អ្នកសារព័ត៌មាន​ក្នុង​ស្រុក និង​ក្រៅ​ប្រទេស​អំពាវនាវ​ឱ្យ​តុលាការ​ទម្លាក់​បទចោទប្រកាន់ និង​ដោះលែង​លោក ម៉ិច ដារ៉ា ឱ្យ​មាន​សេរីភាព

0:00 / 0:00

អ្នកសារព័ត៌មាន​ក្នុង​ស្រុក និង​ក្រៅ​ប្រទេស​អំពាវនាវ​ឱ្យ​រដ្ឋាភិបាល និង​តុលាការ​ទម្លាក់​ចោល​បទ​ប្រកាន់​និង​ដោះលែង​លោក ម៉ិច ដារ៉ា ឱ្យ​មាន​សេរីភាព​ វិញ ដើម្បី​លោក​បាន​បន្ត​អាជីព​ជា​អ្នកសារព័ត៌មាន​ជួយ​ដល់​សង្គម។ ពួកគាត់​ចាត់​ទុក​លោក ម៉ិច ដារ៉ា ជា​អ្នកសារព័ត៌មាន ដែល​ហ៊ាន​រាយការណ៍​ព័ត៌មាន​រសើប​ ជាពិសេស​ ទាក់ទង​នឹង​ការ​ជួញដូរ​មនុស្ស និង​ការ​ឆបោក​តាម​អនឡាញ​នៅ​កម្ពុជា។

ក្រោយ​ពី​មាន​ការ​ចោទ​ប្រកាន់​និង​ឃុំខ្លួន​អ្នកសារព័ត៌មាន​ឯករាជ្យ​លោក ម៉ិច ដារ៉ា អ្នកសារព័ត៌មាន​ក្នុង​ស្រុក និង​ក្រៅ​ប្រទេស​បាន​នាំ​គ្នា ធ្វើ​យុទ្ធនាការ​លើ​បណ្ដាញ​ សង្គម​ហ្វេសប៊ុក​ដោយ​ប្ដូរ​ប្រូហ្វាល់ (Profile) ដាក់​រូប​លោក ម៉ិច ដារ៉ា ភ្ជាប់​នឹង​សារ​ទាមទារ​ឱ្យ​ដោះលែង​អ្នកសារព័ត៌មាន​រូប​នេះ​វិញ។ ក្រៅ​ពី​នោះ ពួកគាត់​បង្ហោះ​សារ​លើ​បណ្ដាញ​សង្គម និង​ខ្លះ​ទៀត រក​កិច្ច​អន្តរាគមន៍​ពី​ស្ថាន​ទូត​នានា ឱ្យ​ជួយ​ជំរុញ​ទៅ​រដ្ឋាភិបាល​កម្ពុជា​ដោះលែង​លោក ម៉ិច ដារ៉ា ឱ្យ​មាន​សេរីភាព​ផង​ដែរ។

អ្នកសារព័ត៌មាន​ឯករាជ្យ អ្នកនាង កាន់ វិច្ឆិកា បាន​សរសេរ​លើ​ហ្វេសប៊ុក កាល​ពី​ថ្ងៃ​ទី៤ ខែតុលា រៀបរាប់​ថា លោក ម៉ិច ដារ៉ា តែង​ជួយ​គេ ទាំង​ដែល​ខ្លួន​ឯង​ គ្មាន​លុយ​ចាយ។ អ្នកនាង​ថា លោក ម៉ិច ដារ៉ា ជា​មនុស្ស​ខ្វាយខ្វល់​ខ្លាំង​អំពី​បញ្ហា​ ក្នុង​សង្គម ហើយ​ការ​ខិត​ខំ​ប្រឹង​ប្រែង​របស់​លោក​កន្លង​មក អ្នកនាង​ថា លោក ម៉ិច ដារ៉ា សម​តែ​ទទួល​បាន​ពាន​រង្វាន់​ពី​រដ្ឋាភិបាល​កម្ពុជា។

