មជ្ឈមណ្ឌលសិទ្ធិមនុស្សកម្ពុជា (CCHR) អះអាងថា សេរីភាពបញ្ចេញមតិ និងសិទ្ធិទទួលបានព័ត៌មាន បានរងការរឹតត្បិតកាន់តែខ្លាំងឡើងៗ ចាប់តាំងពីមុនពេលបោះឆ្នោតថ្នាក់ជាតិកាលពីខែកក្កដា កន្លងទៅ។ ការអះអាងនេះ ធ្វើឡើងក្នុងរបាយការណ៍ស្ដីពី ស្ថានភាពនៃសេរីភាពបញ្ចេញមតិ សេរីភាពសារព័ត៌មាន និងសិទ្ធិទទួលបានព័ត៌មាននៅកម្ពុជា ចេញផ្សាយកាលពីថ្ងៃទី២២ វិច្ឆិកា។
ដោយបានចងក្រងពីព្រឹត្តិការណ៍គំរាមកំហែងស្ថាប័នសារព័ត៌មាន អ្នកសារព័ត៌មាន ព្រមទាំងបានធ្វើករណីសិក្សាជាច្រើនករណីជាមួយក្រុមសកម្មជនសិទ្ធិមនុស្សផងនោះ របាយការណ៍កម្រាស់៦៦ទំព័រ បង្ហាញថា យ៉ាងហោចណាស់សកម្មជនសិទ្ធិមនុស្សប្រមាណ១០០នាក់ និងអ្នកសារព័ត៌មានចំនួន១៦នាក់ បានរងការបំភិតបំភ័យ ដោយសារតែរដ្ឋាភិបាលប្រើប្រាស់យន្តការតុលាការ គំរាមកំហែងអ្នកដែលហ៊ានបញ្ចេញមតិរិះគន់រដ្ឋាភិបាល។ ជាមួយគ្នានេះរបាយការណ៍បានសង្កត់ធ្ងន់ថា ការដកហូតអាជ្ញាប័ណ្ណសារព័ត៌មានចំនួន៥ ដែលរួមទាំងការដកអាជ្ញាប័ណ្ណ វិទ្យុសំឡេងប្រជាធិបតេយ្យ (VOD) និងការរាំងខ្ទប់គេហទំព័រសារព័ត៌មានឯករាជ្យ នៅមុនការបោះឆ្នោតថ្នាក់ជាតិ គឺជាការអនុវត្តផ្ទុយទៅនឹងសេចក្ដីប្រកាសជាសកលស្ដីអំពីសិទ្ធិមនុស្ស។
អ្នកសម្របសម្រួលគម្រោងគាំពារប្រព័ន្ធផ្សព្វផ្សាយឯករាជ្យ និងសេរីភាពមូលដ្ឋាននៅកម្ពុជា នៃមជ្ឈមណ្ឌលសិទ្ធិមនុស្សកម្ពុជា លោក ហួន ផន ប្រាប់វិទ្យុអាស៊ីសេរីថា គោលបំណងក្នុងការផ្សព្វផ្សាយរបាយការណ៍សេរីភាពបញ្ចេញមតិ និងសិទ្ធិទទួលបានព័ត៌មាននេះ គឺដើម្បីស្នើឱ្យរដ្ឋាភិបាលបញ្ឈប់ជាបន្ទាន់នូវការគំរាមកំហែងទៅលើសិទ្ធិសេរីភាពទាំងនេះ។ លោកបន្តថា ក្រៅពីរកឃើញករណីរំលោភសិទ្ធិសេរីភាពបញ្ចេញមតិហើយនោះ CCHR ក៏បានរកឃើញថា អ្នកសារព័ត៌មានជាស្ត្រីក៏បានរងការបៀតបៀនផ្លូវភេទ ពីសំណាក់អាជ្ញាធរផងដែរ។
លោក ហួន ផន៖ «ខ្ញុំគិតថា អនុសាសន៍ដែលមានក្នុងរបាយការណ៍មជ្ឈមណ្ឌលសិទ្ធិមនុស្សកម្ពុជា គឺជាផ្នែកមួយនៃធាតុចូលទៅដល់រដ្ឋាភិបាលដើម្បីលើកយកទៅពិចារណាក្នុងការកែលម្អអ្វីដែលជាបញ្ហា អនុវត្តមិនបានគ្រប់ជ្រុងជ្រោយ មិនបានល្អកន្លងមក ដើម្បីឱ្យការគោរពសិទ្ធិមនុស្សជាពិសេសសេរីភាពបញ្ចេញមតិ សេរីភាពសារព័ត៌មាន ជាងអ្វីដែលកំពុងមានសព្វថ្ងៃនេះ»។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា ដើម្បីសុំការបកស្រាយជុំវិញរឿងនេះបាននៅឡើយទេនៅថ្ងៃទី២៣ ខែវិច្ឆិកា។
