អ្នកឃ្លាំមើលបារម្ភថា លោកនាយរដ្ឋមន្រ្តី ហ៊ុន សែន ប្រឹងប្រែងយកចិត្តទុកដាក់ និងផ្តល់លុយកាក់រាប់ម៉ឺនដុល្លារទៅកាន់ស្ថាប័នព័ត៌មានក្នុងស្រុកមួយចំនួន ដើម្បីឱ្យផ្សព្វផ្សាយព័ត៌មានបែបប្រជាភិថុតិ ឬព័ត៌មានដែលគាំទ្ររដ្ឋាភិបាលតែមួយចំហៀង។ ការលើកឡើងនេះ ធ្វើឡើងបន្ទាប់ពីលោក ហ៊ុន សែន កាលពីពេលថ្មីៗនេះ បានផ្តល់ថវិកាចំនួន ៤៨ម៉ឺនដុល្លារក្នុងរយៈពេល៤ឆ្នាំ ទៅឱ្យសហភាពសហព័ន្ធអ្នកសារព័ត៌មានកម្ពុជា ដោយអះអាងថា ដើម្បីបន្តបេសកកម្មផ្សព្វផ្សាយព័ត៌មានបម្រើប្រយោជន៍សង្គម។
អ្នកជំនាញផ្នែកប្រព័ន្ធផ្សព្វផ្សាយឯករាជ្យលើកឡើងថា ស្ថាប័ន ឬសមាគមដែលទទួលបានថវិកាពីរដ្ឋាភិបាលក្នុងការបើកវគ្គបណ្តុះបណ្ដាលលើវិស័យសារព័ត៌មាន គឺពួកគាត់អាចបាត់បង់ភាពឯករាជ្យលើខ្លួនឯង និងរងសម្ភាធពីរដ្ឋាភិបាល ខណៈស្ថាប័នសារព័ត៌មានឯករាជ្យដែលមិនចំណុះជាមួយរដ្ឋាភិបាលជាច្រើនបានទទួលរងការបង្ក្រាបជាបន្តបន្ទាប់។
នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា ហៅកាត់ ខេមបូចា (CamboJA) លោក ណុប វី យល់ថា ស្ថាប័ន ឬសមាគមអ្នកសារព័ត៌មាន ដែលទទួលបានធនធានពីរដ្ឋាភិបាលគួរណាតែផ្សព្វផ្សាយពាក់ព័ន្ធនឹងផ្នែកក្រមសីលធម៌ វិជ្ជាជីវៈ អ្នកសារព័ត៌មាន ឬដាក់ចេញគោលនយោបាយបើកវគ្គបណ្តុះបណ្ដាលមូលដ្ឋានគ្រឹះដល់អ្នកសារព័ត៌មាន។ លោកលើកឡើងថា ការបំពេញតួនាទីរបស់អ្នកសារព័ត៌មានដោយឈរលើភាពឯករាជ្យទៅតាមវិជ្ជាជីវៈ មានសារៈសំខាន់សម្រាប់បម្រើផលប្រយោជន៍ជាតិឱ្យមហាជនទទួលបានព័ត៌មានពិត។ ប៉ុន្តែ លោកថា បើអ្នកសារព័ត៌មានដែលមិនបានគោរពតាមវិជ្ជាជីវៈរបស់ខ្លួន សរសេរព័ត៌មានបម្រើឱ្យគណបក្សនយោបាយ ឬប្រជាភិថុតិបុគ្គលណាម្នាក់ នោះនឹងធ្វើប៉ះពាល់ដល់សង្គមជាតិ ដែលធ្វើឱ្យប្រជាពលរដ្ឋភ័ន្តច្រឡំបង្កឱ្យមានការរើសអើង និងស្អប់ខ្ពើមគ្នាក្នុងសង្គម៖ « យ៉ាងណាមិញ ប្រសិនជាយើងទទួលនូវធនធានរបស់ជាតិ ហើយយើងមិនបានបំពេញតួនាទីត្រឹមត្រូវ ហើយយើងមិនបានដើរតួនាទីក្នុងការការពារនូវផលប្រយោជន៍ក្រុមណាមួយ ផ្នែកណា