ពលរដ្ឋចាមជាច្រើននាក់ជំរុញឱ្យអាជ្ញាធរពាក់ព័ន្ធចាត់វិធានការផ្លូវច្បាប់ ចំពោះ កូនប្រុសរបស់អ្នកឧកញ៉ាម្នាក់ឈ្មោះ សុះ កំរី ដែលជាចាងហ្វាងនៃគណៈដឹកនាំជាន់ខ្ពស់នៃសាសនាឥស្លាមកម្ពុជា ដែលរងការចោទប្រកាន់ថា បានប្រព្រឹត្តទង្វើ បៀតបៀនផ្លូវភេទមកលើកុមារីចាម ១៨នាក់ បណ្ដាលឱ្យកុមារីខ្លះមានផ្ទៃពោះ។ មន្ត្រីសង្គមស៊ីវិលថា ករណីនេះ គឺជាបទឧក្រិដ្ឋធ្ងន់ធ្ងរ ដែលសមត្ថកិច្ចពាក់ព័ន្ធត្រូវតែបើការស៊ើបអង្កេតរកការពិត ដើម្បីផ្ដល់យុត្តិធម៌ដល់ជនរងគ្រោះ។
ពលរដ្ឋចាមជាច្រើននាក់នាំគ្នាបង្ហោះសារ នៅលើបណ្ដាញសង្គម ហ្វេសប៊ុក(Facebook) ដោយរិះគន់ខ្លាំងៗ មកលើ កូនប្រុសរបស់អ្នកឧកញ៉ា សុះ កំរី ឈ្មោះ កាមារ៉ូទីន ស៊ូហៃមី ដែលរងការចោទថាជាប់ពាក់ព័ន្ធការបៀតបៀនផ្លូវភេទមកលើ កុមារីចំនួន១៨នាក់ ដែលស្នាក់អាស្រ័យ រៀនសូត្រ នៅអន្តេវាសិកដ្ឋាន ស្ថិតនៅខណ្ឌឫស្សីកែវក្រុងភ្នំពេញ។
ការរិះគន់ជាបន្តបន្ទាប់នេះធ្វើឡើង ក្រោយពេលដែលមានគណនីហ្វេសប៊ុក មួយឈ្មោះ សម ម៉េងលី (Som Mengly)បានបង្ហោះសារលើទំព័រហ្វេសប៊ុក នៅថ្ងៃនៅថ្ងៃទី១០ ខែតុលាថា មានកូនអ្នកធំ ម្នាក់ឈ្មោះស៊ូ ហៃមី បានបៀតបៀនផ្លូវភេទសិស្សសាលា ១៨នាក់ ក្នុងនោះសម្រេចបាន ៦នាក់។ លោក ស៊ូហៃមី គឺជា អ្នកគ្រប់គ្រងកូនសិស្សស្រី នៅអន្តេវាសិកដ្ឋាន ស្ថិតនៅខណ្ឌឫស្សីកែវ ក្រុងភ្នំពេញ។ មូលហេតុដែលកើតរឿងនោះ ត្រូវបានម្ចាស់គណនីហ្វេសប៊ុកដដែលលើកឡើងថា គឺ លោក ស៊ូហៃមី បានប្រើលេសហៅសិស្សទៅអប់រំ ពេលពួកគេធ្វើខុស។ ចំណែកការហៅមកណែនាំនេះ ត្រូវឱ្យសិស្សទៅជួបម្នាក់ម្ដងនៅក្នុងបន្ទប់ដែលស្ងាត់។
គណនីហ្វេសប៊ុកដដែលថា នៅពេលដែលលោក ស៊ូហៃមី ជួបនឹងសិស្ស លោកបានលួងលោម ហើយលូកលាន់ មកលើរាងកាយជនរងគ្រោះ រហូត ប្រព្រឹត្តអំពើមិនគប្បី។ ករណីនេះបានកើតឡើងជាច្រើនឆ្នាំមកហើយ ប៉ុន្តែពុំមានអ្នកណាហ៊ានប្ដឹង ព្រោះបារម្ភពីសុវត្ថិភាព ខណៈដែល កុមារី រងគ្រោះ ភាគច្រើនមានជីវភាពក្រីក្រ។ ទោះជាយ៉ាងណា ការបែកធ្លាយ រឿងអាស្រូវនេះ ដោយសារតែមានកុមារីម្នាក់ មានផ្ទៃពោះ ទើបនាងប្រាប់ទៅកាន់អ្នកជុំវិញ ហើយត្រូវបានគេ ចែកចាយលើបណ្ដាញសង្គមហ្វេសប៊ុកដើម្បី ទាមទាររកយុត្តិធម៌ និងជំរុញឱ្យអាជ្ញាធរពាក់ព័ន្ធ ចាត់វិធានការផ្លូវច្បាប់មកលើជនបង្ក។
