សង្គមស៊ីវិលស្នើឲ្យរដ្ឋាភិបាលផ្សព្វផ្សាយ ឬណែនាំជាសាធារណៈ ទៅឲ្យស្ថាប័ន សហគ្រាស និងប្រជាពលរដ្ឋ កុំឲ្យរើសអើង ឬធ្វើឲ្យខាតបង់អត្ថប្រយោជន៍ណាមួយចំពោះអ្នកឆ្លងជំងឺកូវីដ១៩ នៅពេលបង្ហាញអត្តសញ្ញាណរបស់ពួកគេ។ ការអំពាវនាវនេះ គឺនៅក្រោយពេលក្រសួងសុខាភិបាលចាប់ផ្ដើមបង្ហាញអត្តសញ្ញាណអ្នកកើតជំងឺកូវីដ-១៩ ជាសាធារណៈ តាមបញ្ជារបស់លោកនាយករដ្ឋមន្ត្រី ហ៊ុន សែន។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង ឲ្យដឹងថា ការប្រកាសអំពីអត្ថសញ្ញាណរបស់អ្នករងគ្រោះ គឺជារឿងល្អ ក្នុងការការពារ និងស្វែងរកអ្នកពាក់ព័ន្ធបន្ថែម។ ប៉ុន្តែលោកថា ប្រសិនបើរដ្ឋាភិបាលមិនណែនាំ ដល់ប្រជាពលរដ្ឋឲ្យបានច្បាស់លាស់ទេ នោះនឹងអាចធ្វើឲ្យប្រជាពលរដ្ឋព្រួយបារម្ភកាន់តែខ្លាំង ហើយរើសអើងអ្នកជំងឺ រហូតឈានដល់ការខាតបង់អត្ថប្រយោជន៍នៅកន្លែងធ្វើការ និងមិនហ៊ានទៅធ្វើតេស្តជាដើម។ លោកបន្តថា ការបង្ហាញអត្តសញ្ញាណគួរតែជាជម្រើស និងសិទ្ធិរបស់ប្រជាពលរដ្ឋ ក្នុងការបង្ហាញ ឬមិនបង្ហាញអត្តសញ្ញាណរបស់ពួកគេ។ លោកបន្ថែមទៀតថា រដ្ឋាភិបាលគួរចាត់វិធានការ ឲ្យបានម៉ឺងម៉ាត់លើបុគ្គល ឬស្ថាប័ន ដែលរើសអើងលើអ្នកជំងឺកូវីដ១៩ រហូតធ្វើឲ្យអ្នកជំងឺបាត់បង់អត្ថប្រយោជន៍។
ការស្នើសុំរបស់សង្គមស៊ីវិលបែបនេះ ក្រោយពេលក្រសួងសុខាភិបាលចាប់ផ្ដើមបង្ហាញអត្តសញ្ញាណលម្អិតរបស់អ្នកជំងឺកូវីដ-១៩ នៅថ្ងៃទី០៥ ធ្នូ តទៅ តាមបញ្ជារបស់លោកនាយករដ្ឋមន្ត្រី ហ៊ុន សែន។ លោក ហ៊ុន សែន បានថ្លែងសារជាសំឡេងកាលពីយប់ថ្ងៃទៅ០៤ ធ្នូ ដោយសម្រេចឲ្យក្រសួងសុខាភិបាលបង្ហាញអត្តសញ្ញាណអ្នកកើតជំងឺកូវីដ-១៩ រួមមាន ឈ្មោះ រូបថត និងទីលំនៅជាដើម ដើម្បីងាយស្រួលស្វែងរកអ្នកដែលពាក់ព័ន្ធ ដើម្បីប្រមូលសំណាកពួកគេទៅពិនិត្យ និងធ្វើចត្តាឡីស័ក។ ក្រៅពីនេះ លោកបញ្ជាឲ្យកងកម្លាំងនគរបាលអនុវត្តឲ្យបានតឹងរ៉ឹងចំពោះអ្នកដែលធ្វើចត្តាឡីស័ក និងហាមមិនឲ្យមានការប្រមូលផ្តុំមនុស្សច្រើននោះទេ។
