អង្គការសង្គមស៊ីវិល ហៅការសារភាពកំហុស និងការចង់ចូលរួមជីវភាព នយោបាយរបស់លោក នី ណាក់ ថា ជាសិទ្ធិសម្រេចរបស់បុគ្គលម្នាក់ៗ។
ការលើកឡើងនេះ ធ្វើឡើងបន្ទាប់ពីប្រពន្ធរបស់លោក នី ណាក់ នៅថ្ងៃនេះ និយាយថា ប្ដីរបស់គាត់បានទទួលស្គាល់កំហុស និងស្នើសុំលោក ហ៊ុន សែន និងលោក ហ៊ុន ម៉ាណែត បើកឱកាស ដើម្បីបានសុំទោសនិងមានឱកាសចូលរួមជីវភាពនយោបាយជាមួយគណបក្សប្រជាជនកម្ពុជា។
សង្គមស៊ីវិល ដែលធ្វើការលើកកម្ពស់សិទ្ធិមនុស្សលើកឡើងថា អ្នកជំនាញកសិកម្ម ដែលកំពុងជាប់ឃុំលោក នី ណាក់ ដែលប្រពន្ធរបស់លោក អះអាងថា បានសារភាពកំហុស និងចង់ចូលរួមជីវភាពនយោបាយជាមួយរដ្ឋាភិបាល គឺជាសិទ្ធិសម្រេចរបស់បុគ្គលម្នាក់ៗ កុំឱ្យតែមានការដាក់សម្ពាធ ឬបង្ខំណាមួយ។
លោកស្រី សុខ ស៊ីណែត ប្រពន្ធរបស់លោក នី ណាក់ នៅថ្ងៃទី៨ មករា បានចេញវីដេអូឃ្លីបជាង ១នាទី លើបណ្ដាញសង្គមហ្វេសប៊ុកឈ្មោះ នី ណាក់ (Nak Ny) បន្ទាប់បានទៅសួរសុខទុក្ខប្ដីនៅពន្ធនាគារនៅថ្ងៃនេះ។
លោកស្រី រៀបរាប់ថា ប្ដីរបស់លោកស្រី មានការសោកស្ដាយ និងដឹងនូវកំហុសរបស់ខ្លួន ដោយការផុសក្នុងបណ្ដាញសង្គមហ្វេសប៊ុកកាលពីកន្លងទៅ ដោយសារខ្លួន យកព័ត៌មានពីសារព័ត៌មានក្រៅស្រុក ដោយគ្មានមូលដ្ឋានច្បាស់លាស់ និងមិនបាន ស្រាវជាវជាមុន។
លោកស្រីស្នើសុំលោក ហ៊ុន សែន និងលោក ហ៊ុន ម៉ាណែត ជួយអន្តរាគមន៍ និងបើកផ្លូវឱ្យប្ដីរបស់ខ្លួនសុំទោស ដើម្បីមានឱកាសចូលរួមជីវភាពនយោបាយជាមួយរដ្ឋាភិបាល។
លោកស្រី សុខ ស៊ីណែត៖ «គាត់ពិតជាមានការសោកស្ដាយ និងដឹងនូវកំហុស នាងខ្ញុំសូមឱ្យសម្ដេចពុក និងសម្ដេចបវរធិបតី ហ៊ុន ម៉ាណែត ជួយឱ្យប្ដីនាងខ្ញុំបានចេញសារសុំទោស ហើយនឹងជួយឱ្យប្ដីនាងខ្ញុំមានសេរីភាពឡើងវិញ ដើម្បីចូលរួមជីវភាពនយោបាយជារាជរដ្ឋាភិបាលផ្នែកកសិកម្មផង»។
វិទ្យុអាស៊ីសេរីមិនអាចសុំការបញ្ជាក់បន្ថែមពីប្រពន្ធរបស់លោក នី ណាក់ គឺលោកស្រី សុខ ស៊ីណែត បានទេ នៅថ្ងៃទី ៨ មករា ។
លោក នី ណាក់ ត្រូវសាលាដំបូងរាជធានីភ្នំពេញឃុំខ្លួននៅពន្ធនាគារព្រៃស កាលពីថ្ងៃទី៦ ខែមករា បន្ទាប់ពីសមត្ថកិច្ចឃាត់ខ្លួន កាលពីថ្ងៃទី៥ មករា។
តុលាការឃុំខ្លួននេះ ក្រោមបទចោទថា មិនរាងចាលក្នុងបទមជ្ឈិម បន្ទាប់ពីការផ្ដន្ទាទោសបទមជ្ឈិមបរិហារកេរ្តិ៍ជាសាធារណៈ និងញុះញង់ឱ្យមានការរើសអើង។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត ប្រាប់វិទ្យុអាស៊ីសេរី នៅថ្ងៃទី៨ មករាថា ការសារកំហុស ការសុំទោស និងការចូលរួមជីវភាពនយោបាយនេះ គឺជាសិទ្ធិសេរីភាពរបស់បុគ្គលម្នាក់ៗ បើសិនជាការសម្រេចនោះដោយស្ម័គ្រចិត្ត កុំឱ្យតែមានសម្ពាធ ឬចាប់បង្ខំណាមួយ។
