ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នៅថ្ងៃទី១៨ ខែសីហា បញ្ជាឱ្យសមត្ថកិច្ចបិទទីស្នាក់ការសមាគមសម្ពន្ធនិស្សិតបញ្ញវន្តខ្មែរ និងឃាត់ខ្លួនសមាជិក ៤នាក់ ដោយមិនបញ្ជាក់ពីមូលហេតុ។ ការឃាត់ខ្លួននេះ គឺស្របពេលរដ្ឋាភិបាលរបស់ត្រកូល ''ហ៊ុន'' កំពុងដាក់ពង្រាយកងកម្លាំងនៅទូទាំងប្រទេសត្រៀមបង្ក្រាបអ្នកដែលហ៊ានចេញធ្វើបាតុកម្មប្រឆាំងកិច្ចសហប្រតិបត្តិតំបន់ត្រីកោណអភិវឌ្ឍន៍ CLV-DTA រួមទាំងបានចាប់ខ្លួនពលរដ្ឋជាបន្តបន្ទាប់ ដែលរិះគន់លើបណ្ដាញសង្គមថា រដ្ឋាភិបាលអាចធ្វើឱ្យបាត់ទឹកដីទៅឱ្យប្រទេសវៀតណាម ជុំវិញការបង្កើតកិច្ចសហប្រតិបត្តិតំបន់ត្រីកោណអភិវឌ្ឍជាមួយប្រទេសវៀតណាម។
សមាជិកសមាគមសម្ពន្ធនិស្សិតបញ្ញវន្តខ្មែរចំនួន៤នាក់រួមមាន ប្រធានស្ដីទីសមាគមសម្ពន្ធនិស្សិតបញ្ញវន្តខ្មែរ លោក ធី ថន អគ្គលេខាធិការសមាគមសម្ពន្ធនិស្សិតបញ្ញវន្តខ្មែរ កញ្ញា រៀម ស្រីពេជ្ររតនា និងយុវជន ២រូបទៀត គឺកញ្ញា នឿន ស្រីណែត និងកញ្ញា កាត់ ស៊ីណាត ត្រូវបានសមត្ថកិច្ចក្រុងភ្នំពេញឃាត់ខ្លួន ព្រមទាំងបិទទីស្នាក់ការសមាគមក្នុងសង្កត់អូរបែកក្អម ខណ្ឌសែនសុខ។
មុនឃាត់ខ្លួនយុវជនចំនួន ៤នាក់សមត្ថកិច្ចមិនបានបញ្ជាក់មូលហេតុឱ្យបានច្បាស់លាស់នោះទេ ដោយបន្សល់កំណត់ហេតុសរសេរដោយដៃមួយសន្លឹកបិទជាប់នៅមាត់ទ្វារដែលមានស្នាមមេដៃ កញ្ញា រៀម ស្រីពេជ្ររតនា ដែលបញ្ជាក់ថា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ លោក សេង ហៀង បញ្ជាឱ្យបិទទីស្នាក់ការសមាគម។
សមាជិកសកម្មនៃសមាគមនិស្សិតបញ្ញវន្តខ្មែរ កញ្ញា សើន ស្រីម៉ៃ ប្រាប់វិទ្យុអាស៊ីសេរីនៅថ្ងៃទី១៨ ខែសីហា ថា កញ្ញា និងយុវជនទាំង ៤រូបនោះ មានជនមិនស្គាល់អត្តសញ្ញាណបានតាមឃ្លាំមើល និងថតរូបពួកគាត់ ក្នុងអំឡុងពេលពួកគាត់បានរើអីវ៉ាន់ ដើម្បីផ្លាស់ប្ដូរទីតាំងទីស្នាក់ការសមាគមពីសង្កាត់បឹងសាឡាង ខណ្ឌទួលគោក មកសង្កត់អូរបែកក្អម ខណ្ឌសែនសុខវិញ។ កញ្ញាសង្ស័យថា ការចាប់ខ្លួនយុវជន ៤រូបនេះ គឺដោយសារពួកគាត់បានបញ្ចេញមតិនៅលើបណ្ដាញសង្គមពាក់ព័ន្ធនឹងកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTA។
កញ្ញា សើន ស្រីម៉ៃ៖«បច្ចុប្បន្នភាព ចំពោះខ្លួនឯងផ្ទាល់ ក៏មានអារម្មណ៍មិនសូវជាមានសុវត្ថិភាពដែរ ហើយអ្វីដែលបារម្ភជាងគេ គឺបងប្អូនខ្លួនឯងចំនួន ៤នាក់ ដែលបាត់ដំណឹងឈឹងហើយ។ មកទល់ឥឡូវមិនដឹងថា ពួកគាត់បានបាយទឹកហូបហើយ ឬនៅ ពីព្រោះអត់ដឹងគេនាំពួកគាត់ទៅណា»។
