និស្សិតម្នាក់ដែលជាអ្នកគាំទ្រ និងថតសកម្មភាពតស៊ូមតិ របស់អតីតគរុសិស្សនៃវិទ្យាស្ថានជាតិអប់រំកាយ និងកីឡា លោក កែវ សុវណ្ណឫទ្ធិ បារម្ភពីការលុបឈ្មោះពីសាកលវិទ្យាល័យ ក្រោយពេលថ្នាក់ដឹកនាំសាលាសួរលោកអំពីមូលហេតុ ដែលលោកចូលរួមតស៊ូមតិនៅមុខក្រសួងអប់រំ និងស្ថាប័នរដ្ឋ។ មន្ត្រីសង្គមស៊ីវិលចាត់ទុកថា ការសាកសួរពីថ្នាក់ដឹកនាំ សាលាមកលើយុវជន ដែលហ៊ានអនុវត្តសិទ្ធិសេរីភាពតាមផ្លូវច្បាប់ គឺជាទម្រង់ នៃការរឹតត្បិតសេរីភាព។
ក្ដីបារម្ភរបស់និស្សិតសាកលវិទ្យាល័យជាតិគ្រប់គ្រង លោក ឡាន ប្រាថ្នា ដែលត្រូវជាមិត្តភ័ក្ដិរបស់លោក កែវ សុវណ្ណឫទ្ធិ គឺក្រោយពីសកលវិទ្យាធិការរងបានហៅទូរស័ព្ទមកសួរកាលពីថ្ងៃទី២៨ និង២៩ ខែតុលា ពីមូលហេតុដែលលោកទៅចូលរួមធ្វើសកម្មភាពតស៊ូមតិជាមួយ លោក កែវ សុវណ្ណឫទ្ធិ ក្នុងពេលកន្លងទៅនេះ។
លោក ឡាន ប្រាថ្នា ប្រាប់វិទ្យុអាស៊ីសេរីនៅថ្ងៃទី៣០ តុលាថា ការសួរនាំរបស់ថ្នាក់ដឹកនាំសាលានៅពេលនេះ ធ្វើឱ្យលោកមានការព្រួយបារម្ភថា សាកលវិទ្យាល័យនឹងលុបឈ្មោះលោកមិនឱ្យរៀនបន្តទៀត។
ទោះជាយ៉ាងណាក្ដី លោក ឡាន ប្រាថ្នា ថា អ្នកដែលហៅទូរស័ព្ទមកលោកនោះមិនបានប្រាប់ឈ្មោះទេ គឺគ្រាន់តែប្រាប់ថា គឺគាត់ជាសកលវិទ្យាធិការរង ហើយគ្រាន់តែសួរលោកអំពីមូលហេតុលោកទៅចូលរួមទៅថតសកម្មភាពតវ៉ា ប៉ុន្តែសកលវិទ្យាធិការរងរូបនោះ ក៏មិនបានហាមឱ្យឈប់សកម្មភាពនោះដែរ។ លោក ឡាន ប្រាថ្នា ប្រាប់ថា បើទោះជាលោកនឹងមិនអាចទៅថតសកម្មភាពតវ៉ាឱ្យលោក កែវ សុវណ្ណឫទ្ធិ ដូចមុនក្ដី តែលោកនឹងនៅតែទៅតាមដាន និងគាំទ្រលោក កែវ សុវណ្ណឫទ្ធិ ពីចម្ងាយ។
លោក ឡាន ប្រាថ្នា៖«និយាយរួមទៅខ្លាចទាំងអស់ ដូចថា ខ្លាចខាងសាលាគេរករឿង គេអាចលុបឈ្មោះយើងចេញពីសាលា ក៏ខ្លាចបែបអ៊ីចឹងដែរ ដូចទៅខាងលោក កែវ សុវណ្ណឫទ្ធិ ចូលរួមម្ដងៗ សុទ្ធតែមានការភ័យខ្លាចជាប់ខ្លួនទាំងអស់បង ដូចថា យកទៅប្រថុយ។ ខ្ញុំគិតថា ជាសកម្មភាពមួយ ដែលត្រឹមត្រូវអត់ខុសច្បាប់អីទេ ធ្វើក្នុងគោលបំណង គឺទាមទាររកយុត្តិធម៌ មិនមែនធ្វើបំផ្លាញ ធ្វើឱ្យប៉ះពាល់នរណាគេឡើយ»។
