គណៈកម្មាធិការការពារអ្នកកាសែត (CPJ) អំពាវនាវឲ្យរដ្ឋាភិបាលកម្ពុជា ដោះលែងអ្នកសារព័ត៌មានអនឡាញ (Online) កោះកុងទាន់ហេតុការណ៍ ឲ្យមានសេរីភាពឡើងវិញ ដោយគ្មានលក្ខខណ្ឌ និងបញ្ឈប់ការផ្ដន្ទាទោសដាក់ពន្ធនាគារដល់អ្នកកាសែត។
ការទាមទារឲ្យដោះលែងនេះ ធ្វើឡើងក្នុងសេចក្តីថ្លែងការណ៍ របស់គណៈកម្មាធិការការពារអ្នកកាសែត (CPJ) កាលពីថ្ងៃទី១ ខែតុលា បន្ទាប់ពីតុលាការខេត្តកោះកុង បានបើកសវនាការយ៉ាងប្រញាប់ប្រញ៉ាល់ ដើម្បីកាត់ទោសឲ្យលោក យួន ឈីវ ជាប់ពន្ធនាគារមួយឆ្នាំ និងផាកពិន័យជាប្រាក់១លានរៀន ឬស្មើ៥០០ដុល្លារ ពីបទញុះញង់ ក្រោយដែលរដ្ឋមន្ត្រីការពារជាតិ លោក ទៀ បាញ់ បានប្តឹងអ្នកសារព័ត៌មានអនឡាញរូបនេះ។
លោក យួន ឈីវ កាលពីថ្ងៃទី១៩ ខែកញ្ញា បានបង្ហោះព័ត៌មានជុំវិញរឿងវិវាទដីធ្លី នៅស្រុកបុទុមសាគរ រវាងអភិបាលរងខេត្តកោះកុង លោក សុខ សុទ្ធី ជាមួយក្រុមប្រជាពលរដ្ឋ។ លោក យួន ឈីវ បានប្រាប់វិទ្យុអាស៊ីសេរី មុនចាប់ខ្លួនថា ព័ត៌មានដែលចុះផ្សាយនេះគឺជារឿងពិត។ ទោះជាយ៉ាងនេះក្ដី លោកបានធ្វើលិខិតសុំអភ័យទោស និងបានលុបចោលអត្ថបទនិងវីដេអូ ដែលបានបង្ហោះនៅលើទំព័រហ្វេសប៊ុករបស់លោកថែមទៀត។
តំណាងគណៈកម្មាធិការការពារអ្នកកាសែត នៅតំបន់អាស៊ីអាគ្នេយ៍ លោក ស៉ន គ្រីសពីន (Shawn Crispin) បញ្ជាក់ក្នុងសេចក្ដីថ្លែងការណ៍ថា ការផ្តន្ទាទោសលោក យួន ឈីវ ពីបទញុះញង់នេះ គឺជាការរំលោភលើសិទ្ធិសេរីភាព របស់អ្នកសារព័ត៌មាន។ រដ្ឋាភិបាលកម្ពុជា ត្រូវបញ្ឈប់ការរារាំង និងការផ្ដន្ទាទោសដល់អ្នកកាសែតឯករាជ្យ ដែលរាយការណ៍និងចុះផ្សាយអត្ថបទនានា។
ពាក់ព័ន្ធនឹងរឿងនេះដែរ នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ហ្វ៊ីល រ៉ូប៊ើតសុន (Phil Robertson) ក៏បានលើកឡើងថា រដ្ឋាភិបាលរបបក្រុងភ្នំពេញ កំពុងប្រើប្រាស់បទចោទព្រហ្មទណ្ឌ ដែលស្ថិតក្រោមឥទ្ធិពលនយោបាយ ដើម្បីធ្វើទុក្ខបុកម្នេញ និងគំរាមកំហែងដល់អ្នកសារព័ត៌មានឯករាជ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។