ប្រធានព្រឹទ្ធសភា និងជាមេបក្សកាន់អំណាច លោក ហ៊ុន សែន ព្រមានប្រើវិធានការច្បាប់ដោយគ្មានការលើកលែងចំពោះអ្នកណាដែលរិះគន់រឿងតំបន់អភិវឌ្ឍន៍ត្រីកោណពិសេស (កម្ពុជា ឡាវ និងវៀតណាម )។ ការព្រមាននេះបន្ទាប់ពីសមត្ថកិច្ច បានចាប់ខ្លួនសកម្មជនកិច្ចព្រមព្រៀងក្រុងប៉ារីស ៣នាក់នៅព្រឹកថ្ងៃទី២៣ ខែកក្កដា បន្ទាប់ពីពួកគាត់បញ្ចេញមតិព្រួយបារម្ភអំពីគម្រោងអភិវឌ្ឍន៍រួមគ្នាលើតំបន់ត្រីកោណពិសេសនេះ។ អ្នកឃ្លាំមើលចាត់ទុកថា ការចាប់ខ្លួនសកម្មជនកិច្ចព្រមព្រៀងក្រុងប៉ារីសនេះ គឺជាការរំលោភសិទ្ធិមនុស្សធ្ងន់ធ្ងរ។
លោក ហ៊ុន សែន នៅរសៀលថ្ងៃទី២៣ ខែកក្កដា បានចេញមុខថ្លែងសារជំនួសកូនប្រុសរបស់លោកគឺលោកនាយករដ្ឋមន្ត្រី ហ៊ុន ម៉ាណែត ដោយបានព្រមានធ្ងន់ៗទៅកាន់អ្នកទាំងឡាយណាដែលហ៊ានបញ្ចេញមតិព្រួយបារម្ភអំពីការបាត់បង់ផលប្រយោជន៍ ឬបាត់បង់បូរណភាពទឹកដីរបស់កម្ពុជាដោយសារកិច្ចសហប្រតិបត្តិការតំបន់អភិវឌ្ឍន៍ត្រីកោណពិសេស (CLV) ឬហៅថា តំបន់មុំ៣ ដែលស្ថិតនៅភាគ ឦសាននៃប្រទេសកម្ពុជា ជាប់ព្រំដែនប្រទេសវៀតណាម និងឡាវ។
លោក ហ៊ុន សែន ថ្លែងទាំងកំហឹងថា លោកគឺជាអ្នកបញ្ជាឱ្យសមត្ថកិច្ចខេត្តសៀមរាបចាប់ខ្លួនសកម្មជនកិច្ចព្រមព្រៀងសន្តិភាពទីក្រុងប៉ារីស លោក ស៊្រុន ស្រ៊ន និងយុវជនផ្សេងទៀតដែលរិះគន់រឿងកិច្ចសហប្រតិបត្តិការតំបន់អភិវឌ្ឍន៍ត្រីកោណដែលជាគំនិតផ្ដួចផ្ដើមរបស់លោក។ មេបក្សកាន់អំណាចរូបនេះ សង្កត់ធ្ងន់ថា លោកនឹងមិនអត់ឱវាទដាច់ខាតចំពោះអ្នករិះគន់រឿងនេះ ដោយសម្រាប់អ្នករិះគន់នៅក្នុងស្រុក នឹងត្រូវប្រឈមការចាប់ខ្លួនដាក់គុក ហើយអ្នករិះគន់ពីក្រៅស្រុកនឹងត្រូវបានសមត្ថកិច្ចរបស់លោក ស្រាវជ្រាវដល់ក្រុមគ្រួសាររបស់ពួកគេ។ ជាងនេះទៅទៀត លោក ហ៊ុន សែន បញ្ជាឱ្យតុលាការ ហាមបន្ធូរបន្ថយទោស ឫលើកលែងទោសដល់អ្នកដែលហ៊ាននិយាយរិះគន់អំពីគម្រោងតំបន់ត្រីកោណពិសេសនេះ។
