សកម្មជនសង្គមម្នាក់ ត្រូវបានតុលាការដោះលែងនៅថ្ងៃនេះ។ ទោះយ៉ាងណា មន្ត្រីសង្គមស៊ីវិលបន្តជំរុញទៅតុលាការគួរទម្លាក់ចោលការចោទប្រកាន់លើរូបលោក ប៉ុន្តែមន្រ្តីបក្សកាន់អំណាចថា ការសម្រេចបែបនេះ ជាឆន្ទានុសិទ្ធិរបស់តុលាការ។
សកម្មជនសង្គមយុវជន មួង សុភ័ក្រ បានចេញពីពន្ធនាគារនៅថ្ងៃទី១១ ខែវិច្ឆិកា ក្រោយអនុវត្តទោសគ្រប់ចំនួនកំណត់។ យុវជន មួង សុភ័ក្រ មានទឹកមុខស្លេកស្លាំងនិងស្គមស្គាំង ក្រោយលោកជាប់ពន្ធនាគារអស់រយៈ ១៤ខែ។ ទោះយ៉ាងណា យុវជនរូបនេះ នៅតែប្ដេជ្ញាចិត្តបន្តការងារសង្គមដដែល។
អតីតអ្នកទោសមនសិការរូបនេះ រិះគន់ថា ស្ថានភាពក្នុងពន្ធនាគារមានការបែងចែកវណ្ណៈ ហើយថ្នាំសង្កូវមិនគ្រប់គ្រាន់។ លោកថា នៅពន្ធនាគារមានតែថ្នាំប៉ារ៉ាប៉ុណ្ណោះសម្រាប់ព្យាបាលគ្រប់សព្វមុខ៖ « ប្រព័ន្ធសុខាភិបាលនិយាយឲ្យចំទៅខ្សោយមែនទែនព្រោះពេលបុគ្គលណាឈឺអីក៏ដោយ គឺមានថ្នាំតែគ្រាប់លេបអ៊ីចឹង យើងពិបាក ពេលណាយើងត្រូវរកថ្នាំលេប យើងត្រូវទាក់ទងទៅគ្រួសារ។ ដល់យើងអត់បានទំនាក់ទំនងគ្រួសារយើងរកថ្នាំលេបអត់បាន»។
វិទ្យុអាស៊ីសេរីមិនទាន់អាចសុំប្រតិកម្មពីអ្នកនាំពាក្យអគ្គនាយកដ្ឋានពន្ធនាគារលោក នុត សវនា បានទេនៅថ្ងៃទី១១ ខែវិច្ឆិកា។
សមាជិកសមាគមសម្ព័ន្ធនិស្សិតបញ្ញវន្តខ្មែរ និងជាសមាជិកក្រុមការងារ ១០០រាត្រី លោក មួង សុភ័ក្រ ជាយុវជនម្នាក់ក្នុងចំណោមយុវជនដែលត្រូវបានអាជ្ញាធររបបលោក ហ៊ុន សែន បានចាប់ខ្លួន កាលពីខែសីហា និងខែកញ្ញា ឆ្នាំ២០២០ ដោយចោទបទញុះញង់ពាក់ព័ន្ធនឹងការតវ៉ាទាមទារឲ្យដោះលែងមេដឹកនាំសហជីពនិងជាអ្នកឃ្លាំមើលព្រំដែនលោក រ៉ុង ឈុន ដែលមានគម្រោងទៅតវ៉ានៅទីលានប្រជាធិបតេយ្យ ដើម្បីទាមទារយុត្តិធម៌សង្គម។
កាលពីថ្ងៃទី៥ ខែវិច្ឆិកា ក្រុមសកម្មជនសង្គម ៥នាក់ ដែលតវ៉ាទាមទារឲ្យដោះលែងលោក រ៉ុង ឈុន ត្រូវបានតុលាការដោះលែងពីពន្ធនាគារបន្ទាប់ពីពួកគេបានអនុវត្តទោសគ្រប់ចំនួនក្នុងពន្ធនាគារ។
ស្រដៀងគ្នានេះដែរ សកម្មជនគណបក្សសង្រ្គោះជាតិលោក ប៉ែន ច័ន្ទសង្គ្រាម ដែលជាប់ពន្ធនាគារអស់រយៈពេលជិត ១១ ខែក្នុងសំណុំរឿង « ញុះញង់ឱ្យប្រព្រឹត្តបទឧក្រិដ្ឋជាអាទិ៍ » ក៏នឹងត្រូវតុលាការដោះលែងប៉ុន្មានថ្ងៃខាងមុខទៀតដែរ។
កាលពីថ្ងៃទី១០ ខែវិច្ឆិកា ប្រធានក្រុមប្រឹក្សាជំនុំជម្រះនៃសាលាឧទ្ធរណ៍លោក សេង ស៊ីវុត្ថា បានប្រកាសសាលដីកាសម្រេចឲ្យ លោក ប៉ែន ច័ន្ទសង្គ្រាម អនុវត្តទោសក្នុងពន្ធនាគារចំនួន ១០ខែ ២០ថ្ងៃ ដោយឡែកទោសដែលនៅសល់ ៣ឆ្នាំទៀតតុលាការជាន់ខ្ពស់មួយនេះអនុញ្ញាតឲ្យព្យួរ។
