ក្រុមកូដករណាហ្គាវើលដ៍ (Nagaworld) ប្រមាណ ៣០នាក់ នៅថ្ងៃទី៥ វិច្ឆិកា នាំគ្នាស្លៀកពាក់ដោយយកសំរាមមកតុបតែងខ្លួនដើម្បីជាសារដាស់តឿនដល់ថៅកែបនល្បែងកាស៊ីណូណាហ្គាវើលដ៍ថា សូម្បីតែសំរាមក៏មានតម្លៃអាចយកមកកែច្នៃ ដូច្នេះឈប់ចាត់ទុកពួកគេជាសំរាមបន្តទៀត ហើយងាកដោះស្រាយវិវាទការងារឱ្យកម្មករ។
ក្រុមកូដករណាហ្គាវើលដ៍នាំគ្នាកាន់បដាធ្វើឡើងពីប្លាស្ទិក ដប ទឹក និងទុយោបឺត ដាក់តម្រៀបគ្នាដោយមានខ្លឹមសារថា អយុត្តិធម៌ និងអ្នកខ្លះទៀតតុបតែងខ្លួនដោយយកសំបកកេះមកធ្វើជាមួកពាក់ និងសរសេរលើសំបកកេះថា ទទួលយកតំណាងសមាជិកសហជីពចូលធ្វើវិញជាដើម។
កូដករណាហ្គាវើលដ៍ កញ្ញា ប៊ូ ស្រីនាង ប្រាប់វិទ្យុអាស៊ីសេរី នៅថ្ងៃទី៥ វិច្ឆិកា ថា សំរាមដែលទុកយូរគឺមានក្លិនស្អុយ ដូច្នេះបើថៅកែណាហ្គាវើលដ៍មិនព្រមដោះស្រាយវិវាទការងារឱ្យកម្មករទេ គឺប្រៀបដូចជាថៅកែណាហ្គាវើលដ៍ទុកឱ្យកេរ្តិ៍ឈ្មោះថៅកែស្អុយរលួយដូចជាសំរាមដូច្នេះដែរ។
កញ្ញា ប៊ូ ស្រីនាង៖ «ក្នុងការណ៍ដែលពួកគាត់ទុកខ្ញុំចោលអត់ព្រមដោះស្រាយនេះទុកចោលពួកខ្ញុំដូចជាសំរាមនេះវាធ្វើឱ្យថ្នាក់ដឹកនាំនៃប្រទេសមួយនេះត្រូវបានគេរិះគន់ គេថ្កោលទោស បណ្ដាប្រទេសផ្សេងៗគេថ្កោលទោសសុំឱ្យគាត់ហ្នឹងជួយមើលឃើញពួកខ្ញុំផងកុំចាត់ទុកពួកខ្ញុំដូចជាសំរាមឱ្យពួកគាត់ជួយដោះស្រាយសម្អាតពួកខ្ញុំ ឱ្យដូចសម្អាតសំរាមមកពីព្រោះសំរាមកាលទុកយូរគឺវាស្អុយរលួយ»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការងារ លោក កត្តា អ៊ន ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី៥ វិច្ឆិកា ។
បើទោះជាក្រុមកូដករណាហ្គាវើលដ៍ ប្រឈមនឹងបញ្ហាជីវភាព សុខភាព និងរងការចោទប្រកាន់ធ្ងន់ៗពីសំណាក់អាជ្ញាធរ និងអតីតនាយករដ្ឋមន្ត្រី លោក ហ៊ុន សែន ថា ជាក្រុមប្រឆាំងស៊ីឈ្នួលបម្រើបរទេស និងចង់ផ្ដួលរំលំរដ្ឋាភិបាលយ៉ាងណាក្ដី ក៏ពួកគាត់នៅតែប្រកាន់គោលជំហរតវ៉ាទាមទាររហូតដល់ថៅកែណាហ្គាវើលដ៍ ព្រមដោះស្រាយវិវាទការងារជូនពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។