សហព័ន្ធ​ខ្មែរ​ក្រោម​ស្នើ​វៀតណាម​ឱ្យ​ដោះលែង​ព្រះសង្ឃ និង​សកម្មជន​សិទ្ធិមនុស្ស​ខ្មែរ​ក្រោម

0:00 / 0:00

សហព័ន្ធ​ខ្មែរ​កម្ពុជា​ក្រោម​អំពាវនាវ​ដល់សហគមន៍​អន្តរជាតិ​ ឱ្យ​ជួយ​ឃ្លាំមើល​សវនាការ​តុលាការ​វៀតណាម ​ដែល​គ្រោង​នឹង​កាត់ទោស​ព្រះ​សង្ឃ ៥អង្គ​ និង​សកម្មជន​ខ្មែរ​ក្រោម​​ ៤នាក់​ នៅ​សប្ដាហ៍​ក្រោយ​ ដើម្បី​ធានា​ថា ​តុលាការ​វៀតណាម​ផ្ដល់​យុត្តិធម៌​ដល់​ខ្មែរ​ក្រោម​ ដែល​ត្រូវ​បាន​អាជ្ញាធរ​វៀតណាម​ចាប់​ខ្លួន​ ដោយសារ​តែ​ការ​ទាមទារ​សិទ្ធិ​ស្វ័យ​សម្រេច។

តុលាការ​វៀតណាម​ខេត្តលង់ហោ ដែល​វៀតណាម​ហៅ​ថា ខេត្តវិញឡុង (Vinh Long) នឹង​បើក​សវនាការ​កាត់ទោស​ព្រះ​សង្ឃ​ខ្មែរ​ក្រោម​ ៥អង្គ និង​សកម្មជន​សិទ្ធិមនុស្ស ៤នាក់ នៅ​ថ្ងៃ​ទី២៦ និង​ទី២៧ ខែវិច្ឆិកា ក្រោយ​ចាប់​ខ្លួន​ដាក់​ពន្ធនាគារ​អស់​ជា​ច្រើន​ខែ​មក​ហើយ។ ព្រះសង្ឃ និង​សកម្មជន​ខ្មែរ​ក្រោម​ឋិត​ក្នុង​ចំណោម​មនុស្ស ១៣នាក់ ដែល​ត្រូវ​អាជ្ញាធរ​វៀតណាម​បាន​បង្ក្រាប​ជា​ប្រព័ន្ធ ស្រប​ពេល​ព្រះ​សង្ឃ និង​សកម្មជន​សិទ្ធិ​មនុស្ស​ខ្មែរ​ក្រោម​ងើប​ឡើង​ទាមទារ​សិទ្ធិ​ស្វ័យ​សម្រេច។

ក្នុង​ចំណោម​ព្រះសង្ឃ​ទាំង ៥អង្គ​នោះ រួមមាន ព្រះចៅ​អធិការ​វត្តទ្រនំសេក ព្រះភិក្ខុ ថាច់ ចន្ទតារា និង​ព្រះភិក្ខុ យឿង ខាយ ដែល​ជា​ធ្លាប់​ជា​សកម្មជន បាន​ចូល​រួម​យ៉ាង​សកម្ម​ក្នុង​ការ​ផ្សព្វផ្សាយ​សិទ្ធិ​ជនជាតិ​ដើម​ដល់​ពលរដ្ឋ​ខ្មែរ​ក្រោម​មុន​បួស។ អាជ្ញាធរ​វៀតណាម​ខេត្តលង់ហោ កាល​ពី​ថ្ងៃ​ទី២៦ និង​ថ្ងៃ​ទី២៨ ខែមីនា បាន​ចាប់​ផ្សឹក​ព្រះសង្ឃ​ទាំង ៥អង្គ និង​ចាប់​មនុស្ស​បី​នាក់​ផ្សេង​ទៀត អំពី​បទ «កេង​ចំណេញ​លើ​សិទ្ធិ​សេរីភាព និង​លទ្ធិប្រជាធិបតេយ្យ» និង​អំពី​បទ «ការ​ចាប់ខ្លួន ឃាត់ខ្លួន ឬ​ឃុំ​ខ្លួន​មនុស្ស​ដោយ​ខុស​ច្បាប់» នៃ​ក្រម​ព្រហ្មទណ្ឌ​វៀតណាម។ ទោះ​ជា​យ៉ាង​ណា​ក្ដី អង្គការ​សិទ្ធិមនុស្ស​ខ្មែរ​ក្រោម​ចាត់​ទុក​ការ​ចោទ​ប្រកាន់​របស់​តុលាការ​វៀតណាម​ថា ជា​ការ​ធ្វើ​ទុក្ខបុកម្នេញ​សាសនា និង​សិទ្ធិមនុស្ស។

កាល​ពី​ខែ​ឧសភា​កន្លង​ទៅ តុលាការ​វៀតណាម​បាន​កាត់​ទោស​សកម្មជន​សិទ្ធ​មនុស្ស​ខ្មែរ​កម្ពុជា​ក្រោម​ពីរ​នាក់ គឺ​លោក ថាច់ កឿង ឲ្យ​ជាប់​ពន្ធនាគារ ៤ឆ្នាំ និង​លោក តោ ហ្វាងចឿង ៣ឆ្នាំ ៦ខែ​រួច​ទៅ​ហើយ។