ក្រោយចាប់ខ្លួនមួយថ្ងៃ យុវជន ២នាក់ ក្នុងចំណោមយុវជន ៤នាក់ គឺជាសមាជិកសមាគមនិស្សិតបញ្ញវន្តខ្មែរ គឺលោក ធី ថន និងកញ្ញា រៀម ស្រីពេជ្ររតនា បានបង្ហោះសារនៅលើបណ្ដាញសង្គមពាក់ព័ន្ធនឹងភាពអយុត្តិធម៌ដែលពេលថ្មីៗ នេះ សមត្ថកិច្ចបានចាប់ខ្លួនយុវជនជាច្រើននាក់ ដោយគ្រាន់តែពួកគាត់មិនគាំទ្រគម្រោងកិច្ចសហប្រតិបត្តិការ CLV។ កាលពីថ្ងៃទី១៧ ខែសីហា កញ្ញា រៀម ស្រីពេជ្ររតនា បានចែករំលែកការឃាត់ខ្លួនយុវជនម្នាក់ដែលអាជ្ញាធរចោទគាត់ថា ញុះញង់ឱ្យមានការចូលរួមធ្វើបាតុកម្មខុសច្បាប់ដោយកញ្ញាបានសរសេរថា ចូលរួមរំលែកទុក្ខកម្ពុជា។ ដោយឡែក លោក ធី ថន បានបង្ហោះសារនៅលើគណនីហ្វេសប៊ុករបស់លោកថា ធម្មជាតិរបស់ជនផ្ដាច់ការ គឺខ្លាចញញើតនឹងកម្លាំងពលរដ្ឋក្រោកប្រឆាំងតវ៉ា។
អ្នកនាំពាក្យរងក្រសួងមហាផ្ទៃលោក ទូច សុឃៈ ប្រាប់វិទ្យុអាស៊ីសេរីឱ្យទាក់ទង ទៅសមត្ថកិច្ចដោយផ្ទាល់។ វិទ្យុអាស៊ីសេរីក៏មិនអាចទាក់ទង ចៅសង្កត់អូរបែកក្អម លោក ឃឹម រ័ត្ន និងអ្នកនាំពាក្យអគ្គស្នងការនគរបាលជាតិលោក ឆាយ គឹមខឿន ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី១៨ ខែសីហា។
យុវជនចំនួន ៤នាក់នោះ គឺសុទ្ធតែជាយុវជនសកម្មតែងតែចូលរួមសកម្មភាពទាមទារយុត្តិធម៌សង្គម និងធ្វើយុទ្ធនាការលើបណ្ដាញសង្គមស្នើឱ្យតុលាការដោះលែងសកម្មជនសង្គមទាំងអស់ឱ្យមានសេរីភាពឡើងវិញ ជាពិសេស គឺការទាមទារឱ្យតុលាការទម្លាក់ចោលចោទប្រកាន់ទាំងអស់លើ លោក កើត សារ៉ាយ។
ជុំវិញរឿងនេះ អនុប្រធានផ្នែកសិទ្ធិមនុស្សដីធ្លី ធនធានធម្មជាតិនៃសមាគមការពារសិទ្ធិមនុស្សអាដហុក លោក យិន ម៉េងលី យល់ឃើញថា កម្ពុជាមិនទាន់ដាក់ប្រទេសនៅក្នុងគ្រាអាសន្ននោះទេ ដូច្នេះ ការណ៍ដែលរដ្ឋាភិបាលចាប់យុវជនដែលបញ្ចេញមតិពីបញ្ហាដីទឹកគឺជាការបារម្ភហួសហេតុ និងសមហេតុផល។ លោកស្នើឱ្យរដ្ឋាភិបាលដោះលែងយុវជនទាំងអស់ឱ្យមានសេរីភាពឡើងវិញ។
លោក យិន ម៉េងលី៖«យើងគាំទ្របញ្ហាសុវត្ថិភាព ប៉ុន្តែ យើងសុំកុំធ្វើយ៉ាងម៉េច កុំឱ្យរំលោភលើសិទ្ធិសេរីភាពរបស់ប្រជាពលរដ្ឋក្នុងការចេញបញ្ចេញមតិ ក៏ដូចជា ធ្វើដំណើរទៅមក ដែលការការពារសុវត្ថិភាពគឺជារឿងចាំចាច់។ ប៉ុន្តែ ធ្វើម៉េចប្រទេសយើងមិនទាន់មានដាក់ប្រទេសក្នុងគ្រាអាសន្នអត់មានការណែនាំអ្វីទេ។ អ៊ីចឹង កុំឱ្យមានអ្វី ដែលរំលោភលើសិទ្ធិ ពីព្រោះការរំលោភឬក៏បំពានសិទ្ធិហ្នឹងបាន លុះត្រាតែមានច្បាប់យកមកអនុវត្ត ទើបយើងដកហូត ហើយការដកហូតសិទ្ធិហ្នឹង គឺត្រូវមានរយៈពេលណាមួយកំណត់ដោយច្បាប់»។
