បណ្ដាញអង្គការអន្តរជាតិឃ្លាំមើលសិទ្ធិពលរដ្ឋ CIVICUS នៅថ្ងៃទី១៣ ខែសីហា បានចេញផ្សាយរបាយការណ៍មួយស្ដីពីការឃ្លាំមើលសិទ្ធិសេរីភាពពលរដ្ឋ ដោយបញ្ជាក់ថា រដ្ឋាភិបាលកម្ពុជានៅតែបន្តរំលោភបំពានសិទ្ធិមូលដ្ឋានពលរដ្ឋខ្លួន។
អង្គការនេះសំអាងករណីថ្មីៗនៃការធ្វើទុក្ខបុកម្នេញសកម្មជន នៃរដ្ឋាភិបាលក្រោមការដឹកនាំរបស់ លោក ហ៊ុន ម៉ាណែត។
អង្គការនេះបានដាក់ចំណងជើងរបាយការណ៍របស់ខ្លួនថា កម្ពុជា៖ សកម្មជនបរិស្ថាន សកម្មជនសិទ្ធិការងារ សិទ្ធិដីធ្លី ជាគោលដៅបង្ក្រាបរបស់រដ្ឋាភិបាល។
អង្គការនេះបញ្ជាក់ថា ស្ថានភាពលម្ហសិទ្ធិសេរីភាពពលរដ្ឋនៅកម្ពុជា ត្រូវចាត់ថ្នាក់ថា រងការគៀបសង្កត់ ក្នុងនោះច្បាប់ត្រូវគេប្រើជាអាវុធក្នុងការរំលោភបំពានសិទ្ធិ និងដាក់ទោសព្រហ្មទណ្ឌលើសកម្មជនអ្នកការពារសិទ្ធិមនុស្ស សហជីពកម្មករ យុវជនសកម្មការងារសង្គម អ្នកសារព័ត៌មាន និងអ្នកនយោបាយ ដែលមិនស្របនឹងរដ្ឋាភិបាល។
CIVICUS បានលើកមកបង្ហាញអំពីចំណាត់ការរបស់អាជ្ញាធររដ្ឋាភិបាលទៅលើសកម្មជនទាំងនេះ ជាច្រើនករណី ដែលមានជាអាទិ៍៖ ការចាប់ខ្លួនប្រធានសហជីពរោងចក្រ Wing star shoes លោក ជា ចាន់ ប្រធានសហជីពវិស័យទេសចរណ៍ លោក ម៉ម រិទ្ធី ប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ ការម្រេចដាក់ទោសមេសហជីពណាហ្គាវើលដ៍ កញ្ញា ឈឹម ស៊ីថរ របស់តុលាការកំពូល ការចាប់ខ្លួនតំណាងអ្នករកស៊ីសេដ្ឋកិច្ចក្រៅប្រព័ន្ធ លោក ជា ចាន់ថា ការផ្តន្ទាទោសក្រុមយុវជនចលនាមាតាធម្មជាតិ និងចាប់ខ្លួនពួកគេចំនួន ៥នាក់ ដាក់ពន្ធនាគារ ដោយដាក់ឃុំនៅទីតាំងដាច់ស្រយាលពីគ្រួសារ ការចាប់ខ្លួនប្រធានគណបក្សកម្លាំងជាតិ លោក ស៊ុន ចន្ធី ការចាប់ខ្លួនសកម្មជនបក្សប្រឆាំងជាច្រើននាក់ទៀត ពីបទចោទគ្មានមូលដ្ឋានច្បាប់ច្បាស់លាស់ ការសម្រេចទារសំណង ១លាន ៥សែនដុល្លារ ពីប្រធានគណបក្សភ្លើងទៀន លោក ទាវ វណ្ណុល ការលួចវាយ លោក សាន ប៊ុនឆាយ ឱ្យរបួស និងបណ្ដឹងប្រឆាំងអ្នកការពារសិទ្ធិមនុស្ស លោក ស៊ឹង សែនករុណា ជាដើម។ របាយការណ៍ដដែលនេះក៏បានលើកឡើងករណី ដែលអាជ្ញាធររដ្ឋាភិបាលធ្វើទុក្ខបុកម្នេញ អ្នកសារព័ត៌មាន និងអង្គការសង្គមស៊ីវិល មានអង្គការសង់ត្រាល់ ផងដែរ។
