មន្ត្រីសង្ឃ និងអាជ្ញាធរខណ្ឌចំការមន រាជធានីភ្នំពេញ បានចាប់បង្ខំឱ្យព្រះសង្ឃមួយអង្គ ដែលសកម្មនឹងកិច្ចការសង្គម ផ្ដិតមេដៃធ្វើកិច្ចសន្យាជាលើកទី២ ឱ្យឈប់ឈឺឆ្អាលសកម្មភាពសង្គម ក្រោមហេតុផលថា ប៉ះពាល់ដល់សណ្ដាប់ធ្នាប់សង្គម។
ព្រះតេជព្រះគុណ ធូ វ៉ាឃីម នៅតែប្រកាសជំហរ ចូលរួមបញ្ចេញមតិអំពីបញ្ហាសង្គមជាតិ ស្របតាមរដ្ឋធម្មនុញ្ញ និងច្បាប់អន្តរជាតិ បើទោះបីជាអាជ្ញាធរក្រុងភ្នំពេញ បានចាប់បង្ខំឱ្យព្រះអង្គធ្វើកិច្ចសន្យាជាលើកទី២ ឱ្យឈប់ឈឺឆ្អាលរឿងសង្គមជាតិក្ដី។
ព្រះអង្គទទូចដល់រដ្ឋាភិបាលថា គួរតែបើកចិត្តទូលាយផ្តល់សិទ្ធិសេរីភាពឱ្យព្រះសង្ឃ ចូលរួមកិច្ចការសង្គមឱ្យបានពេញលេញ ព្រោះព្រះសង្ឃមានតួនាទីសំខាន់ ក្នុងការជួយកិច្ចការសង្គម និងបង្ហាញផ្លូវប្រាប់បរិស័ទឱ្យចេះឈឺឆ្អាលរឿងអយុត្តិធម៌ និងនយោបាយជាដើម។
ព្រះតេជព្រះគុណ ធូ វ៉ាឃីម បន្ថែមថា ព្រះអង្គនឹងបន្តសកម្មភាពបញ្ចេញមតិអំពីបញ្ហាសង្គម និងបរិស្ថាន បើទោះជារងសម្ពាធ និងគំរាមកំហែង ពីអាជ្ញាធរយ៉ាងណាក្តី។
ព្រះតេជព្រះគុណ ធូ វ៉ាឃីម៖«លោកថ្នាក់ដឹកនាំ គេនិយាយថា បើចង់ធ្វើសកម្មភាពអីទៀត សូមសឹកទៅ។ អានេះគេសង្កត់ធ្ងន់មួយដែរ។ តាមការសង្កេតមើលការធ្វើសកម្មភាពរបស់អាត្មា ដូចជាអត់មានអីប៉ះពាល់ដល់សង្គម សណ្ដាប់ធ្នាប់អីទេ។ ចូលរួមបញ្ចេញមតិ ដោយអហិង្សា ចូលរួមធម្មយាត្រា ដាក់ញត្តិ ទៅព្រៃ ល្បាតព្រៃល្បាតអី សុទ្ធតែជាការរៀនសូត្រទាំងអស់។ អត់មានការប៉ះពាល់សណ្ដាប់ធ្នាប់សង្គមអីទេ»។
កាលពីព្រឹកថ្ងៃទី១៩ សីហា អាជ្ញាធរខណ្ឌចំការមន រាជធានីភ្នំពេញ និងសម្ដេចសង្ឃព្រះនាម ឃឹម សន ព្រមទាំងអាជ្ញាធរប្រមាណ ១០នាក់ បានធ្វើដំណើរដល់វត្តនួនមណីរាម ហៅវត្តថាន់ ជាលើកទី២ ដោយបង្ខំព្រះតេជព្រះគុណ ធូ វ៉ាឃីម ឱ្យផ្ដិតមេដៃធ្វើកិច្ចសន្យាជាថ្មីទៀត ឱ្យឈប់ឈឺឆ្អាលរឿងសង្គម។
ក្នុងកិច្ចសន្យាអាជ្ញាធរសរសេរថា ព្រះតេជព្រះគុណ ធូ វ៉ាឃីម ព្រះជន្ម ២២ព្រះវស្សា (ឆ្នាំ) គង់នៅវត្តនួនមណីរាម ហៅវត្តថាន់ រាជធានីភ្នំពេញ បានសន្យានៅចំពោះមុខព្រះចៅអធិការថា ចាប់ពីពេលនេះតទៅ នឹងឈប់ចូលរួមសកម្មភាពបាតុកម្ម និងសកម្មភាពផ្សេងៗ ប៉ះពាល់ដល់សណ្ដាប់ធ្នាប់សង្គម បើមិនដូច្នេះទេ នឹងទទួលខុសត្រូវ ចំពោះមុខច្បាប់។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីអ្នកនាំពាក្យសាលារាជធានីភ្នំពេញ លោក លោក ម៉េត មាសភក្តី បាននៅឡើយទេ នៅថ្ងៃទី១៩ សីហា ដោយសារទូរស័ព្ទហៅចូលច្រើនដង តែគ្មានអ្នកលើក។
រីឯអ្នកនាំពាក្យក្រសួងធម្មការ និងសាសនា លោក សេង សុមុនី ក៏មិនទាន់អាចសុំការអធិប្បាយបានដែរ។
