ក្រុមកូដករបុគ្គលិកក្រុមហ៊ុនណាហ្គាវើលដ៍ (NagaWorld) ជាច្រើននាក់កំពុងប្រឈមបញ្ហាសុខភាពដោយសាររងការប្រើអំពើហិង្សាពីសំណាក់អាជ្ញាធរក្រុងភ្នំពេញជាច្រើនថ្ងៃជាប់ៗគ្នាកន្លងមកនេះ។ ពួកគាត់ខកចិត្តចំពោះអាជ្ញាធរដែលមិនបានដើរតួនាទីបម្រើរាស្ត្រក្នុងការរកដំណោះស្រាយឱ្យបានត្រឹមត្រូវដើម្បីបញ្ចប់វិវាទការងាររ៉ាំរ៉ៃមួយនេះ។
ក្រុមកូដករក្រុមហ៊ុនកាស៊ីណូណាហ្គាវើលដ៍ (NagaWorld) ឱ្យវិទ្យុអាស៊ីសេរីដឹងនៅថ្ងៃទី៣ ខែមេសា ថា ពួកគាត់ឈឺចាប់ពេញរាងកាយ និងមានស្លាកស្នាមជាំលើដងខ្លួន ក្រោយពីអាជ្ញាធរបានដាក់កម្លាំងឡោមព័ន្ធប្រើហិង្សាលើពួកគាត់ទាំងកម្រោលក្នុងរយៈពេលប៉ុន្មានថ្ងៃចុងក្រោយនេះ។
កូដករ និងជាបុគ្គលិកក្រុមហ៊ុនកាស៊ីណូណាហ្គាវើលដ៍ កញ្ញា ប៉ែន រាសី ប្រាប់វិទ្យុអាស៊ីសេរីថា កញ្ញានិងកូដករផ្សេងទៀតដែលភាគច្រើនជាស្ត្រីមានសុខភាពទ្រុឌទ្រោមខ្លាំង និងអ្នកខ្លះទៀតគ្មានលទ្ធភាពគ្រប់គ្រាន់ បានត្រឹមតែទិញថ្នាំសម្រាកព្យាបាលនៅផ្ទះ។ កញ្ញាបញ្ជាក់ថា កូដករភាគច្រើនសុទ្ធតែមានស្នាមជាំលើរាងកាយដូចៗគ្នា និងខ្សោះអស់កម្លាំងដោយសារតែអាជ្ញាធរព្យាយាមរារាំងក្រុមកូដករដោយប្រើអំពើហិង្សា មិនឱ្យកូដករឈរតវ៉ាដោយសន្តិវិធីនៅក្បែរអគារក្រុមហ៊ុន៖ «ខ្ញុំសោកស្ដាយទង្វើក្រុមអាជ្ញាធរ និងក្រសួងពាក់ព័ន្ធទាំងអស់ជាពិសេសក្រសួងការងារអត់បាន ដោះស្រាយបញ្ចប់វិវាទនេះ បែរជាលម្អៀងទៅខាងក្រុមហ៊ុន។ ប្រសិនជាក្រសួងការងារជា ចំណុចកណ្ដាលដោះស្រាយបញ្ចប់វិវាទនេះ គឺស្រួលណាស់ មិនមែនអូសបន្លាយពេលដល់ពេលនេះទេ»។
កូដករម្នាក់ទៀត កញ្ញា ណុប រ៉ាំរ៉ាវ និយាយថា ការបង្ក្រាបរបស់អាជ្ញាធរមិនមែនជាដំណោះស្រាយបញ្ចប់វិវាទការងារនេះឡើយ។ កញ្ញាលើកទឹកចិត្តដល់អាជ្ញាធរជំរុញឱ្យភាគីក្រុមហ៊ុនគោរពតាមលក្ខខណ្ឌចរចាទាំង៩ចំណុច និងត្រូវបញ្ឈប់រាល់ទម្រង់នៃអំពើហិង្សាលើកូដករដែលប្រើសិទ្ធិស្របច្បាប់ទាមទារសិទ្ធិសេរីភាពក្នុងកន្លែងធ្វើការ៖ «កាលពីម្សិលមិញពិបាកខ្លាំង ព្រោះមេឃភ្លៀងតែអាជ្ញាធរបានត្រៀមអាវភ្លៀង ហើយកូដករខ្លះក៏មានខ្លះក៏អត់។ អាជ្ញាធរក៏បានរុញកូដករកៀបជើងដែរ។ ពេលមកវិញ អាជ្ញាធរទម្លាក់នៅទីលានប្រជាធិបតេយ្យដដែល ប៉ុន្តែអ្វីដែលពិបាកគឺមេឃភ្លៀងខ្លាំង គ្នាពួកខ្ញុំជួយចូរលុយគ្នាហៅម៉ូតូកង់បីដើម្បីដល់ទីតាំងទៅដល់កន្លែងផ្ញើម៉ូតូ»។
