ប្រជាពលរដ្ឋ ព្រះសង្ឃ សកម្មជនដីធ្លី តំណាងរាស្ត្រគណបក្សនយោបាយ អង្គការសមាគម និងសហគមន៍ដីធ្លី បានប្រមូលផ្ដុំគ្នានៅខាងមុខពន្ធនាគារព្រៃស កាលពីព្រឹកថ្ងៃទី១៤ ខែធ្នូ។ នេះជាការជួបជុំគ្នាលើកទី៤ ហើយ នៅមុខពន្ធនាគារព្រៃស ចាប់តាំងពីអាជ្ញាធរចាប់សកម្មជនការពារដីធ្លី ហើយការជួបជុំនេះ ដើម្បីទាមទារឲ្យស្ថាប័នរបស់រដ្ឋមួយនេះ ដោះលែងព្រះសង្ឃបីអង្គ សកម្មជនគណបក្សនយោបាយ ៥រូប និងស្ត្រីតស៊ូក្នុងរឿងដីធ្លីចំនួន ១០នាក់ពីពន្ធនាគារ។
ការតវ៉ាដោយអហិង្សា និងសន្តិវិធីនេះ បានឈានចូលដល់សប្ដាហ៍ទីបួនហើយ គិតត្រឹមថ្ងៃអាទិត្យ ទី១៤ ខែធ្នូ ក្នុងការជំរុញឲ្យអ្នកជាប់ឃុំទាំងអស់ ដែលបានចាប់ខ្លួនពាក់ព័ន្ធដីធ្លី ការតស៊ូមតិដើម្បីសិទ្ធិសេរីភាពបាននៅក្រៅឃុំ ខណៈដែលស្ត្រីទាំង ៨នាក់ បន្តធ្វើកូដកម្មបង្អត់អាហារនៅក្នុងពន្ធនាគារ ឈានចូលដល់ថ្ងៃទី៥ ដោយពុំមានដំណោះស្រាយ។
ការតវ៉ានៅខាងមុខពន្ធនាគារលើកនេះ ដូចពេលមុនដែរ គឺក្រុមអ្នកតវ៉ារៀបចំពិធីស្មិងស្មាធិ៍ មានព្រះសង្ឃទេសនា ស្វាធ្យាយធម៌ផ្សាយមេត្តាចិត្ត និងនៅនាទីចុងក្រោយមុនចាកចេញពីមណ្ឌលកែប្រែ ម២ ឆ្ពោះទៅមណ្ឌលកែប្រែ ម១ គឺក្រុមអ្នកតវ៉ាបានបង្ហោះប៉ោងៗ ជាសញ្ញាទីមួយ បង្ហាញឲ្យអ្នកជាប់ឃុំដឹងថា ពួកគេនៅខាងក្រៅ មិនព្រងើយកន្តើយដើម្បីស្វែងរកដំណោះស្រាយ និងទីពីរជាសារបញ្ជាក់ថា អ្នកតស៊ូក្នុងវិវាទដីធ្លី ព្រមទាំងសកម្មជនសិទ្ធិមនុស្ស មិនត្រូវបានចាប់ខ្លួនឡើយ។
ក្រៅពីនេះ រឿងនៅថ្ងៃតវ៉ាទាមទារឲ្យមានការដោះលែងសកម្មជនទាំង ១៨នាក់ ឈានចូលដល់សប្ដាហ៍ទីបួននេះ របាំងដែលធ្លាប់តែដាក់ពង្រាយក្បែររបងពន្ធនាគារ ម២ បែរជារំកិលចូលមកដល់ក្បែរផ្លូវធំទៅវិញ។ ប៉ុន្តែរបាំងនេះ ត្រូវបានរំកិលទៅដាក់កន្លែងដើមវិញ បន្ទាប់ពីក្រុមអ្នកតវ៉ាបង្ខំចិត្តឆ្លងកាត់លើដីទួលឆ្ពោះទៅក្បែរមណ្ឌលកែប្រែ ម២។ ជាងនេះទៀតនោះ គឺជាលើកទីមួយហើយ ចាប់តាំងពីមានការតវ៉ានៅមុខពន្ធនាគារ គឺសំឡេងធុងបាសត្រូវបានចាក់បំពងសំឡេងចេញពីផ្នែកខាងក្នុងនៃបរិវេណមណ្ឌលកែប្រែ ម១។ សំឡេងដែលបន្ទរឮខ្លាំងៗនេះ ទំនងចង់ប្រណាំងនឹងសំឡេងរបស់អ្នកតវ៉ានៅខាងក្រៅ។