លោក ឡាន ប្រាថ្នា ឱ្យដឹងទៀតថា កន្លងមកលោកត្រូវបានអាជ្ញាធររាជធានីភ្នំពេញ វាយលោកលើកទីមួយរហូតដល់សន្លប់ និងលើកទី២ អាជ្ញាធរ ក៏បានព្រួតវាយលោកឱ្យមានរបួសផងដែរ។ លោក ឡាន ប្រាថ្នា ចាត់ទុកការប្រើហិង្សាមកលើលោក និងលោក កែវ សុវណ្ណឬទ្ធិ មិនមែនជាការអនុវត្តច្បាប់នោះទេ។
អតីតគរុសិស្សនៃវិទ្យាស្ថានជាតិអប់រំកាយ និងកីឡា លោក កែវ សុវណ្ណឫទ្ធិ ថា ការសាកសួរមិត្តភ័ក្ដិរបស់លោកពីសំណាក់ថ្នាក់ដឹកនាំសាកលវិទ្យាល័យ គឺជាការរឹតត្បិតសេរីភាព និងបំបិទសិទ្ធិពលរដ្ឋមិនឱ្យចេញមុខតវ៉ារកយុត្តិធម៌។
លោក កែវ សុវណ្ណឫទ្ធិ៖«សកលវិទ្យាធិការគ្រប់សាកលវិទ្យាល័យទាំងអស់មេត្តាពិចារណាឡើងវិញ ការចោទសួរជាសំណួរបែបនេះ ធ្វើឱ្យយុវជនមានភាពភ័យខ្លាច ការសួរនេះ គឺជ្រៀតជ្រែកទៅដល់សិទ្ធិបុគ្គលឯកជនផងដែរ ដឹងហើយថា បុគ្គលអាចមានសិទ្ធិធ្វើអ្វីខ្លះនៅលើរឿងអ្វីផ្សេងៗ អីចឹងយើងមិនចាំបាច់សួរពីគាត់ទេ»។
នៅព្រឹកថ្ងៃទី៣០ ខែតុលា លោក កែវ សុវណ្ណឫទ្ធិ បន្តសកម្មភាពតស៊ូមតិសប្ដាហ៍ទី១២ ដោយធ្វើដំណើរទៅកាន់ក្រសួងអប់រំ យុវជន និងកីឡា ហើយលោកទទូចសាជាថ្មីទៅកាន់រដ្ឋមន្ត្រីក្រសួងអប់រំកាយ និងកីឡា ផ្ដល់ក្របខ័ណ្ឌឱ្យលោក និងអតីតគរុសិស្សផ្សេងទៀត។ ក្រោយការឈរស្រែកតវ៉ាមិនទទួលបានលទ្ធផលអ្វី លោក កែវ សុវណ្ណឫទ្ធិ បានធ្វើដំណើរបន្តទៅអគ្គស្នងការដ្ឋាននគរបាលជាតិ ដើម្បីសាកសួរលទ្ធផលពាក្យបណ្ដឹង ដែលអាជ្ញាធរខណ្ឌដូនពេញបានប្រើអំពើហិង្សាម្ដងហើយម្ដងទៀតលើរូបលោក និងអ្នកថតរូបលោក។
ទោះជាយ៉ាងណាក្ដី លោក កែវ សុវណ្ណឫទ្ធិ ថា បណ្ដឹងរបស់លោកនៅមិនមានចំណាត់ការនៅឡើយ ហើយមន្ត្រី នៃអគ្គស្នងការដ្ឋាននគរបាលជាតិអះអាងថា បណ្ដឹងរបស់លោក ត្រូវបានបញ្ជូនទៅថ្នាក់លើ។ លោក កែវ សុវណ្ណឫទ្ធិ សោកស្ដាយ ដែលអាជ្ញាធរនៅតែពន្យារពេលដោះស្រាយបណ្ដឹងរបស់លោក ខណៈដែលលោកបានដាក់បណ្ដឹងច ប់តាំងពីថ្ងៃទី១២ តុលា មកម្ល៉េះ។
លោក កែវ សុវណ្ណឫទ្ធិ៖«ខ្ញុំក៏ស្នើសុំដដែលៗ ក៏ដូចជា បញ្ហាទាំងអស់នេះ គឺខ្ញុំស្នើសុំឱ្យឯកឧត្ដមបណ្ឌិតសភាចារ្យក្រសួងអប់រំ គាត់មេត្តាចេញបកស្រាយនូវបញ្ហា ដែលបោកឱ្យខ្ញុំចូលរៀនអស់រយៈពេលមួយខែ នៅពេល ដែលប្រើអស់សាច់ ហើយបែរជាលុបចេញវិញ»។