វិទ្យុអាស៊ីសេរីមិនទាន់សុំការអត្ថាធិប្បាយបន្ថែមពីមេធាវីការពារក្ដីលោក ប៉ែន ច័ន្ទសង្គ្រាម គឺលោក សំ សុគង់ បានទេនៅថ្ងៃទី១១ ខែវិច្ឆិកា។ ទោះយ៉ាងណា មេធាវីរូបនេះឲ្យសារព័ត៌មានក្នុងស្រុក (វីអូឌី) ដឹងថា គិតពីថ្ងៃឃុំខ្លួនកូនក្ដីលោកមកដល់ពេលនេះ ជិតដល់ចំនួនកំណត់ហើយ ដូច្នេះលោកថា នាប៉ុន្មានថ្ងៃខាងមុខទៀត កូនក្ដីលោកអាចនឹងត្រូវតុលាការដោះលែង។
ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា សង្កេតឃើញថា សំណុំរឿងទាំងនេះមានពាក់ព័ន្ធនឹងនយោបាយច្រើនជាងការអនុវត្តច្បាប់។ មន្ត្រីសង្គមស៊ីវិលរូបនេះយល់ថា គួរដល់ពេលតុលាការផ្ដល់សិទ្ធិសេរីភាពពេញលេញលើសកម្មជនសង្គមនិងសកម្មជននយោបាយដែលរងការចោទប្រកាន់ទាំងនោះហើយ៖ « កុំឲ្យមានការព្យួរអីឲ្យស្អាតតែម្ដងទៅ ព្រោះយើងពិនិត្យមើលបងប្អូនគាត់អនុវត្តសិទ្ធិរបស់គាត់ណា មានទៅរំលោភអីទេ ធ្វើឲ្យស្អាតតែម្ដងទៅ កិត្តិយសរដ្ឋាភិបាលនឹងមានការល្អប្រសើរការសាទរ » ។
ឆ្លើយតបនឹងបញ្ហានេះ អ្នកនាំពាក្យគណបក្សប្រជាជនកម្ពុជាលោក សុខ ឥសាន និយាយថា ការដោះលែងសកម្មជនទាំងនោះ គឺតុលាការពិនិត្យជាក់ស្ដែងតាមសំណុំរឿងនីមួយៗ និងគ្មានការគាប់សង្កត់អ្នកណានោះទេ៖ « អ៊ីចឹង សុំកុំឲ្យបញ្ហាថា មានគំនាបខាងក្រៅដាក់លើរាជរដ្ឋាភិបាល ទើបមានការដោះលែងអត់។ អ៊ីចឹងបងប្អូន ដែលជាប់ពាក់ព័ន្ធបានរួចហើយ ទោះបីឋិតក្នុងការត្រួតពិនិត្យ ឬមិនឋិតក្រោមការត្រួតពិនិត្យរបស់តុលាការ ក៏សុំឲ្យកែប្រែខ្លួនទៅជាពលរដ្ឋល្អដូចគេដូចឯងទៅ អត់មានបញ្ហាអីទេ » ។
ចាប់តាំងពីអាជ្ញាធរសម្រុកចាប់ខ្លួនសកម្មជនសិទ្ធិមនុស្ស សកម្មជនសង្គម បរិស្ថាន និងសកម្មជនបក្សប្រឆាំដាក់ពន្ធនាគារជាបន្តមក ក្រុមអ្នកជំនាញសិទ្ធិមនុស្សអង្គការសហប្រជាជាតិ តែងតែជំរុញឲ្យរដ្ឋាភិបាលឲ្យដោះអ្នកទាំងនោះដោយចាត់ទុកការចាប់ខ្លួនក្រុមសកម្មជនទាំងនេះ គឺជាការគំរាមកំហែង និងរំលោភបំពានសិទ្ធិសេរីភាពពលរដ្ឋ។ មួយរយៈពេលចុងក្រោយនេះរបបលោក ហ៊ុន សែន បានដោះលែងសកម្មជនបរិស្ថាន និងនយោបាយជាបន្តបន្ទាប់នៅពេលដែលកម្ពុជាបានក្លាយជាប្រធានអាស៊ាននិងរងសម្ពាធពីសហគមន៍អន្តរជាតិជាច្រើនមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។