សកម្មជនដីធ្លីល្បីឈ្មោះនៅខេត្តកោះកុង ដែលទើបត្រូវបានសាលាឧទ្ធរណ៍ប្រចាំតំបន់ តាំងនៅខេត្តព្រះសីហនុ ដោះលែងឲ្យនៅក្រៅឃុំបណ្ដោះអាសន្នថ្មីៗនេះ លើកឡើងថា ពួកគាត់នឹងនៅតែបន្តទាមទារស្វែងរកដំណោះស្រាយវិវាទដីធ្លី បើទោះជាត្រូវលះបង់ជីវិតក៏ដោយ។ មន្ត្រីសង្គមស៊ីវិលថា អាជ្ញាធរគួរតែបញ្ឈប់ការរឹតត្បិតសិទ្ធិសេរីភាពមូលដ្ឋានរបស់ពលរដ្ឋ។
សកម្មជនដីធ្លីនៅខេត្តកោះកុងលើកឡើងថា ប្រសិនបើគ្មានដំណោះស្រាយវិវាទដីធ្លី និងទម្លាក់បទចោទប្រកាន់លើតំណាងសហគមន៍ទាំងអស់នោះទេ ពួកគាត់នឹងនៅតែបន្តទាមទារស្វែងរកដំណោះស្រាយបើទោះជារងការគំរាមកំហែង ឬត្រូវលះបង់អាយុជីវិតក៏ដោយ។
សកម្មជនដីធ្លីខេត្តកោះកុង លោកស្រី ផាវ ញ៉ើង ប្រាប់អាស៊ីសេរីនៅថ្ងៃទី៨ តុលាថា ទោះជាស្ថានភាពសុខភាពមិនទាន់ល្អប្រសើរ និងឈឺមុខរបួសក្ដី ក៏លោកស្រីនៅតែប្ដេជ្ញាចិត្តជាមួយសហគមន៍ ដើម្បីទាមទាររកដំណោះស្រាយវិវាទដីធ្លី។
លោកស្រី ផាវ ញ៉ើង៖ «អ៊ីចឹងខ្ញុំនៅតែតស៊ូ ខ្ញុំតែមានជំនឿថា ច្បាប់នៅតែច្បាប់ប្រទេសមានច្បាប់ខ្ញុំនៅតែតស៊ូបើទោះបីជាលំបាក ត្រូវស្លាប់ខ្លួនក៏ដោយ ខ្ញុំនៅតែសង្ឃឹមអ៊ីចឹងបើទោះបីជាសង្ឃឹមតិចតួចប៉ុនគ្រាប់ស្រូវក៏ដោយក៏ខ្ញុំនៅតែតស៊ូដែរ»។
លោកស្រី ផាវ ញ៉ើង ខកចិត្តចំពោះអាជ្ញាធរ ដែលមិនបំពេញតួនាទីរបស់ខ្លួន ក្រោយពីផ្ទះលោកស្រីត្រូវបានចោរគាស់ អាជ្ញាធរមិនបានចុះមកស៊ើបអង្កេត និងធ្វើរបាយការណ៍អ្វីសោះ ប៉ុន្តែពេលលោកស្រីត្រូវបានដោះលែងពីពន្ធនាគារវិញ បែរជាមកដល់ផ្ទះលោកស្រី និងថតរូបលោកស្រីទៅវិញ។
លោកស្រី ផាវ ញ៉ើង៖ «ពួកខ្ញុំចង់បានយុត្តិធម៌ ពួកខ្ញុំត្រូវការហូបចុកគ្រប់គ្រាន់ដូចគេដែរ ព្រោះខ្ញុំក៏ជាប្រជាពលរដ្ឋខ្មែរដូចគេដែរ ទោះបីជាខ្ញុំគ្មានឋានៈ បុណ្យស័ក្ដិ ប៉ុន្តែក៏មានជីវិតដូចបងប្អូនដទៃទៀតដែរ សូមកុំឲ្យអាជ្ញាធររើសអើងខ្ញុំអ៊ីចឹងអី កុំប្រកាន់បក្សពួកសម្រាប់ខ្ញុំអី»។
ស្រដៀងគ្នានេះដែរ សកម្មជនដីធ្លីម្នាក់ទៀត គឺលោកស្រី សេង លីន ថ្លែងថា លោកស្រីនឹងមិនបញ្ឈប់ការទាមទារស្វែងរកដំណោះស្រាយវិវាទដីធ្លីនេះទេ ហើយនឹងបន្តធ្វើរហូតទាល់តែតុលាការទម្លាក់ការចោទប្រកាន់លើតំណាងសហគមន៍ទាំងអស់ និងដោះស្រាយវិវាទដីធ្លីនេះ។
លោកស្រី សេង លីន៖ «សំណូមពរដល់ ហ៊ុន ម៉ាណែត ឲ្យចាត់ការពួកចោរយកដីរដ្ឋលក់រកយុត្តិធម៌ជូនពួកខ្ញុំ ពួកខ្ញុំអត់សុខចិត្តទេបើសិនជាមិនរកយុត្តិធម៌ជូនពួកខ្ញុំ ពួកខ្ញុំនឹងដើរតវ៉ារហូតដើម្បីរកយុត្តិធម៌ឲ្យពួកខ្ញុំ រកចោរឲ្យឃើញឲ្យពួកខ្ញុំ»។