វិទ្យុអាស៊ីសេរីមិនទាន់អាចសុំការឆ្លើយតបរឿងនេះពី អ្នកនាំពាក្យក្រសួងអប់រំ លោក កាន់ ពុទ្ធី និង អ្នកនាំពាក្យអគ្គស្នងការនគរបាលជាតិលោក ឆាយ គឹមខឿន បានទេ នៅថ្ងៃទី៣០ ខែតុលា។
ចំណែកសកលវិទ្យាធិការរង នៃសាកលវិទ្យាល័យជាតិគ្រប់គ្រង លោក សេង ប៊ុនធឿន បានឱ្យដឹងថា លោកពុំបានដឹងថា ថ្នាក់ដឹកនាំសាកលវិទ្យាល័យរូបណា ដែលបានសួរនាំលោក ឡាន ប្រាថ្នា នោះឡើយ។
នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ក្នុងករណីដែលលោក ឡាន ប្រាថ្នា ចូលរួមតស៊ូមតិដោយសន្តិវិធី និងស្របតាមច្បាប់ តែថ្នាក់ដឹកនាំសកលវិទ្យាល័យហៅទៅសួរនាំ គឺជាទម្រង់នៃការរឹតត្បិតសេរីភាព។
លោក អំ សំអាត៖«សាលាធ្វើការសួរនាំ អាហ្នឹងវាប៉ះពាល់ទៅដល់សេរីភាពរបស់គាត់ ពីព្រោះលើកលែងតែគាត់ទៅធ្វើអី ដែលប្រព្រឹត្តខុសច្បាប់ តែបើគាត់គ្រាន់តែអនុវត្តសិទ្ធិ និងសេរីភាពជាមូលដ្ឋានរបស់គាត់ ហើយគាត់គាំទ្រមិត្តភ័ក្ដិគាត់ដោយសន្តិវិធី វាអត់មានអី ដែលប៉ះពាល់ ឬទៅសួរនាំអីគាត់ ដែលនាំឱ្យប៉ះពាល់ដល់សិទ្ធិ និងសេរីភាព»។
លោក អំ សំអាត បន្តថា មន្ត្រីពាក់ព័ន្ធគួរពន្លឿនចាត់វិធានការតាមផ្លូវច្បាប់ ដែលអាជ្ញាធរខណ្ឌដូនពេញបានប្រើអំពើហិង្សាលើ លោក កែវ សុវណ្ណឫទ្ធិ និងមិត្តភ័ក្ដិរបស់លោក ជៀសវាងកុំឱ្យមានអំពើនិទ្ទណ្ឌភាពបន្តកើនឡើងដូចការវាយដំទៅលើសកម្មជនបក្សប្រឆាំង និងសកម្មជនសិទ្ធិមនុស្សផ្សេងទៀត។
លោក កែវ សុវណ្ណឫទ្ធិ អាយុ ២០ឆ្នាំ គឺជាអតីតគរុសិស្សនៃវិទ្យាស្ថានជាតិអប់រំកាយ និងកីឡា ដែលបានប្រឡងជាប់ស្ថាពរ នៅថ្ងៃទី១៣ ខែវិច្ឆិកា ឆ្នាំ២០២១។ លោក កែវ សុវណ្ណឫទ្ធិ និងអតីតគរុសិស្ស ១១នាក់ផ្សេងទៀត ត្រូវបានលុបឈ្មោះចេញកាលពីថ្ងៃទី២៨ ខែធ្នូ ឆ្នាំ២០២១។ លោក កែវ សុវណ្ណឫទ្ធិ និងលោក ឡាន ប្រាថ្នា ធ្លាប់ត្រូវបានកម្លាំងសន្តិសុខខណ្ឌដូនពេញ ប្រើអំពើហិង្សាចំនួនពីរដង កាលពីថ្ងៃទី២១ ខែសីហា និងថ្ងៃទី៩ ខែតុលា កន្លងទៅ បណ្ដាលឱ្យសន្លប់ និងមានរបួសខ្លួនប្រាណមួយចំនួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។