សារព័ត៌មានអន្តរជាតិចុះផ្សាយព្រោងព្រាត ទាក់ទងនឹងសំណុំរឿងចាប់ខ្លួនអ្នកសារព័ត៌មានឯករាជ្យ លោក ម៉ិច ដារ៉ា ខណៈអង្គការជាតិ អន្តរជាតិ រួមមាន បណ្ដាប្រទេសលោកសេរី សហភាពអឺរ៉ុប និងអង្គការអន្តរជាតិនានា នាំគ្នាទាមទារឱ្យដោះលែងអ្នកកាសែតរូបនេះ ជាបន្ទាន់ និងឥតលក្ខខណ្ឌ។ អ្នកឃ្លាំមើលយល់ថា ប្រតិកម្ម និងការចុះផ្សាយរបស់សារព័ត៌មានអន្តរជាតិនេះ នឹងកាន់តែធ្វើឱ្យរដ្ឋាភិបាលមានកេរ្តិ៍ឈ្មោះមិនល្អ និងប្រឈមទណ្ឌកម្មថ្មីៗ បន្ថែមទៀតពីសហគមន៍អន្តរជាតិសេរី ប្រជាធិបតេយ្យ។
អ្នកឃ្លាំមើល លើកឡើងថា ការចុះផ្សាយរបស់សារព័ត៌មានអន្តរជាតិនៅជុំវិញពិភពលោក ទាក់ទងនឹងការចាប់ខ្លួនលោក ម៉ិច ដារ៉ា មានឥទ្ធិពលខ្លាំងក្នុងការធ្វើឱ្យរដ្ឋាភិបាលត្រកូល ហ៊ុន កាន់តែអាម៉ាស់មុខនៅលើឆាកអន្តរជាតិ និងក៏ជាមូលដ្ឋានសំខាន់មួយ សម្រាប់ឱ្យរដ្ឋាភិបាលនៃប្រទេសប្រជាធិបតេយ្យពិចារណាបន្ថយទំនាក់ទំនងការទូត និងដាក់ទណ្ឌកម្មបន្ថែមទៀត។
ពួកគេពន្យល់ថា ការចុះផ្សាយរបស់បណ្ដាញព័ត៌មានអន្តរជាតិក្នុងរឿងលោក ម៉ិច ដារ៉ា នេះ មានចម្រុះខ្លឹមសារ តាំងពីការគាស់កកាយនូវទិន្នន័យស៊ើបអង្កេតឧក្រិដ្ឋកម្ម និងការឆបោកតាមប្រព័ន្ធអនឡាញនៅកម្ពុជា ព្រមទាំងមតិពីអ្នកជំនាញ ដែលបានវាយតម្លៃមិនល្អ ចំពោះស្ថានភាពប្រទេសកម្ពុជា ដូច្នេះ រដ្ឋាភិបាលគ្រួសារហ៊ុន ពិបាកចៀសផុតពីការបាក់មុខ និងរងទណ្ឌកម្មខ្លះទៀត បើមិនសម្រួលដោះលែង លោក ម៉ិច ដារ៉ា ទេ។
អ្នកជំនាញច្បាប់ និងអភិបាលកិច្ចបែបប្រជាធិបតេយ្យលោក វ៉ន ចាន់ឡូត ប្រាប់វិទ្យុអាស៊ីសេរីនៅថ្ងៃទី៤ ខែតុលា ថា ការចោទប្រកាន់ និងឃុំខ្លួនលោក ម៉ិច ដារ៉ា រដ្ឋាភិបាលភ្នំពេញសព្វថ្ងៃ ត្រូវរងការរិះគន់ពីសហគមន៍អន្តរជាតិបន្ថែមទៀត ជាពិសេស ត្រូវប្រឈមនឹងការពិបាកស្ដារទំនុកចិត្ត ទំនាក់ទំនងការទូតជាមួយបណ្ដា រដ្ឋ ដែលជាមិត្តប្រជាធិបតេយ្យ។ លោកថា នេះជាបរាជ័យការទូតរបស់រដ្ឋាភិបាលលោក ហ៊ុន ម៉ាណែត។
