ព្រះសង្ឃ និងក្រុមយុវជនជាង ១០០អង្គ/នាក់ នៅព្រឹកថ្ងៃទី៥ ធ្នូ បានជួបជុំគ្នាក្នុងបរិវេណប្រាសាទអង្គរវត្ត ដើម្បីធ្វើពិធីរំលឹកគុណបុព្វបុរស និងថ្លែងសារអបអរទិវាសិទ្ធិមនុស្សអន្តរជាតិ ថ្ងៃទី១០ ធ្នូ ក្នុងបំណងឱ្យពលរដ្ឋកម្ពុជាទទួលបានសិទ្ធិសេរីភាពពេញលេញ។
ក្រៅពីជួបជុំប្រារព្ធពិធីបួងសួងនៅបរិវេណប្រាសាទអង្គរវត្តនៅថ្ងៃទី៥ ធ្នូ ព្រះសង្ឃ និងពលរដ្ឋ ក៏គ្រោងធ្វើធម្មយាត្រាហែក្បូនពីក្រុងសៀមរាបទៅកាន់រាជធានីភ្នំពេញតាមផ្លូវជាតិលេខ៦ នៅថ្ងៃទី៦ ខែធ្នូ ដើម្បីផ្សាយមេត្តាធម៌ផង និងផ្សាភ្ជាប់ការទាមទារការគោរពសិទ្ធិមនុស្ស និងយុត្តិធម៌សង្គមផង។
យុទ្ធនាការនេះ មានការចូលរួមពីតំណាងអង្គការសង្គមស៊ីវិល និងសហជីពចំនួន ៤ ស្ថាប័ន រួមមាន សហភាពការងារកម្ពុជា (CLC) អង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ថាច្រាក់ (CHRAC) អង្គការកម្មវិធីអភិវឌ្ឍន៍ធនធានយុវជន ហៅកាត់ថា YRDP និងសមាគមសម្ព័ន្ធនិស្សិតបញ្ញាវន្តខ្មែរ។
មន្ត្រីតស៊ូមតិផ្នែកសិល្បៈ នៃអង្គការកម្មវិធីអភិវឌ្ឍន៍ធនធានយុវជន ហៅកាត់ថា YRDP អ្នកស្រី សាក់ កន្និការ បានថ្លែងក្នុងវិធីនេះថា យុវជន និងពលរដ្ឋត្រូវយល់ដឹងពីសិទ្ធិរបស់ខ្លួន ក្នុងការចូលរួមជួយកិច្ចការសង្គម និងនយោបាយ។
អ្នកស្រីស្នើរដ្ឋាភិបាល គួរតែផ្តល់ឱកាសឱ្យយុវជនចូលរួម ពង្រឹងសមត្ថភាពក្នុងវិស័យនយោបាយ ដោយគ្មានការរឹតត្បិត និងគំរាមកំហែង ដើម្បីជាធនធានអភិឌ្ឍន៍ប្រទេសជាតិ។
អ្នកស្រី សាក់ កន្និការ៖ «សិទ្ធិគឺជារបស់យើងគ្រប់គ្នា យើងទាំងអស់គ្នា ត្រូវចូលរួមការពារ និងទាមទារ មិនឱ្យមានអ្នករំលោភសិទ្ធិរបស់ពួកយើង ដែលយើងមានចែងក្នុងច្បាប់ នៅកម្ពុជាដែរ»។
ក្រុមយុវជនបានធុជធូប ក្នុងបរិវេណប្រាសាទអង្គរវត្ត នៅខាងមុខរូបចម្លាក់អ្នកតារាជ ដើម្បីរំលឹកគុណបុព្វបុរស ដែលពលីជីវិត ការពារជាតិមាតុភូមិ។ រីឯអាជ្ញាធរអប្សរាបានតាមឃ្លាំមើល និងសួរនាំ រកលិខិតអនុញ្ញាត ក៏ប៉ុន្តែពួកគេមិនបានរារាំងពិធីជួបជុំនេះនោះទេ ដោយសារក្រសួងមហាផ្ទៃបានចេញលិខិតអនុញ្ញាតឱ្យប្រារព្ធពិធីនេះ។
ចំណែក ប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ ប្រាប់វិទ្យុអាស៊ីសេរីថា យុទ្ធនាការនេះ បំណងផ្ញើសារឱ្យរដ្ឋាភិបាលត្រូវធានាសេចក្ដីថ្លៃថ្នូរ សេរីភាព និងយុត្តិធម៌ ដល់ពលរដ្ឋគ្រប់រូប។
លោកថ្លែងថា ពិធីនេះក៏មានការផ្សព្វផ្សាយមេត្តាចិត្ត និងសិទ្ធិមនុស្ស ដល់ពលរដ្ឋ ដែលរស់នៅតាមដងផ្លូវជាតិលេខ៦។
