អតីតគរុសិស្សមួយរូបនៅតែបន្តទាមទាររកយុត្តិធម៌ពីក្រសួងអប់រំយុវជន និងកីឡា ទោះបីមានបញ្ហាសុខភាព និងក្រោមភ្លៀងធ្លាក់ បន្ទាប់ពីការតវ៉ាអស់រយៈពេលជិត ៣ខែមកនេះ នៅតែគ្មានដំណោះស្រាយសមស្របណាមួយសម្រាប់រូបគាត់។ មន្ត្រីសង្គមស៊ីវិលទទូចឱ្យរដ្ឋាភិបាល ជាពិសេសក្រសួងអប់រំ ពន្លឿនការដោះស្រាយបញ្ហានេះ ប្រកបដោយភាពទំនួលខុសត្រូវ ដើម្បីផ្ដល់យុត្តិធម៌ឱ្យយុវជនរូបនេះ។
បើទោះបីជាទទួលរងភាពអយុត្តិធម៌ផ្ទួនៗ ដោយការលុបឈ្មោះចេញពីសាលាក្រោមហេតុផលមិនសមរម្យ និងត្រូវអាជ្ញាធរបង្ក្រាបដោយប្រើប្រាស់អំពើហិង្សាជាច្រើនលើកទៅហើយក្ដី ក៏អតីតគរុសិស្សវិទ្យាស្ថានអប់រំកាយ និងកីឡា លោក កែវ សុវណ្ណឫទ្ធិ មិនបានបោះការទាមទាររកយុត្តិធម៌ពីក្រសួងអប់រំឡើយ។
អតីតគរុសិស្ស លោក កែវ សុវណ្ណឫទ្ធិ ប្រាប់វិទ្យុអាស៊ីសេរីនៅថ្ងៃទី២៣ តុលានេះថា លោកនឹងមិនចុះចាញ់នោះឡើយ ដរាបណាលោកនៅមិនទាន់បានដំណោះស្រាយសមស្របពីក្រសួងអប់រំ។ លោកសង្ឃឹមថា ថ្នាក់ដឹកនាំក្រសួងអប់រំ នឹងបានឃើញអត្ថន័យសារនៅលើស្លាកក្រដាស ហើយងាកមកដោះស្រាយរឿងអយុត្តិធម៌ ដែលកើតមាននៅក្នុងស្ថាប័នអប់រំឡើងវិញ។
លោក កែវ សុវណ្ណឫទ្ធិ៖«ជាចុងក្រោយខ្ញុំសូមសំណូមពរទៅដល់(កងកម្លាំង)សណ្ដាប់ធ្នាប់ខណ្ឌដូនពេញ សូមគាត់អនុវត្តនីតិវិធីផ្លូវច្បាប់ឱ្យមានភាពត្រឹមត្រូវ ហើយមួយទៀត ពាក់ព័ន្ធជាមួយនឹងក្រសួងអប់រំ សូមមេត្តាឆ្លើយតប កុំឱ្យថា ខ្ញុំនេះ ធ្វើការលើកបដា ហើយនៅសុខៗ ឧទាហរណ៍ថា ខ្ញុំឡើងទៅប្ដឹងគាត់ វាជាបញ្ហាមួយ ដែលក្មេងទៅប្ដឹងចាស់ ទៅគំរាមកំហែងចាស់ វាខុសនីតិវិធីនៃការគោរព»។
នៅក្រោមដំណក់ទឹកភ្លៀង អតីតគរុសិស្ស លោក កែវ សុវណ្ណឫទ្ធិ ឈរចំពីមុខឈ្មោះក្រសួងអប់រំយុវជន និងកីឡា លើកស្លាកក្រដាស ដែលសរសេរចំណងជើងពណ៌ក្រហមថា “សប្ដាហ៍ទី១១” និងរំលេចខ្លឹមសារដោយអក្សរពណ៌ខៀវថា «បង្កើតច្បាប់មិនអនុវត្ត យុវជនចេះដឹង មិនបាច់សិក្សាអប់រំ រីឯបណ្ឌិតគេចពីការពិត ចំណែកឯអ្នកមាន សំអាងទ្រព្យសម្បត្តិជាអំណាច»។
ចំពោះខ្លឹមសារចាក់ដោតនេះ លោក កែវ សុវណ្ណឫទ្ធិ សំដៅទៅលើភាពអយុត្តិធម៌ ដែលកើតឡើងចំពោះលោកជាក់ស្ដែង តែគ្មានអ្នកចេញមុខមកដោះស្រាយ និងភាពលម្អៀងរបស់វិទ្យាស្ថានអប់រំកាយ និងកីឡា ដែលលុបឈ្មោះលោកចេញពីសាលា ដោយអះអាងថា ខុសលក្ខន្តិកៈខ្វះកម្ពស់ ប៉ុន្តែក្រសួងបែរជាអនុញ្ញាតឱ្យគរុសិស្ស ដែលខុសលក្ខន្តិកៈ លើសអាយុ និងមានគ្រួសារ អាចចុះឈ្មោះចូលរៀនបានទៅវិញ។ ស្របពេលដែលយុត្តិធម៌នៅមិនទាន់មាន អតីតគរុសិស្ស កែវ សុវណ្ណឫទ្ធិ បែរជាត្រូវទទួលរងអំពើហិង្សា បណ្ដាលឱ្យមានបញ្ហាត្រចៀក និងត្រូវបាត់បង់ការងារនៅកន្លែងឯកជនមួយផងដែរ។
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងអប់រំយុវជននិងកីឡា អ្នកស្រី ឃួន វិច្ឆិកា ដើម្បីសុំការបកស្រាយបញ្ហានេះបានទេ នៅថ្ងៃទី២៣ តុលា។