គណបក្សនយោបាយណាមួយ ដោយមិនដាក់តម្កល់នូវផលប្រយោជន៍ជាតិជាសំខាន់ ផលប្រយោជន៍ប្រជាពលរដ្ឋជាសំខាន់ នោះគឺជាការអនុវត្តមួយដែលប្រាសចាក ពីក្រមសីលធម៌ពីវិជ្ជាជីវៈសារព័ត៌មាន ហើយមួយផ្នែកទៀត វាជាការចូលរួមចំណែក ក្នុងការបំផ្លិចបំផ្លាញនូវការជឿទុកចិត្តរបស់ប្រជាពលរដ្ឋ របស់សាធារណៈជនទូទៅ ទៅដល់វិជ្ជាជីវៈអ្នកសារព័ត៌មានហ្នឹងឯង »។
ការលើកឡើងនេះ បន្ទាប់ពីលោកនាយករដ្ឋមន្រ្តី ហ៊ុន សែន កាលពីពេលថ្មីៗនេះ បានប្រកាសបរិច្ចាគថវិកាផ្ទាល់ខ្លួនចំនួន ៤៨ម៉ឺនដុល្លា (៤៨០,០០០) ដែលមានរយៈពេល៤ឆ្នាំ ដើម្បីគាំទ្របេសកកម្មការងាររបស់សហភាពសហព័ន្ធអ្នកសារព័ត៌មានកម្ពុជា។
ប្រធានសហភាពសហព័ន្ធអ្នកសារព័ត៌មានកម្ពុជាលោក ហ៊ុយ វណ្ណៈ លើកឡើងតាមរយៈកាសែតក្នុងស្រុក(Fresh New)ថា ថវិការបស់លោក ហ៊ុន សែន នេះឆ្លុះបញ្ចាំងពីការលើកកម្ពស់សេរីភាពសារព័ត៌មាន និងសេរីភាពបញ្ចេញមតិនៅកម្ពុជា។
វិទ្យុអាស៊ីសេរីមិនទាន់អាចទាក់ទង ប្រធានសហភាពសហព័ន្ធអ្នកសារព័ត៌មានកម្ពុជាលោក ហ៊ុយ វណ្ណៈ និងអ្នកនាំពាក្យក្រសួងព័ត៌មានលោក មាស សុភ័ណ្ឌ ដើម្បីសាកសួរជុំវិញរឿងនេះបានទេ នៅថ្ងៃទី២៤ កក្កដា។
ប៉ុន្តែ លោក មាស សុភ័ណ្ឌ តែងតែលើកឡើងថា រដ្ឋាភិបាលបានយកចិត្តទុកដាក់លើសេរីភាពសារព័ត៌មាន និងមិនបានរឹតត្បិត ឬបំពានលើសិទ្ធិសេរីភាពសារព័ត៌មាននោះឡើយ។
ទោះបីជាយ៉ាងណា នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា (CamboJA) លោក ណុប វី មានប្រសាសន៍ថា សេរីភាពសារព័ត៌មាន ជាពិសេសអ្នកសារព័ត៌មានឯករាជ្យនៅកម្ពុជាមិនទាន់មានការគាំទ្រពីរដ្ឋាភិបាលនោះទេ។ លើសពីនេះ លោកថា រូបភាពដែលនៅតែបន្តលេចធ្លោសម្រាប់អ្នកសារព័ត៌មានឯករាជ្យ គឺពួកគេតែងតែរងការគំរាមកំហែងបំភិតបំភ័យពីសំណាក់អាជ្ញាធរ។ ក្រៅពីនេះទៀត អ្នកសារព័ត៌មានឯករាជ្យមួយចំនួនទៀតរដ្ឋាភិបាលលោក ហ៊ុន សែន ចាប់ដាក់ពន្ធនាគារដោយសារតែសកម្មភាពបំពេញការងារតាមវិជ្ជាជីវៈរបស់ពួកគេ។
