ក្រុមអង្គការសង្គមស៊ីវិលរួមគ្នាផ្សព្វផ្សាយបញ្ហាសិទ្ធិសេរីភាពរយៈពេល១០ថ្ងៃដើម្បីអបអរទិវាសិទ្ធិមនុស្សអន្តរជាតិថ្ងៃទី១០ ធ្នូ ខាងមុខនេះ។ ពួកគេស្នើឱ្យរដ្ឋាភិបាលគោរពសិទ្ធិសេរីភាពពលរដ្ឋ ក៏ដូចជាផ្ដល់ឱកាសដល់យុវជនក្នុងការចូលរួមចំណែកជួយសង្គមជាតិទៅតាមគោលការណ៍ប្រជាធិបតេយ្យ។
ក្រុមអង្គការសង្គមស៊ីវិល យុវជន និងអ្នកវិភាគរួមគ្នាផ្សព្វផ្សាយបញ្ហាសិទ្ធិសេរីភាពរយៈពេល ១០ថ្ងៃទៅកាន់ពលរដ្ឋ។ មកទល់នឹងថ្ងៃទី៦ ធ្នូនេះ យុទ្ធនាការផ្សព្វផ្សាយ គឺមានរយៈពេល ៦ថ្ងៃមកហើយ ដែលគ្រោងនឹងបិទបញ្ចប់នៅថ្ងៃទី១០ធ្នូ ដែលជាខួបលើកទី៧៣ នៃទិវាសិទ្ធិមនុស្សអន្តរជាតិ។
អ្នកនាំពាក្យសមាគមអាដហុក (ADHOC) លោក សឹង សែនករុណា លើកឡើងថា ស្ថានភាពសិទ្ធិមនុស្សនៅកម្ពុជាមិនទាន់មានលក្ខណៈប្រសើរនៅឡើយទេ ថ្វីបើមានគណបក្សនយោបាយច្រើនចូលរួមក្នុងការប្រកួតប្រជែងទៅតាមគោលការណ៍លទ្ធិប្រជាធិបតេយ្យសេរីពហុបក្ស និងមានការដោះលែងក្រុមយុវជនសង្គមមួយចំនួនកាលពីអំឡុងខែវិច្ឆិកាកន្លងទៅ។ លោកថា កម្ពុជាមានរដ្ឋធម្មនុញ្ញ មានកិច្ចព្រមព្រៀងសន្តិភាពទីក្រុងប៉ារីស៍ និងមានការផ្ដល់នូវសច្ចាប័នដែលជាលិខិតុបករណ៍ស្ដីពីសិទ្ធិមនុស្ស ដូច្នេះរដ្ឋាភិបាលត្រូវជាប់កាតព្វកិច្ចក្នុងការគោរពសិទ្ធិមនុស្ស៖ « យើងអត់ចង់ឃើញប្រទេសយើងក្នុងស្ថានភាពបែបនេះទេ គឺយើងចង់ឱ្យមានការអនុវត្តប្រជាធិបតេយ្យដោយភាពសេរី ត្រឹមត្រូវ និងយុត្តិធម៌ សម្រាប់ការប្រកួតប្រជែងការបោះឆ្នោតក្នុងរយៈកាលនឹងជិតមកដល់ឆ្នាំ២០២២ ខាងមុខនេះ។ បើកចំហទៅលើសេរីភាពសារព័ត៌មាន សេរីភាពខាងអង្គការសង្គមស៊ីវិល ហើយជំរុញឱ្យមានឯករាជភាពខាងកងកម្លាំងប្រដាប់អាវុធ ក៏ដូចជាស្ថាប័នឯករាជ្យបី ដែលត្រូវតែឯករាជ្យដាច់ចេញពីគ្នា ដើម្បីធ្វើការឆ្លុះបញ្ចាំងអំពីអំណាចទាំងអស់ហ្នឹងឱ្យមានតុល្យភាពគ្នា » ។
