សកម្មជនដីធ្លីនៅខេត្តកោះកុង សោកស្ដាយចំពោះសមត្ថកិច្ច ដែលឃាត់ខ្លួន ពួកគាត់ និងបង្ខំឱ្យធ្វើកិច្ចសន្យាមិនឱ្យចូលរួមតវ៉ាប្រឆាំងគម្រោងអភិវឌ្ឍន៍ ត្រីកោណ CLV របស់រដ្ឋាភិបាល ដែលកំពុងមានភាពចម្រូងចម្រាស ក្នុងពេល ពួកគាត់កំពុងដំណើរមកលេងកូនចៅនៅភ្នំពេញនៅថ្ងៃទី២៥ សីហា។មន្រ្តីសង្គមស៊ីវិលហៅវិធានការនេះ ថាមិនស្របតាមគោលការណ៍ច្បាប់ និងធ្វើឱ្យប៉ះពាល់ដល់សេរីភាព និងផលប្រយោជន៍របស់ពលរដ្ឋ។
ពលរដ្ឋដែលសកម្មរឿងយុត្តិធម៌សង្គម និងតែងតែលះបង់ពេលវេលានិងសេចក្តីសុខផ្ទាល់ខ្លួន ដើម្បីទាមទារដំណោះស្រាយបញ្ហាទំនាស់ដីធ្លីនៅខេត្តកោះកុង គឺលោកស្រី ផាវ ញើង ហៅវិធានការរបស់សមត្ថកិច្ច ដែលឃាត់ដំណើរលោកស្រី និងអ្នកផ្សេងទៀតជាច្រើនកន្លែង តាំងពីខេត្តកោះកុងដល់រាជធានីភ្នំពេញ និងឱ្យធ្វើកិច្ចសន្យា ថាជាទង្វើខុសច្បាប់ និងរំលោភសិទ្ធិសេរីភាពពលរដ្ឋ។
លោកស្រី ផាវ ញើង ប្រាប់វិទ្យុអាស៊ីសេរីនៅថ្ងៃទី ២៥ ខែសីហា ថា គ្រាន់តែ លោកស្រី ធ្វើដំណើរទៅលេងកូនចៅនៅភ្នំពេញ សមត្ថកិច្ចនៅឃុំអូជ្រៅ ស្រុកស្រែ អំបិល បានឃាត់រថយន្ត ដែលលោកស្រីជិះធ្វើដំណើរតាំងពីម៉ោង៨ព្រឹក រហូតដល់ម៉ោង១០ព្រឹក និងសួរនាំពីប្រវត្តិ និងការងាររបស់លោកស្រីយ៉ាងលម្អិតដូចអ្នកទោស។ លោកស្រីថា សមត្ថកិច្ចបានថតរូបលោកស្រីទុក និងឱ្យលោកស្រី ធ្វើកិច្ចសន្យាមួយហើយមួយទៀត ដោយផ្ដិតមេដៃរហូតដល់៥ដង រឿងមិនឱ្យ លោកស្រីពាក់ព័ន្ធនឹងបាតុកម្មប្រឆាំងគម្រោង CLV របស់រដ្ឋាភិបាល។
លោកស្រីយល់ថា ទង្វើបែបនេះរបស់អាជ្ញាធរប្រៀបដូចលោកស្រីរស់ក្នុងគុកឥត ជញ្ជាំង ដែលការឃាត់ខ្លួននោះធ្វើឱ្យលោកស្រី អត់បាយស្ទើរខ្យល់គរ។
លោកស្រី ផាវ ញើង៖ «ខ្ញុំអត់យល់ខ្ញុំជាមុខសញ្ញា ខ្ញុំជាមេចោរអន្តរជាតិមែន ខ្ញុំជាពិរុទ្ធជនមែន រឿងអីគេ ខ្ញុំអត់ដែលប្រព្រឹត្តិបទល្មើសសូម្បីតែស្លាព្រាបាយមួយមិនដែលយករបស់អ្នកណាគេ។ ដងទឹកសុទ្ធគេបោះចោល ខ្ញុំមិនដែលទៅយករបស់គេផង បើមិនមានការអនុញ្ញាតហើយមូលហេតុអ្វីបានជារឹតត្បិតសិទ្ធិសេរីភាពខ្ញុំគ្រាន់តែដើរហើរ រឿងអ៊ីចឹងៗ ខ្ញុំអត់យល់មែន។ បើសិនស្អែកខ្ញុំទៅខ្ញុំសៀមរាប ខ្ញុំនិយាយប្រាប់គាត់ត្រង់ បើសិនខ្ញុំនិយាយត្រង់ហើយ ស្អែកឃាត់ខ្លួនខ្ញុំនៅកន្លែងណាទៀត ខ្ញុំសុខចិត្តងាប់តែម្ដង ខ្ញុំនិយាយមែន វាអត់ត្រូវចង់និយាយថា វាអត់ត្រូវតែម្ដង។ លើកមុនអ៊ីចឹងដែរ ស្អែកឡើងនាំកូនៗខ្ញុំទៅដើរលេង ស្រាប់តែថ្ងៃហ្នឹង ចាប់ខ្លួនយកទៅដាក់ពន្ធនាគារបាត់ឆ្នាំទៅមិញ។ ឥឡូវខ្ញុំទៅដើរលេងទៀត»។
វិទ្យុអាស៊ីសេរីមិនអាចសុំការបំភ្លឺបញ្ហានេះ ពីអភិបាលខេត្តកោះកុង អ្នកស្រី មិថុនា ភូថង បានទេនៅថ្ងៃទី ២៥ ខែសីហា ដោយទូរសព្ទចូលតែគ្មានអ្នកទទួល។
លោកស្រីផាវ ញើង បញ្ជាក់ថាលោកស្រីឈឺចិត្ត ដែលសមត្ថកិច្ច គំរាមលោកស្រីឱ្យទទួលខុសត្រូវនៅចំពោះមុខច្បាប់ បើលោកស្រីធ្វើបាតុកម្មរឿងគម្រោងCLV។
