អ្នកសារព័ត៌មានឯករាជ្យ លោក ម៉ិច ដារ៉ា ដែលធ្លាប់ទទួលបានពានរង្វាន់ ពីសហរដ្ឋអាមេរិក ត្រូវបានតុលាការ ដោះលែងឱ្យនៅក្រៅឃុំបណ្ដោះអាសន្ន នៅថ្ងៃទី២៤ ខែតុលា ក្រោយជាប់ឃុំជិត១ខែ។
ការដោះលែងលោក ម៉ិច ដារ៉ា ឱ្យនៅក្រៅឃុំបណ្ដោះអាសន្ននេះ ធ្វើឡើងក្រោយពីអ្នកសារព័ត៌មានឯករាជ្យរូបនេះ បានចេញពីវីដេអូសុំទោសឪពុកកូនគឺ លោក ហ៊ុន សែន និងលោក ហ៊ុន ម៉ាណែត និងទទួលស្គាល់ថា បានបង្ហោះព័ត៌មានក្លែងក្លាយ នៅលើបណ្ដាញសង្គម។
វីដេអូសុំទោសរបស់លោក ម៉ិច ដារ៉ា ត្រូវបានបណ្ដាញសារព័ត៌មានស្និទ្ធនឹងគ្រួសារ ត្រកូលហ៊ុន Fresh News ផ្សព្វផ្សាយកាលយប់ថ្ងៃទី២៣ ខែតុលា បន្ទាប់ពីតុលាការក្រុងភ្នំពេញ បាននាំខ្លួនលោកពីពន្ធនាគារខេត្តកណ្ដាលទៅសាកសួរបន្ថែម អស់ជាច្រើនម៉ោង។
វិទ្យុអាស៊ីសេរី មិនទាន់អាចសុំការឆ្លើយតបបញ្ហានេះ ពីមេធាវីការពារក្ដីលោក ម៉ិច ដារ៉ា គឺលោក ឌុច ពិសិដ្ឋ និងលោក រឹម បូរ៉ា បានឡើយទេ។
ជុំវិញរឿងនេះ នាយកទទួលបន្ទុកកិច្ចការទូទៅនៃ អង្គការការពារសិទ្ធិមនុស្ស លីកាដូ លោក អំ សំអាត អបអរ ដែលលោក ម៉ិច ដារ៉ា ត្រូវបានដោះលែងឱ្យ នៅក្រៅឃុំបណ្ដោះអាសន្ន ប៉ុន្តែ លោកថាសំណុំរឿងនេះ និងនីតិវិធីនៅ តុលាការនៅតែបន្ត ដូច្នេះ លោក ម៉ិច ដារ៉ា នៅតែមាន សម្ពាធដដែល។ លោកថា តុលាការគួរទម្លាក់ចោលបទចោទប្រកាន់ លើលោក ម៉ិច ដារ៉ា ដើម្បីឱ្យអ្នកសារព័ត៌មានឯករាជ្យ ដូចលោក ម៉ិច ដារ៉ា មានសិទ្ធិ និងសេរីភាពពេញលេញ ក្នុងការបំពេញការងារវិជ្ជាជីវៈ ជាអ្នកសារព័ត៌មានរបស់លោកបន្តទៀត។
តុលាការក្រុងភ្នំពេញ បានឃុំខ្លួនអ្នកសារព័ត៌មានឯករាជ្យលោក ម៉ិច ដារ៉ា នៅពន្ធនាគារខេត្តកណ្ដាល ដោយចោទប្រកាន់ពីបទ «ញុះញង់ឱ្យមានភាពវឹកវរធ្ងន់ធ្ងរ ដល់សន្តិសុខសង្គម» បន្ទាប់ពីចាប់ខ្លួនលោក កាលពីថ្ងៃទី៣០ ខែកញ្ញា ទាក់ទងនឹង ការបង្ហោះរូបថតរមណីយដ្ឋានបាភ្នំ ដែលអាជ្ញាធរថាកាត់ត ឬព័ត៌មានក្លែងក្លាយ។
ក្នុងជំនួបជាមួយលោកនាយករដ្ឋមន្ត្រី ហ៊ុន ម៉ាណែត កាលពីថ្ងទី២៣ តុលា នាយិកានៃទីភ្នាក់ងារសហរដ្ឋ អាមេរិកសម្រាប់ការអភិវឌ្ឍអន្តរជាតិសកល (USAID) អ្នកស្រី សាមែនថា ផៅវ័រ (Samantha Power) បានលើកឡើង អំពីកង្វល់មួយចំនួន ដូចជា ការគំរាម កំហែងលើសិទ្ធិជាមូលដ្ឋាន និងការចាប់ខ្លួន ដោយមិនត្រឹមត្រូវជាដើម ក្នុងនោះ អ្នកស្រីថាសហរដ្ឋអាមេរិកបានតាម ដានយ៉ាងដិតដល់ ចំពោះករណីចាប់ខ្លួនអ្នកសារព័ត៌មានឯករាជ្យ លោក ម៉ិច ដារ៉ា ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។