រដ្ឋាភិបាល និងអង្គការសង្គមស៊ីវិលលើកឡើងផ្សេងគ្នាពីការគោរពសិទ្ធិស្ត្រី។ លោក ហ៊ុន សែន នៅតែអះអាងថា រដ្ឋាភិបាលរបស់លោកលើកកម្ពស់សិទ្ធិនារីរាប់ឆ្នាំមកនេះបានយ៉ាងល្អ ប៉ុន្តែអង្គការសង្គមស៊ីវិលនៅតែមើលឃើញភាពប្រឈម និងការរំលោភបំពានលើស្ត្រី។
ទាំងរដ្ឋាភិបាលទាំងអង្គការសង្គមស៊ីវិលក្នុងការប្រារព្ធរម្លឹកទិវាសិទ្ធិនារីអន្តរជាតិ ៨មីនាឆ្នាំនេះ មិនបានឱ្យមានការជួបជុំធំដុំនោះទេ ដោយសារតែការឆ្លងរាលដាលសាកលនៃជំងឺកូវីដ១៩។ ទោះយ៉ាងណា អ្នកពាក់ព័ន្ធព្យាយាមធ្វើដោយផ្សាយតាមបណ្ដាញសង្គម ឬចេញសេចក្ដីថ្លែងការណ៍ជាដើម។ លោកនាយករដ្ឋមន្ត្រី ហ៊ុន សែន សរសេរលើហ្វេសប៊ុកនៃខួបលើកទី១១០ នៃទិវាសិទ្ធិនារីអន្តរជាតិនេះថា សិទ្ធិទាំងឡាយរួមទាំងសិទ្ធិនារី ដែលទទួលបានឡើងវិញ ពេលនេះគឺដោយសារគុណបុណ្យថ្ងៃរំដោះ ៧មករា ឆ្នាំ១៩៧៩។ លោកអួតអាងទៀតថា រដ្ឋាភិបាលយកចិត្តទុកដាក់ជានិច្ចក្នុងការលើកកម្ពស់ស្ត្រីរហូតបង្កើតបានជាពាក្យស្លោកថា «ស្ត្រីជាឆ្អឹងខ្នងសេដ្ឋកិច្ចជាតិ»។
ប៉ុន្តែនាយិកាមជ្ឈមណ្ឌលសិទ្ធិមនុស្សកម្ពុជាអ្នកស្រី ចក់ សុភាព បានលើកឡើងថា មានការប្ដេជ្ញាជាច្រើន ចំពោះការលើកកម្ពស់ឱ្យមានសមភាពយេនឌ័រ ប៉ុន្តែបញ្ហាប្រឈមសម្រាប់ស្ត្រីនៅតែមាន។ អ្នកស្រីជំរុញទៅតួអង្គពាក់ព័ន្ធរួមគ្នាពិចារណាដោះស្រាយបញ្ហាប្រឈមរបស់ស្ត្រី ឬលុបចោលបញ្ហាវិសមភាពយេនឌ័រ។ អ្នកស្រីសង្ឃឹមថា ការដោះស្រាយបញ្ហានេះមិនមែនត្រឹមតែដាក់ចេញជាច្បាប់នៅលើក្រដាសនោះទេ ប៉ុន្តែត្រូវមានការអនុវត្តន៍ជាក់ស្ដែង ហើយត្រូវផ្ដល់ឱ្យស្ត្រីមានតួនាទីក្នុងការសម្រេចចិត្ត៖ «មិនមែនត្រឹមតែបរិមាណទេ យើងត្រូវឈានឱ្យហួសពីការកំណត់ ដែលថា ស្ត្រីត្រូវតែចូលរួមប៉ុណ្ណេះភាគរយ ប៉ុន្តែខ្ញុំយល់ថា តួលេខនេះនឹងមិនមានខ្លឹមសារទេ បើយើងមើលក្នុងការសម្រេចចិត្តភាគច្រើន គឺបុរស»។