លោកស្រី ផាវ ញើង៖ «គម្រោងCLVជាគម្រោងរបស់CLVបើខ្ញុំបាតុកម្មរឿងហ្នឹង ក៏អត់ខុសច្បាប់អីដែរ ប៉ុន្តែខ្ញុំអត់បានមកទេ ខ្ញុំអត់បានគិតគួររឿងអស់ហ្នឹងទេ។ ហេតុអីបានៗសួរនាំខ្ញុំអ៊ីចឹង។ ខ្ញុំឈឺចាប់ណាស់ខ្ញុំចេញពីកន្លែងប៉ូលីសមក ខ្ញុំស្រក់ទឹកភ្នែក ខ្ញុំទប់ភ្នែកខ្ញុំដែរ ខ្ញុំមិនចង់ស្រក់នៅចំពោះមុខពួកគាត់ទេ»។
លោកស្រីផាវ ញើង សម្ដែងការខកចិត្តយ៉ាងខ្លាំង ដែលរស់នៅក្រោមការដឹកនាំសង្គមបែបសព្វថ្ងៃ ដែលសមត្ថកិច្ចធ្វើតាមតែគោលការណ៍របស់មេដឹកនាំ មិនធ្វើ តាមគោលការណ៍ច្បាប់។
លោកស្រី ផាវ ញើង៖ «ខ្ញុំកើតនៅក្នុងសង្គមនេះ ខ្ញុំសោកស្ដាយមែនទែន ដែលមនុស្សអត់មានប្រព្រឹត្តបទល្មើសអី មនុស្សចេះគោរពច្បាប់ មនុស្សយល់ពីស្ថានភាពច្បាស់លាស់បែរទៅជាធ្វើទុក្ខបុកម្នេញ អានៅផ្ទះយាមៗនោះយាម អាតេឆាតរកតាមWhatAppតាមតេឡេក្រាមក៏ឆាត ក៏សួរអាចចាប់ខ្លួន»។
ជុំវិញរឿងនេះ អនុប្រធានផ្នែកសិទ្ធិមនុស្សដីធ្លី ធនធានធម្មជាតិ នៃសមាគមការពារ សិទ្ធិមនុស្សអាដហុកលោក យិន ម៉េងលី ប្រាប់វិទ្យុអាស៊ីសេរីនៅថ្ងៃទី២៥ ខែសីហា ថា ការឃាត់មនុស្សហើយ ទើបទៅរកបទល្មើសទម្លាក់ឱ្យមនុស្សវិញ គឺជាអំពើ ខុសច្បាប់។ លោកពន្យល់ថា កាលណាមានបទល្មើស ទើបអាចឃាត់រថយន្តបាន គឺមិនអាចលោកស្រី ផាវ ញើង ជិះរថយន្តសុខៗក៏ស្រាប់តែទៅឃាត់រថយន្តនោះទេ។
លោក យិន ម៉េងលី ៖«ពាក់ព័ន្ធនឹងផ្ដិតមេដៃហ្នឹង សុខៗយើងដើរចាប់គេ ហៅគេផ្ដិតមេដៃៗៗហ្នឹង ផ្ដិតមេដៃធ្វើកិច្ចសន្យាហ្នឹង កិច្ចសន្យានឹងយើងដឹងហើយ ទាល់កិច្ចសន្យាចេញពីឆន្ទៈរបស់ភាគីម្ខាងទៀត តែបើកិច្ចសន្យាធ្វើឡើងដោយការបង្ខំ កិច្ចសន្យាធ្វើឡើងដោយការគំរាម កិច្ចសន្យាដែលធ្វើឡើងដោយខុសច្បាប់កិច្ចសន្យានឹងអត់អាចអនុវត្តបានទេតាមគោលការណ៍ច្បាប់»។
ដើម្បីទប់ស្កាត់ចលនាពលរដ្ឋមិនឱ្យចូលរួមធ្វើបាតុកម្មនៅរាជធានីភ្នំពេញ ប្រឆាំងនឹងគម្រោងត្រីកោណអភិវឌ្ឍន៍ CLV របស់រដ្ឋាភិបាល ក្រៅតែពីប្រកាសបង្រ្កាបនិងបញ្ចេញកងកម្លាំងព្រោងព្រាតគំរាមកំហែងពលរដ្ឋ អាជ្ញាធរពីថ្នាក់ភូមិរហូត ដល់ថ្នាក់រាជធានី-ខេត្ត បណ្តាក់គ្នាធ្វើការពិនិត្យតាមដានទៅលើសកម្មភាព និងការធ្វើដំណើររបស់ពលរដ្ឋ។ សមត្ថកិច្ចបានដាក់របាំងឆែកឆេរនៅតាមផ្លូវជាតិ និងបញ្ឈប់រថយន្ត ដើម្បីពិនិត្យមើលអ្នកជិះ ដែលសកម្មភាពទាំងនេះ ត្រូវបានរងការរិះគន់ថាជាការគំរាមកំហែង និងរំខានដល់ការរស់នៅរបស់ពលរដ្ឋ។
លោក យិន ម៉េងលី លើកឡើងថា ការអនុវត្តច្បាប់ត្រូវធានានូវការគោរពសម្រាប់ ទាំងអស់គ្នា ទាំងសមត្ថកិច្ច និងប្រជាពលរដ្ឋ បើមិនដូច្នេះទេ វានឹងធ្វើឱ្យប៉ះពាល់ ដល់សេរីភាព និងផលប្រយោជន៍របស់ប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។