លោក វ៉ន ចាន់ឡូត ថា ករណីនេះ អាចធ្វើឱ្យប្រទេសកម្ពុជា ក្រោមការដឹកនាំរបស់រដ្ឋាភិបាលត្រកូល ហ៊ុន ជួបនូវទណ្ឌកម្មពាណិជ្ជកម្មមួយកម្រិតទៀត ពីព្រោះការចាប់ខ្លួនលោក ម៉ិច ដារ៉ា ជាការបញ្ជាក់ថា អ្នកកាន់អំណាចគ្មានចេតនាជាក់លាក់ ក្នុងការបោសសម្អាតឧក្រិដ្ឋកម្មក្នុងប្រទេសឱ្យប្រសើរឡើង ដើម្បីកសាងកម្ពុជាឱ្យដើរលើផ្លូវនីតិរដ្ឋឡើយ ហើយជាការបង្ហាញពីការសងសឹករបស់គ្រួសារត្រកូលហ៊ុន ចំពោះការដាក់ទណ្ឌកម្មរបស់សហរដ្ឋអាមេរិកលើលោក លី យ៉ុងផាត់ ដែលជាមនុស្សជំនិតនៃលោក ហ៊ុន សែន ទៅវិញ។
លោក វ៉ន ចាន់ឡូត៖«អន្តរជាតិ អាចនឹងពិចារណាបន្ថែមទៀតទៅនឹងទៅនឹងគោលនយោបាយនានារបស់ខ្លួន ពាក់ព័ន្ធនឹងការធ្វើការសហការជាមួយប្រទេសកម្ពុជាតួយ៉ាង គឺជំនួយ និងវិនិយោគឬការដាក់ទណ្ឌកម្មបន្ថែមទៅនឹងបុគ្គលស្នូលដែលស្ថិតនៅក្នុងជួរអ្នកកាន់អំណាច ឬក៏អ្នករកស៊ីគ្រាក់ៗ នៅក្បែរអ្នកកាន់អំណាចហ្នឹង»។
លោក វ៉ន ចាន់ឡូត លើកឡើងថា ការចាប់ខ្លួនលោក ម៉ិច ដារ៉ា ចុងក្រោយនេះ ក៏ជាការឆ្លុះបញ្ចាំងពីបរាជ័យរបស់រដ្ឋាភិបាលលោក ហ៊ុន ម៉ាណែត ក្នុងការកម្ចាត់ការជួញដូរមនុស្ស និងឧក្រិដ្ឋកម្មឆបោកតាមអ៊ីនធឹណិត ពីព្រោះរដ្ឋាភិបាល តាមកម្ចាត់អ្នកសារព័ត៌មានសេរី ដែលធ្វើការយ៉ាងសកម្មលើវិស័យនេះ។
រីឯប្រធានសមាគមសម្ព័ន្ធអ្នកសារព័ត៌មានកម្ពុជា (CAMBOJA) លោក ណុប វី មាន ប្រាប់វិទ្យុអាស៊ីសេរីនៅថ្ងៃទី៤ ខែតុលា ថា ព័ត៌មានស៊ើបអង្កេតរបស់លោក ម៉ិច ដារ៉ា អំពីការជួញដូរមនុស្ស និងការឆបោកតាមប្រព័ន្ធអនឡាញ ដោយមិនព្រួយបារម្ភអំពីសុវត្ថិភាពផ្ទាល់ខ្លួនកន្លងមក បានចូលរួមជំរុញឱ្យចាត់វិធានការដោះស្រាយករណីជួញដូរមនុស្ស គឺដូចបានជួយជនរងគ្រោះ ដែលត្រូវឆបោកតាម ប្រព័ន្ធអនឡាញ ដែលនេះ ជាការរួមចំណែករបស់លោក ចំពោះការងាររដ្ឋាភិបាល។
លោក ណុប វី ថា ក្នុងករណីដែលលោក ម៉ិច ដារ៉ា នៅតែបន្តឃុំខ្លួន និងការចោទប្រកាន់បែបនេះទៀត មានផលប៉ះពាល់ច្រើនដល់វិស័យព័ត៌មាន ដែលធ្វើកិច្ចការជំរុញឱ្យរដ្ឋាភិបាលដោះស្រាយបញ្ហាសង្គម។
