កូដករបុគ្គលិកក្រុមហ៊ុនណាហ្គាវើលដ៍ (NagaWorld) ម្នាក់គឺលោកស្រី សុខ រតនា កំពុងប្រឈមគ្រោះថ្នាក់ដល់អាយុជីវិត ដោយសារតែបាត់បង់កូនក្នុងផ្ទៃ និងបន្តធ្លាក់ឈាមច្រើន។ បច្ចុប្បន្នលោកស្រីកំពុងស្ថិតក្នុងដំណាក់កាលសង្គ្រោះបន្ទាន់នៅមន្ទីរពេទ្យរុស្ស៊ី បន្ទាប់ពីសមត្ថកិច្ចក្រុងភ្នំពេញបានរុញច្រានលោកស្រីផ្ទប់នឹងរថយន្តកាលពីដើមខែឧសភា។ គ្រូពេទ្យជំនាញបញ្ជាក់ថា បើស្ថានភាពលោកស្រី សុខ រតនា នៅតែបន្តធ្លាក់ឈាម នឹងអាចឈានទៅដល់ការវះកាត់យកស្បូនចេញ ដើម្បីជួយសង្គ្រោះអាយុជីវិតម្ដាយ។
កូដករម្នាក់ដែលកំពុងតស៊ូមតិទាមទារសិទ្ធិសេរីភាពការងារនៅក្រុមហ៊ុនបនល្បែងណាហ្គាវើលដ៍គឺលោកស្រី សុខ រតនា ឱ្យដឹងថា កូនលោកស្រីបានស្លាប់នៅក្នុងផ្ទៃអស់រយៈពេលបីថ្ងៃមកហើយ ក្រោយពីលោកស្រីធ្លាក់ឈាម និងបានពិគ្រោះជាមួយគ្រូទេព្យនៅមន្ទីរពេទ្យមិត្តភាពខ្មែរ-សូវៀតកាលពីថ្ងៃទី២៨ ខែឧសភា។
លោកស្រី សុខ រតនា ប្រាប់វិទ្យុអាស៊ីសេរីនៅថ្ងៃទី២៩ ខែឧសភាថា លោកស្រីស្ទើរតែបាត់បង់អាយុជីវិត ដោយសារតែមានការធ្លាក់ឈាមឥតឈប់ឈរ និងខ្សោយអស់កម្លាំងពិសារអ្វីក៏មិនបាននោះដែរ។ លោកស្រីឱ្យដឹងទៀតថា មកដល់ពេលនេះគ្រូពេទ្យកំពុងតាមដានសុខភាពលោកស្រីបន្ថែម ហើយបើនៅតែមានការធ្លាក់ឈាមច្រើនទៀត នឹងអាចវះកាត់យកស្បូនចេញ និងបូមសម្អាតឈាមក្នុងផ្ទៃជាថ្មីទៀត ដើម្បីជួយសង្គ្រោះជីវិតលោកស្រី៖ « លោកគ្រូពេទ្យថា បើសិនជាខ្ញុំនៅតែមានការធ្លាក់ឈាម សម្អាតហើយនៅតែមានការធ្លាក់ឈាមខ្លាំង គាត់ [ គ្រូពេទ្យ ] នឹងធ្វើការវះកាត់ ដើម្បីយកតួស្បូនយើងចេញ។ ហើយខ្ញុំក៏អស់កម្លាំង ដោយសារតែ ញ៉ាំអីអត់បាន ហើយប្រឈមអស់កម្លាំងផង ល្ហិតល្ហៃ ផង ហើយយើង មកជួបរឿងបែបហ្នឹងទៀត ខ្ញុំមានអារម្មណ៍ថា ពិបាកទទួលយក។ នៅពេលដែរ [ គ្រូពេទ្យ ] សម្អាតហើយឈាម ដូចបាក់ទំនប់អ៊ីចឹង ខ្ញុំភ័យ។ ខ្ញុំមានអារម្មណ៍ថា បើនៅឈាមចឹងទៀត ខ្ញុំមិនត្រឹមតែបាត់បង់កូន វាប្រឈមមុខនឹងជីវិត ហើយវាបាត់តួស្បូនរបស់យើងទៀត វាប្រឈមច្រើន »។
លោកស្រី សុខ រតនា ឱ្យដឹងថា ប្រសិនបើស្ថិតក្នុងដំណាក់កាលវះកាត់យកស្បូនចេញ គ្រូពេទ្យបញ្ជាក់ថា លោកស្រីនឹងមិនអាចមានកូនទៀតឡើយ ហើយក៏មិនមានភាពល្អប្រសើរដូចពេលមុនដែរ៖ « និយាយទៅគាត់ [ គ្រូពេទ្យ ] បញ្ជាក់ប្រាប់យើងច្បាស់ៗដែរ ប្រសិនបើយើងវះកាត់តួស្បូន វានៅតែដៃស្បូនទេ។ អ៊ីចឹង យើងអត់អាចមានកូនបានទេ ១រយ ភាគរយ ( ១០០ %) គឺយើងអត់អាចយកកូនបានទៀតទេ។ អ្វីដែរនៅមាន នៅមានតែដៃស្បូន ស្បែកយើងនៅស្រស់ថ្លា ដោយសារតែដៃស្បូន វានៅដំណើរការនៅឡើយ វាអត់តែតួស្បូន យើងអត់អាចយកកូនបានទៀតទេ។ ខ្ញុំមានអារម្មណ៍ថា ខ្ញុំឈឺចាប់ខ្លាំងមែនទែន ដោយសារតែ ខ្ញុំជាកូដករ ហើយអាជ្ញាធរជាខ្មែរ ការងារគាត់ តួនាទីគាត់ [ អាជ្ញាធរ ] បម្រើរាស្រ្ត។ តែគាត់ [ អាជ្ញាធរ ] អត់បានបម្រើរាស្រ្ត ទេ គាត់មានតែការវាយដំ ច្រំ ធាក់រាស្រ្ត ហើយ ការពារក្រុមហ៊ុនបរទេស »។
លោកស្រី សុខ រតនា ឱ្យដឹងទៀតថា មុនពេលមានគ្រោះថ្នាក់រហូតបាត់បង់កូនលោកស្រីបែបនេះ កាលពីថ្ងៃទី១១ ឧសភា កម្លាំងអាជ្ញាធរចម្រុះ និងជនស៊ីវិលជាច្រើននាក់ បានឡោមព័ន្ធរុញច្រានលោកស្រីទាំងកម្រោលបោកខ្ទប់នឹងបង្កាន់ដៃរថយន្ត បណ្ដាលឱ្យលោកស្រីដួលបោកខ្លួននឹងថ្នល់ ពេលដែលលោកស្រីចេញតវ៉ាដើម្បីទាមទារឱ្យក្រុមហ៊ុនបនល្បែងណាហ្គាវើលដ៍គោរពច្បាប់ប្រទេសកម្ពុជា។ លោកស្រី ចាត់ទុកការបង្ក្រាបរបស់កម្លាំងសមត្ថកិច្ចមកលើកូដករឥតឈប់ឈរបែបនេះ ថាជាទង្វើអមនុស្សធម៌ និងស្លៀកពាក់ឯកសណ្ឋានអាជ្ញាធរបង្ក្រាបពលរដ្ឋស្លូតត្រង់ ដើម្បីការពារអំណាចក្រុមហ៊ុនបរទេសដែលរំលោភសិទ្ធិកម្មករខ្មែរ។
លោកស្រី សុខ រតនា បន្ថែមថា នៅពេលដែលស្ថានសុខភាពប្រសើរឡើងវិញ លោកស្រីនឹងពិភាក្សាជាមួយមេធាវី ដើម្បីពាក្យប្ដឹងអ្នកដែលពាក់ព័ន្ធជាពិសេសកម្លាំងអាជ្ញាធរដែលប្រើអំពើហិង្សាលើលោកស្រីរហូតបាត់បង់កូនក្នុងផ្ទៃ ឱ្យមកទទួលខុសត្រូវតាមផ្លូវច្បាប់៖ « ខ្ញុំមានគម្រោងការប្ដឹង ដោយសារអី ?នេះគឺជាការបាត់បង់ ហើយប្រឈមគ្រោះថ្នាក់ដល់អាយុជីវិតមនុស្សរហូតដល់តែពីរ កូនមួយខ្ញុំមួយ។ តែខ្ញុំត្រូវពិភាក្សាតាមផ្លូវច្បាប់សិន។ ប្រសិនបើគាត់ [ អាជ្ញាធរ ] វាយដំ ច្រំធាក់ខ្ញុំបានន័យថា គាត់ខុសបាត់ទៅហើយ។ តែអាជ្ញាធរនៅតែធ្វើបាបខ្ញុំ និងកូនខ្ញុំទៀត។ ទង្វើរបស់គាត់ [ អាជ្ញាធរ ] គឺសាហាវព្រៃផ្សៃ ខ្លាំងមែនទែន ហើយយើងខ្មែរដូចគ្នា មកធ្វើអ៊ីចឹង ដើម្បីការពារក្រុមហ៊ុនបរទេស »។
វិទ្យុអាស៊ីសេរី មិនអាចទាក់ទង អ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា និងអភិបាលរាជធានីក្រុងភ្នំពេញលោក ឃួង ស្រេង ដើម្បីបកស្រាយបំភ្លឺបញ្ហានេះបានទេ នៅថ្ងៃទី២៩ ខែឧសភា។