សកម្មជនដីធ្លីនៅខេត្តកោះកុង អះអាងថា ចាប់តាំងពីតុលាការបានសម្រេចដោះលែងឲ្យពួកគាត់នៅក្រៅឃុំបណ្ដោះអាសន្នមក ជារៀងរាល់ថ្ងៃតែងតែមានសមត្ថកិច្ចស្លៀកពាក់ឯកសណ្ឋាន និងស៊ីវិល តាមឃ្លាំមើលសកម្មភាពរបស់ពួកគាត់។ ជាងនេះទៅទៀត នៅពេលមានតំណាងសហគមន៍ ឬពលរដ្ឋមកសួរសុខទុក្ខម្ដងៗ អាជ្ញាធរតែងតែសួរនាំ និងថតរូបពួកគេថែមទៀតផង។
វិទ្យុអាស៊ីសេរីនៅពុំទាន់អាចទាក់ទងអ្នកនាំពាក្យក្រសួងយុត្តិធម៌លោក ជិន ម៉ាលីន និងអធិការដ្ឋាននគរបាលស្រុកបុទុមសាគរ លោក យេន តូច ដើម្បីសុំការឆ្លើយតបជុំវិញបញ្ហានេះបាននៅឡើយទេ នៅថ្ងៃទី៨ តុលា។
ទោះជាយ៉ាងណា មន្ត្រីទទួលបន្ទុកសិទ្ធិមនុស្ស និងធុរកិច្ចនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត មានប្រសាសន៍ថា នៅពេលអាជ្ញាធរ តាមដានឃ្លាំមើលសកម្មជនដីធ្លីទាំងនោះជាប្រចាំ គឺជាការរំលោភសិទ្ធិសេរីភាពជាមូលដ្ឋានរបស់ពួកគេដូចជា សិទ្ធិបញ្ចេញមតិ សិទ្ធិដើរហើរជាដើម។ លោកបន្តថា អំពើរបស់អាជ្ញាធរមូលដ្ឋាននេះ ផ្ទុយពីពាក្យ «អរគុណសន្តិភាព» របស់រដ្ឋាភិបាល ដែលអាចធ្វើឲ្យប៉ះពាល់ដល់មុខមាត់របស់រដ្ឋាភិបាល។
លោក វណ្ណ សូផាត៖ «អ៊ីចឹងអាហ្នឹងវាផ្ទុយទៅនឹងពាក្យថា អរគុណសន្តិភាព។ អរគុណសន្តិភាពមានន័យថា ប្រជាពលរដ្ឋគ្រប់រូបគាត់រស់នៅមានសន្តិភាព សន្តិភាពទាំងផ្លូវចិត្ត និងផ្លូវកាយ។ បើសិនជាដាក់សម្ពាធទៅលើគាត់របៀបហ្នឹងថា អាហ្នឹងគឺជាសញ្ញាដែល អាជ្ញាធរហ្នឹងមិនអនុវត្តន៍តួនាទី ឬក៏ធ្វើឲ្យប៉ះពាល់ដល់កិត្តិសព្ទរបស់រាជរដ្ឋាភិបាលទៅវិញទេ ដោយសាររាជរដ្ឋាភិបាលខ្ញុំយល់ថា ប្រហែលជាលោកមិនបានបញ្ជាឲ្យអាជ្ញាធរហ្នឹងទៅធ្វើអ៊ីចឹង ទៅបង្ហាញនូវការរឹតត្បិតបំបាក់ស្មារតីប្រជាពលរដ្ឋទេ»។
កាលពីថ្ងៃទី២៩ សីហា សាលាឧទ្ធរណ៍ព្រះសីហនុ សម្រេចឲ្យសកម្មជនដីធ្លី ខេត្តកោះកុងទាំង៩នាក់ ដែលត្រូវបានចោទប្រកាន់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ឲ្យនៅក្រៅឃុំបណ្ដោះអាសន្ន ប៉ុន្តែសកម្មជនត្រឹមតែ៧នាក់ប៉ុណ្ណោះ ត្រូវបានដោះលែងឲ្យនៅក្រៅឃុំកាលពីពេលនោះ។ ចំណែកសកម្មជន២នាក់ផ្សេងទៀត គឺលោកស្រី ផាវ ញ៉ើង និងលោកស្រីសេង លីន ត្រូវបានតុលាការចោទប្រកាន់ ពីបទបរិហារបង្កាច់កេរ្តិ៍មួយបទចោទទៀត ហើយត្រូវបានសាលាឧទ្ធរណ៍ឲ្យនៅក្រៅឃុំ កាលពីថ្ងៃទី០៥ តុលា។
សកម្មជនដីធ្លី និងមន្ត្រីអង្គការសង្គមស៊ីវិល ទទូចឲ្យរដ្ឋាភិបាលដោះស្រាយបញ្ចប់វិវាទដីធ្លីរាំ រៃនេះ និងស្នើដល់អាជ្ញាធរមូលដ្ឋានបញ្ឈប់ការរឹតត្បិតសិទ្ធិសេរីភាពជាមូលដ្ឋានរបស់ពលរដ្ឋ៕
កំ ណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។