ពលរដ្ឋចាមកញ្ញា យ៉ា ហ្វាអ៊ីហ្សះ ប្រាប់វិទ្យុអាស៊ីសេរី នៅថ្ងៃទី១២ ខែតុលា ថា ករណីបៀតបៀនផ្លូវភេទ មកលើកុមារីទាំង១៨នាក់នោះ ភាគច្រើនពួកគាត់មានវ័យក្រោម១៨ឆ្នាំ។ កញ្ញាថា គឺជារឿងដ៏គួរឱ្យក្ដុកក្ដួល និងឈឺច្បាប់បំផុត សម្រាប់ជនរងគ្រោះ។ កញ្ញាជំរុញឱ្យ ក្រសួងពាក់ព័ន្ធគួរតែស៊ើបអង្កេត និងចាត់វិធានការ ឱ្យបានតឹងរ៉ឹងចំពោះជនបង្ក បើពុំដូច្នោះទេ បញ្ហាបែបនេះ នៅតែបន្តកើតមាន។
កញ្ញា យ៉ា ហ្វាអ៊ីហ្សះ៖«អាជ្ញាធរ ភាគីពាក់ព័ន្ធសូមចាត់វិធានការយ៉ាងម៉ឺងម៉ាត់ ហើយជាបន្ទាន់ដើម្បីស្វែងរកយុត្តិធម៌ ជូនដល់ជនរងគ្រោះ ហើយក៏ដូចជាការពារសុវត្ថិភាពដល់ជនរងគ្រោះ និងដល់ក្មេងៗដទៃទៀត ដែលអត់ទាន់រងគ្រោះ។ ហើយអាជ្ញាធរ និងភាគីពាក់ព័ន្ធ ក្នុងការ ដំណើររឿងនេះ ត្រូវធានាឱ្យបានថា ភាគីដែលជាជនរងគ្រោះ គាត់ត្រូវបានធានានូវសុវត្ថិភាព ពួកគាត់ ។ អត់មានការគំរាមកំហែង អត់មានការភ័យខ្លាច ក្នុងការស្វែងរកយុត្តិធម៌ឱ្យខ្លួនឯង»។
ក្រោយបែកធ្លាយរឿងអាស្រូវបៀតបៀនផ្លូវភេទលើកុមារីទាំង ១៨នាក់ រួចមកអាណាព្យាបាលជនរងគ្រោះ បានយកកូនត្រឡប់ទៅផ្ទះវិញហើយ ក្រោយមកដោយសារ បារម្ភពីសុវត្ថិភាព អាណាព្យាបាលកុមារីម្នាក់ បានយកកូនទៅឱ្យស្នាក់នៅជាមួយអង្គការ អាហ្វេស៊ីបកម្ពុជា (AFESIP Cambodia) ដើម្បីជួយការពារសុវត្ថិភាព និងដាក់ពាក្យបណ្ដឹងទៅក្រសួងពាក់ព័ន្ធឱ្យចាត់វិធានការតាមផ្លូវច្បាប់។
ប្រធានអង្គការអាហ្វេស៊ីប អ្នកស្រី ម៉ម សុម៉ាលី បានបង្ហោះសារលើទំព័រ ហ្វេសប៊ុក នៅថ្ងៃទី១១ ខែតុលាថា មកដល់ពេលនេះ កុមារីរងគ្រោះពីការបៀតបៀនផ្លូវភេទទាំងនោះ មានសុវត្ថិភាពហើយ។ អ្នកស្រីកំពុងតែ រៀបចំពាក្យបណ្ដឹងទៅកាន់សមត្ថកិច្ចពាក់ព័ន្ធ ដើម្បីចាត់វិធានការផ្លូវច្បាប់។ បន្ថែមពីនោះ អ្នកស្រី ក៏ ស្នើឱ្យ អាណាព្យាបាល និងជនរងគ្រោះផ្សេងទៀត ដែលរងការបៀតបៀន សូមដាក់ពាក្យបណ្ដឹង តាមរយៈអង្គការអ្នកស្រីដើម្បីរកដំណោះស្រាយ។
