេញគឺអង្គភាពប្រឆាំងអំពើពុករលួយហ្នឹងហើយ គាត់ជាភាគីដើម្បីបណ្ដឹង គាត់ជាអ្នកពាក់ព័ន្ធនៅក្នុងបណ្ដឹងហ្នឹងហើយគាត់ជាអ្នកមានសិទ្ធិអំណាច ក្នុងការថត រូប ឬក៏ថតវីដេអូទៀត ខ្ញុំមើលទៅវាមិនសមហេតុផល»។
ទាក់ទងបញ្ហានេះ វិទ្យុអាស៊ីសេរីបានសុំការបំភ្លឺពីប្រធានសាលាឧទ្ធរណ៍រាជធានី ភ្នំពេញ លោក យូ ប៊ុនឡេង ប៉ុន្តែនៅពេលលោកឮថា អ្នកសារព័ត៌មានមកពីវិទ្យុអាស៊ីសេរីលោកប្រាប់ថា រវល់រួចបិទទូរស័ព្ទ។
លោក នី សុខា លើកឡើងថា សាក្សីដាក់បន្ទុកពីរនាក់គឺ នាង ខុម ចាន់តារាទី និងអ្នកស្រីមេធាវី ទ្រី ឈួន មិនដែលបានចូលបំភ្លឺតុលាការតាំងពីសំណុំរឿងនេះនៅសាលាដំបូងរាជធានីភ្នំពេញ មកម្ល៉េះ។ លោកស្នើទៅតុលាការឲ្យកោះហៅសាក្សីទាំងពីរនាក់នេះមកបំភ្លឺនៅតុលាការផងនៅពេលចាប់ផ្ដើមសវនាការជាថ្មី។ បើគ្មានការប្រែប្រួល សាលាឧទ្ធរណ៍ នឹងបើកសវនាការលើសំណុំរឿងនេះនៅចុងខែមេសាខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។