រីឯ​អ្នក​សារព័ត៌មាន​មួយ​រូប​ទៀត​គឺ​លោក វ៉ាន់ វិចារ បាន​សរសេរ​លើ​ហ្វេសប៊ុក​កាល​ពី​ថ្ងៃ​ទី០២ ខែតុលា​ថា លោក មិន​ទាន់​ដឹង​ច្បាស់​ថា អាជ្ញាធរ​ចាប់​លោក ម៉ិច ដារ៉ា ដោយសារ​មូល​ហេតុ​អ្វី​នោះឡើយ ប៉ុន្តែ​ក្នុង​ស្មារតី​ជា​អ្នក​កាសែត​ដូច​គ្នា លោក​អំពាវនាវ​សូម​អាជ្ញាធរ​មេត្តា​យោគយល់​និង​ដោះលែង​លោក ម៉ិច ដារ៉ា ឱ្យ​មាន​សេរីភាព​វិញ ខណៈ​អ្នកសារព័ត៌មាន​លោក សុខ ហេង បាន​ចែក​រំលែក និង​សង្ឃឹម​ថា​លោក ម៉ិច ដារ៉ា នឹង​មាន​សេរីភាព​វិញ។

ចំណែក​អ្នក​សារព័ត៌មាន​លោក យាង សុធារិន្ទ ដែល​ធ្លាប់​ធ្វើការ​ជាមួយ​លោក ម៉ិច ដារ៉ា នៅ​វិទ្យុ​វីអូឌី (VOD) ក៏​បាន​សរសេរ​លើ​ហ្វេសប៊ុក នៅ​ថ្ងៃ​ទី៦ ខែតុលា ថា ក្នុង​នាម​បង​ប្អូន​រួម​អាជីព​ជា​អ្នក​សារព័ត៌មាន​ដូច​គ្នា ក្នុង​នាម​ជា​អតីត​សហការី​មួយ​រយៈ​ពេល​ជាមួយ​គ្នា ក្នុង​នាម​ជា​អ្នក​ធ្លាប់​ឆ្លង​កាត់​ជីវិត​កម្សត់​ក្នុង​វ័យ​កុមារ​ដូច​គ្នា ក្នុង​នាម​ជា​អ្នក​ធ្លាប់​ឆ្លង​កាត់​ជីវិត​ក្នុង​ពន្ធនាគារ​ដូច​គ្នា លោក​តែង​នឹក​គិត​អាណិត​ដល់​ លោក ម៉ិច ដារ៉ា ។

លោក​សូម​បួង​សួង​ឱ្យ​លោក ម៉ិច ដារ៉ា ទទួល​បាន​សេរីភាព​ឆាប់ៗ ដើម្បី​ជួប​ជុំ​គ្រួសារ​ឡើង​វិញ និង​បន្ត​អាជីព​ជា​អ្នកសារព័ត៌មាន​ដែល​លោក​ស្រឡាញ់ ខណៈ​អ្នក​ខ្លះ​ទៀត​ប្ដូរ​ប្រូហ្វាល់ កាន់​រូប​ថត​លោក ម៉ិច ដារ៉ា ភ្ជាប់​ពាក្យ​ថា អ្នកសារព័ត៌មាន​មិនមែន​ជា​ឧក្រិដ្ឋ​ជន​នោះ​ទេ។