ដោយឡែកសកម្មជនបរិស្ថានលោក លី ចាន់ដារ៉ាវុធ បានបង្ហាញពីក្ដីព្រួយបារម្ភចំពោះបញ្ហាការរំលោភសិទ្ធិសេរីភាពធ្ងន់ធ្ងរនៅកម្ពុជា ដែលអាចធ្វើឱ្យយុវជន និងពលរដ្ឋមានការភ័យខ្លាចក្នុងការចូលរួមកិច្ចការសង្គម។ លើសពីនេះ លោកថា រដ្ឋាភិបាលបានប្រើលេសកូវីដ១៩ ដើម្បីទប់ស្កាត់សំឡេងរិះគន់របស់ពលរដ្ឋ៖ «ចុងក្រោយនេះ ដែលយើងឃើញច្បាស់ៗ ហ្នឹង គឺនៅក្នុងប្រទេសកម្ពុជាហ្នឹង ក៏មានការរំលោភបំពានសិទ្ធិមនុស្សធ្ងន់ធ្ងរដែរ។ យើងសង្កេតឃើញថា មានការចាប់ខ្លួនសកម្មជនគណបក្សប្រឆាំងហ្នឹង ទៅឃុំខ្លួនដោយមិនមានការសួរនាំ ឬក៏មិនមានការស៊ើបអង្កេតរឿងគាត់ឱ្យបានច្បាស់លាស់ទេ ហើយសកម្មជនសង្គមដូចជាខ្មែរថាវរៈ សកម្មជនបរិស្ថានអីហ្នឹងបែរជាត្រូវបានចោទប្រកាន់ពីបទព្រហ្មទណ្ឌ បទញុះញង់ » ។
ស្រដៀងគ្នានេះដែរ ប្រធានក្រុមអ្នកវិភាគវ័យក្មេង កញ្ញា លី ស្រីស្រស់ យល់ឃើញថា កម្ពុជាមានការធ្លាក់ចុះនូវស្ថានភាពសិទ្ធិសេរីភាព ពិសេសនៅក្រោយការរំលាយបក្សសង្គ្រោះជាតិ។ កញ្ញាបន្តថា ការរំលោភបំពានសិទ្ធិសេរីភាពនេះមានទំហំកាន់តែធំ ដោយឆ្លងទៅដល់ប្រទេសជិតខាងផងដែរ ជាក់ស្ដែងកម្ពុជាបានសហការជាមួយនឹងរដ្ឋាភិបាលថៃក្នុងការចាប់បញ្ជូននូវសកម្មជននយោបាយត្រឡប់មកកម្ពុជាជាដើម៖ «ទិដ្ឋភាពនេះខ្ញុំមើលឃើញថា ស្ថានភាពសិទ្ធិមនុស្សរបស់ប្រទេសកម្ពុជាចាប់ពីការរំលាយបក្សប្រឆាំងមករហូតហ្នឹង មិនត្រឹមតែធ្វើឱ្យមានការប៉ះពាល់ទៅលើដំណើរការប្រជាធិបតេយ្យទេ ប៉ុន្តែវាថែមទាំងមានភាពធ្លាក់ចុះទៅលើស្ថានភាពសេដ្ឋកិច្ចទៀត។ មានន័យថា ទំនាក់ទំនងទៅលើស្ថានភាពសេដ្ឋកិច្ចជាមួយបណ្ដាប្រទេសប្រជាធិបតេយ្យហ្នឹង គឺយើងហាក់ដូចជាបាត់បង់សក្ដានុពលនៅក្នុងការទទួលបាននូវផលប្រយោជន៍ផ្នែកសេដ្ឋកិច្ច » ។
ជាការឆ្លើយតបនឹងការរិះគន់ខាងលើ អ្នកនាំពាក្យរដ្ឋាភិបាល លោក ផៃ ស៊ីផាន បានអះអាងថា រដ្ឋាភិបាលមិនបានរំលោភបំពានសិទ្ធិមនុស្សដូចការចោទប្រកាន់របស់មតិមហាជន និងអង្គការសង្គមស៊ីវិលឡើយ។ ទន្ទឹមនឹងនោះ ការរឹតត្បិតសិទ្ធិសេរីភាពដែលធ្វើឡើងមួយចំនួនក្នុងពេលកន្លងមក ដូចជាការហាមឃាត់ការជួបជុំគ្នាច្រើនជាដើម គឺក្នុងបំណងអនុវត្តនូវវិធានការសុខាភិបាលដើម្បីទប់ស្កាត់ការរាលដាលនៃជំងឺកូវីដ១៩ ប៉ុណ្ណោះ៖ « អង្គការក្រៅរដ្ឋាភិបាលក្លាយទៅជានគរបាលហើយ។ នគរបាលសម្រាប់តាមដាន សម្រាប់វាយប្រហារលើរដ្ឋាភិបាល។ រដ្ឋាភិបាលមិនដែលទៅប៉ះពារអ្វីនោះទេ។ គាត់ចង់ថាម៉េច ថាទៅ។ ប៉ុន្តែចរិតគណបក្សប្រឆាំងជាចរិតដែលមួយចំនួនហ្នឹងគឺ ខ្ញុំមិននិយាយទាំងអស់ទេ ជាចរិតឧទ្ទាម។ សូម្បីសិទ្ធិក្នុងការបញ្ចេញយោបល់នៅសហរដ្ឋអាមេរិក ក៏គេបិទដែរ។ ដូច្នេះកម្ពុជាក៏អនុវត្តដូចគ្នាទេ » ។
ទោះយ៉ាងណា នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា (CCHR) អ្នកស្រី ចក់ សុភាព បានថ្លែងថា រដ្ឋាភិបាលត្រូវគោរពទៅតាមគោលការណ៍នីតិរដ្ឋ ដោយមិនត្រូវរំលោភបំពានសិទ្ធិមនុស្សហើយ បែរជាបកស្រាយតាមអំពើចិត្ត ឬដៅមុខសញ្ញាក្នុងការបង្ក្រាបសំឡេងរិះគន់នោះឡើយ៖ «អ្វីដែលយើងគួរតែរំឭកទៀតនោះ យើងដឹងហើយថា សង្គមយើងបានរងនូវការបាក់ស្បាតអំពីរបបជាច្រើន។ ជាពិសេសរបបប្រល័យពូជសាសន៍ ឬក៏ការគាបសង្កត់អីជាដើមហ្នឹង ដែលធ្វើឱ្យអ្នកជំនាន់ចាស់ ភាគច្រើនហ្នឹងគឺ គាត់មានការខ្លាចរអា គាត់បាក់ស្បាត។ អ៊ីចឹងនៅពេលដែលមានករណីនៃការចាប់ខ្លួន ចោទប្រកាន់ ឬក៏ផ្ដន្ទាទោសយុវជនជាដើមអីថែមទៀតហ្នឹង រឹតតែធ្វើឱ្យឪពុកម្ដាយឬក៏អាណាព្យាបាលហ្នឹង កាន់តែមានការខ្លាចរអាថែមទៀតហើយ » ។
ជាដំណោះស្រាយ អ្នកស្រីយល់ថា មានតួអង្គសំខាន់បី នៅក្នុងការលើកស្ទួយសិទ្ធិមនុស្សនៅកម្ពុជាឡើងវិញ។ ទីមួយ រដ្ឋាភិបាល និងស្ថាប័នតុលាការត្រូវស្វែងរកយុត្តិធម៌នៅពេលមានករណីរំលោភបំពានសិទ្ធិសេរីភាពកើតឡើង ពិសេសគឺត្រូវលុបបំបាត់នូវនិទណ្ឌភាព។ ទីពីរ ឪពុកម្ដាយ ឬអាណាព្យាបាលត្រូវលើកទឹកចិត្ត និងគាំទ្រដល់យុវជនក្នុងការធ្វើកិច្ចការងារសង្គមផ្សេងៗ។ ទីបី យុវជនត្រូវចូលរួមក្នុងការស្វែងយល់ច្បាប់ និងសិទ្ធិសេរីភាពរបស់ខ្លួន ព្រមទាំងត្រូវក្ដាប់ព័ត៌មានឱ្យបានគ្រប់ជ្រុងជ្រោយ និងមានឥរិយាបថត្រឹមត្រូវ ដើម្បីឱ្យការចូលរួមនោះប្រកបដោយអត្ថន័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។