អាជ្ញាធរក្នុងខេត្តកោះកុង និងអង្គការមិនមែនរដ្ឋាភិបាលផ្នែកសិទ្ធិមនុស្សរួមគ្នាជួយសង្រ្គោះកុមារីម្នាក់ ដែលត្រូវម្តាយចិញ្ចឹមចាក់ច្រវ៉ាក់ជើង មិនអោយចេញពីផ្ទះ។
ក្មេងស្រីវ័យ ៥ឆ្នាំ ត្រូវមន្ទីរសង្គមកិច្ច និងកិច្ចការនារីខេត្ត រួមជាមួយការិយាល័យប្រឆាំងការជួញដូរមនុស្ស នាំទៅបីបាច់រក្សានៅមន្ទីរសង្គមកិច្ច ជំនួសអោយម្តាយចិញ្ចឹម ដែលតែងដាក់ច្រវ៉ាក់ ជើងនាងនៅពេលម្តាយរូបនោះចេញទៅស៊ីឈ្នួលនៅចម្ការកៅស៊ូ។
លោក នាង បូរ៉ាទីណូ មន្ត្រីសម្របសម្រួលសមាគមអាដហុកខេត្តកោះកុង ដែលតាមដានរឿងនោះចាត់ទុកថាទង្វើនេះការរំលោភសិទ្ធិសំខាន់ៗរបស់កុមារកុមារ ដូចជា សិទ្ធិទទួលបានការអប់រំ សិទ្ធិទទួលអាហារគ្រប់គ្រាន់ និងរំលោភសន្ធិសញ្ញាស្ដីពីសិទ្ធិកុមា។
ការជួយសង្រ្គោះកុមារីរូបនេះកើតឡើងបន្ទាប់ពីប្រជាពលរដ្ឋនៅភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង បានផ្ដល់ព័ត៌មានជូនមន្ត្រីសិទ្ធិមនុស្ស អាជ្ញាធរ និងមន្ទីរពាក់ព័ន្ធជួយអន្តរាគមន៍នៅថ្ងៃទី ៤ កក្កដា។
អ្នកជិតខាងបានឲ្យមន្ត្រីសិទ្ធិមនុស្សដឹងថា ស្ត្រីជាម្ដាយឈ្មោះ ពៅ ស៊ីផាត់ អាយុ ៤៣ឆ្នាំ បានសុំកូន មកចិញ្ចឹមជាង ២ឆ្នាំមកហើយ ដោយស្ត្រីជាម្ដាយតែងចាក់សោរកជើងក្មេងស្រីនោះ រាល់ពេលគាត់ទៅស៊ីឈ្នួលធ្វើចម្ការកៅស៊ូចន្លោះពីម៉ោង ៧ព្រឹក ដល់ម៉ោង ១១ថ្ងៃត្រង់ និងពេលរសៀល ចន្លោះម៉ោង ១ដល់ម៉ោង ៥ល្ងាច ហើយដោះលែងក្មេងស្រី ពេលគាត់ត្រឡប់មកផ្ទះវិញ ដោយសារក្មេងស្រីរពឹសពេក។
បន្ទាប់ពីមានអន្តរាគមន៍របស់អាជ្ញាធរ ស្រ្តីជាម្ដាយត្រូវធ្វើកិច្ចសន្យាឈប់ធ្វើទង្វើបង្ខាំងមនុស្សតទៅទៀត។ អាជ្ញាធរបានអនុញ្ញាតឲ្យស្រ្តីជាម្តាយអាចសួរសុខទុក្ខកូនស្រីរបស់ខ្លួននៅពេលត្រូវការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។