អ្នក​សារព័ត៌មាន​ឯករាជ្យ លោក ភួង វ៉ាន់ថា ប្រាប់​វិទ្យុ​អាស៊ី​សេរី​នៅ​ថ្ងៃ​ទី៦ ខែតុលាថា ការ​ទាមទារ​របស់​ពួកគាត់​នេះ ដោយសារ​តែ​លោក ម៉ិច ដារ៉ា ជា​មនុស្ស​ល្អ ចេះ​ចែក​រំលែក​ចំណេះ ដែល​លោក​មាន​ទៅ​ដល់​មិត្ត​រួម​អាជីព និង​សិស្ស​ប្អូន​ក្នុង​វិស័យ​សារព័ត៌មាន។ លើស​ពី​នេះ លោក ម៉ិច ដារ៉ា គឺ​ជា​មនុស្ស​ហ៊ាន​លះ បង់​ពី​សុវត្ថិភាព​ផ្ទាស់ និង​ហ៊ាន​រាយការណ៍​រឿង​រសើប​ក្នុង​ពេល​អ្នកសារព័ត៌មាន​មួយ​ចំនួន មិន​ហ៊ាន​ធ្វើ​សេចក្ដី​ការណ៍​នោះ​ទេ។

លោក ភួង វ៉ាន់ថា៖ «លោក គឺ​ជា​មនុស្ស​ហ៊ាន​លះ​បង់​ជំនាញ​របស់​ខ្លួន។ អ៊ីចឹង យើង​អាច​ថា គាត់​ជា​មនុស្ស​ក្លាហាន​រាយការណ៍​ព័ត៌មាន ហ៊ាន​ចុះ​ស្រាវជ្រាវ​ទោះបី​ដឹង​ថា មាន​​បញ្ហា​ប្រឈម​អំឡុង​ពេល​រាយការណ៍​ក៏​គាត់​នៅ​តែ​ក្លាយ​ចុះ​ទៅ​យក​ព័ត៌មាន​ចុះ​ទៅ​តាម​ដាន​បទ​ឧក្រិដ្ឋ។ ខ្ញុំ​អាច​និយាយ​ថា អ្នក​កាសែត​ភាគ​ច្រើន​អាច​នឹង​ព្រួយ​បារម្ភ ប៉ុន្តែ​ចំពោះ​គាត់ គឺ​គាត់​ក្លាហាន មោះមុត​ក្នុង​ការងារ​របស់​គាត់ ដើម្បី​ទទួល​ព័ត៌មាន​មួយ​ដែល​លាក់​ជាក់ រាយការណ៍​ជូន​ដល់​សាធារណជន ឬ​បម្រើ​ដល់​សាធារណជន​ទាំង​មូល អំពី​បញ្ហា​នៅ​ក្នុង​សង្គម»។

ក្រៅ​ពី​អ្នកសារព័ត៌មាន​ក្នុង​ស្រុក​នោះ ក៏​មាន​អ្នកសារព័ត៌មាន​បរទេស ដែល​ធ្លាប់​ ធ្វើការ​រួម​អាជីព​ជាមួយ​លោក ម៉ិច ដារ៉ា ក៏​បាន​ធ្វើ​យុទ្ធនាការ​ទាមទារ​ឱ្យ​ដោះលែង​ លោក ម៉ិច ដារ៉ា និង​បាន​សរសេរ​ពី​ប្រវត្តិ​របស់​អ្នកសារព័ត៌មាន​ឯករាជ្យ​រូប​នេះ​ផង។

វិទ្យុ​អាស៊ី​សេរី​មិន​អាច​ទាក់ទង​សុំ​ការ​អត្ថាធិប្បាយ​បញ្ហា​នេះ ពី​អ្នក​នាំ​ពាក្យ​សាលាដំបូង​រាជធានី​ភ្នំពេញ​លោក អ៊ី រិន្ទ និង​ប្រធាន​អង្គភាព​អ្នក​នាំ​ពាក្យ​រដ្ឋាភិបាល​លោក ប៉ែន បូណា បាន​ទេ នៅ​ថ្ងៃ​ទី៦ ខែតុលា ដោយ​ទូរស័ព្ទ​ចូល​តែ​គ្មាន​អ្នក​ទទួល។