អ្នកស្រី ម៉ម សុម៉ាលី៖«ម្ដងជាពីរដង ខ្ញុំសូមអង្វរឱ្យជនរងគ្រោះទាំងអស់ ដោយសារតែមានបងប្អូនយើងច្រើនណាស់ ដែលគាត់បារម្ភពីជនរងគ្រោះ។ គាត់ចង់ឱ្យជនរងគ្រោះទទួលបានយុត្តិធម៌ ប៉ុន្តែការទទួលបានយុត្តិធម៌ទៅបាន ទាល់តែជនរងគ្រោះខ្លួនឯង ងើបឈរហើយ និយាយ។ ប្រសិនបើយើងអត់ហ៊ាននិយាយ យើងនៅតែខ្លាចគេ នាំគ្នា លាក់ពួនបាត់ ខ្ញុំក៏មិនដឹងថាជួយយ៉ាងម៉េច សមត្ថកិច្ចក៏មិនដឹងជួយយ៉ាងម៉េច មេធាវីក៏មិនដឹងជួយយ៉ាងម៉េច ព្រោះអី កូនខ្លួនឯង អត់ងើបឈរ ហើយនិយាយខ្លួនឯង អត់តស៊ូខ្លួនឯង»។
ចំណែកអ្នកឧកញ៉ា សុះ កំរី ដែលជាចាងហ្វាងនៃគណៈដឹកនាំជាន់ខ្ពស់នៃសាសនាឥស្លាម បានបង្ហោះសារនៅលើ ទំព័រហ្វេសប៊ុក នៅថ្ងៃទី១១ខែ តុលា ថា លោក បានឃើញពាក្យចចាមអារ៉ាម និងការចែកចាយ តាមបណ្ដាញសង្គម អំពីករណី សិស្សនារី ត្រូវបានរំលោភបំពាន នៅសាលារៀន (ឥស្លាមកំរិត២) អាន់នៀកម៉ះភ្នំពេញ ដែលមានពាក់ព័ន្ធដល់កូនប្រុសរបស់លោក ឈ្មោះ សូហៃមី ដែលជាអ្នកគ្រប់គ្រងអន្តេវាសិកដ្ឋានសិស្សនារី។
លោកបន្តថា បន្ទាប់ពីទទួលដំណឹងនេះ លោកបានហៅ លោក សូហៃមី ដែលជាកូន របស់លោក មកសាកសួរជាច្រើនលើក ដើម្បីរកការពិត ប៉ុន្តែ លោក សូហៃមី បានបដិសេធថា ពុំបានប្រព្រឹត្តដូចពាក្យចចាមអារ៉ាមនោះឡើយ ហើយលោកគាំទ្រក្នុងការរកការពិតដើម្បីផ្ដល់យុត្តិធម៌ ជូនដល់ជនរងគ្រោះ។
វិទ្យុអាស៊ីសេរីពុំអាចទាក់ទងចាងហ្វាងនៃគណៈដឹកនាំជាន់ខ្ពស់នៃសាសនាឥស្លាម លោក សុះ កំរី និងអ្នកគ្រប់គ្រងអន្តេវាសិកដ្ឋានសិស្សនារី លោក សូហៃមី ដើម្បីឆ្លើយតបជុំវិញរឿងនេះបន្ថែមបានទេ នៅថ្ងៃទី១៣ ខែតុលា។
រីឯអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង និងអ្នកនាំពាក្យស្នងការដ្ឋាននគរបាល រាជធានីភ្នំពេញ លោក សំ វិច្ឆិកា ក៏ពុំអាចទាក់ទងបានដែរ នៅថ្ងៃទី១៣ ខែតុលា។ ដោយឡែកនៅថ្ងៃដដែលនេះ អធិការនគរបាលខណ្ឌឫស្សីកែវ លោក ឌៀ សារី ប្រាប់វិទ្យុអាស៊ីសេរីថា មកដល់ពេលនេះ លោកពុំទាន់ទទួលបានព័ត៌មាន ឬពាក្យបណ្ដឹងណាមួយពាក់ព័ន្ធ ករណីនេះនៅឡើយ។
