កូដករនៃក្រុមហ៊ុនកាស៊ីណូ ណាហ្គាវើលដ៍ (Nagaworld) សម្រេចផ្អាកធ្វើកូដកម្មនៅថ្ងៃទី៧ ឧសភានេះ ដោយសារបញ្ហាសុខភាព និងជីវភាព។
កូដករដ៏សកម្មមួយរូប គឺលោកស្រី អាទីន ប្រាប់វិទ្យុអាស៊ីសេរីថា មូលហេតុនៃការផ្អាកកូដកម្មនេះ គឺដោយសារពួកគាត់កំពុងជួបការលំបាកខ្លាំងផ្នែកជីវភាព និងខ្លះទៀតមានបញ្ហាសុខភាពព្រោះរងអំពើហិង្សាពីសំណាក់អាជ្ញាធរ៖ « អ្នកខ្លះក៏ធ្លាក់ខ្លួនឈឺកំពុងគេងនៅពេទ្យក៏មាន ហើយអ្នកខ្លះទៀតសូម្បីតែលុយធ្វើដំណើរដើម្បីទៅកូដកម្មសឹងតែគ្មានផង ហើយដូចរូបខ្ញុំផ្ទាល់ ឥលូវចាប់ផ្ដើមធ្លាក់ខ្លួនឈឺបណ្ដើរៗហើយ។ អ៊ីចឹងបើយើងធ្វើរាល់ថ្ងៃ វាអត់អាចទៅមុខ។ អ៊ីចឹងក៏សម្រេចគ្នាបោះឆ្នោតថា សម្រាកមួយថ្ងៃសិន។ មួយរយៈនេះ យើងក៏បានផ្សាយសុំជំនួយពីសប្បុរសជនតាមរយៈប្រព័ន្ធ ដូចជាហ្វេសប៊ក ឬក៏ប្រព័ន្ធផ្សព្វផ្សាយផ្សេងៗ។ យើងសុំ ( ជំនួយ ) ជាសាធារណៈ កាត់កេរ្តិ៍ កាត់ខ្មាសហើយដល់វគ្គនេះហើយ រយៈពេល ៥ខែមកហើយ»។
លោកស្រី អាទីន បន្តថា ក្រុមកូដករមិនទាន់សម្រេចថា នឹងត្រូវធ្វើកូដកម្មវិញនៅថ្ងៃណានោះទេ ដោយត្រូវរង់ចាំការប្រជុំសម្រេចជាមួយគ្នាជាមុនសិន។ ប៉ុន្តែលោកស្រីបញ្ជាក់ថា កូដករទាំងអស់គ្នានឹងបន្តការតវ៉ាទៅមុខទៀត ដើម្បីទទួលបានយុត្តិធម៌ និងដំណោះស្រាយក្នុងវិវាទការងារមួយនេះ។
ក្រុមបុគ្គលិកកាស៊ីណូណាហ្គាវើលដ៍បានចាប់ផ្ដើមធ្វើកូដកម្មតាំងពីខែធ្នូ ឆ្នាំ២០២១ ដើម្បីទាមទារដំណោះស្រាយវិវាទការងារជាមួយភាគីក្រុមហ៊ុន ដែលពួកគាត់ចោទថា បានរំលោភសិទ្ធិ និងអនុវត្តផ្ទុយពីច្បាប់ទាក់ទងនឹងការបញ្ឈប់ពួកគាត់ពីការងារ។ ក្នុងការតវ៉ាប្រមាណ ៥ខែមកនេះ ពួកគាត់មិនត្រឹមតែមិនទទួលបានដំណោះស្រាយសមរម្យនោះទេ ប៉ុន្តែបែរជាទទួលរងអំពើហិង្សា និងការធ្វើទុក្ខបុកម្នេញពីអាជ្ញាធរក្រុងភ្នំពេញថែមទៀត។
ក្រុមអង្គការសង្គមស៊ីវិល តំណាងប្រទេសប្រជាធិបតេយ្យ ព្រមទាំងទីភ្នាក់ងារអង្គការសហប្រជាជាតិបានអំពាវនាវជាបន្តបន្ទាប់ដល់រដ្ឋាភិបាលលោក ហ៊ុន សែន ឱ្យបញ្ឈប់អំពើហិង្សាលើក្រុមកូដករ និងងាកមកជួយរកដំណោះស្រាយបញ្ចប់វិវាទការងារមួយនេះវិញ៕