អតីតគរុសិស្សវិទ្យាស្ថានជាតិអប់រំកាយ បន្តការតវ៉ាឱ្យក្រសួងអប់រំបកស្រាយការលុបឈ្មោះចេញពីក្របខ័ណ្ឌ ដើម្បីបង្ហាញតម្លាភាពក្នុងដំណើរការជ្រើសរើសគ្រូកីឡា។
អតីតគរុសិស្សនៃវិទ្យាស្ថានជាតិអប់រំកាយ និងកីឡា លោក កែវ សុវណ្ណឫទ្ធិ បានឈរនៅខាងមុខអគារក្រសួងអប់រំយុវជន និងកីឡា ដោយមានកាន់បដាទាមទាររដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន ឱ្យបកស្រាយចំពោះភាពមិនប្រក្រតី ក្នុងការលុបឈ្មោះរបស់លោក និងគរុសិស្ស ១១នាក់ទៀត ដោយអយុត្តិធម៌។ ជាមួយគ្នានេះ លោកក៏បានគូសខ្វែងឡូហ្គោ ក្រសួងអប់រំយុវជន និងកីឡានៅលើបដា ដែលលោកកាន់ផង។
លោក កែវ សុវណ្ណឫទ្ធិ ប្រាប់វិទ្យុអាស៊ីសេរី នៅថ្ងៃទី១៨ ខែកញ្ញាថា លោកនៅតែបន្តទាមទាររកយុត្តិធម៌ពីក្រសួងអប់រំយុវជន និងកីឡា នៅរៀងរាល់ព្រឹកថ្ងៃចន្ទ រហូតដល់មានការបកស្រាយសមស្របពីក្រសួងអប់រំ ចំពោះការលុបឈ្មោះលោកចេញពីវិទ្យាស្ថាប័នជាតិអប់រំកាយ និងកីឡា។
វិទ្យុអាស៊ីសេរីនៅតែមិនអាចទាក់ទងអ្នកនាំពាក្យក្រសួងអប់រំយុវជន និងកីឡា លោក រស់ សុវាចា បកស្រាយជុំវិញរឿងនេះបាននៅឡើយទេ នៅថ្ងៃទី១៨ ខែកញ្ញា។
លោក កែវ សុវណ្ណឫទ្ធិ លើកឡើងថា ប្រសិនបើក្រសួងអប់រំនៅតែមិនបង្ហាញពីតម្លាភាពជុំវិញការលុបឈ្មោះរបស់លោកនោះទេ លោកនឹងដើរកាន់បដាចម្ងាយប្រមាណ ១០គីឡូម៉ែត្រ នៅថ្ងៃចន្ទ ទី២៥ ខែកញ្ញាខាងមុខ ដោយចាប់ផ្ដើមចេញដំណើរពីខាងមុខក្រសួងអប់រំយុវជន និងកីឡា យកញត្តិទៅដាក់នៅក្រសួងមុខងារសាធារណៈឱ្យជួយដោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។