សម្ព័ន្ធសហជីពសាកល (global civil society alliance CIVICUS ) អំពាវនាវឲ្យតុលាការដោះលែងលោក រ៉ុង ឈុន ប្រធានសហភាពសហជីពកម្ពុជា សកម្មជនបរិស្ថាន និងសកម្មជនព្រំដែនជាបន្ទាន់។
ការចេញសេចក្ដីថ្លែងការណ៍ចេញកាលពីថ្ងៃទី២ កុម្ភៈ បានអំពាវនាវឲ្យដោះលែង លោក រ៉ុង ឈុន នេះ នៅមុនមួយថ្ងៃ ដែលតុលាការនឹងនាំយកលោក រ៉ុង ឈុន មកជំនុំជម្រះទៀត នៅថ្ងៃពុធ ទី៣ ស្អែកនេះ។
សម្ព័ន្ធសហជីពសាកល ចាត់ទុកការចោទប្រកាន់លោក រ៉ុង ឈុន និងមនុស្សមួយចំនួនទៀត ជាហេតុផលនយោបាយ ដោយអំពាវនាវឲ្យតុលាការលើកលែងការចោទប្រកាន់អ្នកទាំងនោះវិញដោយឥតលក្ខខ័ណ្ឌ។ សម្ព័ន្ធសហជីពដដែលនេះ បានហៅការចាប់ខ្លួនលោក រ៉ុង ឈុន និងសកម្មជននេះថា ជាការប៉ុនប៉ងដើម្បីគំរាមកំហែង បំភិតបំភ័យ និងបំបិទមាត់ តាមទម្រង់នានា ដែលបង្ហាញពីការធ្លាក់ចុះនៃសិទ្ធិសេរីភាពបញ្ចេញមតិ និងការរំលោភសិទ្ធិមនុស្សធ្ងន់ធ្ងរនៅកម្ពុជា។
សម្ព័ន្ធសហជីពសាកលនេះ អំពាវនាវឲ្យសហគមន៍អន្តរជាតិ ត្រូវតែរួមគ្នាទាមទារអាជ្ញាធរកម្ពុជា ឱ្យបញ្ឈប់យុទ្ធនាការជាប្រព័ន្ធ ដើម្បីបំបិទសំឡេងរិះគន់នេះ។ សម្ព័ន្ធសហជីពសាកល បានស្រាវជ្រាវឃើញយ៉ាងច្បាស់ថា អាជ្ញាធររបបលោក ហ៊ុន សែន ប្រើប្រាស់ច្បាប់នានា ចោទប្រកាន់ ចាប់ខ្លួន សកម្មជន និងការរឹតត្បិតអង្គការសង្គមការសង្គមស៊ីវិល គឺជាការដាក់ទោសទណ្ឌ ឬទណ្ឌកម្ម ចំពោះការអនុវត្តសិទ្ធិបុគ្គលម្នាក់។ ក្រៅពីនេះទៀត សម្ព័ន្ធនេះក៏រកឃើញដែរថា របបលោក ហ៊ុន សែន កំពុងតែរឹតត្បិត និងយាយីអ្នកសារព័ត៌មាន ដោយប្រើវិធានការច្បាប់បែបនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។