សកម្មជនបក្សសង្គ្រោះជាតិដែលកំពុងភៀសខ្លួននៅប្រទេសម៉ាឡេស៊ី ព្រួយបារម្ភពីសុវត្ថិភាព ក្រោយពួកគេទទួលរងការគំរាមកំហែងជាបន្តបន្ទាប់ពីសំណាក់មន្ត្រីរដ្ឋាភិបាលលោក ហ៊ុន សែន។ ពួកគេយល់ថា ទង្វើបែបនេះ គឺជាសញ្ញាគ្រោះថ្នាក់បន្ថែមទៀតដល់ជនភៀសខ្លួននយោបាយដែលកំពុងតស៊ូនៅក្រៅប្រទេស ដើម្បីយុត្តិធម៌ និងលទ្ធិប្រជាធិបតេយ្យនៅកម្ពុជា។ ប៉ុន្តែមន្ត្រីជាន់ខ្ពស់គណបក្សកាន់អំណាចចាត់ទុកអ្នកគាំទ្រសកម្មភាពគណបក្សសង្គ្រោះជាតិ គឺជាសកម្មភាពខុសច្បាប់ដែលរដ្ឋាភិបាលត្រូវចាត់វិធានការតាមដែលអាចធ្វើទៅបាន ហើយមិនខ្វល់ពួកគេទទួលឋានៈជាជនភៀសខ្លួនឡើយ។
សកម្មជនបក្សប្រឆាំងដែលកំពុងភៀសខ្លួននៅប្រទេសម៉ាឡេស៊ីកំពុងគេចពីការធ្វើទុក្ខបុកម្នេញ ដោយសារពួកព្រួយបារម្ភពីសុវត្ថិភាព ជាពិសេសប្រឈមនឹងការចាប់បញ្ជូនទៅកម្ពុជាវិញ។
សកម្មជនគណបក្សសង្គ្រោះជាតិដែលកំពុងភៀសខ្លួន នៅប្រទេសម៉ាឡេស៊ី បារម្ភអំពីសុវត្ថិភាព ក្រោយពេលលោក និងសកម្មជនផ្សេងទៀតទទួលបានការគំរាមកំហែងជាបន្តបន្ទាប់ពីសំណាក់មន្ត្រីស្ថានទូតខ្មែរ ដោយបញ្ជាឱ្យជនដៃដល់ ឬក្រុមជើងកាងស្វែងរកកន្លែងស្នាក់នៅរបស់សកម្មជនគណបក្សប្រឆាំង។ លោក សាដាត សាម៉ាតធី ប្រាប់វិទ្យុអាស៊ីសេរីថា សកម្មភាពនេះ គឺរដ្ឋាភិបាលលោក ហ៊ុន សែន កំពុងតាមកម្ទេចអ្នកប្រជាធិបតេយ្យនៅក្រៅប្រទេសដែលស្មោះត្រង់ និងបន្តគាំទ្រគណបក្សសង្គ្រោះជាតិ ដើម្បីទាមទារការគោរពសិទ្ធិមនុស្ស និងស្ដារលទ្ធិប្រជាធិបតេយ្យនៅកម្ពុជាឡើងវិញ។ សកម្មជនបក្សប្រឆាំងរូបនេះ អំពាវនាវឱ្យអង្គការសិទ្ធិមនុស្សអន្តរជាតិ និងឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួនប្រចាំប្រទេសម៉ាឡេស៊ី ជួយតាមដាន និងធានាអំពីសុវត្ថិភាពចំពោះជនភៀសខ្លួនផងដែរ៖ «គេកំពុងឱ្យដៃជើង ឬជើងកាងរបស់ស្ថានទូតឱ្យស្វែងរកទីតាំងដែលខ្ញុំស្នាក់នៅ សព្វថ្ងៃនេះខ្ញុំបានប្តូរទីកន្លែងដើម្បីសុវត្ថិភាព ខ្ញុំបារម្ភបំផុតចំពោះជនភៀសខ្លួននៅប្រទេសម៉ាឡេស៊ី ដោយសារពួកជនងងឹតនេះអាចរុញបញ្ចូលឡានដូចក្នុងប្រទេសថៃអ៊ីចឹង ហើយបញ្ជូនទៅតាមផ្លូវក្រោម ដូចរូបខ្ញុំផ្ទាល់ក៏មានដីកាហៅនៅខេត្តក្រចេះដែរ»។