ទោះជាយ៉ាងណា ជាង៥ខែមកហើយ ដែលក្រុមកូដករភាគច្រើនជាស្រ្តី បានចេញតវ៉ា ដើម្បីទាមទារឱ្យថៅកែក្រុមហ៊ុនបនល្បែងណាហ្គាវើលដ៍បញ្ឈប់ការរំលោភសិទ្ធកម្មករ និងត្រូវគោរពសិទ្ធសហជីពនៅក្នុងកន្លែងការងារ។ ជាការឆ្លើយតប សាលាក្រុងភ្នំពេញ និងស្ថាប័ន្ធពាក់ព័ន្ធ ព្រមទាំងមន្រ្តីគ្រាក់ៗ រួមទាំងប្រព័ន្ធឃោសនានៃរបបលោក ហ៊ុន សែន ផង តែងចេញសេចក្ដីប្រកាសដោយហៅការតវ៉ារបស់ក្រុមស្រ្តីជាកូដករទាំងនេះ ថាជាក្រុមបំពុលសង្គម និងរៀបចំឈុតឆាកសម្ដែងបម្រើមហិច្ឆតានយោបាយ។ ក្រៅពីនេះ ក៏មានមន្រ្តី និងក្រុមបក្សពួកដែលសិ្នទ្ធនឹង លោក ហ៊ុន សែន តែងបន្ទាបតម្លៃក្រុមស្រ្តីកូដករទាំងនោះ ដោយប្រៀបប្រដូចនឹងមេរោគចង្រៃ និងជាក្រុមមានចេតនាធ្វើបដិវត្តពណ៌ ដើម្បីផ្តួលរំលំរដ្ឋាភិបាល។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ (LICADO) លោក អំ សំអាត មានប្រសាសន៍ថា ការបន្ទាបតម្លៃកិត្ដិយសពីសំណាក់អាជ្ញាធរទៅលើក្រុមកូដករដែលភាគច្រើនជាស្រ្តី បែបនេះហើយ គឺដើមចមក្នុងការចងគំនុំ និងក្នុងការបើកដៃឱ្យកម្លាំងសមត្ថកិច្ចបង្ក្រាបឥតឈប់ឈរលើក្រុមកូដករ។ ទោះយ៉ាងណា លោក អំ សំអាត សង្កត់ធ្ងន់ថា ការបង្ក្រាបរបស់អាជ្ញាធរឈានដល់ថ្នាក់បាត់បង់ទារកក្នុងផ្ទៃបែបនេះ គឺការរំលោភសិទ្ធិមនុស្សធ្ងន់ធ្ងរ និងទាមទារដល់ស្ថាប័នពាក់ព័ន្ធ បើកការស៊ើបអង្កេតរកជនដៃដល់មកផ្ដន្ទាទោស ឱ្យខាងតែបាន៖ « ការបាត់បង់កូននៅក្នុងផ្ទៃ ក៏វាជាអាយុជីវិតមួយដែរ។ អ៊ីចឹង វាត្រូវតែមានការស៊ើបអង្កេតមួយឱ្យបានច្បាស់លាស់ ដើម្បីរកយុត្តិធម៌តាមផ្លូវច្បាប់។អំពើហិង្សាបែបដូច្នេះ យើងចាត់ទុកថាគឺជាការរំលោភសិទ្ធមនុស្សមួយយ៉ាងធ្ងន់ធ្ងរ។ ជាពិសេស ទៅលើទារក មិនទាន់ទទួលការដឹងក្ដីនៅឡើយ។ បញ្ហាទាំងអស់នេះ យើងឃើញថា ជាបទពិសោធន៍មួយ ត្រូវតែជៀសវាង នូវការប្រើប្រាស់អំពើហិង្សា ទៅលើក្រុមកូដករ ដែលធ្វើកូដកម្មដែលអហិង្សា »។
កន្លងទៅអ្នកជំនាញផ្នែកសិទ្ធិមនុស្សជាតិ អន្តរជាតិ ក្រុមសហជីព ព្រមទាំងស្ថាប័នអន្តរជាតិជាច្រើនទៀត បានចេញសេចក្ដីថ្លែងការណ៍ថ្កោលទោសរបបលោក ហ៊ុន សែន ដោយសារតែបានប្រើកម្លាំងអាជ្ញាធរ ដើម្បីរារាំង ក្នុងការព្យាយាមដាក់សម្ពាធឱ្យកូដករបញ្ឈប់ការទាមទារដំណោះស្រាយការងារ និងមានចេតនាឱ្យសំឡេងសហជីពមានភាពចុះខ្សោយ។ ពួកគេ អំពាវនាវដល់រដ្ឋាភិបាល លោក ហ៊ុន សែន ឱ្យបញ្ឈប់ការធ្វើទុក្ខបុកម្នេញលើក្រុមកូដករណាហ្គាវើលដ៍តទៅទៀត និងត្រូវងាកមកដំណោះស្រាយវិវាទការងារដ៏រ៉ាំរ៉ៃនេះស្របតាមច្បាប់ស្ដីពីការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។