អ្នកការពារសិទ្ធិកម្មករ និងអតីតអ្នកជាប់ឃុំ លោក រ៉ុង ឈុន បានជួបជជែកជាមួយ អ្នករាយការណ៍ពិសេសអង្គការសហប្រជាជាតិ នៅរសៀលថ្ងៃនេះ និយាយពីបញ្ហាបោះឆ្នោត លំហសេរីភាពរបស់សហជីព និងបញ្ហាប្រឈមរបស់កម្មករ។ ជំនួបដែលមានរយៈពេលជាង ១មួយនេះ លោក វិទិត មុនតាប៊ន (Vitit Muntarbhorn) បានសួរនាំទីប្រឹក្សាសមាគមគ្រូបង្រៀនកម្ពុជាឯករាជ្យ និងជាប្រធានសហភាពសហជីពកម្ពុជា លោក រ៉ុង ឈុន បញ្ហាជាច្រើន រួមមាន ការបោះឆ្នោតថ្នាក់ក្រោមជាតិឆ្នាំ២០២២ និងការបោះឆ្នោតថ្នាក់ជាតិ ២០២៣ ខាងមុខ ការអនុវត្តសិទ្ធិសហជីព សង្គមស៊ីវិល និងករណី តុលាការចោទប្រកាន់លើលោក រ៉ុង ឈុន ដែលសំណុំរឿងកំពុងស្ថិតក្រោមការឃ្លាំមើលពីតុលាការ។
លោក រ៉ុង ឈុន ឲ្យវិទ្យុអាស៊ីសេរីដឹងក្រោយជំនួប នៅល្ងាចថ្ងៃទី២២ ខែសីហា លោកបានប្រាប់ អ្នករាយការណ៍ពិសេសអង្គការសហប្រជាជាតិថា កាលពីការបោះឆ្នោតថ្មីៗ នេះ លំហសេរីភាពសកម្មជនសិទ្ធិមនុស្ស និងសកម្មជននយោបាយ មានការរឹតបន្តឹង។ លោកបន្តថា ការមានការរារាំងការលើកស្លាកគណបក្សនយោបាយក្រៅរដ្ឋាភិបាល ការប្រើប្រាស់ហិង្សា ការគំរាមកំហែង និងការប្ដឹងទៅតុលាការជាដើម ដែលករណីទាំងនោះភាគច្រើនកើតឡើងលើគណបក្សភ្លើងទៀន។ លោកឲ្យដឹងទៀតថា ទាក់ទងសិទ្ធិការងារ ការប្រមូលផ្ដុំ ការបញ្ចេញមតិរបស់កម្មករ និងការចងក្រងសហជីពនៅតាមរោងចក្រ មានភាពតូចចង្អៀត៖ « គាត់នឹងលើកបញ្ហាទាំងអស់នេះ ដាក់បញ្ចូលក្នុងរបាយការណ៍ ហើយប្រជុំគាត់នឹងសូត្រ ( ថ្លែង ) នៅពេលប្រជុំខែ១០ ( ខែតុលា ) ខាងមុខនេះ។ អ៊ីចឹងយើងគិតថា វត្តមានរបស់គាត់ បេសកកម្មប្រមាណ ១០ថ្ងៃនេះ មានសារសំខាន់ណាស់ សម្រាប់មកសិក្សា ក៏ដូចជាមកខាងមុខនេះជាការស្វែងរកព័ត៌មាន ពិតទាក់ទងដំណើរការ ការគោរពសិទ្ធិមនុស្ស និងប្រជាធិបតេយ្យនៅកម្ពុជាបាទ » ។
លោក រ៉ុង ឈុន ឲ្យដឹងទៀត ក្នុងជំនួបពិសេសនោះ ប្រេសិតពិសេសអង្គការសហប្រជាជាតិ លោកក៏បានបង្ហាញការបារម្ភ ដោយខ្លាចកម្ពុជាដើរជាន់ចាស់ទាក់ទងជម្លោះក្នុងតំបន់ និងអន្តរជាតិ ខណៈរដ្ឋាភិបាល លោក ហ៊ុន សែន កំពុងមានទំនោរខ្លាំងទៅប្រទេសកុម្មុយនិស្តចិន។
អ្នករាយការណ៍ពិសេសអង្គការសហប្រជាជាតិ ទទួលបន្ទុកផ្នែកសិទ្ធិមនុស្សប្រចាំនៅកម្ពុជា មកបំពេញទស្សនកិច្ចនៅកម្ពុជា ដើម្បីវាយតម្លៃស្ថានភាពសិទ្ធិមនុស្សពីថ្ងៃទី១៥ ដល់ថ្ងៃទី២៦ ខែសីហា។ បេសកកម្មនេះ លោក វិទិត មុនតាប៊ន បានជួបក្រុមមន្ត្រីអង្គការសង្គមស៊ីវិល លោកនាយករដ្ឋមន្ត្រី ហ៊ុន សែន ប្រធានគណបក្សសង្គ្រោះជាតិ លោក កឹម សុខា ពលរដ្ឋ និងអ្នកពាក់ព័ន្ធផ្សេងទៀត ដើម្បីចងជារបាយការណ៍សម្រាប់ថ្លែងកិច្ចប្រជុំអង្គការសហប្រជាជាតិ នាខែតុលាការខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។