ក្រុមសកម្មជនបក្សប្រឆាំងឱ្យដឹងទៀតថា កន្លងមកពួកគាត់តែងតែទទួលការគំរាមកំហែងពីសំណាក់មន្ត្រីគណបក្សប្រជាជនកម្ពុជា ដោយសារពួកគាត់បន្តគាំទ្រសកម្មភាពគណបក្សប្រឆាំង ដូចជាការការបង្ហោះសារជាបន្តបន្ទាប់ ដោយរិះគន់អំពើអយុត្តិធម៌ និងបញ្ចេញមតិនានាលើបណ្ដាញសង្គមហ្វេសប៊ុក ជាពិសេសសកម្មភាពចែកស្បៀងអាហារដែលបានមកពីប័ណ្ណលក់នាឡិការបស់លោក សម រង្ស៊ី។ សកម្មភាពទាំងនេះ បានទទួលរងការតាមដាន និងការព្រមានចាត់វិធានការជាហូរហែ បើសិនពួកគាត់បន្តសកម្មភាពទាំងនេះតទៅទៀត។
ប្រធានប្រតិបត្តិគណបក្សសង្គ្រោះជាតិប្រចាំរាជធានីភ្នំពេញ លោក ម៉ន ផល្លា ដែលកំពុងភៀសខ្លួននៅប្រទេសម៉ាឡេស៊ី ឱ្យដឹងថាកន្លងមករូបលោកបានគេច ពីការតាមចាប់បញ្ជូនក្រោមកិច្ចសហការរវាងអាជ្ញាធរថៃ និងកម្ពុជា។ មន្ត្រីបក្សប្រឆាំងរូបនេះបន្តថា បច្ចុប្បន្នលោកបានទទួលឋានៈជាជនភៀសខ្លួននៅម៉ាឡេស៊ីហើយ ប៉ុន្តែក្រោយពេលលោក ហ៊ុន សែន ថ្លែងសារកម្ទេចក្រុមបក្សប្រឆាំងនាពេលថ្មីៗនេះ លោកត្រូវបានជនមិនស្គាល់អត្តសញ្ញាណតាមឃ្លាំមើល ដែលធ្វើឱ្យគ្រួសាររបស់លោកបានសម្រេចផ្លាស់ប្ដូរកន្លែងស្នាក់នៅភ្លាមៗ ។ លោកយល់ថា ការដែលរដ្ឋាភិបាលកម្ពុជាប៉ុនប៉ងចាប់ខ្លួន និងគំរាមកំហែងលើសកម្មជនគណបក្សប្រឆាំងពេលនេះ ដើម្បីរកមធ្យោបាយបញ្ចប់សកម្មភាពងើបតវ៉ា និងបញ្ចេញមតិ ដោយសារពួកគេមិនបោះបង់ការការតស៊ូ ហើយរក្សាឆន្ទៈសង្គ្រោះជាតិ។ លោកថា បញ្ជាក់ថា ជនភៀសខ្លួននៅប្រទេសម៉ាឡេស៊ីព្រួយបារម្ភដោយខ្លាចអាជ្ញាធរម៉ាឡេស៊ី និងកម្ពុជាសហការគ្នាចាប់បញ្ជូនអ្នកនយោបាយទៅវិញ ដោយកន្លងទៅម៉ាឡេស៊ីក៏ធ្លាប់បញ្ជូនជនភៀសខ្លួនម្តងមកហើយ៖ «អំពីសុវត្ថិភាព យើងខ្ញុំស្នើសុំឱ្យអង្គការសហប្រជាជាតិទទួលបន្ទុកជនភៀសខ្លួននៅប្រទេសម៉ាឡេស៊ី និងអង្គការសិទ្ធិមនុស្សអន្តរជាតិយកចិត្តទុកដាក់លើជនភៀសខ្លួននយោបាយ ក៏ដូចជាពួកយើងខ្ញុំនេះ អន្តរាគមន៍ដោយធ្វើយ៉ាងណាឱ្យពួកយើងខ្ញុំរស់នៅបានសេចក្តីសុខ និងគេចផុតពីការប៉ុនប៉ងការចាប់ខ្លួន»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការបរទេសលោក កុយ គួង ដើម្បីបកស្រាយជុំវិញរឿងនេះបានទេ នៅថ្ងៃទី០៤ វិច្ឆិកា ដោយទូរស័ព្ទចូលតែពុំមានអ្នកទទួល។ ចំណែកមន្ត្រីស្ថានទូតខ្មែរប្រចាំប្រទេសម៉ាឡេស៊ី ប្រាប់ថា លោករវល់ហូបបាយ ហើយចុចផ្តាច់ទូរស័ព្ទ។