ជុំវិញរឿងនេះ នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី ប្រាប់វិទ្យុអាស៊ីសេរីនៅថ្ងៃទី២៣ ខែវិច្ឆិកា ថា អ្នកសារព័ត៌មាននៅតែប្រឈមនឹងការគំរាមកំហែងពីសំណាក់អាជ្ញាធរ នៅពេលពួកគេចុះយកព័ត៌មានទាក់ទងនឹងបញ្ហារំលោភសិទ្ធិមនុស្ស និងរំលោភដីធ្លីជាដើម។
លោក ណុប វី៖ «មានច្បាប់មួយចំនួនដែលកំពុងធ្វើឱ្យមានផលប៉ះពាល់ជាច្រើនដល់សេរីភាពបញ្ចេញមតិ សេរីភាពសារព័ត៌មាន ហើយនិងសិទ្ធិទទួលបានព័ត៌មានហ្នឹង ឧទាហរណ៍ដូចជាការប្រើប្រាស់ក្រមព្រហ្មទណ្ឌយកមកធ្វើការចោទប្រកាន់ទៅលើអ្នកបញ្ចេញមតិ ឬអ្នកសារព័ត៌មានហើយនិងចំណុចខ្សោយនៃច្បាប់មួយចំនួនដែលកំពុងកើតមានឡើងនៅក្នុងប្រទេសយើងដូចជាច្បាប់ស្ដីពីរបបសារព័ត៌មានហ្នឹង មិនមានឥទ្ធិពលគ្រប់គ្រាន់ដែលធ្វើឱ្យប្រសើរឡើងក្នុងការទទួលបានព័ត៌មាន និងការផ្សព្វផ្សាយព័ត៌មាននោះទេ នេះគឺជាឧទាហរណ៍ជាក់លាក់ ហើយការធ្វើឱ្យល្អប្រសើរហ្នឹង លុះត្រាតែច្បាប់ទាំងនោះត្រូវធ្វើវិសោធនកម្មឡើងវិញ»។
ដោយឡែកតាមរយៈការសម្ភាសន៍ជាមួយអ្នកសារព័ត៌មានវិញ របាយការណ៍បានរកឃើញថា ដោយសារតែខ្លាចរងការចោទប្រកាន់ពីតុលាការ អ្នកជំនាញផ្នែកប្រព័ន្ធផ្សព្វផ្សាយជាច្រើនបានដាក់កំហិតខ្លួនឯង ដោយមិនហ៊ានផ្សាយព័ត៌មានរសើបដូចជាអំពើពុករលួយ បញ្ហាដីធ្លី រឿងនយោបាយ ដែលអាចប៉ះពាល់អ្នកមានឥទ្ធិពល និងមន្ត្រីរដ្ឋាភិបាលនោះឡើយ។ ជាមួយគ្នានេះ អ្នកសារព័ត៌មានឯករាជ្យមួយចំនួនក៏បានលើកឡើងក្នុងរបាយការណ៍ថា ពួកគេតែងរងការគំរាមកំហែង និងរងការរើសអើងពីមន្ត្រីសាធារណៈ មិនផ្ដល់បទសម្ភាសន៍ទៅដល់ពួកគេផងដែរ។
ក្រៅពីស្នើឱ្យរដ្ឋាភិបាលលុបចោលអនុក្រឹត្យច្រកទ្វារអ៊ីនធឺណិតជាតិ ដែលត្រូវបានគេមើលឃើញថា គឺជាការគំរាមកំហែងដល់ការអនុវត្តសេរីភាពមូលដ្ឋានតាមអ៊ីនធឺណិត និងសេរីភាពបញ្ចេញមតិហើយនោះ របាយការណ៍ក៏បានផ្ដល់អនុសាសន៍ចំនួន១១ចំណុចផ្សេងទៀតទៅកាន់រដ្ឋាភិបាល ដើម្បីលើកកម្ពស់សេរីភាពបញ្ចេញមតិ សេរីភាពសារព័ត៌មាន និងសិទ្ធិទទួលបានព័ត៌មានឱ្យស្របទៅតាមរដ្ឋធម្មនុញ្ញ និងសិទ្ធិមនុស្សអន្តរជាតិផងដែរ។ អនុសាសន៍ទាំងនោះរួមមាន ការពន្លឿនអនុម័តច្បាប់ស្ដីពីសិទ្ធិទទួលបានព័ត៌មាន ការលុបចោលច្បាប់ស្ដីពីវិសោធនកម្មការបោះឆ្នោត និងស្នើឱ្យដោះលែងអ្នកសារព័ត៌មាន និងសកម្មជនសិទ្ធិមនុស្សដែលកំពុងជាប់ពន្ធនាគារដោយសារតែការអនុវត្តសិទ្ធិសេរីភាពបញ្ចេញមតិរបស់ពួកគេជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។