ជុំវិញ​រឿង​នេះ ប្រធាន​គណៈកម្មការ​ព័ត៌មាន​សហព័ន្ធ​ខ្មែរ​កម្ពុជា​ក្រោម ព្រះភិក្ខុ សឺង យ៉ឹងរតនា ស្នើ​ដល់​សហគមន៍​អន្តរជាតិ ដែល​មាន​ស្ថានទូត​នៅ​វៀតណាម ធ្វើ​អន្តរាគមន៍​ទៅ​វៀតណាម ដើម្បី​ឲ្យ​វៀតណាម​ដោះលែង​ព្រះ​សង្ឃ និង​សកម្មជន​ខ្មែរ​ក្រោម​ទាំង​អស់ ពីព្រោះ​សហព័ន្ធ​អះអាង​ថា ពួក​គេ​មិន​បាន​ប្រព្រឹត្ត​កំហុស​ដូច​ការ​លើក​ឡើង​របស់​វៀតណាម​នោះ​ទេ។

ស្រប​ពេល​តុលាការ​វៀតណាម​គាត់​កាត់​ទោស​ព្រះ​សង្ឃ និង​ពលរដ្ឋ​ខ្មែរ​ក្រោម​នេះ អង្គការ​សិទ្ធិ​មនុស្ស​ខ្មែរ​ក្រោម​ក៏​បាន​សំណូមពរ​ឲ្យ​រដ្ឋាភិបាល​កម្ពុជា​អន្តរាគមន៍​ទៅ​ប្រធាន​សភា​វៀតណាម​លោក ជិន ថាញ់​មិន (Tran Thanh Man) ដែល​មក​ទស្សនកិច្ច​នៅ​កម្ពុជា សប្ដាហ៍​នេះ​កុំ​ឲ្យ​រំលោភ​សិទ្ធិ និង​សាសនា​ខ្មែរ​ក្រោម និង​កុំ​រើសអើង​នឹង​ខ្មែរ​ក្រោម។

ក្នុង​ជំនួប​រវាង​ប្រធាន​ព្រឹទ្ធសភា លោក ហ៊ុន សែន និង​លោក ជិន ថាញ់មិន លោក ហ៊ុន សែន បាន​អរគុណ​វៀតណាម ដែល​អនុញ្ញាត​ឲ្យ​ភរិយា​លោក គឺ​អ្នកស្រី ប៊ុន រ៉ានី ហ៊ុន សែន បាន​ដង្ហែ​កឋិន​ទៅ​វត្តស្វាយសៀម​ថ្មី នៅ​ខេត្ត​ព្រះត្រពាំង ទោះបី​វៀតណាម​រឹតត្បិត​សេរីភាព​ពលរដ្ឋ​ខ្មែរ​មិន​ឲ្យ​ជួប​នឹង​ពលរដ្ឋ​ក្រោម​ដោយ​សេរី​ក្ដី។ លោក ហ៊ុន សែន ក៏​ស្នើ​ឱ្យ​អាជ្ញាធរ​វៀតណាម​យក​ចិត្ត​ទុក​ដាក់​លើ​ការ​ថែរក្សា​ទំនៀម​ទម្លាប់ ប្រពៃណី និង​ជំនឿ​សាសនា​របស់​ខ្មែរ​ក្រោម។ ទោះ​ជា​យ៉ាង​ណា​ក្ដី លោក ហ៊ុន សែន មិន​បាន​ស្នើ​វៀតណាម​ឱ្យ​ដោះលែង​ព្រះសង្ឃ ៥អង្គ និង​សកម្មជន​សិទ្ធិមនុស្ស ៨នាក់នោះ​ទេ។

ព្រះភិក្ខុ សឺង យ៉ឹងរតនា រំពឹង​ថា រដ្ឋាភិបាល​កម្ពុជា នឹង​លើក​យក​បញ្ហា​របស់​ពលរដ្ឋ​ខ្មែរ​ក្រោម​ទៅ​ជជែក​ជាមួយ​ប្រធាន​សភា​វៀតណាម។

បច្ចុប្បន្ន​សហព័ន្ធ និង​មូលនិធិ​សិទ្ធិមនុស្ស (Human Rights Foundation) បាន​ដាក់​ញាតិ​ទៅ​ក្រុម​ការងារ​អង្គការ​សហប្រជាជាតិ​ស្ដីពី​ការ​ឃុំ​ខ្លួន​ដោយ​បំពាន (The United Nations Working Group on Arbitrary Detention) ជំនួស​ឲ្យ​សកម្មជន​សិទ្ធិ​មនុស្ស​ខ្មែរ​ក្រោម​ពីរ​នាក់ ដែល​តុលាការ​វៀតណាម​បាន​កាត់​ឲ្យ​ជាប់​ពន្ធនាគារ​ជា​ច្រើន​ឆ្នាំ ដោយសារ​តែ​ពួកគេ​ទាមទារ​សិទ្ធិ​ជនជាតិ​ដើម។ អង្គការ​ទាំង​ពីរ​នេះ​មាន​ភស្តុតាង​បង្ហាញ​ថា អាជ្ញាធរ​វៀតណាម​បាន​បន្ត​ឃុំ​ខ្លួន​ជន​ជាតិ​ដើម​ខ្មែរ​ក្រោម​តាម​ទំនើង​ចិត្ត និង​ស្នើ​ឲ្យ​វៀតណាម​ដោះលែង​សកម្មជន​ទាំង​ពីរ​ជា​បន្ទាន់។ វៀតណាម​មិន​ទាន់​បាន​ឆ្លើយ​តប​នឹង​ញាតិ​របស់​អង្គការ​ទាំង​ពីរ​នេះ​នៅ​ឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។