លោក ណុប វី៖ «បើសិនអ្នកសារព័ត៌មានដែលមានសមត្ថភាព ដូច្នេះ ចេះតែបាត់បង់ចេះតែកាត់បន្ថយ លោកបារម្ភថា បញ្ហានៅក្នុងសង្គម។ យើងសមត្ថកិច្ចមិន អាចដោះស្រាយតែឯងទេ ពីព្រោះប្រជាពលរដ្ឋគ្រប់រូប សុទ្ធតែមានតួនាទីមានភារកិច្ចក្នុងការចូលរួមម្នាក់ៗ បន្តិចៗ ក្នុងការផ្ដល់ព័ត៌មាន ភស្តុតាងផ្សេងៗ ដែលជំរុញទៅដល់ការអនុវត្តតួនាទី ក្នុងការដោះស្រាយក្នុងការឆ្លើយតបបញ្ហាទាំងអស់នេះ»។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICAHDO) លោក អំ សំអាត ប្រាប់វិទ្យុអាស៊ីសេរីថា ការចាប់ខ្លួន និងចោទប្រកាន់លើលោក ម៉ិច ដារ៉ា នេះ គឺប៉ះពាល់ដល់សេរីភាពសារព័ត៌មាននិងសេរីភាពបញ្ចេញមតិ ខណៈជាអ្នកសារព័ត៌មានឯករាជ្យ ដែលធ្វើការយ៉ាងសកម្មទាក់ទងនឹងព័ត៌មាន ជួញដូរមនុស្ស និងការឆបោកតាមប្រព័ន្ធអនឡាញ រួមទាំងល្បែងអនឡាញជាដើម។
លោក អំ សំអាត៖ «ការចាប់ខ្លួនលោក ម៉ិច ដារ៉ា មិនមានអ្វី ផលចំណេញអ្វីសម្រាប់កម្ពុជាទេ ផ្ទុយទៅវិញ ទទួលបានរិះគន់ និងការទាមទារក្នុងការដោះលែងលោក ម៉ិច ដារ៉ា ដោយឥតលក្ខខណ្ឌនេះ ពីបណ្ដាស្ថានទូតលោកសេរី ហើយពីអន្តរជាតិ ក៏ដូចជាក្រុមប្រឹក្សាសិទ្ធិមនុស្សទៅវិញ»។
វិទ្យុអាស៊ីសេរីមិនអាចសុំការអត្ថាធិប្បាយពីប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា បានទេនៅថ្ងៃទី៤ ខែតុលា ដោយទូរស័ព្ទចូលតែគ្មានអ្នកទទួល។
លោក ម៉ិច ដារ៉ា ត្រូវបានអាជ្ញាធរចាប់ខ្លួនកាលពីថ្ងៃទី៣០ ខែកញ្ញា នៅស្រុកស្រែអំបិល ខេត្តកោះកុង។ នៅថ្ងៃទី១ ខែតុលា តុលាការក្រុងភ្នំពេញចោទប្រកាន់លោកពីបទញុះញង់ និងបញ្ជូនទៅឃុំខ្លួននៅពន្ធនាគារខេត្តកណ្ដាល។
ក្រោយការចាប់ខ្លួនលោក សារព័ត៌មានអន្តរជាតិធំៗ បានចុះផ្សាយអំពីសំណុំរឿង ចាប់ខ្លួនអ្នកសារព័ត៌មានឯករាជ្យរូបនេះ រួមមាន ទីភ្នាក់ងារសារព័ត៌មានប៊ីប៊ីស៊ី (BBC) របស់អង់គ្លេស សារព័ត៌មាន ស៊ីអ៊ិនអ៊ិន (CNN) របស់អាមេរិក សារព័ត៌មាន អ៊ិនភីអ (NPR) សារព័ត៌មាន ឌឹ ហ្កាឌៀន (The Guardian) កាសែត ឌឹ ញូវយ៉ក ថាមស៍ (NYT) និងទីភ្នាក់ងារសារព័ត៌មានរ៉យទ័រ (Reuters) ជាដើម។
បណ្ដាញព័ត៌មានទាំងអស់នេះ រួមទាំងមជ្ឈដ្ឋានអ្នកការទូតអន្តរជាតិបង្កើនការបារម្ភ និងទាមទារឱ្យដោះលែងលោក ម៉ិច ដារ៉ា ដោយគ្មានលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។