លោក កើត សារ៉ាយ៖ «ដើម្បីធ្វើឱ្យរដ្ឋាភិបាលស្រេកឃ្លាន ចង់បានសិទ្ធិ ពលរដ្ឋខ្មែរមានច្រើន មន្ត្រីអាជ្ញាធរគួរតែចូលរួមជាមួយយើង ជាជាងរឹតត្បិត ព្រោះគោលដៅរបស់យើង ធានាថា ពលរដ្ឋរស់នៅដោយភាពថ្លៃថ្នូរ នៅចំពោះមុខច្បាប់ទាំងអស់គ្នា»។
ប្រធានសហភាពការងារកម្ពុជា លោក អាត់ ធន់ ថ្លែងក្នុងពិធីនោះថា បច្ចុប្បន្នសិទ្ធិកម្មករធ្លាក់ចុះ ហើយសិទ្ធិជួបប្រជុំជាសាធារណៈ ក៏បាត់បង់ទៀត។ លោកស្នើរដ្ឋាភិបាលឱ្យពិចារណាឡើងវិញ ក្នុងការកែប្រែច្បាប់ស្ដីពីសហជីព ដែលជាច្បាប់កាត់បន្ថយសិទ្ធិកម្មករ។
លោក អាត់ ធន់៖ «យើងចង់ឃើញ កម្ពុជាដើរតាមរដ្ឋធម្មនុញ្ញ អនុវត្តឱ្យបានពីសិទ្ធិមនុស្សមានចែង មាត្រា ៣១ បញ្ជាក់ កម្ពុជាទទួលស្គាល់កតិកាសញ្ញា និងអនុសញ្ញាទាំងឡាយ របស់អង្គការសហប្រជាជាតិ ជាពិសេសសិទ្ធិផ្សេងៗទៀត ដែលមានចែងក្នុងច្បាប់»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីអ្នកនាំពាក្យគណៈកម្មាធិការសិទ្ធិមនុស្សកម្ពុជា លោក ស្រ៊ាង ចិន្តា បាននៅឡើយទេ នៅថ្ងៃទី៥ ធ្នូ ដោយទូរស័ព្ទហៅចូល តែគ្មានអ្នកលើក។
ប្រធានអង្គការសម្ព័ន្ធភាពការពារសិទ្ធិមនុស្សកម្ពុជាហៅកាត់ថា ច្រាក់ (CHRAC) លោក រស់ សុដ្ឋា បានថ្លែងក្នុងពិធីនោះថា ពលរដ្ឋទាំងអស់ត្រូវរួមគ្នាលើកកម្ពស់សិទ្ធិមនុស្ស ហើយមនុស្សគ្រប់រូប មិនថា រាស្ត្រ ឬ អ្នកនយោបាយឡើយត្រូវមានភាពស្មើគ្នាចំពោះមុខច្បាប់។
លោកបន្ថែមថា រដ្ឋធម្មនុញ្ញកម្ពុជា បានទទួលស្គាល់ការគោរពសិទ្ធិមនុស្ស ហើយរដ្ឋាភិបាលកម្ពុជាក៏ជាប់កាតព្វកិច្ចគោរពសិទ្ធិមនុស្សដែរ។
លោក រស់ សុដ្ឋា៖ «កម្ពុជាជាប់កាតព្វកិច្ចក្នុងការអនុវត្តសិទ្ធិមនុស្ស ហើយរដ្ឋមានមានកាតព្វកិច្ចបី សំខាន់គឺ គោរព ការពារ និងបំពេញ បំពេញបន្ថែមចំណុចខ្វះខាត ដើម្បីធានាថា សិទ្ធិត្រូវបានលើកតម្កើង មិនមែនធ្វើច្បាប់ ឱ្យសិទ្ធិកាន់តែរួមតួច ឬចង្អៀតទេ»។
នៅថ្ងៃទី៦ ធ្នូ ក្រុមយុវជន និងព្រះសង្ឃ នឹងធ្វើធម្មយាត្រាដើរថ្មើរជើងតាមផ្លូវជាតិលេខ៦ ចាប់ពីចំណុចទីរួមខេត្ត ឆ្ពោះទៅផ្សារដំដែក ក្នុងស្រុកសូទ្រនិគម ហើយនឹងបន្តជួបជុំគ្នាម្ដងទៀត ក្នុងរាជធានីភ្នំពេញ ដើម្បីប្រារព្ធទិវាសិទ្ធិមនុស្សអន្តរជាតិទ្រង់ទ្រាយធំ នៅថ្ងៃទី១០ ធ្នូ នៅទីលានប្រជាធិបតេយ្យ។
ពួកគេអំពាវនាវដល់ពលរដ្ឋរស់នៅតាមដងផ្លូវ ឱ្យចូលរួមហែក្បូន ដើម្បីបង្ហាញពីចិត្តមនុស្សធម៌ និង ការផ្តល់តម្លៃលើការអនុវត្តសិទ្ធិមនុស្សជាសកល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។