អាជ្ញាធរក្រុងកំពតសម្រេចដោះលែងពលរដ្ឋ ៩នាក់ និងព្រះសង្ឃមួយអង្គ ក្រោយពីឃាត់ខ្លួនសួរនាំជិត២០ម៉ោងពាក់ព័ន្ធនឹងការជួបជុំគ្នាផ្សាយផ្ទាល់ពីអត្ថន័យកិច្ចព្រមព្រៀងសន្តិភាពទីក្រុងប៉ារីស ក្នុងខួប៣៣ឆ្នាំ កាលពីព្រឹកថ្ងៃទី២៣ តុលា។
ទោះជាយ៉ាងណាក្តី មន្ត្រីសិទ្ធិមនុស្សថា ឃាត់ខ្លួននេះធ្វើឡើងដោយខុសច្បាប់ និងរំលោភសិទ្ធិពលរដ្ឋ និងសិទ្ធិសេរីភាពនៃការបញ្ចេញមតិធ្ងន់ធ្ងរ។
អាជ្ញាធរក្រុងកំពតបានតាក់តែងលិខិតមួយច្បាប់ឲ្យពលរដ្ឋ និងព្រះសង្ឃមួយអង្គផ្ដិតមេដៃ សន្យាឈប់ធ្វើសកម្មផ្សព្វផ្សាយកិច្ចព្រមព្រៀងសន្តិភាពទីក្រុងប៉ារីស និងច្បាប់ផ្សេងៗទៀត រួមទាំងរដ្ឋធម្មនុញ្ញដែលជាច្បាប់កំពូលរបស់ជាតិផង ដោយគ្មានការអនុញ្ញាតពីអាជ្ញាធរមូលដ្ឋាន។
នេះបើយោងតាមលិខិតរបស់អាជ្ញាធរក្រុងកំពត ដែលវិទ្យុអាស៊ីសេរីទទួលបានតាមរយៈពលរដ្ឋដែលអាជ្ញាធរឃាត់ខ្លួនកាលពីយប់ថ្ងៃទី២៣ តុលា។
ពលរដ្ឋប្រាប់វិទ្យុអាស៊ីសេរី ដោយសុំមិនបញ្ចេញឈ្មោះឲ្យដឹងបន្ទាប់ពីអាជ្ញាធរដោះលែងថា ពួកគាត់ព្រមផ្ដិតមេដៃនេះទាំងបង្ខំចិត្ត ព្រោះពួកគាត់មិនមានកំហុសអ្វីឡើយ ផ្ទុយទៅវិញអាជ្ញាធរទេដែលអនុវត្តខុសច្បាប់ និងតួនាទី លើពួកគាត់ ព្រមទាំង រំលោភសិទ្ធិពលរដ្ឋ និងរំលោភសិទ្ធិសេរីភាពនៃការបញ្ចេញមតិធ្ងន់ធ្ងរ។
ពលរដ្ឋថ្លែងលាក់ឈ្មោះ៖ «បើនិយាយតាមច្បាប់រដ្ឋធម្មនុញ្ញពួកខ្ញុំអត់បានធ្វើអីខុសទេ ឬធ្វើឲ្យប៉ះពាល់ខាតប្រយោជន៍ដល់បុគ្គលណា ឬបង្កភាពចលាចលដល់សង្គមគឺអត់មានទេ រដ្ឋធម្មនុញ្ញគឺបានចែងអំពីសិទ្ធិអំណាចរបស់ពលរដ្ឋ»។
អាជ្ញាធរក្រុងកំពតបានឃាត់ខ្លួនមនុស្សចំនួន៩ នាក់និងព្រះសង្ឃមួយអង្គ ដែលបានជួបជុំគ្នាផ្សាយផ្ទាល់អត្ថន័យកិច្ចព្រមព្រៀងសន្តិភាពទីក្រុងប៉ារីស កាលពីព្រឹកថ្ងៃទី២៣ ខែតុលា នៅត្រង់ម្តុំសួនច្បារក្រុង ជាប់មាត់ព្រែកកំពត ក្បែររូបសំណាកព្រះអង្គឌួង កាលពីម៉ោងជាង៨ព្រឹក។ បន្ទាប់មកបានបញ្ជូនពួកគាត់ទៅសួរនាំនៅសាលាក្រុងកំពត រួចហើយបន្តបញ្ជូនទៅស្នងការនគរបាលក្រុងកំពត រហូតដល់ម៉ោងជិត ១០យប់ថ្ងៃដដែលនេះ។
ពលរដ្ឋទាំងនោះមួយចំនួនរស់នៅខេត្តកំពត និងខេត្តកែប និងចំណែកយុវជនមួយរូប និងព្រះសង្ឃមួយអង្គ និមន្តពីខេត្តព្រៃវែង។
វិទ្យុអាស៊ីសេរីមិនទាន់អាចទាក់ទងអាជ្ញាធរក្រុងកំពត ដើម្បីបកស្រាយអំពីករណីនេះបាននៅឡើយទេ គិតត្រឹមម៉ោងផ្សាយនេះ។
មន្ត្រីសិទ្ធិមនុស្សនៃអង្គការអាដហុក (Adhoc) ប្រចាំការិយាល័យខេត្តកំពត លោក យន់ ផល្លី ដែលបានតាមដានរឿងនេះ យល់ឃើញថា ពលរដ្ឋបានយល់ដឹង នឹងប្រើសិទ្ធិស្របច្បាប់របស់ពួកគាត់បានត្រឹមត្រូវទៅតាមច្បាប់។
លោក យន់ ផល្លី៖ «អ៊ីចឹងពលរដ្ឋទាំងអស់គាត់អាចចូលរួមយ៉ាងសកម្មដើម្បីមជ្ឈដ្ឋានទូទៅមានការយល់ដឹងនៅក្នុងប្រទេសកម្ពុជាយើង...»។
ទាក់ទងនឹងការផ្សព្វផ្សាយពីកិច្ចព្រមព្រៀងសន្តិភាពទីក្រុងប៉ារីសនេះ អាជ្ញាធររដ្ឋាភិបាលលោក ហ៊ុន ម៉ាណែត កាលខែកក្កដា បានចាប់ខ្លួនសកម្មជនកិច្ចព្រមព្រៀងសន្តិភាពក្រុងប៉ារីសចំនួន ៤នាក់ គឺលោក ស្រ៊ុន ស្រ៊ន កញ្ញា ភឹង សោភា និងលោក សាន សិទ្ធិ និងលោក ចក់ ប៊ានមុន្នី។ មកដល់ពេលនេះអ្នកទាំង៤នោះ កំពុងជាប់ឃុំក្នុងពន្ធនាគារនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។