ប៉ុន្តែ អ្នកនាំពាក្យគណបក្សកាន់អំណាច លោក សុខ ឥសាន ថ្លែងថា រដ្ឋាភិបាលចាត់ទុកសកម្មជនគាំទ្រគណបក្សសង្គ្រោះជាតិ គឺជាសកម្មភាពខុសច្បាប់ ដោយមិនមែនជាការអនុវត្តសិទ្ធិសេរីភាពនោះទេ។ លោកបន្តថា ស្ថិតក្នុងវិសាលភាពរបស់អាជ្ញាធរកម្ពុជា បើទោះបីពួកគេស្ថិតនៅកន្លែងណាក៏ដោយ រដ្ឋាភិបាលត្រូវតែចាត់វិធានការ។ លោកបញ្ជាក់ថារដ្ឋាភិបាលមិនខ្វល់ចំពោះសកម្មជននយោបាយទាំងនោះទទួលបានសិទ្ធិជាជនភៀសខ្លួននោះឡើយ ព្រោះពួកគេធ្វើឱ្យប៉ះពាល់ដល់ឯករាជ្យភាព និងអធិបតេយ្យភាពជាតិ៖ «យើងមិនដឹងនរណាភៀសខ្លួនមិនភៀសខ្លួននោះទេ ប៉ុន្តែបើធ្វើខុសច្បាប់ប៉ះពាល់ដល់សន្តិសុខជាតិ ឯករាជ្យភាព អធិបតេយ្យភាពជាតិ នៅណាក៏ដោយក្រោមវិសាលភាពលទ្ធភាព វិធានការផ្លូវច្បាប់របស់រដ្ឋាភិបាល គឺចាំបាច់ត្រូវតែធ្វើ»។
ឆ្លើយតបនឹងការលើកឡើងរបស់ លោក សុខ ឥសាននេះ ប្រធានគណៈកម្មការសម្របសម្រួលជនភៀសខ្លួនគណបក្សសង្គ្រោះជាតិប្រចាំប្រទេសម៉ាឡេស៊ី លោក អៈម៉ាត់ ចាមាល ថ្កោលទោសចំពោះវិធានការ និងទង្វើគំរាមកំហែងរបស់រដ្ឋាភិបាលលើថ្នាក់ដឹកនាំ និងសកម្មជនបក្សប្រឆាំងក្រៅប្រទេសដោយមិនអាចទទួលយកបានឡើយ។ លោកអះអាងថា សកម្មភាពគាំទ្រគណបក្សសង្គ្រោះជាតិ គឺជាការសិទ្ធិពលរដ្ឋក្នុងសង្គមប្រជាធិបតេយ្យ ដែលធានាដោយច្បាប់ជាតិ និងអន្តរជាតិ ពីព្រោះពួកគាត់ទទួលរងនូវអំពើអយុត្តិធម៌ពីសំណាក់រដ្ឋាភិបាល។ លោកឱ្យដឹងថា លោកបានជូនដំណឹងទៅថ្នាក់ដឹកនាំគណបក្សរួចហើយ ហើយលោកកំពុងរៀបចំលិខិតដាក់ទៅស្ថាប័នពាក់ព័ន្ធ ដើម្បីជួយតាមដានករណីនេះដែរ៖ «ខាងគេឱ្យតាមដានសកម្មភាពពួកយើងខ្ញុំ ចែកអំណោយក៏គេតាមដាន សកម្មភាពពួកយើងខ្ញុំទាំងអស់គាត់តាមដានរហូតដល់សព្វថ្ងៃនេះ ហើយនេះគឺជាការបំពានលើសិទ្ធិសេរីភាពរបស់ប្រជាពលរដ្ឋ ឬក៏ជនភៀសខ្លួន»។