លោក ឌៀ សារី៖««អាហ្នឹងខាងព្រហ្មទណ្ឌគេអ្នកធ្វើ[ចុះស៊ើបអង្កេត]ទេ ខាង ខ្ញុំខាង វិទ្យុទាក់ទងអត់មានវិធានការធ្វើអ្វីនោះទេ។ ខ្ញុំគ្រាន់តែជាអ្នកទទួលព័ត៌មានទេ។ អត់ទេ ខ្ញុំមិនទាន់ ទទួលបាន ព័ត៌មាន[ករណី បៀតបៀន ផ្លូវ ភេទ កុមារី១៨នាក់] នោះទេ។ ប្រសិនបើលោកចង់ដឹងផ្ទាល់ មកចូលអធិការខ្ញុំមក»។
គណៈគ្រប់គ្រងសាលាឥស្លាមកំរិត២ អាន់នៀកម៉ះ ភ្នំពេញ បានបង្ហោះ សេចក្ដីប្រកាសព័ត៌មាន នៅថ្ងៃទី១២ តុលា នៅលើហ្វេសប៊ុក ដោយការពារថា បុគ្គលិកឈ្មោះ កាមារ៉ូទីន ស៊ូហៃមី គឺជាអ្នកគ្រប់គ្រងសន្តិសុខសណ្ដាប់ធ្នាប់ អនាម័យ និងសុខភាពនៅអន្តេវាសិកដ្ឋានស្រី បានអនុវត្ត លើការងារគ្រប់គ្រង និងសណ្ដាប់ធ្នាប់ ប៉ុន្តែ នៅថ្ងៃទី៥ ខែតុលា សិស្សបានរាយការណ៍ទៅអ្នក គ្រូៗនៅការិយាល័យរដ្ឋបាលសាលារៀនឥស្លាមកំរិត២ អាន់នៀកម្ល៉េះ ភ្នំពេញ ដោយបុគ្គល ឈ្មោះ កាមារ៉ូទីន ស៊ូហៃមី បានប្រើប្រាស់ពាក្យសម្ដី អាកប្បកិរិយា និងកាយវិការ មិនសមរម្យដល់សិស្សមួយចំនួន ក្នុងករណីនេះ សិស្សបានសំណូមពរឱ្យបញ្ចប់តួនាទីបុគ្គលខាងលើពីតួនាទីរបស់ខ្លួន ហើយភ្លាមៗនោះគណៈ គ្រប់គ្រងសាលាបានប្រជុំសម្រេច និងដកតួនាទី លោក កាមារ៉ូទីន សូហៃមី ចេញពីអ្នកគ្រប់គ្រងនៅអន្តេវាសិកដ្ឋានស្រី។
ក្រោយមកទៀត ក្នុងចំណោមសិស្សទាំងអស់ពួកគេនៅតែបន្តធ្វើការរៀនសូត្រធម្មតា មានសិស្សមួយចំនួនតូចប៉ុណ្ណោះសុំទៅលេងផ្ទះ ហើយបែរជាមានក្រុមមនុស្ស អូសទាញសិស្សខ្លះយកទៅបម្រើមហិច្ឆតានយោបាយខ្លួន ហើយវាយប្រហារឥតសំចៃ មកលើសាលាទាំងខុសរបៀប។
ទោះជាបែបនេះក្ដី សិស្សស្រីមួយរួបដែលធ្លាប់ស្នាក់នៅអន្តេវាសិកដ្ឋាន ដែលគ្រប់គ្រងដោយ លោក សូហ៊ៃមី នេះ បានអះអាងប្រាប់វិទ្យុអាស៊ីសេរី ដោយសុំមិនបញ្ចេញឈ្មោះ ដោយបារម្ភពីសុវត្ថិភាពថា កូនអ្នកឧកញ៉ា សុះ កំរី នេះ តែងតែបៀតបៀនផ្លូវភេទកុមារី។ កញ្ញាអះអាងបន្តថា លោក សូហ៊ៃមី នេះ មិនហ៊ានបៀតបៀនក្មេងស្រីមានអាយុលើសពី១៨ឆ្នាំទេ ពីព្រោះខ្លាចក្មេងស្រីពេញវ័យស្ដីតបវិញ ឬប្ដឹងទៅឪពុកម្ដាយរបស់ពួកគេ។