ក្រៅពីសមត្ថកិច្ចចាប់ខ្លួនសមាជិកសមាគមសម្ពន្ធនិស្សិតបញ្ញវន្ត ៤នាក់ហើយនោះ នៅថ្ងៃដដែលនេះសមត្ថកិច្ចក៏ចាប់ខ្លួនសកម្មជនបក្សភ្លើងទៀនចំនួន ៣នាក់បន្ថែមទៀត នៅខេត្តបៃលិន រួមមាន លោក ស៊ុន ពិសិដ្ឋ លោក ឡោ ធន់ និងលោក មាស កុល ដោយមិនបញ្ជាក់អំពីមូលហេតុ។ ដោយឡែកក្រុមយុវជនចំនួន ១៧នាក់ ដែលឡើងមកពីខេត្តផ្សេងៗ គ្នា កាលពីយប់ថ្ងៃទី១៧ ខែសីហា ក្នុងគោលបំណងចូលរួមកម្មវិធីសិក្ខាសាលា នៅថ្ងៃទី១៨ ខែសីហា ជាមួយអង្គការកម្មវិធីអភិវឌ្ឍន៍ធនធានយុវជនហៅកាត់ថា YRDP ក៏អាជ្ញាធរខណ្ឌច្បារអំពៅឃាត់ខ្លួនសួរនាំពីគម្រោងធ្វើបាតុកម្មនៅថ្ងៃទី១៨ ខែសីហា ប៉ុន្តែក្រោយមកអាជ្ញាធរដោះលែងពួកគាត់វិញ ដោយបង្ខំឱ្យពួកគាត់ធ្វើកិច្ចសន្យា។
ការបង្កើនការចាប់ខ្លួនក្រុមយុវជន និងសកម្មជនបក្សប្រឆាំងទាំងនេះ គឺស្របពេលលោក ហ៊ុន សែន និងលោក ហ៊ុន ម៉ាណែត គំរាមបង្ក្រាបប្រជាពលរដ្ឋ ដែលហ៊ានតវ៉ាមិនគាំទ្រគម្រោងកិច្ចប្រតិបត្តិការតំបន់ត្រីកោណអភិវឌ្ឍន៍ CLV។
ទន្ទឹមគ្នានេះដែរ អាជ្ញាធរខេត្តស្ទឹងត្រែងបានដោះលែងសកម្មជនព្រៃឡង់ ២នាក់ រួមមាន កញ្ញា ឆេន លក្ខិណា កញ្ញា ឆោម ស្រីផា និងឪពុកចុងរបស់កញ្ញា ឆេន លក្ខិណា លោក ម៉ៅ ញ៉ក់ ឱ្យមានសេរីភាពឡើងវិញ ក្រោយពីអាជ្ញាធរបង្ខំឱ្យពួកគាត់ធ្វើកិច្ចសន្យាឈប់បង្ហោះសារមិនគាំទ្រគម្រោងអភិវឌ្ឍន៍។
ម្ដាយកញ្ញា ឆេន លក្ខិណា លោកស្រី អេង សុផល ឱ្យវិទ្យុអាស៊ីសេរីដឹងថា អាជ្ញាធរខេត្តស្ទឹងត្រែងបានដោះលែងកូនស្រី និងប្ដីលោកស្រីឱ្យមានសេរីភាពឡើងក្រោមលក្ខខណ្ឌដ៏តឹងរ៉ឹង។ លោកស្រីបន្តថា សមត្ថកិច្ចបានព្រមានក្រុមគ្រួសារលោកស្រីមិនឱ្យជជែក ឬចែករំលែកព័ត៌មានពាក់ព័ន្ធនឹងការមិនគាំទ្រគម្រោងCLVបន្តទៀតនោះទេ បើមិនដូច្នេះ កូនស្រី និងប្ដីនឹងត្រូវជាប់ពន្ធនាគាររយៈពេល ១០ឆ្នាំពីបទរួមគំនិតក្បត់។
លោកស្រី អេង សុផល៖«គេឱ្យយើងសុំទោសសម្ដេចរដ្ឋាភិបាល ឱ្យយើងសុំទោសគេ ហើយកុំឱ្យកូនខ្ញុំមានជាលើកទី២។ បើមានលើកទី២ ហ្នឹង ទៀត(like share)និយាយទៅគេយើងក្បត់ជាតិ។ គេថា លើកនេះ ទោសកូនខ្ញុំពី ៥ឆ្នាំ ទៅដល់ ១០ឆ្នាំ រួចផុតពីហ្នឹងមានលើកទី២ទៀតគេគុណជា២ គុណជា៣ គេនិយាយអ៊ីចឹង»។
មន្ត្រីអង្គការសង្គមស៊ីវិលស្នើឱ្យរដ្ឋាភិបាលបញ្ឈប់ការចាប់ខ្លួនក្រុមយុវជន ហើយដោះលែងពួកគាត់ឱ្យមានសេរីភាពឡើងវិញពីព្រោះការបញ្ចេញមតិពីបញ្ហាបូរណភាពទឹកដីមិនមែនជារឿងខុសច្បាប់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។