រយៈពេលចុងក្រោយនេះ អាជ្ញាធរបង្ក្រាបឥតឈប់ឈរលើក្រុមកូដករ ដែលហ៊ានចេញស្វែងរកដំណោះស្រាយដោយសន្តិវិធី។ អាជ្ញាធរបានរុញច្រាន អូសសែងក្រុមកូដករឱ្យឡើងរថយន្ត ដើម្បីដឹកយកទៅទុកចោលនៅតំបន់ជាយក្រុង។ ជាពិសេស កាលពីថ្ងៃទី០២ មេសា អាជ្ញាធរ និងជនស្លៀកពាក់ស៊ីវិលជាច្រើននាក់ បានឡោមព័ទ្ធរុញច្រានកូដករណាហ្គាវើលដ៍ជាង ១រយ (១៣៥) នាក់ទាំងកណ្ដាលភ្លៀង ព្រមទាំងជេរប្រមាថបង្ខំកូដករឱ្យឡើងរថយន្តក្រុងពេលពួកគាត់ជួបជុំតវ៉ាក្បែរអគារក្រុមហ៊ុន។ ក្រុមកូដករ ចាត់ទុកទង្វើអាជ្ញាធរបែបនេះថា ជាការរំលោភបំពានសិទ្ធិជាមូលដ្ឋានស្របច្បាប់របស់ក្រុមកូដករ។
វិទ្យុអាស៊ីសេរីមិនអាចទាក់ទងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា និងអ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាល លោក កត្តា អ៊ន ដើម្បីបំភ្លឺបញ្ហានេះបានទេនៅថ្ងៃទី០៣ មេសា។
ប៉ុន្តែសាលាក្រុងភ្នំពេញបានសេចក្ដីប្រកាសជាហូរហែដោយចោទប្រកាន់ថា ក្រុមកូដករជាក្រុមធ្វើបាតុកម្មខុសច្បាប់។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (Licadho) លោក អំ សំអាត មើលឃើញថា ក្រសួងការងារនិងភាគីក្រុមហ៊ុនហាក់មិនបានប្រឹងប្រែងដោះស្រាយវិវាទការងារនេះឱ្យបានត្រូវត្រឹមតាមច្បាប់នោះឡើយ។ ផ្ទុយទៅវិញ កូដករបែរជារងសម្ពាធ និងហិង្សាកាន់តែខ្លាំងពីការបង្ក្រាបរបស់អាជ្ញាធរ។ លោកបន្តថា បើអាជ្ញាធរ បន្តប្រើអំពើហិង្សាលើកូដករបែបនេះ នោះនឹងកាន់តែជះឥទ្ធិពលអវិជ្ជមានបន្ថែមទៀតដល់រដ្ឋាភិបាល៖ «ប្រសិនជាភាគីពាក់ព័ន្ធទាំងអស់រួមគ្នា ពន្លឿននីតិវិធីក្នុងការដោះស្រាយវិវាទការងារជាមួយអតីតបុគ្គលិក ឬបុគ្គលិកកំពុងធ្វើកូដកម្មនេះវាជារឿងល្អ។ មួយវិញទៀតវាមិនជះឥទ្ធិពលទាក់ទងនឹងការរំលោភសិទ្ធិការងារ រំលោភសិទ្ធិមនុស្ស ឬក៏ទម្រង់ហិង្សាផ្សេងៗប៉ះពាល់ដល់បុគ្គលិក ឬអតីតបុគ្គលិកដែលជាស្ត្រីនោះ»។
កាលពីថ្ងៃទី២៩ មីនា ភាគីក្រុមហ៊ុនបានបញ្ជាក់ពីជំហរដដែលដោយបដិសេធមិនទទួលយកកម្មករជាង២០០នាក់ និងថ្នាក់ដឹកនាំសហជីពឱ្យចូលធ្វើការវិញឡើយ។ ក្រុមកូដករថា ការបដិសេធរបស់ភគីក្រុមហ៊ុនច្រើនលើកច្រើនសាមកនេះបង្ហាញថា ថៅកែក្រុមហ៊ុនណាហ្គាវើលដ៍ពិតជាមានចេតនាចង់រំលាយសហជីពឯករាជ្យទាំងស្រុង។
ក្រសួងការងារក៏បានប្រកាសឱ្យភាគីទាំងពីរពិចារណាឡើងវិញក្នុងការចរចារកដំណោះស្រាយវិវាទការងារនេះម្ដងទៀតនៅថ្ងៃទី០៦ មេសា ខាងមុខ។
ទោះជាយ៉ាងណា ក្រុមកូដករអះអាងថា ពួកគាត់នឹងបន្តចេញធ្វើកូដកម្មដោយសន្តិវិធីរហូតដល់មានដំណោះស្រាយពីថៅកែ បើទោះបីជារងការធ្វើទុក្ខបុកម្នេញយ៉ាងណាក្ដី។ ពួកគាត់ទទូចឱ្យតុលាការទម្លាក់បទចោទលើថ្នាក់ដឹកនាំសហជីពដើម្បីបើកផ្លូវឱ្យមានការចរចាប្រកបដោយតម្លាភាពនិងយុត្តិធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។