កញ្ញាបន្ថែមថា រឿងនេះ បានកើតឡើងជាច្រើនឆ្នាំមកហើយ ហើយអ្នកជិតខាងក៏ដឹងរឿងនេះដែរ។ ប៉ុន្តែម្នាក់ៗមិនហ៊ានប្ដឹងទៅសមត្ថកិច្ចទេ ដោយខ្លាចឥទ្ធិពល ឪពុក សូហ៊ៃមី ដែលជាមេដឹកនាំសាសនាផង និងខ្លាចខ្មាសគេផង។
អតីតសិស្សរូបនេះបន្ថែមថា មូលហេតុដែលធ្វើឱ្យជនសង្ស័យ សូហ៊ៃមី ងាយនឹងលូកលាន់ ឬបៀតបៀនផ្លូវភេទកុមារបាននោះ ដោយសារតែ សូហ៊ៃមី និងភរិយា ស្នាក់នៅបន្ទប់មួយ ក្នុងអន្តេវាសិកដ្ឋានជាមួយសិស្សស្រីនៅជាន់ទី១។
កញ្ញាបន្ថែមថា ជនសង្ស័យមានល្បិចជាច្រើន ដើម្បីឆ្លៀតឱកាសចាប់រំលោភកុមារី ឬបៀតបៀនកេរ្តិ៍ខ្មាស ដូចជា ពេលខ្លះ ជនសង្ស័យ ឡើងទៅបិទទឹកនៅជាន់លើ ហើយប្រាប់កុមារីទាំងអស់ថា ដាច់ទឹក បើប្អូនៗចង់ងូតទឹក ត្រូវចុះទៅងូតទឹកនៅជាន់ក្រោម។ នៅពេលនោះ សូហ៊ៃមី (ជនសង្ស័យ) ចូលទៅបន្ទប់ទឹក ដើម្បីធ្វើជាជួសជុលឡើងវិញ។ ជនសង្ស័យបានឱ្យកុមារីម្នាក់ ទៅឈរពីក្រៅបន្ទប់ទឹក ដើម្បីមើលគេជួសជុលបន្ទប់ទឹក រួចក៏ហៅកុមារីរូបនោះចូលទៅក្នុងបន្ទប់ទឹក ហើយចាប់ខ្ទប់មាត់ បៀតបៀនកេរ្តិ៍ខ្មាសកុមារីតែម្ដង។ កុមារីរួបនោះក៏ព្យាយាមរើបម្រាស់ហើយក៏ស្រែកឱ្យគេជួយដោយបន្លឺសំឡេងខ្លាំងៗ ដើម្បីបានរួចខ្លួនមកវិញ។
អ្នករស់នៅ ក្បែរអន្តេវាសិកដ្ឋានម្នាក់សុំមិនបញ្ចេញឈ្មោះដែរ បានឱ្យដឹងថា រឿងនេះបានកើតឡើង ៤ឆ្នាំមកហើយ។ អ្នកស្រីអះអាងថា ក្មេងស្រីរងគ្រោះមួយចំនួនតែងមកប្រាប់អ្នកស្រី។ ប៉ុន្តែ លោកស្រីក៏មិនហ៊ានរាយការណ៍ទៅសមត្ថកិច្ចដែរ ពីព្រោះខ្លាចឥទ្ធិពលថ្នាក់ដឹកនាំជាន់ខ្ពស់នេះ ធ្វើបាបវិញ។ អ្នកស្រីបន្ថែមថា ក្មេងរងគ្រោះខ្លះ ឈប់រៀនរត់ទៅខែត្រវិញស្ងាត់ៗក៏មាន។