ជុំវិញ​រឿង​នេះ នាយក​ទទួល​បន្ទុក​កិច្ចការ​ទូទៅ នៃ​អង្គការ​ការពារ​សិទ្ធិ​មនុស្ស លីកាដូ លោក អំ សំអាត ប្រាប់​វិទ្យុ​អាស៊ី​សេរី​នៅ​ថ្ងៃ​ទី៦ ខែតុលា​ថា ក្រៅ​ពី​ អ្នកសារព័ត៌មាន​ជាតិ​និង​អន្តរជាតិ ក៏​មាន​ក្រុម​អង្គការ​សង្គម​ស៊ីវិល​ជាតិ អន្តរជាតិ រួម​ទាំង​បណ្ដា​ប្រទេស​លោក​សេរី ក៏​បាន​ការ​ទាមទារ​ឱ្យ​ដោះលែង​លោក ម៉ិច ដារ៉ា ដោយ​ឥត​លក្ខខណ្ឌ​ដែរ ពីព្រោះ​ការ​ចាប់​ខ្លួន​លោក ម៉ិច ដារ៉ា នេះ គឺ​ប៉ះពាល់​ដល់​ សេរីភាព​សារព័ត៌មាន និង​សេរីភាព​បញ្ចេញមតិ។

លោក អំ សំអាត៖ «ពីព្រោះ​គេ​មើល​ឃើញ​ថា ការ​ចាប់​ខ្លួន ការ​ចោទប្រកាន់​លោក ម៉ិច ដារ៉ា នេះ វា​ធ្វើ​ឱ្យ​ប៉ះពាល់​សម្រាប់​អ្នក ដែល​ធ្វើ​ព័ត៌មាន​សង្គម​សំខាន់ៗ ឬ​ព័ត៌មាន​បែប​ស៊ើបអង្កេត ជា​ចំណុច​រសើប​កន្លងមក។ អ៊ីចឹង វា​ប៉ះពាល់​ដល់​សេរីភាព នៃ​សារព័ត៌មាន»។

លោក ម៉ិច ដារ៉ា ត្រូវ​បាន​អាជ្ញាធរ​ចាប់​ខ្លួន កាល​ពី​ថ្ងៃ​ទី៣០ ខែកញ្ញា នៅ​ស្រុក​ស្រែអំបិល ខេត្តកោះកុង។ តុលាការ​ក្រុង​ភ្នំពេញ​ក្រុងភ្នំពេញ កាលពី​ថ្ងៃ​ទី១ ខែតុលា ចោទ​ប្រកាន់​លោក ម៉ិច ដារ៉ា ពី​បទ «ញុះញង់​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ចំពោះ​ការ​បង្ហោះ​រូបភាព​នៅ​លើ​បណ្ដាញ​សង្គម​របស់​លោក។ លោក​ត្រូវ​បាន​បញ្ជូន​ទៅ​ឃុំខ្លួន​នៅ​ពន្ធនាគារ​ខេត្តកណ្ដាល។

ប៉ុន្តែ​សហគមន៍​ជាតិ និង​អន្តរជាតិ​បាន​ថ្កោល​ទោស​រដ្ឋាភិបាល​លោក ហ៊ុន ម៉ាណែត ករណី​ចាប់​ខ្លួន​អ្នក​សារព័ត៌មាន​ឯករាជ្យ​លោក ម៉ិច ដារ៉ា និង​ចាត់​ទុក​ករណី​នេះ​ថា ជា​ការ​បង្ក្រាប​ទៅ​លើ​អ្នក​សារព័ត៌មាន​ឯករាជ្យ និង​គំរាម​កំហែង​អ្នក​សារព័ត៌មាន​ដទៃ​ទៀត។ បណ្ដាញ​ព័ត៌មាន​ទាំង​អស់​នេះ រួម​ទាំង​មជ្ឈដ្ឋាន​អ្នក​ការ​ទូត​អន្តរជាតិ​បង្កើន​ការ​បារម្ភ និង​ទាមទារ​ឱ្យ​ដោះ​លែង​លោក ម៉ិច ដារ៉ា ដោយ​គ្មាន​លក្ខខណ្ឌ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។