ព្រះតេជព្រះគុណ ធូ វ៉ាឃីម ជានិស្សិតច្បាប់ឆ្នាំទី៣ នៃសកលវិទ្យាល័យមួយនៅរាជធានីភ្នំពេញ។ កន្លងទៅព្រះសង្ឃអង្គនេះបានធ្វើសកម្មភាពសង្គមជាច្រើន រួមមាន ការពារព្រៃឈើ ឃ្លាំមើលបញ្ហាដីធ្លី ទាមទារយុត្តិធម៌សង្គម និងជំទាស់ ចំពោះការអនុវត្តច្បាប់លើយុវជនចលនាមាតាធម្មជាតិទាំង ៥រូប ដាក់ពន្ធនាគារ ព្រមទាំងមិនពេញចិត្ត ចំពោះការចាប់ខ្លួនប្រធានសមាគមសម្ពន្ធនិស្សិតបញ្ញវន្តខ្មែរ លោក កើត សារ៉ាយ ដាក់ពន្ធនាគារជាដើម។
ទាក់ទងរឿងនេះដែរ ព្រះសង្ឃគង់នៅប្រទេសកាណាដា ព្រះតេជព្រះគុណ ម៉ិញ សុខមីល ដែលតែងតែចេញវីដេអូឈឺឆ្អាលរឿងសង្គម និងនយោបាយ មានថេរដីកាថា ព្រះសង្ឃ ដែលសកម្មភាព ក្នុងការចូលរួមជួយសង្គម មិនខុសនឹងព្រះវិន័យរបស់ព្រះពុទ្ធទេ។
ព្រះអង្គបន្ថែមថា បច្ចុប្បន្នអាជ្ញាធរបានដើរគំរាមព្រះសង្ឃតាមវត្តអារាម ដោយរឹតត្បិតព្រះសង្ឃគ្រប់ៗ អង្គ មិនឱ្យចូលរួមសកម្មភាពសង្គម និងនយោបាយ ជាអំពើល្មើសច្បាប់ធ្ងន់ធ្ងរ។
លោក ម៉ិញ សុខមីល៖«ទុក្ខរបស់បរិស័ទ គឺជាទុក្ខរបស់ព្រះសង្ឃ ឆ្នាំងបាយរបស់បរិស័ទ ក៏ជាឆ្នាំងបាយព្រះសង្ឃ បើគណៈសង្ឃគ្រប់អង្គហាមឃាត់ព្រះសង្ឃ ដែលធ្វើសកម្មភាពស្រឡាញ់ជាតិ ផ្សព្វផ្សាយនូវការពិត ស្មើនឹងគណៈសង្ឃក្បត់បរិស័ទ ហើយបម្រើនៅមនសិការរបស់ជនក្បត់។ កុំអូសទាញគេទៅចូលរួមក្បត់ជាមួយខ្លួន»។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត ពន្យល់ថា ព្រះសង្ឃមានតួនាទីសំខាន់ ក្នុងការអប់រំពលរដ្ឋទាំងផ្លូវចិត្ត និងផ្លូវធម៌ឱ្យដើរផ្លូវល្អ និងចូលរួមជួយសង្គម ក៏ប៉ុន្តែប្រសិនបើមានការគំរាមកំហែង និងបំភិតបំភ័យព្រះសង្ឃ ជាការរំលោភបំពានសិទ្ធិសេរីភាពព្រះសង្ឃ ដែលធានាដោយរដ្ឋធម្មនុញ្ញ និងច្បាប់អន្តរជាតិ។
លោក អំ សំអាត៖«អ៊ីចឹង ការគំរាមកំហែងបំភិតបំភ័យណាមួយទៅលើព្រះសង្ឃ និងពលរដ្ឋមិនឱ្យចូលរួមការងារសង្គម ដែលមិនមែនជាការងារខុសច្បាប់ នោះជាការរំលោភបំពានសិទ្ធិសេរីភាពរបស់ពលរដ្ឋ ឬ បុគ្គល ដែលធានាដោយរដ្ឋធម្មនុញ្ញ និងបទដ្ឋានអន្តរជាតិ»។
ព្រះសង្ឃដែលសកម្មភាពក្នុងកិច្ចការសង្គមឱ្យដឹងថា បច្ចុប្បន្នមន្ត្រីសង្ឃគ្រប់ជាន់ថ្នាក់ រងសម្ពាធពីរដ្ឋាភិបាល បានដាក់គំនាបឱ្យព្រះចៅអធិការវត្ត រឹតត្បិតព្រះសង្ឃគ្រប់វត្តអារាមទាំងអស់ មិនឱ្យចូលរួមបញ្ចេញមតិ ជំទាស់នឹងរដ្ឋាភិបាល តាមបណ្ដាញសង្គម ជាពិសេស គឺរឿងត្រីកោណអភិវឌ្ឍន៍បីប្រទេស គឺកម្ពុជា ឡាវ និងវៀតណាម (CLV-DTA) និងហាមព្រះសង្ឃមិនឱ្យធ្វើបាតុកម្ម ឬធម្មយាត្រាជាដើម។
ព្រះតេជព្រះគុណ ម៉ិញ សុខមីល អំពាវនាវឱ្យព្រះសង្ឃគ្រប់ៗ ព្រះអង្គ ត្រូវសាមគ្គីគ្នា ក្រោកឈរតវ៉ាប្រឆាំង ចំពោះទង្វើរឹតត្បិតទាំងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។