វិទ្យុអាស៊ីសេរី ពុំទាន់អាចទាក់ទងមន្ត្រីពន្ធនាគារដើម្បីស្នើសុំបំភ្លឺជុំវិញការទាមទាររបស់ក្រុមអ្នកតវ៉ាបានទេ។ មន្ត្រីអង្គការឃ្លាំមើលសិទ្ធិមនុស្សលីកាដូ ដែលបានបញ្ជូនពេទ្យដើម្បីចូលពិនិត្យសុខភាពនៅក្នុងពន្ធនាគារបញ្ជាក់ថា ក្នុងចំណោមស្ត្រីទាំង ៨នាក់ ដែលធ្វើកូដកម្មបង្អត់អាហារ ក្នុងនោះលោកស្រី បូ ឆវី មានសភាពប៉ះពាល់សុខភាពធ្ងន់ធ្ងរជាងគេ។ បើទោះជាបែបនេះក្តី ពេទ្យដែលអង្គការលីកាដូ បញ្ជូនដើម្បីពិនិត្យសុខភាពនោះ មិនត្រូវបានអនុញ្ញាតឲ្យចូលឡើយ។
ប្រធានលេខាធិការដ្ឋាននៃគណៈកម្មាធិការប្រព្រឹត្តកម្មនៃអង្គការ-សមាគមការពារសិទ្ធិមនុស្ស ហៅកាត់ថា ច្រាក (CHHRAC) លោក សួន ប៊ុនស័ក្ដិ ចាត់ទុកថា រូបភាពដែលមន្ត្រីអនុវត្តច្បាប់របស់រដ្ឋាភិបាលធ្វើដូចនេះ គឺកំពុងរំលោភសិទ្ធិមនុស្សធ្ងន់ធ្ងរ។ លោកថ្លែងថា រដ្ឋាភិបាលគប្បីពិនិត្យឡើងវិញពីវិធីសារនានា ស្ដីពីសិទ្ធិមនុស្សដែលខ្លួនបានទទួលស្គាល់ការគោរពសិទ្ធិមនុស្សក្នុងពេលកន្លងទៅ។
ចំណែកក្រុមកុមារតូចៗវិញ ដែលម្ដាយរបស់ពួកគេត្រូវសមត្ថកិច្ចចាប់ខ្លួន ហើយឃុំនៅក្នុងពន្ធនាគារ ក្រោមអំណាចសាលក្រមនៃសាលាដំបូងរាជធានីភ្នំពេញ បានទ្រហោយំនៅខាងក្រៅរបងពន្ធនាគារ ដោយទទូចសុំឲ្យដោះលែងម្ដាយរបស់ពួកគេមកវិញ៖ «ខ្ញុំបានរស់នៅមានសុភមង្គលជាមួយគ្រួសារ ប៉ុន្តែដោយសារតែមានការអភិវឌ្ឍធ្វើឲ្យខ្ញុំបាត់ម្ដាយ»។
ក្រុមអង្គការមិនមែនរដ្ឋាភិបាល ដែលឃ្លាំមើលការតវ៉ា កាលពីព្រឹកថ្ងៃទី១៤ ធ្នូ ចាត់ទុកថា អ្នកដែលត្រូវចាប់ខ្លួនទាំងនេះ គប្បីដោះលែងឲ្យមានសេរីភាព។ ការចាប់ខ្លួនគឺពុំមានភស្តុតាងដាក់បន្ទុកដែលឈានរហូតមានអំណាចសាលក្រមពីតុលាការដូច្នេះឡើយ។