សមាគមសម្ព័ន្ធអ្នកសារព័ត៌មានកម្ពុជា (CamboJA) រកឃើញថា ក្នុងរយៈពេល ១០ខែនៃឆ្នាំ ២០២១ អ្នកសារព័ត៌មាន ៨១ នាក់ បានក្លាយជាគោលដៅនៃការយាយី ក្នុងនោះ ២០ ករណីជាអំពើហិង្សា ១៦ករណីជាការគំរាមកំហែង ហើយ ១៤ករណីជាការឃាត់ខ្លួនសួរនាំ និងប្រឈមវិធានការតុលាការ។ ដោយឡែក ក្នុងរយៈពេលចុងក្រោយនេះ អ្នកសារព័ត៌មានឯករាជ្យក៏ទទួលរងការរឹតត្បិត និងតាមយាយីពីសំណាក់អាជ្ញាធរ ដោយសារតែពួកគេចុះយកព័ត៌មានស្តីពីការបង្ក្រាបរបស់អាជ្ញាធរទៅលើក្រុមកូដករណាហ្គាវើលដ៍។សមាគមសម្ព័ន្ធអ្នកសារព័ត៌មានកម្ពុជារកឃើញថា ក្នុងត្រីមាសទី១ និងត្រីមាសទី២ ក្នុងឆ្នាំ២០២២ ផលប៉ះពាល់សម្រាប់អ្នកសារព័ត៌មានចំនួន ២៤ករណី ក្នុងនោះមានអ្នកសារព័ត៌មាន ចំនួន៤០នាក់ ភាគច្រើនបានរងការរឹតត្បិត និងរងអំពើហិង្សាពីសំណាក់អាជ្ញាធរ និងមានអ្នកសារព័ត៌មានចំនួន ៨នាក់ផ្សេងទៀត កំពុងជាប់ឃុំក្នុងពន្ធនាគារ។
ថ្វីត្បិតស្ថាប័នសារព័ត៌មាននៅកម្ពុជាហាក់បានរីកដុះដាលយ៉ាងឆាប់រហ័សក្ដី ប៉ុន្តែ ស្ថាប័នសារព័ត៌មានទាំងនោះភាគច្រើនផ្សព្វផ្សាយព័ត៌មានបែបប្រជាភិថុតិបម្រើឱ្យគណបក្សប្រជាជនកម្ពុជា និងរដ្ឋាភិបាលលោក ហ៊ុន សែន។ ចំណែកលើប្រព័ន្ធអ៊ិនធើណិតវិញ រដ្ឋាភិបាលបានបង្កើតអនុក្រឹត្យថ្មី ដែលយកលំនាំតាមប្រទេសចិនកុម្មុយនិស្ត ដើម្បីត្រួតពិនិត្យរាល់ការទំនាក់ទំនង និងរាំងខ្ទប់គេហទំព័រមួយចំនួន តាមរយៈការបង្កើតច្រកទ្វារអ៊ីនធឺណិតជាតិ។
កម្ពុជាជាប់លេខ ១៤២ ក្នុងចំណោម ១៨០ នៅក្នុងសន្ទស្សន៍សេរីភាពសារព័ត៌មានពិភពលោកសម្រាប់ឆ្នាំ២០២២ របស់អង្គការអ្នករាយការណ៍គ្មានព្រំដែន (Reporters Without Borders)។ ចំណែកឯ ចំណាត់ថ្នាក់ស្តីពីសេរីភាពសារព័ត៌មានវិញ កម្ពុជាស្ថិតក្នុងចំណាត់ថ្នាក់អាក្រក់អស់រយៈពេល ៥ឆ្នាំមកហើយ ដោយសារតែរដ្ឋាភិបាល លោក ហ៊ុន សែន បើកយុទ្ធនាការណ៍បង្ក្រាបស្ថាប័នសារព័ត៌មានឯករាជ្យធំៗជាច្រើនស្ថាប័នក្រោយពីរម្លាយគណបក្សសង្គ្រោះជាតិកាលពីឆ្នាំ២០១៧ និងបន្តចាប់ខ្លួនអ្នកសារព័ត៌មានឯករាជ្យដាក់គុកដោយគ្មានមូលដ្ឋានច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។