APHR ជំរុញ​ឱ្យ​កម្ពុជា​ដោះលែង​ពលករ​ខ្មែរ នួន តឿន និង​អ្នក​កាសែត លោក ម៉ិច ដារ៉ា

ក្រុម​សមាជិក​អាស៊ាន​ដើម្បី​សិទ្ធិ​មនុស្ស (APHR) ជំរុញ​ឱ្យ​អាជ្ញាធរ​កម្ពុជា​ដោះលែង​ពលករ​ខ្មែរ កញ្ញា នួន តឿន និង​អ្នក​កាសែត​ឯករាជ្យ លោក ម៉ិច ដារ៉ា។ APHR ថា​ខ្លួន​មាន​ការ​រំខាន​ចិត្ត​ជា​ខ្លាំង​ដោយសារ​ករណី​ចាប់​បញ្ជូន​កញ្ញា នួន តឿន ដោយ​បង្ខំ​ពី​ប្រទេស​ម៉ាឡេស៊ី (Malaysia) មក​កម្ពុជា​វិញ​កាលពី​ពេល​ថ្មីៗ​នេះ។

នាយិកា APHR និង​ជា​តំណាងរាស្ត្រ​ឥណ្ឌូណេស៊ី (Indonesia) អ្នកស្រី ម៉ឺស៊ី គ្រីស្ទី បារែនស៍ (Mercy Chriesty Barends) ថ្លែង​ក្នុង​ សេចក្តីថ្លែងការណ៍ កាលពី​ថ្ងៃទី០៧ ខែតុលា ថា រដ្ឋ​សមាជិក​អាស៊ាន​គួរ​តែ​សហការ​គ្នា​លើក​កម្ពស់​ប្រជាធិបតេយ្យ និង​កែ​លម្អ​ការ​ការពារ​សិទ្ធិ​មនុស្ស​នៃ​ប្រជាជន​អាស៊ាន ជាជាង​សម​គំនិត​គ្នា​ក្នុង​ការ​បង្ក្រាប​សំឡេង​រិះគន់។

រីឯ សមាជិក​ក្រុមប្រឹក្សាភិបាល APHR និង​ជា​អតីត​តំណាងរាស្ត្រ​នៃ​ប្រទេស​ថៃ លោក កាសិត ភិរម្យ (Kasit Piromya) គូសបញ្ជាក់​ឡើងវិញ​អំពី​ការ​អំពាវនាវ​ដល់​រដ្ឋាភិបាល​អាស៊ាន​ទាំងអស់ ឱ្យ​ចងចាំ​អំពី​ការ​ប្ដេជ្ញាចិត្ត​របស់​ពួកគេ​ដើម្បី​វិបុលភាព និង​សុខដុមរមនា​របស់​ប្រជាជន​ក្នុង​តំបន់​អាស៊ាន ដោយ​​ពង្រឹង​បរិយាកាស​មួយ​ដែល​សេរីភាព​នៃ​ការ​បញ្ចេញ​មតិ និង​សារព័ត៌មាន​ ត្រូវ​បាន​ការពារ និង​ផ្តល់​តម្លៃ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។