កាលពីថ្ងៃទី ២ ខែកញ្ញា ថ្នាក់ដឹកនាំវិទ្យាស្ថានជាតិអប់រំកាយ និងកីឡាបានហៅលោក កែវ សុវណ្ណឬទ្ធិ ទៅជួប ដើម្បីចរចា ដោយផ្ដល់ឱ្យយុវជនរូបនេះទទួលយកអាហារូបករណ៍សិក្សានៅសាកលវិទ្យាល័យរយ:ពេល ៤ឆ្នាំ ដោយឥតគិតថ្លៃ ជាថ្នូរនឹងការលុបឈ្មោះលោកចេញពីបញ្ជីគរុនិស្សិត និងបញ្ឈប់សកម្មភាពឈរតវ៉ា។ ប៉ុន្តែលោក កែវ សុវណ្ណឬទ្ធិ មិនទទួលយកសំណើនេះទេ ដោយលោកអះអាងថា ដំណោះស្រាយនេះ មិនមែនជាភាពយុត្តិធម៌ និងការទទួលខុសត្រូវរបស់ក្រសួងអប់រំ ដែលលោកចង់បាននោះទេ។
ជុំវិញរឿងនេះ ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី លើកឡើងថា ការព្រងើយកន្តើយរបស់ក្រសួងអប់រំ ក្នុងការឆ្លើយតបទៅនឹងការទាមទាររកយុត្តិធម៌នេះ នឹងធ្វើឱ្យសាធារណជនយល់ឃើញអំពីភាពអយុត្តិធម៌ និងអំពើពុករលួយនៅក្នុងស្ថាប័នក្រសួងអប់រំ ដែលជាកន្លែងផលិតធនធានមនុស្ស។ អ្នកស្រីបន្តថា យុវជន កែវ សុវណ្ណឫទ្ធ គួរតែទទួលបានការលើកទឹកចិត្ត ព្រោះរូបគេបានបង្ហាញអំពីឆន្ទៈស្រឡាញ់វិស័យអប់រំកាយ មានភាពក្លាហាន និងអត់ធ្មត់តស៊ូ។
អ្នកស្រី អ៊ុក ឆាយ៉ាវី៖«ក្រសួងអប់រំ ជាស្ថាប័នមួយដែលបញ្ជាក់ពីការពិត ហើយគឺជាក្រសួងដែលធ្វើឱ្យមហាជន ក៏ដូចជាប្រទេសជាតិហ្នឹងប្រសើរឡើង ក៏ដោយសារតែការចេះដឹងហ្នឹង ថាការចូលរួមរបសក្រសួងហ្នឹងអាចមកដោះស្រាយ(បញ្ហា)របស់យុវជនម្នាក់ហ្នឹងបាន មិនគួរណាទុកឱ្យគាត់បណ្ដែតបណ្ដោយរាប់ខែអ៊ីចឹងទេ គួរតែដោះស្រាយឱ្យឆាប់ៗទៅ ដើម្បីមុខមាត់ប្រទេសជាតិទាំងមូលផង»។
កាលពីថ្ងៃទី៩ ខែតុលា អាជ្ញាធរខណ្ឌដូនពេញក្នុងឯកសណ្ឋានស៊ីវិលបានចាប់ទាញ រុញច្រាន លោក កែវ សុវណ្ណឫទ្ធិ បញ្ចូលទៅក្នុងរថយន្ត ក្នុងពេលលោកកំពុងឈរស្រែកតវ៉ានៅពីមុខក្រសួងអប់រំ ខណៈការប្រទាញប្រទង់គ្នានៅពេលនោះ អាជ្ញាធរបានទះលោក កែវ សុវណ្ណឫទ្ធិ ចំគុម្ពត្រចៀកបណ្ដាលឱ្យលោកដួលសន្លប់ទៅលើដី។
ជុំវិញការប្រើអំពើហិង្សាលើរូបលោកជាថ្មីនេះ លោក កែវ សុវណ្ណឫទ្ធិ កាលពីថ្ងៃទី១២ តុលា បានដាក់ពាក្យបណ្ដឹងទៅកាន់ក្រសួងមហាផ្ទៃ និងអគ្គស្នងការដ្ឋាននគរបាលជាតិ ប្ដឹងអាជ្ញាធរខណ្ឌដូនពេញ។ ទោះជាយ៉ាងណាក្ដី ស្ថាប័នទាំងពីរនេះ បានរុញដាក់គ្នាទៅវិញទៅមក មិនទទួលយកពាក្យបណ្ដឹងរបស់លោក កែវ សុវណ្ណឫទ្ធិ នោះទេ។ ក្រោយការស្វះស្វែងដាក់ពាក្យបណ្ដឹងមិនរាថយ នៅទីបំផុត អគ្គនាយកដ្ឋានរដ្ឋបាលនៃក្រសួងមហាផ្ទៃ ក៏ព្រមទទួលយកពាក្យបណ្ដឹងនោះ។
លោក កែវ សុវណ្ណឫទ្ធិ អះអាងថា ប្រសិនបើក្រសួងមហាផ្ទៃមិនមានដំណោះស្រាយរកយុត្តិធម៌ឱ្យលោកទេនោះ លោកគ្រោងនឹងបន្តដាក់ពាក្យប្ដឹងទៅតុលាការទៀត។
ក្នុងពេលជាមួយគ្នា អតីតគរុនិស្សិតអប់រំកាយ និងកីឡារូបនេះ លើកឡើងថា ប្រសិនបើក្រសួងអប់រំនៅតែមិនចេញមុខបកស្រាយចំពោះភាពអយុត្តិធម៌មកលើរូបលោកទេនោះ លោកនឹងដាក់ញត្តិទៅរដ្ឋសភា នៅសប្ដាហ៍ក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។