CIVICUS បានរំលេចដែរថា ក្រុមអ្នកជំនាញ និងអ្នករាយការណ៍ពិសេសអង្គការសហប្រជាជាតិស្ដីពីសិទ្ធិមនុស្សនៅកម្ពុជា បានអំពាវនាវជាបន្តបន្ទាប់ ឱ្យរដ្ឋាភិបាលកម្ពុជាឈប់ធ្វើទុក្ខបុកម្នេញ និងចោទប្រកាន់តាមផ្លូវតុលាការទៅលើអ្នកការពារសិទ្ធិមនុស្ស និងសកម្មជនសង្គម ព្រមទាំងបើកឱ្យពួកគេអាចអនុវត្តសិទ្ធិពលរដ្ឋ និងនយោបាយបានដោយសេរី។
បន្ថែមពីនេះ នៅក្នុងកិច្ចប្រជុំពិនិត្យកាលកំណត់ UPR លើកទី៤៦ របស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិកាលពីខែមេសាប្រទេសជាបណ្ដាសមាជិកអង្គការសហប្រជាជាតិបានផ្ដល់អនុសាសន៍ជាច្រើនក្នុងនោះរួមមាន៖ ជំរុញឱ្យរដ្ឋាភិបាលបង្កើតស្ថាប័នសិទ្ធិមនុស្សជាតិ ដែលឯករាជ្យ បញ្ឈប់រាល់ការធ្វើទុក្ខបុកម្នេញ ការចាប់ឃុំខ្លួនមនុស្សតាមទំនើងចិត្ត និងដោះលែងអ្នកកំពុងជាប់ឃុំ។
វិទ្យុអាស៊ីសេរីនៅមិនទាន់អាចសុំការឆ្លើយតបរឿងនេះពីអ្នកនាំពាក្យរដ្ឋាភិបាល លោក ប៉ែន បូណា បានទេនៅយប់ថ្ងៃទី១៣ ខែសីហា។
យ៉ាងណាទាក់ទងនឹងវិធានការអាជ្ញាធររដ្ឋាភិបាលទៅលើក្រុមអ្នកការពារសិទ្ធិមនុស្ស សកម្មជនបរិស្ថាន ដីធ្លី សហជីព អ្នកនយោបាយ និងអ្នកសារព័ត៌មាននេះ ត្រូវនាយករដ្ឋមន្ត្រី ហ៊ុន ម៉ាណែត អះអាងជាការចាត់វិធានការផ្លូវច្បាប់ជាពិសេស ដើម្បីការពារសន្តិភាព។ លោកអះអាងថា មិនខ្លាចនឹងជាប់ឈ្មោះជាមេដឹកនាំផ្ដាច់ការទៀតផង។
លោក ហ៊ុន ម៉ាណែត៖ «គេតែងតែថា នេះជាការផ្ដាច់ការ។ បើសិនជាការប្ដេជ្ញាចិត្តថែរក្សាសន្តិភាព និងស្ថិរភាពឱ្យប្រជាពលរដ្ឋ ហើយត្រូវបានគេចោទថា ផ្ដាច់ការ ខ្ញុំសុខចិត្តឱ្យគេហៅជាជាងឱ្យប្រជាជនចោទខ្ញុំអសមត្ថភាពឱ្យសង្គ្រាមកើតឡើង។ នេះជាការពិត។ បើហៅខ្ញុំថាផ្ដាច់ការ ដោយសារប្ដេជ្ញាចិត្តការពារសន្តិភាពមិនឱ្យប្រជាពលរដ្ឋស្លាប់ មិនឱ្យប្រទេសដើរថយក្រោយ ដូចពេលដែលយើងបាត់សន្តិភាពកាលពីមុននោះខ្ញុំសុខចិត្តទទួល»។
បើទោះជាយ៉ាងណា អង្គការសិទ្ធិមនុស្សអន្តរជាតិនៅទទូចឱ្យរដ្ឋាភិបាលដើរតាមគន្លងប្រជាធិបតេយ្យពិតប្រាកដ និងអនុលោមតាមច្បាប់សិទ្ធិមនុស្សអន្តរជាតិជាគោល។ ក្រៅពីនេះអង្គការនេះក៏បានទាមទារឱ្យរដ្ឋាភិបាលកែប្រែច្បាប់ដែលរឹតត្បិតសេរីភាពបញ្ចេញមតិ ការបញ្ចេញទស្សនៈយោបល់ បើកឱ្យស្ថាប័នព័ត៌មានឯករាជ្យមានដំណើរការឡើងវិញ លុបចោលមាត្រា ដែលកំណត់ទោសព្រហ្មទណ្ឌចំពោះបទបរិហារកេរ្តិ៍ ព្រមទាំងធ្វើវិសោធនកម្មច្បាប់ស្ដីគណបក្សនយោបាយ និងច្បាប់ស្ដីពីការគ្រប់គ្រងសមាគម និងអង្គការមិនមែនរដ្ឋាភិបាល ឱ្យស្របនឹងច្បាប់សិទ្ធិមនុស្សអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។