លោកស្នើឱ្យអាជ្ញាធរ និងតុលាការពិនិត្យពិចារណាឱ្យបានដិតដល់ថា អ្វីជាសេរីភាពបញ្ចេញមតិ អ្វីជាបទល្មើស ពីព្រោះដូចករណីលោក នី ណាក់ កន្លងមក ជាសកម្មជនសង្គមមួយរូប ដែលបញ្ចេញមតិយ៉ាងសកម្ម ទាក់ទងនឹងវិស័យកសិកម្ម និងបញ្ហាសង្គមផ្សេងៗ រហូតដល់ជាប់ពន្ធនាគារ ហើយពេលចេញវិញ ក៏លោកនៅតែបន្តបញ្ចេញមតិដដែល រហូតឈានដល់ជនមិនស្គាល់មុខលួចវាយឱ្យរងរបួសធ្ងន់ ថែមទៀត។
លោក អំ សំអាត បន្ថែមថា កន្លងមក រឿងបញ្ចេញមតិនេះ មានការបកស្រាយចម្រូងចម្រាស ប៉ុន្តែអ្វីដែលអ្នកជំនាញសិទ្ធិមនុស្សអង្គការជាតិ និងអន្តរជាតិលើកឡើង គឺពឹងផ្អែកលើបទដ្ឋានអន្តរជាតិ។ ដូច្នេះ លោកថា ប្រសិនជាគ្មានការថ្លឹងថ្លែងឱ្យបានច្បាស់ទេ គឺនឹងប៉ះពាល់ដល់សិទ្ធិសេរីភាពនៅក្នុងបញ្ចេញមតិ។
លោក អំ សំអាត៖ «អ៊ីចឹងយើងមើលឃើញថា សកម្មភាពទាំងអស់ហ្នឹង ទិដ្ឋភាពទាំងអស់ វាធ្វើឱ្យជះឥទ្ធិពលមិនល្អ ជាការបំភិតបំភ័យជាការគំរាមកំហែងសម្រាប់អ្នកបញ្ចេញមតិ ព្រោះអ្នកដែលលួចវាយគាត់ មិនត្រូវបានរកឃើញ ហើយយកទៅអនុវត្តតាមផ្លូវច្បាប់។ ចុងក្រោយនេះ គាត់មានការបញ្ចេញមតិតាមបណ្ដាញសង្គម ហើយត្រូវបានចាប់ និងចោទប្រកាន់ទៅទៀត»។
ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា (CHRAC) លោក រស់ សុដ្ឋា មានប្រសាសន៍ថា បើតាមច្បាប់អន្តរជាតិការលើកឡើងរបស់លោក នី ណាក់ លើបណ្ដាញសង្គម គឺជាការបញ្ចេញមតិ។
លោក រស់ សុដ្ឋា៖ «សម្ពាធដែលយើងមើលឃើញ សម្ពាធទី១ គឺសម្ពាធរងទុក្ខវេទនាផ្លូវកាយ ដែលមិនទាន់ទទួលបាន យុត្តិធម៌ សម្ពាធទី ២ គឺជាសម្ពាធដែលគាត់ត្រូវជាប់ពន្ធនាគារ ពីបទបរិហាកេរ្តិ៍ ហ្នឹងទៀត»។
កាលពីខែកញ្ញា ឆ្នាំ២០២៣ ជនមិនស្គាល់មុខមួយក្រុមមានគ្នាប្រមាណ ៨នាក់ បានជិះម៉ូតូបុកម៉ូតូលោក នី ណាក់ ឱ្យដួល និងចុះព្រួតគ្នាវាយលោកឱ្យបែកក្បាលរបួសធ្ងន់ នៅពេលលោក និងប្រពន្ធរបស់លោកកំពុងធ្វើដំណើរតាមផ្លូវ។ មកទល់នឹងពេលនេះ អាជ្ញាធរនៅមិនទាន់ចាប់ខ្លួនជនបង្កមកផ្ដន្ទាទោសបាននៅឡើយទេ។
លោក នី ណាក់ ក៏ធ្លាប់ត្រូវបានអតីតរដ្ឋមន្ត្រីក្រសួងកសិកម្ម លោក វ៉េង សាខុន ប្ដឹងពីបទញុះញង់ ដាក់ពន្ធនាគារ ១៨ខែ កាលពីពេលកន្លងទៅ រឿងលោកសរសេររិះគន់យុទ្ធនាការរបស់ក្រសួងកសិកម្ម និងឌឺដងរឿងទិញម៉ាស់ពាក់ឱ្យកូនមាន់ក្នុងគ្រាមានអាសន្ន ខណៈកម្ពុជា និងពិភពលោក ផ្ទុះជំងឺកូវីដ១៩ កាលពីចុងឆ្នាំ២០១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។