អង្គការឃ្លាំមើលសិទ្ធិមនុស្សអន្តរជាតិ(Human Rights Watch) ថា រដ្ឋាភិបាលលោក ហ៊ុន សែន នៅតែបង្ក្រាបសំឡេងប្រឆាំងយ៉ាងចាស់ដៃ និងមានៈមិនព្រមស្ដារប្រជាធិបតេយ្យ និងសិទ្ធិមនុស្សឡើងវិញ។
ដោយសារតែស្ថានភាពសិទ្ធិមនុស្ស និងប្រជាធិបតេយ្យកាន់តែអាក្រក់នៅកម្ពុជា អង្គការនេះ នៅថ្ងៃទី១៥ ខែមីនា ចេញសេចក្ដីថ្លែងការណ៍មួយ ជំរុញឲ្យគណៈកម្មការអឺរ៉ុប ចាត់វិធានការកាន់តែក្តៅបន្ថែមទៀត ដើម្បីឆ្លើយតបទៅនឹងស្ថានការណ៍នេះ។
អង្គការឃ្លាំមើលសិទ្ធិមនុស្សអន្តរជាតិថ្លែងថា វិធានការកាន់តែក្ដៅនេះ គឺការដាក់ទណ្ឌកម្មលើបុគ្គល ដែលជាមន្ត្រីគ្រាក់ៗ និងមានបាតដៃកង្វក់ ជាពិសេស ឧត្ដមសេនីយ៍ទាំង ១២រូប ដែលអង្គការនេះថា បានចូលដៃក្នុងការរំលោភសិទ្ធិមនុស្ស និងបំផ្លាញប្រជាធិបតេយ្យធ្ងន់ធ្ងរនៅកម្ពុជា។
នាយឧត្ដមសេនីយ៍១២ រូប ដែលជាមនុស្សជំនិតរបស់លោក ហ៊ុន សែន រួមមាន នាយឧត្ដមសេនីយ៍ផ្កាយមាស៤ ចំនួន៧នាក់ គឺលោក ប៉ុល សារឿន លោក គន់ គីម លោក សៅ សុខា លោក នេត សារឿន លោក សុខ ផល លោក ម៉ក់ ជីតូ លោក ជួន សុវណ្ណ និងនាយឧត្ដមសេនីយ៍ឯកផ្កាយមាស៣ ចំនួន៥នាក់ គឺ លោក ជា ម៉ន លោក ប៊ុន សេង លោក ជឿន សុវណ្ណថា លោក ចាប ភក្ដី និងលោក រ័ត្ន ស្រ៊ាង។
ជាងនេះទៅទៀត អង្គការឃ្លាំមើលសិទ្ធិមនុស្សអន្តរជាតិ រកឃើញទ្រព្យសម្បត្តិដ៏មហាសាលរបស់មន្ត្រីគ្រាក់ៗ ទាំងនេះ ដែលអាចបានមកពីការប្រព្រឹត្តិអំពើពុករលួយ និងកិបកេងទ្រព្យជាតិ។
: as Hun Sen's repression intensifies, so should the EU's response.<br/> <br/>Targeted sanctions against him and his "dirty dozen", the abusive generals forming the backbone of a now de facto one-party dictatorship, long overdue:
សាររបស់អង្គការអន្តរជាតិនេះ ធ្វើឡើងស្របគ្នាទៅនឹងសេចក្ដីសម្រេចរបស់សភាសហភាពអឺរ៉ុប ដែលកាលពីថ្ងៃទី១១ ខែមីនា បានមូលមាត់គ្នា ស្នើឲ្យគណៈកម្មការអឺរ៉ុប ដាក់ទណ្ឌកម្មលើបុគ្គលក្នុងជួររដ្ឋាភិបាលលោក ហ៊ុន សែន។ អង្គការនេះស្នើសមាជិកសភាសហភាពអឺរ៉ុប ឲ្យដាក់ទណ្ឌកម្មជាទម្រង់ នៃការបិទទិដ្ឋាការ មិនឲ្យអ្នកទាំងនោះជាន់ដីសហភាពអឺរ៉ុប និងបង្កកទ្រព្យសម្បត្តិ និងផ្ដាច់ចរន្តសេដ្ឋកិច្ចនៃមន្ត្រីទាំងនោះ ព្រមទាំងក្រុមគ្រួសារពួកគាត់ និងអ្នកពាក់ព័ន្ធទាំងអស់។
កាលពីខែសីហា ឆ្នាំ២០២០ គណកម្មការអឺរ៉ុប បានដាក់ទណ្ឌកម្មរដ្ឋាភិបាលលោក ហ៊ុន សែន ដោយដកការអនុគ្រោះពន្ធទូទៅ EBA ២០%។ ទណ្ឌកម្មនោះ គឺជាការព្រមាន ចំពោះការមិនព្រមស្ដារសិទ្ធិមនុស្ស និងប្រជាធិបតេយ្យឡើងវិញ។
អាស៊ីសេរី មិនទាន់អាចសុំការបំភ្លឺពីអ្នកនាំពាក្យរដ្ឋាភិបាលលោក ហ៊ុន សែន គឺលោក ផៃ ស៊ីផាន បានទេនៅពេលនេះ។ ប៉ុន្តែអ្នកនាំពាក្យគណបក្សកាន់អំណាចលោក ឈឹម ផលវរុណ ថ្មីៗនេះ បានចំអកឲ្យសភាសហភាពអឺរ៉ុបថា សព្វថ្ងៃនេះការដាក់ទណ្ឌកម្មលែងមានប្រសិទ្ធភាពហើយ។ លោកឲ្យមើលគំរូនៅប្រទេសភូមា ដែលលោកអះអាងថា ទណ្ឌកម្មគ្មានធ្វើអ្វីរបបសឹកភូមាបាន។
ផ្ទុយពីការយល់ឃើញមន្ត្រីបក្សកាន់អំណាចរូបនេះ អង្គការឃ្លាំមើលសិទ្ធិមនុស្សអន្តរជាតិ តាមបទពិសោធន៍ ទណ្ឌកម្មលើមន្ត្រីគ្រាក់ៗ ដូចជា ការបង្កកទ្រព្យសម្បត្តិពួកគាត់បែបនេះ មានប្រសិទ្ធភាពខ្ពស់ ព្រោះវាប៉ះពាល់ដោយផ្ទាល់ដល់អ្នកទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។