សាច់ញាតិអ្នកទោសមនសិការស្នើសុំឲ្យរដ្ឋាភិបាល និងតុលាការដោះលែងប្តី និងបងប្អូនរបស់ពួកគេឲ្យមានសេរីភាពឡើងវិញ ក្នុងទិវាសិទ្ធិមនុស្សអន្តរជាតិ ១០ ធ្នូ។ មន្ត្រីសិទ្ធិមនុស្សយល់ថា រដ្ឋាភិបាលគួរបន្ធូរបន្ថយ និងដោះលែងពួកគេឲ្យមានសេរីភាពឡើងវិញ ដើម្បីអបអរទិវាសិទ្ធិមនុស្សអន្តរជាតិ។
សាច់ញាតិរបស់សកម្មជននយោបាយ សកម្មជនសិទ្ធិមនុស្ស និងសកម្មជនបរិស្ថានជាដើមនោះ បាននាំគ្នាបង្ហោះសារនៅលើទំព័រហ្វេសប៊ុកចំថ្ងៃទិវាសិទ្ធិមនុស្សអន្តរជាតិ១០ ធ្នូ ដោយមានកាន់រូបថត និងថ្លែងសារស្នើសុំឲ្យរដ្ឋាភិបាល និងតុលាការដោះលែងក្រុមគ្រួសាររបស់ពួកគេវិញ។ប្អូនស្រីសកម្មជនមាតាធម្មជាតិ កញ្ញា ឡុង គន្ធា គឺកញ្ញា ឡុង សុខលីន រៀបរាប់ទាំងទឹកសំឡេងយំខ្សឹកខ្សួលថា កញ្ញានឹករលឹកបងស្រីជាខ្លាំង បន្ទាប់ពីបងស្រី ត្រូវបានអាជ្ញាធរចាប់ដាក់ពន្ធនាគារទាំងអយុត្តិធម៌។ កញ្ញាបន្តថា កញ្ញាព្រួយបារម្ភពីសុវត្ថិភាព និងសុខភាពរបស់បងស្រីដែលរស់នៅយ៉ាងលំបាកក្នុងពន្ធនាគារ។ កញ្ញាលើកឡើងថា កញ្ញាអស់សង្ឃឹម និងគ្មានជំនឿលើតុលាការក្រុងភ្នំពេញថា នឹងអាចរកយុត្តិធម៌ឱ្យបងស្រីកញ្ញាបានឡើយ។
ចំណែក ប្រពន្ធសកម្មជនមាតាធម្មជាតិ លោក ថុន រដ្ឋា គឺលោកស្រី ប៉ាត់ រស្មី ឲ្យដឹងថា ប្តីលោកស្រីមិនបានប្រព្រឹត្តកំហុសដូចការចោទប្រកាន់របស់តុលាការនោះទេ ដោយប្តីលោកស្រីគ្រាន់តែប្រើប្រាស់សិទ្ធិរបស់ខ្លួន និងជាសកម្មជនស្នេហាជាតិប៉ុណ្ណោះ។ លោកស្រីបន្តថា លោកស្រីជួបការលំបាកជាខ្លាំង ដោយសារបាត់បង់បង្គោលគ្រួសារ ខណៈលោកស្រីពុំមានការងារធ្វើ និងមានកូនតូចដែលជាបន្ទុកត្រូវចញ្ចឹមមួយទៀត។ លោកស្រីស្នើសុំឲ្យតុលាការដោះលែងប្តីលោកស្រីឲ្យមានសេរីភាពឡើងវិញ ដើម្បីបានជួបជុំគ្រួសារ។
ដោយឡែក ម្ដាយព្រះសង្ឃខ្មែរថាវរៈ ព្រះតេជព្រះគុណ កើត សារាយ គឺលោកស្រី ចាប យែម ថ្លែងថា លោកស្រីមានការឈឺចាប់ និងនឹករលឹកកូនប្រុសជាខ្លាំង បន្ទាប់ពីកូនប្រុសត្រូវអាជ្ញាធរចាប់ខ្លួនទៅបាត់។ លោកស្រីបន្តថា លោកស្រីមានជំងឺប្រចាំកាយ ខ្វះខាតក្នុងជីវភាព ពុំមានថវិកាសម្រាប់ទិញថ្នាំសង្កូវទេ និងមិនអាចសូម្បីទៅសួរសុខទុក្ខកូនក្នុងពន្ធនាគារ។ លោកស្រីលើកឡើងថា កូនប្រុសលោកស្រី គ្រាន់តែជាព្រះសង្ឃដែលចូលចិត្តជួយកិច្ចការសង្គម ពុំបានប្រព្រឹត្តទង្វើខុសឆ្គងនោះទេ ហើយអាជ្ញាធរគួរដោះលែងកូនលោកស្រីឲ្យមានសេរីភាពឡើងវិញ។
