បណ្ដាញអង្គការអន្តរជាតិឃ្លាំមើលសិទ្ធិពលរដ្ឋ (CIVICUS) និងអង្គការវេទិកាអាស៊ី ដើម្បីសិទ្ធិមនុស្ស និងការអភិវឌ្ឍ (FORUM-ASIA) នៅថ្ងៃទី២ ខែតុលា បានដាក់របាយការណ៍ទៅកិច្ចប្រជុំដំណើរការត្រួតពិនិត្យជាសកលតាមកាលកំណត់ (UPR) របស់អង្គការសហប្រជាជាតិលើកទី៤៦។
ក្នុងរបាយការណ៍ ដែលបានស្នើនេះ អង្គការទាំងពីរពិនិត្យឃើញថា រដ្ឋាភិបាលកម្ពុជានៅតែរឹតត្បិតលើសេរីភាពក្នុងការបង្កើតសមាគម ការជួបប្រជុំដោយសន្តិវិធី និងការបញ្ចេញមតិ ចាប់តាំងពីការត្រួតពិនិត្យជាសកលតាមកាលកំណត់ (UPR) ឆ្នាំ២០១៩។
កាលពីឆ្នាំ២០១៩ រដ្ឋាភិបាលកម្ពុជាទទួលបានអនុសាសន៍ពីអង្គការសហប្រជាជាតិចំនួន៥០ ដោយទាមទារឱ្យរដ្ឋាភិបាលកម្ពុជាបើកលំហសម្រាប់សង្គមស៊ីវិល ។ រដ្ឋាភិបាលកម្ពុជាបានទទួលយកអនុសាសន៍ចំនួន៣៥ និងបានកត់សម្គាល់អនុសាសន៍ចំនួន១៥ ។ ទោះជាយ៉ាងណាក្ដី អ្នកជំនាញច្បាប់ និងសិទ្ធិមនុស្សជាច្រើនរកឃើញថា រដ្ឋាភិបាលកម្ពុជាមិនបានអនុវត្តតាមការអនុសាសន៍ ដែលអង្គការសហប្រជាជាតិបានស្នើនោះទេ។
របាយការណ៍ដដែលថា រដ្ឋាភិបាលបានបរាជ័យជាបន្តបន្ទាប់ក្នុងការដោះស្រាយការរឹតបន្តឹងធានាលើលំហសិទ្ធិពលរដ្ឋ ដូចដែលបានសន្យា។
អង្គការទាំងពីរថា ពួកគេមានការព្រួយបារម្ភយ៉ាងខ្លាំង ចំពោះច្បាប់រឹតត្បិតស្តីពីសមាគម និងអង្គការមិនមែនរដ្ឋាភិបាល (LANGO) ការរឹតបន្តឹងលើសហជីព និងការបង្ក្រាបក្រុមនយោបាយប្រឆាំង ដូចជា ការយាយី ការគំរាមកំហែង និងការធ្វើទុកបុកម្នេញអ្នកសារព័ត៌មាន និងការបិទប្រព័ន្ធផ្សព្វផ្សាយឯករាជ្យ បំបិទសំឡេងរិះគន់ ការចាប់ខ្លួនតាមអំពើចិត្ត និងរឹតបន្តឹងហួសហេតុទៅលើអ្នកតវ៉ាដោយសន្តិវិធីជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។