ក្រុមហ៊ុនបនល្បែងណាហ្គាវើលដ៍ (NagaWorld) បង្ខំបុគ្គលិក ដែលជាសហជីពចំនួន ១២នាក់ឲ្យបញ្ចប់កិច្ចសន្យាការងារ ដោយមិនបានបញ្ជាក់ពីមូលហេតុ។ អតីតបុគ្គលិកក្រុមហ៊ុនណាហ្គាវើលដ៍ មិនអាចទទួលយកការបញ្ចប់កិច្ចសន្យាដោយដោយគ្មានកំហុស និងមិនបញ្ជាក់ពីមូលហេតុបាននោះទេ។ មន្ត្រីសហជីពថា ការបង្ខាំងបុគ្គលិកដើម្បីបង្ខំឲ្យពួកគេលាឈប់ពីកន្លែងការងារ ជាការរំលោភលើសិទ្ធិការងារធ្ងន់ធ្ងរ។
រដ្ឋបាលក្រុមហ៊ុនកាស៊ីណូណាហ្គាវើលដ៏ កាលពីថ្ងៃទី១៤ វិច្ឆិកា បានហៅបុគ្គលិក ចំនួន១២នាក់ ដែលកំពុងធ្វើការ និងជាសហជីពនៅក្នុងកាស៊ីណូណាហ្គាវើលដ៍ ទៅជួបនៅអគារមួយដែលនៅក្នុងក្រុមហ៊ុន តែបុគ្គលិកទាំង១២នាក់ បានបដិសេធ និងបានសុំជួបនៅអគារបណ្ដុះបណ្ដាលបុគ្គលិកជំនួសវិញ។
រដ្ឋបាលក្រុមហ៊ុនបានហៅ បុគ្គលិកទាំង១២នាក់ ម្នាក់ម្ដងៗ ដើម្បីឲ្យពួកគេផ្ដិតមេដៃ ឬចុះហត្ថលេខាលើក្រដាសពីរសន្លឹក ដែលរៀបចំដោយរដ្ឋបាលក្រុមហ៊ុន ទី១ គឺលិខិតបញ្ចប់កិច្ចសន្យាដោយព្រមព្រៀង និងទី២ គឺសេចក្ដីជូនដំណឹងការរំលាយកិច្ចសន្យាការងារ។
បន្ទាប់ពីបុគ្គលិកមួយចំនួនមិនព្រមផ្ដិតមេដៃ ឬចុះហត្ថលេខា ខាងក្រុមហ៊ុនណាហ្គាវើលដ៍ បានបិទទ្វាររបងតាំងពីម៉ោង៥រសៀល មិនឲ្យពួកគាត់ចេញទៅផ្ទះនោះទេ រហូតដល់ម៉ោង៧ កន្លះយប់ ក៏ឃើញមានសមត្ថកិច្ចជាច្រើនមកដល់ទីតាំងនោះ ទើបបុគ្គលិកទាំងនោះអាចចាកចេញពីក្រុមហ៊ុនបាន ។ ទោះជាយ៉ាងណា ភ្លាមៗនោះ សមត្ថកិច្ចមិនបានសាកសួរពីការបង្ខាំងបុគ្គលិកជាក់ស្ដែងនោះទេ បែរជាឲ្យបុគ្គលិក ដែលត្រូវបានក្រុមហ៊ុនបង្ខាំងទៅដាក់ពាក្យបណ្ដឹងនៅប៉ុស្តិ៍នគរបាលទៅវិញ។ ក្នុងចំណោមបុគ្គលិកចំនួន១២នាក់នោះ មានតែបុគ្គលិកម្នាក់គឺកញ្ញា សៀក កញ្ញា ដែលមិនទទួលយកសំណើនោះ ហើយបុគ្គលិក១១នាក់ផ្សេងទៀតសុទ្ធតែទទួលយកសំណើបញ្ចប់កិច្ចសន្យាដោយព្រមព្រៀង។
អតីតបុគ្គលិកណាហ្គាវើលដ៍ម្នាក់គឺ កញ្ញា សៀក កញ្ញា ដែលមិនទទួលយកសំណើទាំង២ខាងលើ ប្រាប់វិទ្យុអាស៊ីសេរីនៅថ្ងៃទី១៥ វិច្ឆិកាថា កញ្ញាមិនអាចទទួលយកការបញ្ចប់កិច្ចសន្យានេះបាននោះទេ។ កញ្ញាបន្តថា ក្រោយពីមិនទទួលយកសំណើទាំងពីរនេះ រដ្ឋបាលក្រុមហ៊ុនបានសុំគាត់ ថតរូបភ្ជាប់ជាមួយនឹងលិខិតជូនដំណឹងការរំលាយកិច្ចសន្យាការងារ តែគាត់បានបដិសេធមិនអនុញ្ញាតឲ្យថត បែរជារដ្ឋបាលបានថតជាវីដេអូ។
កញ្ញា សៀក បញ្ញា៖ «ខ្ញុំអត់ព្រមទេ ខ្ញុំអត់ព្រមទទួលយកការរំលាយកិច្ចសន្យាការងារ ខ្ញុំអត់ព្រមទទួលយកបញ្ចប់កិច្ចសន្យាការងារទេ ព្រោះអីខ្ញុំត្រូវការការងារធ្វើ ខ្ញុំអត់មានខុសអីទេ ព្រោះអីបើសិនជាក្រុមហ៊ុនចង់បញ្ចប់កិច្ចសន្យាការងារខ្ញុំ ក៏គួរតែឲ្យខ្ញុំដឹងហេតុផលដែរ ។ បើប្រើតែភាសាថា គ្រាន់តែចង់បញ្ចប់កិច្ចសន្យាការងារខ្ញុំប៉ុណ្ណឹង ខ្ញុំទទួលយកអត់បានទេ ព្រោះខ្ញុំអត់ខុសអី»។