អ្នកស្រី ចក់ សុភាព លើកឡើងបែបនេះក្នុងពិធីប្រារព្ធសិទ្ធិនារីអន្តរជាតិដែលមជ្ឈមណ្ឌលរបស់អ្នកស្រីធ្វើកាលពីថ្ងៃទី៤ ខែមីនាកន្លងទៅ។ វិបត្តិនៃជំងឺកូវីដ១៩ តម្រូវឲ្យពិធីនេះធ្វើឡើងតាមអ៊ីនធឹណិត និងរឹតត្បិតចំនួនអ្នកចូលរួម។ មជ្ឈមណ្ឌលសិទ្ធិមនុស្សកម្ពុជាលើកយកប្រធានបទ៖ «ខ្ញុំស៊ូជម្នះនឹងវិសមភាពយេនឌ័រ» មកជជែក ក្រៅពីការវេទិកាបញ្ចេញមតិសួរដេញដោល ក៏មានការសម្ដែងរឿងអប់រំខ្លី និងចម្រៀងចាប៉ីដងវែងនិយាយពីសិទ្ធិនារីដែរ។
អ្នកកាសែតស្ត្រីម្នាក់ដែលបម្រើការងារនៅវិទ្យុវីអូឌី (VOD) កញ្ញា ខាន់ លក្ខិណា និយាយថា ក្នុងកន្លែងកញ្ញាធ្វើការងារ និងស្ថាប័នផ្សេងទៀត ការចូលរួមរបស់ស្ត្រីនៅមានតិចតួចនៅឡើយ បើធៀបនឹងចំនួនបុរស។ កញ្ញា លក្ខិណា យល់ថា ដើម្បីឱ្យស្ត្រីអាចចូលរួមការងារនានា បានច្រើនដូចបុរស គឺស្ត្រី ត្រូវជួយខ្លួនឯងជាមុនសិន ដោយប្រឹងធ្វើការងារ និងពង្រឹងសមត្ថភាពខ្លួនឱ្យសង្គមឃើញពីតម្លៃស្ត្រី៖ «ធ្វើការងារមួយបានល្អគាត់អាចជួយកាត់បន្ថយភាពក្រីក្រនៅក្នុងគ្រួសារផងដែរ កុំជឿថា ស្ត្រីមិនអាចធ្វើការងារអីបានកុំជឿឱ្យសោះស្រលាញ់អីធ្វើហ្នឹងទៅ»។
ចំណែកវិទ្យាស្ថានតស៊ូមតិ និងគោលនយោបាយ ហៅកាត់ថា API បានចេញសេចក្ដីប្រកាសព័ត៌មាននៅថ្ងៃ ៨ មីនា ឱ្យដឹងថា ការសិក្សាថ្មីសឹងតែទាំងអស់បង្ហាញថា បញ្ហាគម្លាតរវាងអត្រាអក្ខរកម្មរបស់ស្ត្រី និងបុរសនៅតែមាន ហើយជាងនេះទៅទៀត បញ្ហានេះបើផ្ដោតលើក្រុមស្ត្រីងាយរងគ្រោះ ដូចជា ស្ត្រីជនជាតិដើមភាគតិច និងស្ត្រីពិការភាពគម្លាតនេះរីកកាន់តែធំ។ ស្ថាប័នដដែលលើកឡើងទៀតថា ការទទួលបានការអប់រំ និងចំណេះដឹងទូទៅ ជាពិសេស ការទទួលបានព័ត៌មានសាធារណៈនៅតែជាបញ្ហា ដែលគួរឱ្យបារម្ភសម្រាប់ស្ត្រី ដោយសារវប្បធម៌យកបុរសជាធំ ដែលអនុញ្ញាតឱ្យបុរសវ័យចំណាស់មានមុខតំណែងជាអ្នកមានអំណាចក្នុងការបន្ទោសពលរដ្ឋខ្លួនឯងដែលជាស្ត្រី។
អ្នកវិភាគនយោបាយលោកបណ្ឌិត ឡៅ ម៉ុងហៃ ឯណោះវិញ លោកសរសេរលើហ្វេសប៊ុកថា ប្រសិនចង់ឱ្យស្ត្រីចូលរួមដឹកនាំប្រទេសឱ្យបានស្មើនឹងបុរស គឺអាចចាប់ផ្ដើមពីការធ្វើច្បាប់មួយ ដែលនឹងបង្ខំឱ្យគណបក្សនយោបាយដាក់បេក្ខជននារី និងបេក្ខជនបុរសឆ្លាស់គ្នា នារីមួយ បុរសបន្ទាប់ ឬបុរសមួយ នារីបន្ទាប់ ពីក្បាលដល់ចុងបញ្ជីបេក្ខជនឈរឈ្មោះបោះឆ្នោតរបស់គណបក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។