សមត្ថកិច្ចបានឃាត់ខ្លួនអ្នកជំនាញកសិកម្ម លោក នី ណាក់ សាជាថ្មី នៅព្រឹកថ្ងៃទី៥ ខែមករា និងបានបញ្ជូនទៅតុលាការហើយ នៅរសៀលថ្ងៃដដែលនេះ ដោយចោទប្រកាន់ពីបទញុះញង់ និងបរិហារកេរ្តិ៍ ក្រោយលោកបង្ហោះសារលើហ្វេសប៊ុក រិះគន់ព័ត៌មានដែលក្រសួងការងារទើបបង្ហាញចំនួនក្រុមហ៊ុនទើបបើកថ្មីនៅដើមឆ្នាំ២០២៤ ។ មន្ត្រីអង្គការសង្គមស៊ីវិលថា អាជ្ញាធរ និងតុលាការ គួរតែចែកឲ្យដាច់រវាងបទល្មើស និងសេរីភាពបញ្ចេញមតិ ដើម្បីជៀសវាងការរិះគន់ថា រដ្ឋាភិបាលរំលោភសិទ្ធិពលរដ្ឋ។
ភរិយាលោក នី ណាក់ គឺលោកស្រី សុខ ស៊ីណែត បង្ហោះនៅលើហ្វេសប៊ុកថា ប្ដីរបស់លោកស្រី គឺលោក នី ណាក់ ត្រូវសមត្ថកិច្ចនៃក្រសួងមហាផ្ទៃឃាត់ខ្លួនសាកសួរ តាំងពីព្រឹកម៉ោង ៨.៤០នាទី តាមបណ្តឹងរបស់រដ្ឋមន្ត្រីក្រសួងការងារលោក ហេង សួរ។
ការឃាត់ខ្លួនអ្នកជំនាញកសិកម្មរូបនេះ បន្ទាប់ពីលោកបង្ហោះសារលើហ្វេសប៊ុកនៅថ្ងៃទី៥ ខែមករា រិះគន់ព័ត៌មាន ដែលក្រសួងការងារទើបបង្ហាញចំនួនក្រុមហ៊ុនទើបបើកថ្មីនៅដើមឆ្នាំ២០២៤។
លោក នី ណាក់ សរសេរលើហ្វេសប៊ុកថា៖ «មួយម៉ឺនក្រុមហ៊ុនបើកថ្មីនៅ២០២៤។ សង្ស័យរាប់តាំងពីក្រុមហ៊ុនលក់លៀសហាល ក្រុមហ៊ុនដើរសុំទាន ក្រុមហ៊ុនលក់ថ្នាំញៀន។ល។ លោក សរសេរបន្តទៀតថា បើកច្រើន បិទវិញអត់រាប់ឡើយ។ ប្រទេសខ្លាសេដ្ឋកិច្ចលក់តាំងពីភ្នំមិនសល់»។
ប្រពន្ធរបស់លោក នី ណាក់ បង្ហោះសារលើហ្វេសប៊ុកថា ក្រោយការសរសេរនេះរដ្ឋមន្ត្រីក្រសួងការងារ និងបណ្ដុះបណ្ដាល វិជ្ជាជីវៈ លោក ហេង សួរ បានដាក់ពាក្យបណ្តឹងពីបទបរិហារកេរ្តិ៍ និងញុះញង់ ហើយសមត្ថកិច្ចបានឃាត់ខ្លួន និងបានបញ្ជូនលោក នី ណាក់ ទៅតុលាការហើយ នៅរសៀលថ្ងៃទី៥ មករា បន្ទាប់ពីសាកសួររួចរាល់។
វិទ្យុអាស៊ីសេរី នៅពុំទាន់អាចទាក់ទង ភរិយាលោក នី ណាក់ គឺលោកស្រី សុខ ស៊ីណែត ដើម្បីសាកសួរបន្ថែមពីបញ្ហានេះបានទេ នៅថ្ងៃទី៥ មករា។ ចំណែកឯ អ្នកនាំពាក្យក្រសួងការងារគឺ លោក កត្តា អ៊ន និងអ្នកនាំពាក្យអយ្យការអមសាលាដំបូងរាជធានីភ្នំពេញ លោក ប្លង់ សុផល ក៏មិនអាចទាក់ទងបានដែរ ដោយទូរស័ព្ទចូលច្រើនដង តែពុំមានអ្នកទទួល។
នាយកទទួលបន្ទុកកិច្ចការទូទៅ នៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត កត់សម្គាល់ថា អ្នកជំនាញកសិកម្ម និងជាសកម្មជនសង្គមលោក នី ណាក់ តែងរិះគន់ភាពអសកម្មមួយចំនួនក្នុងសង្គម ហើយលោកធ្លាប់ត្រូវជនមិនស្គាល់មុខលួចវាយរហូតរងរបួសធ្ងន់ធ្ងរ ប៉ុន្តែអាជ្ញាធរនៅពុំទាន់ចាប់ខ្លួនជនបង្កទាំងនោះ មកផ្ដន្ទាទោសបាននៅឡើយ។ លោកបន្ថែមថា អាជ្ញាធរ និងតុលាការគួរចែកឲ្យដាច់រវាងបទល្មើស និងសេរីភាពបញ្ចេញមតិ។
លោក អំ សំអាត៖ «អ៊ីចឹងយើងជាអង្គការសង្គមស៊ីវិល មិនចង់មានការរិះគន់បន្ថែមទៀតទៅលើបញ្ហារឹតត្បិតសេរីភាពក្នុងការបញ្ចេញមតិ ឬការរំលោភទៅលើសេរីភាពជាមូលដ្ឋាន ហើយនិងបញ្ហាសិទ្ធិមនុស្ស មិនមានលក្ខណៈល្អប្រសើរនោះទេបាទ»។
កាលពីខែកញ្ញា ឆ្នាំ២០២៣ ជនមិនស្គាល់មុខមួយក្រុមមានគ្នាប្រមាណ៨នាក់ បានជិះម៉ូតូបុកម៉ូតូលោក នី ណាក់ ឱ្យដួល និងចុះព្រួតគ្នាវាយបែកក្បាលរបួសធ្ងន់ នៅពេលលោក និងប្រពន្ធរបស់លោកកំពុងធ្វើដំណើរចេញពីម្ដុំវត្តចំពុះក្អែកសំដៅទៅផ្ទះ។ មកទល់នឹងពេលនេះ អាជ្ញាធរនៅមិនទាន់ចាប់ខ្លួនជនបង្កមកផ្ដន្ទាទោសបាននៅឡើយទេ។
លោក នី ណាក់ ក៏ធ្លាប់ត្រូវបានអតីតរដ្ឋមន្ត្រីក្រសួងកសិកម្ម លោក វ៉េង សាខុន ប្ដឹងពីបទញុះញង់ ដាក់ពន្ធនាគារ ១៨ខែ កន្លងទៅហើយ ករណីលោកសរសេររិះគន់យុទ្ធនាការរបស់ក្រសួងកសិកម្ម និង ឌឺដងរឿងទិញម៉ាស់ពាក់ឱ្យកូនមាន់ក្នុងគ្រាមានអាសន្ន ខណៈកម្ពុជា និងពិភពលោក ផ្ទុះជំងឺកូវីដ១៩ កាលពីចុងឆ្នាំ២០១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។