កញ្ញាបន្ថែមថា ក្រុមហ៊ុនបញ្ឈប់បុគ្គលិកបែបនេះ ជាការរំលោភលើសិទ្ធិការងារ និងស្នើដល់រដ្ឋាភិបាលដោះស្រាយបញ្ហានេះ។
កញ្ញា សៀក បញ្ញា៖ «ខ្ញុំមានតែលើកម្រាមដៃដប់ ក្នុងនាមខ្ញុំជាពលរដ្ឋម្នាក់ ដែលទាមទារសិទ្ធិការងារ ដែលត្រឹមត្រូវ ហើយដែលត្រូវបានក្រុមហ៊ុនបញ្ឈប់ទាំងអយុត្តិធម៌អ៊ីចឹង គឺខ្ញុំពិតជាទទួលយកមិនបានមែន ខ្ញុំស្នើសុំឲ្យស្ថាប័នពាក់ព័ន្ធ មិនថា តែរដ្ឋាភិបាល ឬខាងអង្គការសិទ្ធិមនុស្សទេ សូមឲ្យគាត់ជួយរកយុត្តិធម៌ឲ្យខ្ញុំ»។
វិទ្យុអាស៊ីសេរី ពុំអាចទាក់ទងផ្នែកធនធានមនុស្ស នៃក្រុមហ៊ុនណាហ្គាវើលដ៍ ដើម្បីសុំការអត្ថាធិប្បាយជុំវិញបញ្ហានេះ បាននៅឡើយទេ នៅថ្ងៃទី១៥ វិច្ឆិកា ដោយទូរស័ព្ទចូល ប៉ុន្តែចុចបិទ។ ចំណែកឯអ្នកនាំពាក្យក្រសួងការងារលោក កត្តា អ៊ន ក៏មិនអាចទាក់ទងបានដែរ ដោយទូរស័ព្ទចូលតែគ្មានអ្នកទទួល។
ទាក់ទងបញ្ហានេះ ប្រធានសហព័ន្ធសហជីពកម្មករចំណីអាហារ និងសេវាកម្ម កម្ពុជា អ្នកស្រី អ៊ូ ទេពផល្លីន ប្រាប់អាស៊ីសេរីថា ការបង្ខាំងបុគ្គលិក ដើម្បីបង្ខំឲ្យពួកគាត់ផ្ដិតមេដៃ ឬចុះហត្ថលេខាបញ្ចប់កិច្ចសន្យាការងារ ជាទង្វើឃោរឃៅនិងរំលោភសិទ្ធិការងារធ្ងន់ធ្ងរ។ អ្នកស្រីស្នើដល់រដ្ឋាភិបាល និងតុលាការចាត់វិធានច្បាប់ចំពោះក្រុមហ៊ុនណាហ្គាវើលដ៍ ដែលរំលោភសិទ្ធិការងារធ្ងន់ធ្ងរជាគំរូដល់ថៅកែក្រុមហ៊ុនដទៃទៀត។
អ្នកស្រី អ៊ូ ទេពផល្លីន៖ «យើងចង់ឲ្យរាជរដ្ឋាភិបាលស្រុកខ្មែរយើងហ្នឹងគួរតែបញ្ជាហើយដាក់ទណ្ឌកម្មយ៉ាងធ្ងន់ ដល់និយោជិត កុំគ្រាន់តែថា កម្មករនិយោជិតទាមទារប្រើប្រាស់សិទ្ធិខ្លួនឯងមកដាក់ទោសទណ្ឌមកលើកម្មករនិយោជិត ហើយចោទប្រកាន់មកលើកម្មករនិយោជិតទៀត តែនិយោជករួចខ្លួន ហើយគេប្រើប្រាស់លុយបញ្ឈប់ បណ្ដេញចេញអីចឹង បង្ខំដាក់រូបភាពសម្លុត អីផ្សេងៗអ៊ីចឹង កន្លែងហ្នឹងហើយដែលយើងឃើញថា យុគសម័យហ្នឹងហើយមិនគួររាជរដ្ឋាភិបាលនៅស្ងៀមទេ ស្ថានភាពបែបនេះនោះ»។
អនុសញ្ញាអន្តរជាតិខាងការងារលេខ៨៧ និងច្បាប់ស្ដីពីសហជីពនៃកម្ពុជា បានផ្ដល់សិទ្ធិសេរីភាពយ៉ាងពេញលេញទៅដល់កម្មករនិយោជិត និងនិយោជកក្នុងការបង្កើត និងអនុវត្តសិទ្ធិសេរីភាពអង្គការវិជ្ជាជីវៈដោយសេរី គ្មានការបង្ខិតបង្ខំ និងគំរាមកំហែង។ ក៏ប៉ុន្តែនៅពេលបុគ្គលិកក្រុមហ៊ុនណាហ្គាវើលដ៍ ធ្វើកូដកម្មទាមទាររកដំណោះស្រាយវិវាទការងារ ដែលក្រុមហ៊ុនបានបញ្ឈប់ពួកគាត់ពីកន្លែងការងារ រដ្ឋាភិបាលមិនយកចិត្តទុកដាក់ដោះស្រាយនោះទេ ផ្ទុយទៅវិញបានប្រើប្រាស់ប្រព័ន្ធតុលាការចោទប្រកាន់លើតំណាងសហជីពឲ្យជាប់ពន្ធនាគារទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។