អង្គការសង្គមស៊ីវិលក៏ព្រួយបារម្ភពីការចាប់បញ្ជូនសកម្មជនបក្សប្រឆាំង ជាជនភៀសខ្លួនមកឲ្យរដ្ឋាភិបាលផ្ដន្ទាទោសផងដែរ។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថារូបភាពនៃការចាប់បញ្ជូន និងការគំរាមកំហែងលើជនភៀសខ្លួននយោបាយ ដែលទទួលស្គាល់ដោយឧត្ដមស្នងការអង្គការសហប្រជាជាតិ (UNHCR) ម្តងហើយម្តងទៀត បានធ្វើឱ្យប៉ះពាល់សិទ្ធិ និងបង្កើនក្តីបារម្ភអំពីសុវត្ថិភាពរបស់ពួកគេយ៉ាងខ្លាំង។ លោកយល់ថាប្រទេសដែលមានជនភៀសខ្លួន ត្រូវយកចិត្តទុកដាក់ និងធានាសុវត្ថិភាពដល់ពួកគាត់។ លើសពីនេះ លោកទទូចដល់ឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួនប្រចាំប្រទេសម៉ាឡេស៊ី គួរចាត់វិធានការជាបន្ទាន់ ដើម្បីទប់ស្កាត់ការអនុវត្តផ្ទុយពីអនុសញ្ញាស្ដីពីសិទ្ធិភៀសខ្លួន ដើម្បីធានាដល់សិទ្ធិពលរដ្ឋគ្រប់រូប៖ «ប្រទេសទាំងអស់ដែលទទួលស្គាល់ សមាជិក ហត្ថលេខីលើអនុសញ្ញាជនភៀសខ្លួន ត្រូវតែមានកាតព្វកិច្ចក្នុងការធានាដល់សិទ្ធិជនភៀសខ្លួនទាំងអស់ហ្នឹង ពីព្រោះថា ជាកាយវិការមនុស្សធម៌របស់ប្រទេសជិតខាងដែលត្រូវតែយកចិត្តទុកក្នុងការដោះស្រាយបញ្ហាដល់ជនភៀសខ្លួនដែលគ្នារត់គេចចេញពីប្រទេសសាមីដែលធ្វើទុក្ខបុកម្នេញ ធ្វើបាបខាងផ្លូវនយោបាយ និងសិទ្ធិមនុស្ស»។
ចាប់តាំងពីរបបក្រុងភ្នំពេញរំលាយគណបក្សសង្គ្រោះជាតិកាលពីឆ្នាំ២០១៧ សកម្មជនគណបក្សនេះជាង ១រយនាក់បានភៀសខ្លួននៅប្រទេសថៃ ម៉ាឡេស៊ី និងហ្វីលីពីន ដើម្បីគេចពីការធ្វើទុក្ខបុកម្នេញ។ កន្លងទៅអាជ្ញាធរកម្ពុជាក៏ធ្លាប់សហការជាមួយអាជ្ញាធរម៉ាឡេស៊ីចាប់បញ្ជូនអតីតស្នងការក្រុងភ្នំពេញលោក ហេង ពៅ ក្នុងពេលលោកទទួលបានសិទ្ធិជ្រកកោនផ្នែកនយោបាយនៅប្រទេសហ្វាំងឡង់ (Finland)។
កាលពីថ្មីៗនេះ អាជ្ញាធរថៃបានចាប់ខ្លួនសកម្មជនបក្សប្រឆាំងចំនួន ៤នាក់ គឺលោក វឿង សំណាង លោក វឿន វាសនា ហៅគ្រញូងព្រៃឡង់ និងអ្នកស្រី ឡាញ់ ថាវរី លោក ម៉ិច ហ៊ាង បញ្ជូនឱ្យអាជ្ញាធររដ្ឋាភិបាលលោក ហ៊ុន សែន ដែរ។ តុលាការបានចោទប្រកាន់ពួកគេពីបទរួមគំនិតក្បត់ និងបទញុះញង់ ហើយឃុំខ្លួនបណ្ដោះអាសន្នក្នុងពន្ធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។