ក្រុមអង្គការសង្គមស៊ីវិល សហជីព និងប្រជាសហគមន៍ជាង ១៥០ស្ថាប័ននៅថ្ងៃទី០៤ កក្កដា បានចេញសេចក្តីថ្លែងការណ៍ពីរផ្សេងគ្នា ថ្កោលទោស ចំពោះការផ្ដន្ទាទោសលើសកម្មជនបរិស្ថាន ១០រូប និងឃុំខ្លួនសកម្មជនចលនាមាតាធម្មជាតិ៥រូបក្នុងពន្ធនាគារ ថាជារឿងគួរឱ្យអាម៉ាស់សម្រាប់ប្រជាជាតិខ្មែរ និងប្រព័ន្ធយុត្តិធម៌នៅកម្ពុជា។
ពួកគេស្នើឱ្យតុលាការទម្លាក់បទចោទ និងដោះលែងសកម្មជនបរិស្ថានទាំងនេះជាបន្ទាន់។
ក្រុមអង្គការស៊ីវិល សហជីព និងអ្នកការពារព្រៃឈើជាង ១៥០ស្ថាប័ន បង្ហាញក្តីកង្វល់រួមមួយ ក្នុងសេចក្តីថ្លែងការណ៍ ពីការបំបិទសំឡេងសកម្មជនការពារបរិស្ថាន ដែលតស៊ូមតិការពារធនធានធម្មជាតិ។
សេចក្តីថ្លែងការណ៍នេះ ធ្វើឡើងក្រោយពីសាលាដំបូងរាជធានីភ្នំពេញ បានសម្រេចផ្ដន្ទាទោសសកម្មជនបរិស្ថាន ១០នាក់ ដាក់ពន្ធនាគារពី ៦ ដល់ ៨ឆ្នាំពីបទ''រួមគំនិតក្បត់''និង''ប្រមាថព្រះមហាក្សត្រ'' និងបានចាប់ខ្លួនយុវជនចលនាមាតាធម្មជាតិ ៥ នាក់ រួមមាន លោក ថុន រដ្ឋា លោក លី ចាន់ដារ៉ាវុត កញ្ញា ឡុង គន្ធា កញ្ញា ភួន កែវរស្មី និងលោក យីម លាងហ៊ី ដាក់ពន្ធនាគារ។
ក្រុមអង្គការសង្គមស៊ីវិលដែលចេញសេចក្តីថ្លែងការណ៍ទាំងនោះរួមមាន សមាគមអាដហុក (Adhoc) អង្គការលីកាដូ (Licadho) សមាគមបណ្ដាញយុវជនកម្ពុជា និងមជ្ឈមណ្ឌលសិទ្ធិមនុស្សកម្ពុជា (CCHR) សមាគមធាងត្នោត សហគមន៍ការពារព្រៃឈើ និងសហគមន៍ដីធ្លីជាដើម។
សេចក្តីថ្លែងការណ៍ស្នើឱ្យអាជ្ញាធរគួរតែស្តាប់ និងចូលរួមធ្វើការជាមួយយុវជន ដោយបញ្ឈប់ការចំណាយធនធានរបស់រដ្ឋ ដើម្បីធ្វើទុក្ខបុកម្នេញគំរាមកំហែង និងដាក់ទោសទៅលើយុវជនវ័យក្មេងដែលក្លាហានការពារធនធានធម្មជាតិ។
ប្រធានសមាគមការពារសិទ្ធិមនុស្សអាដហុក លោក នី សុខា យល់ថា សកម្មជនចលនាមាតាធម្មជាតិ បានប្រើប្រាស់សិទ្ធិរបស់ខ្លួនដែលច្បាប់ការពារធ្វើកិច្ចការងារការពារបរិស្ថាន ដោយមិនគួរត្រូវរងការដាក់ទោសទណ្ឌតាមប្រព័ន្ធតុលាការនោះទេ។ ផ្ទុយទៅវិញពួកគាត់ គួរតែទទួលបានការលើកទឹកចិត្ត និងការផ្តល់ពានរង្វាន់ពីរដ្ឋាភិបាល។ «»
សេចក្តីថ្លែងការណ៍បានផ្តល់អនុសាសន៍ថា អាជ្ញាធររដ្ឋាភិបាលគួរតែឱ្យតម្លៃដល់សកម្មជនការពារបរិស្ថានទាំងនោះ មិនមែនចាប់ខ្លួនដាក់គុកនោះទេ។ រីឯការចោទប្រកាន់មិនត្រឹមត្រូវលើសកម្មភាពចលនាមាតាធម្មជាតិ ឆ្លុះបញ្ចាំងពីការមិនយល់របស់អាជ្ញាធរ ធ្វើឱ្យប៉ះពាល់យ៉ាងខ្លាំងដល់ប្រយោជន៍ជាតិ។
វិទ្យុអាស៊ីសេរីមិនទាន់អាចទាក់ទងសុំការបំភ្លឺជុំវិញសេចក្តីថ្លែងការណ៍នេះ ពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ដោយទូរស័ព្ទហៅចូលតែគ្មានអ្នកលើក នៅថ្ងៃទី៤ កក្កដា។
ជុំវិញរឿងនេះ មន្ត្រីសម្របសម្រួលគម្រោងសមាគមបណ្ដាញយុវជនកម្ពុជា CYN លោក អូត ឡាទីន យល់ថា សេចក្តីថ្លែងការណ៍នេះ ជាការបង្ហាញក្តីកង្វល់ ជុំវិញភាពមិនប្រក្រតីរបស់តុលាការ ដែលសម្រេចក្តីយ៉ាងអយុត្តិធម៌លើសកម្មជនការពារបរិស្ថាន ដែលពួកគេបានលះបង់ ដើម្បីប្រយោជន៍រួម។
ក្រុមអង្គការសង្គមស៊ីវិលទាំងនោះ ស្នើឱ្យរាជរដ្ឋាភិបាល និងតុលាការ បើកចំហសេរីភាពដល់ពលរដ្ឋដូចមានចែងក្នុងច្បាប់ជាតិ និងអន្ដរជាតិ ដើម្បីឱ្យពួកគេអាចចូលរួមសកម្មភាពក្នុងបុព្វហេតុសង្គមជាតិដោយសេរី និងគ្មានការភ័យខ្លាច ហើយត្រូវផ្តល់យុត្តិធម៌ដល់ក្រុមយុវជនចលនាមាតាធម្មជាតិទាំងអស់ ដើម្បីឱ្យពួកគេបន្តបេសកកម្មសម្រាប់ជាឧត្តមប្រយោជន៍ជាតិ។
កន្លងទៅ សកម្មជនចលនាមាតាធម្មជាតិ បានធ្វើកិច្ចការជាច្រើន ដើម្បីការពារបរិស្ថាន រួមមាន បញ្ហាដីធ្លី និងព្រៃឈើ ក្នុងឧទ្យានជាតិគិរីរម្យ ការបំពុលទឹកស្ទឹងសង្កែ ការបង្ហូរទឹកកខ្វក់ចូលស្ទឹងសៀមរាប ,ការបំពុលបរិស្ថានសមុទ្រ ការបូមខ្សាច់ខុសច្បាប់ អាជីវកម្មរ៉ែមាស ការបំផ្លាញព្រៃឈើ និង ភាពមិនប្រក្រតីជាច្រើនទៀត ដែលបំផ្លាញធនធានធម្មជាតិ ធ្វើឱ្យប៉ះពាល់បរិស្ថាន និងសង្គម ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។