កម្ពុជាបានចាប់ផ្ដើមមានករណីចម្លងក្នុងសហគមន៍ កាលពីថ្ងៃទី២៨ វិច្ឆិកា។ ចាប់តាំងពីថ្ងៃទី២៩ វិច្ឆិកា ដល់ថ្ងៃទី០៣ ធ្នូ ក្រសួងសុខាភិបាលបានធ្វើតេស្តអ្នកប៉ះពាល់ក្នុងព្រឹត្តិការណ៍ឆ្លងក្នុងសហគមន៍២៨ វិច្ឆិកា បានជាង១ម៉ឺននាក់ (១០.១៤៧) ក្នុងនោះអ្នកឆ្លងកូវីដ-១៩ មានចំនួន២៩ នាក់។
ក្រសួងសុខាភិបាលបានអះអាងថា ប្រភពដើមនៃការចម្លងក្នុងសហគមន៍នេះអាចចេញមកពីអ្នកជំងឺ២រូប គឺស្ត្រីឈ្មោះ ឆែម សូនីតា អាយុ ៣០ឆ្នាំ ជាកូនស្រីបង្កើតរបស់លោក ឆែម សាវុធ និងលោក តាំង សេវិនអាប់ អាយុ ៤២ឆ្នាំ។ អ្នកទាំងពីរ អាចឆ្លងបន្តពីករណីនាំចូលជំងឺកូវីដ-១៩ ពីក្រៅប្រទេស កាលពីខែតុលា។ លោក ឆែម សាវុធ ជាអគ្គនាយកពន្ធនាគារនៃក្រសួងមហាផ្ទៃ។
អាស៊ីសេរីបានព្យាយាមសុំការបំភ្លឺរឿងនេះពីអ្នកនាំពាក្យក្រសួងសុខាភិបាលអ្នកស្រី យក់ សម្បត្តិ តែអ្នកស្រីបញ្ជាក់ដោយខ្លីថា រវល់ប្រជុំ រួចក៏ចុចផ្តាច់ទូរស័ព្ទ។ ចំណែក អ្នកនាំពាក្យមួយរូបទៀតនៃក្រសួងសុខាភិបាល គឺអ្នកស្រី ឱ វ៉ាន់ឌីន មិនលើកទូរស័ព្ទទេ នៅថ្ងៃទី០៥ ធ្នូ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (Licadho) លោក អំ សំអាត មានប្រសាសន៍ថា អ្នកដែលឆ្លងជំងឺកូវីដ១៩ គួរមានការលើកទឹកចិត្តពីគ្រប់មជ្ឈដ្ឋាន ដោយមិនត្រូវឲ្យពួកគេមានការខាតបង់អត្ថប្រយោជន៍នៅអំឡុងពេលព្យាបាលជំងឺ ឬធ្វើចត្តាឡីស័កនោះទេ។ លោកបន្តថា ការបង្ហាញអត្តសញ្ញាណអ្នកជំងឺបែបនេះ មួយផ្នែកគឺជាការរំលោភសិទ្ធិមនុស្ស ប៉ុន្តែវាក៏ជាវិធានការមួយក្នុងការផ្ដល់ព័ត៌មានដល់ប្រជាពលរដ្ឋឲ្យបានឆាប់រហ័ស និងងាយស្រួលក្នុងការទប់ស្កាត់ផងដែរ។
គិតត្រឹមល្ងាចថ្ងៃទី០៤ ខែធ្នូ កម្ពុជាមានអ្នកកើតជំងឺកូវីដ-១៩ សរុបចំនួន ៣៤៥នាក់ ក្នុងនោះអ្នកបានជាសះស្បើយមានចំនួន ៣០៥នាក់ និងអ្នកកំពុងនៅសម្រាកព្យាបាលមានចំនួន ៤០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។