រីឯ ម្តាយសកម្មជនខ្មែរថាវរៈ លោក ហ៊ុន វណ្ណៈ គឺលោកស្រី ទី ម៉ារី និង ប្អូនស្រីកញ្ញា សូ មេត្តា គឺ កញ្ញា អេង វណ្ណឌី ក៏បានលើកឡើងដូចៗគ្នានៅលើគេហទំព័រហ្វេសប៊ុកដែរថា ពួកគាត់ឈឺចាប់ដែលអាជ្ញាធរចាប់ខ្លួនកូនប្រុសនិងបងស្រីដាក់ពន្ធនាគារដោយអយុត្តិធម៌ និងស្នើឲ្យតុលាការដោះលែងពួកគេវិញក្នុងឱកាសទិវាសិទ្ធិមនុស្សអន្តរជាតិនេះ។
ក្រុមសកម្មជនមាតាធម្មជាតិ និងយុវជនខ្មែរថាវរៈជាច្រើននាក់ ត្រូវបានអាជ្ញាធររបបលោក ហ៊ុន សែន ចាប់ដាក់ពន្ធនាគារជាបន្តបន្ទាប់ ដោយចោទប្រកាន់ពីបទញុះញង់ បន្ទាប់ពីពួកគេធ្វើសកម្មភាពបរិស្ថាន និងប្រមូលផ្តុំគ្នាតវ៉ាទាមទារឱ្យមានយុត្តិធម៌សង្គម។
ឆ្លើយតបរឿងនេះ ប្រធានអង្គភាពនាំពាក្យរដ្ឋាភិបាល លោក ផៃ ស៊ីផាន មានប្រសាសន៍ថា ការស្នើសុំឲ្យរដ្ឋាភិបាលដោះលែងអ្នកជាប់ឃុំទាំងនោះ គឺមិនអាចធ្វើបានទេ ដោយលោកលើកឡើងថា នេះជាដែនសមត្ថកិច្ចរបស់តុលាការ។
ប្រធានផ្នែកសិទ្ធិមនុស្ស និងដីធ្លីនៃសមាគមការពារសិទ្ធិមនុស្សអាដហុក(Adhoc) លោក នី សុខា មានប្រសាសន៍ថា រដ្ឋាភិបាលគួរពិចារណាទម្លាក់ចោលការចោទប្រកាន់ ឬដោះលែងអ្នកទោសមនសិការដែលគ្រាន់តែបញ្ចេញមតិ ឬប្រើប្រាស់សេរីភាពជួបជុំ ដែលមានធានាដោយច្បាប់ទាំងនោះ។ លោកបន្តថា តុលាការមិនបានគោរព ឬអនុវត្តច្បាប់ពេញលេញនោះទេ តែជាការអនុវត្តតាមអ្នកនយោបាយច្រើនជាង។ លោកស្នើសុំឲ្យរដ្ឋាភិបាលគួរងាកមកគោរពសិទ្ធិមនុស្ស និងដោះស្រាយបញ្ហានេះ ដើម្បីអភិវឌ្ឍន៍ប្រទេសជាតិ និងលទ្ធិប្រជាធិបតេយ្យពិតប្រាកដ។ «»
សហគមន៍ជាតិ និងអន្តរជាតិវាយតម្លៃថា កម្ពុជាមានករណីរំលោភសិទ្ធិមនុស្សធ្ងន់ធ្ងរ និងជាប្រព័ន្ធ កើតឡើងឥតឈប់ឈរ។ ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន ជាច្រើនទសវត្សរ៍មកនេះ អ្នកនយោបាយបក្សប្រឆាំង សកម្មជនសិទ្ធិមនុស្ស មេដឹកនាំសហជីព អ្នកការពារបរិស្ថាន អ្នកសារព័ត៌មាន និងប្រជាពលរដ្ឋដែលមិនគាំទ្រការដឹកនាំរបស់លោក បានទទួលរងការវាយបង្ក្រាប ការគាបសង្កត់ បំបិទសិទ្ធិសេរីភាព ជាពិសេសសិទ្ធិពលរដ្ឋ និងសិទ្ធិនយោបាយ និងការចាប់ដាក់គុក៕