ទាក់ទិនរឿងនេះ នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្ស លីកាដូ (Licadho) លោក អំ សំអាត ប្រាប់វិទ្យុអាស៊ីសេរី ថា ករណីបៀតបៀនផ្លូវភេទមកលើកុមារី ១៨នាក់ នេះគឺជាបទល្មើសឧក្រិដ្ឋធ្ងន់ធ្ងរ ដែលសមត្ថកិច្ចពាក់ព័ន្ធត្រូវតែបើការស៊ើបអង្កេតរកការពិត ដោយឈរលើគោលការណ៍យុត្តិធម៌ ដើម្បីជួយដល់ជនរងគ្រោះ។
លោក អំ សំអាត៖«ករណីនេះបើយើងមើលតាម ប្រព័ន្ធផ្សព្វផ្សាយ និងព័ត៌មានដែលលិចធ្លាយនេះ វាជាបទឧក្រិដ្ឋធ្ងន់ធ្ងរ។ អ៊ីចឹងហើយ ព្រះរាជអាជ្ញា ត្រូវតែចាត់វិធានការ ដឹកនាំសមត្ថកិច្ចក្នុងការចុះស៊ើបអង្កេតទៅលើករណីនេះ ដើម្បីស្វែងរកការពិត និងយុត្តិធម៌ សម្រាប់ជនរងគ្រោះ»។
មាត្រា៣៣ នៃបទល្មើសទាក់ទងនឹងពេស្យាចារកុមារចែងថា ជនណាប្រព្រឹត្តបទល្មើសណាមួយ ដែលមានចែងក្នុងមាត្រា ៣០ មាត្រា ៣១ និងមាត្រា ៣២ នៃច្បាប់នេះ ត្រូវផ្ដន្ទាទោសដាក់ពន្ធនាគារពី ៧ (ប្រាំពីរ) ឆ្នាំ ទៅ ១៥ (ដប់ប្រាំឆ្នាំ) បើបទល្មើសដែលបានប្រព្រឹត្តនោះទាក់ទងនឹងពេស្យាចារកុមារ។
ប្រធានអង្គការ អាហ្វេស៊ីប អ្នកស្រី ម៉ម សុម៉ាលី បានផ្សាយផ្ទាល់នៅម៉ោងប្រមាណ ៧យប់ថ្ងៃទី១៣ តុលា ដោយអះអាងថា សមត្ថកិច្ចកំពុងធ្វើរឿងនេះហើយ។ អ្នកស្រីថា មកទល់ពេលនេះ មានក្មេងស្រីតែម្នាក់គត់ ដែលបានមកស្នាក់នៅកន្លែងអង្គការអ្នកស្រី។
វិទ្យាស្ថាន អាន់នៀកម៉ះអាល់ឥស្លាមីយ៉ះ ភ្នំពេញ (An-Nikmah Al-Islamiyah Phnom Penh) ស្ថិតនៅខណ្ឌឫស្សីកែវ ក្រុងភ្នំពេញ ដែលជាកន្លែងបណ្ដុះបណ្ដាលសិស្សានុសិស្ស ផ្នែកសាសនាឥស្លាម និងភាសាអង់គ្លេសដើម្បីត្រៀមប្រឡងយកអាហារូបករណ៍ ទៅសិក្សានៅក្រៅប្រទេស ដូចជាប្រទេសឥណ្ឌូណេស៊ី និងប្រទេសម៉ាឡេស៊ី ជាដើម។ បន្ថែមពីនោះ សាលាក៏មាន អន្តេវាសិកដ្ឋាននារី និងអន្តេវាសិកដ្ឋានប្រុសឱ្យសិស្សស្នាក់នៅសម្រាប់អ្នកដែលមកពីបណ្ដាខេត្តឆ្ងាយៗ និងអ្នកមានជីវភាពខ្វះខាតមកពីខែត្រ។ ក្រោយពីមានការបែកធ្លាយរឿងអាស្រូវ បៀតបៀនផ្លូវភេទ លើកុមារីមក ពលរដ្ឋចាមជំរុញឱ្យអាជ្ញាធរពាក់ព័ន្ធ ជាពិសេសរដ្ឋាភិបាល លោក ហ៊ុន ម៉ាណែត ជួយរកយុត្តិធម៌ជូនដល់ជនរងគ្រោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។