លោក អំ សំអាត មន្ត្រីជាន់ខ្ពស់អង្គការលីកាដូ (Licadho) យល់ឃើញថា អ្នកដែលបានចាប់ខ្លួនពាក់ព័ន្ធការចោទប្រកាន់របស់តុលាការនេះ គឺពួកគេសុទ្ធតែជាកូនអុក និងជាគ្រាប់ឡុកឡាក់របស់អ្នកនយោបាយ ដើម្បីសម្រេចគោលដៅអ្វីមួយ។ លោក អំ សំអាត អំពាវនាវសូមឲ្យអ្នកនយោបាយឈប់ប្រើប្រាស់ប្រជាពលរដ្ឋដើម្បីផលប្រយោជន៍នយោបាយតទៅទៀត៖ «ទទូចហើយទទូចទៀត សូមឲ្យគណបក្សទាំងពីរឈប់យកប្រជាពលរដ្ឋ ឈប់យកសកម្មជនដីធ្លី ឈប់យកសកម្មជនរបស់គណបក្ស ឈប់យកព្រះសង្ឃធ្វើជាឧបករណ៍ ឬជាចំណាប់ខ្មាំង»។
ទោះជាយ៉ាងណា ការតវ៉ាក្នុងសប្ដាហ៍ទីបួននេះ អ្នកចូលរួមមានចំនួនកើនឡើង បើប្រៀបកាលបីសប្ដាហ៍កន្លងទៅ។ លើកនេះ មនុស្សប្រមាណ ៣០០នាក់ និងព្រះសង្ឃប្រហែល ២០អង្គផង បានចូលរួមលើកទឹកចិត្តឲ្យមានការដោះលែង ក្នុងនោះគឺមកពីសហគមន៍ដែលមានទំនាស់ដីធ្លី អង្គការ សមាគម សមាជិកនៃសមាគមគ្រូបង្រៀន សហជីព និងអ្នកតំណាងរាស្ត្រគណបក្សសង្គ្រោះជាតិផង។
ដោយឡែក លោក ណៃ វ៉ង់ដា មន្ត្រីឃ្លាំមើលសិទ្ធិមនុស្សនៃសមាគមអាដហុក (Adhoc) វិញ ថ្លែងថា បើដំណោះស្រាយតាមមធ្យោបាយតវ៉ាដោយអហិង្សានេះ នៅតែមិនអាចទៅរួចទៀត គឺនៅមានចលនាតវ៉ាដោយសន្តិវិធីពីអង្គការ សមាគមមួយចំនួនបន្ថែមលើសកម្មភាពដែលមានស្រាប់នេះ។ លោកបន្តទៀតថា ស្ថាប័នមិនមែនរដ្ឋាភិបាលទាំងនោះ នឹងធ្វើយុទ្ធនាការប្រហាក់ប្រហែលគ្នាក្នុងពេលឆាប់ៗនេះដែរ ប្រឆាំងការឃុំខ្លួនទាំងនោះ៖ «នៅក្រុមអង្គការសង្គមស៊ីវិលមួយក្រុមទៀត កំពុងតែរៀបចំក្បួន។ ខ្ញុំគិតថា យ៉ាងហោចណាស់ថ្ងៃ ២០ ជាងដែរនឹងអាចមានសកម្មភាពគគ្រឹកគគ្រេងបន្ថែមទៀត»។
គិតត្រឹមថ្ងៃទី១៤ ខែ ធ្នូ សកម្មជនតស៊ូក្នុងរឿងដីធ្លីជាស្ត្រីចំនួន ៨នាក់ បានធ្វើកូដកម្មបង្អត់អាហារក្នុងពន្ធនាគារឈានចូលថ្ងៃទី៥ហើយ។ អ្នកទាំងនោះព្រមានថា នឹងធ្វើកូដកម្មបន្តទៀត ប្រឆាំងការឃុំខ្លួននេះ រហូតមានដំណោះស្រាយអាចចេញពីពន្ធនាគារវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។