លោក ហ៊ុន សែន៖«ពេលនេះប្រហែលជាចាប់ ថ្ងៃមុនចាប់យកម្នាក់មករឿងហ្នឹងដដែលរឿងហ្នឹងដដែលថ្ងៃនេះចាប់ពីរនាក់ពីសៀមរាបមកប្រហែលកំពុងដឹកមកភ្នំពេញ។ បងប្អូននឹងអាចបាត់អាគ្រូ២៣ តុលា ១៩៩១ គ្រូកិច្ចព្រមព្រៀងទីក្រុងប៉ារីសបើហែងនិយាយពីកិច្ចព្រមព្រៀងទីក្រុងប៉ារីសហែងនិយាយទៅហែងនិយាយស្អីរឿងហ្នឹង ហែងនិយាយទាំងបំពានហែងរកផ្លូវច្បាប់ ហើយក្រសួងពាណិជ្ជកម្មរៀបចំបញ្ជូនឯកសារ ទាំងអស់ទៅឱ្យតុលាការមិនអាចឱ្យអ្នកឯងបំពានទេ»។
លោកថ្លែងថា សមត្ថកិច្ច បានដឹកសកម្មជនកិច្ចព្រមព្រៀងសន្តិភាពទីក្រុងប៉ារីសពីខេត្តសៀមរាប ដើម្បីបញ្ជូនមកកាត់ទោសនៅតុលាការក្រុងភ្នំពេញ។
ការលើកឡើងរបស់លោក ហ៊ុន សែន នេះ គឺបន្ទាប់ពីសមត្ថកិច្ចសៀមរាបបានឃាត់ខ្លួនសកម្មជនកិច្ចព្រមព្រៀងក្រុងប៉ារីស ៣នាក់ រួមមានលោក ស្រ៊ុន ស្រ៊ន កញ្ញា ភឹង សោភា និងសាន សិទ្ធិនៅស្រុកវ៉ាវិន ខេត្តសៀមរាប បន្ទាប់ពីពួកគាត់ បានផ្សព្វផ្សាយវីដេអូតាមបណ្ដាញសង្គមហ្វេសប៊ុកថា តើការបញ្ចូលខេត្តទាំង ៤ របស់ខ្មែរដើម្បីអភិវឌ្ឍជាមួយវៀតណាម និងឡាវ (CVL) មានគុណសម្បត្តិ និងគុណវិបត្តិអ្វីខ្លះ? ហើយតើមានដំណោះស្រាយបែបណាចំពោះរឿងនេះ?
ប្រពន្ធ លោក សាន សិទ្ធិ គឺលោកស្រី ស្វាយ ពៅ ប្រាប់វិទ្យុអាស៊ីសេរីនៅថ្ងៃទី២៣ ខែកក្កដា ថា សមត្ថកិច្ចបានចុះមកឃាត់ខ្លួនប្ដីលោកស្រី និងសកម្មជនកិច្ចព្រមព្រៀងក្រុងប៉ារីស ២នាក់ទៀត នៅក្នុងផ្ទះលោកស្រី បញ្ជូនទៅស្នងការដ្ឋាននគរបាលខេត្តសៀមរាបដោយមិនបានបញ្ជាក់ពីមូលហេតុច្បាស់លាស់ឡើយ។ លោកស្រីបន្តថា លោកស្រីបានទៅសាកសួរអាជ្ញាធរឃុំ ស្រែណូយពីករណីឃាត់ខ្លួនប្ដីលោកស្រីនេះ ដោយអាជ្ញាធរឃុំបានប្រាប់លោកស្រីថា ការឃាត់ខ្លួនទាំង៣នាក់នេះ គឺដោយសារ លោក ស្រ៊ុន ស្រ៊ន បង្ហោះសារនៅលើហ្វេសប៊ុកផេករបស់លោកដែលនិយាយប៉ះពាល់ដល់រដ្ឋាភិបាល។
លោកស្រី ស្វាយ ពៅ៖«អត់អូនអត់បានសោះគាត់ធ្វើនេះគឺដូចថា បំបិទសិទ្ធិសេរីភាពប្រជាពលរដ្ឋ ហើយបើរឿងហ្នឹងធំតូចម៉េចក៏ដោយក៏ត្រូវខលជួបប្រពន្ធសិនដែរ។ ពីព្រោះអ្នកផ្ទះក៏ខ្វល់ខ្វាយឱ្យប្ដីខ្ញុំជួបម៉ាត់មកថា រឿងហ្នឹងវាយ៉ាងម៉េចឯងមិនបាច់ភ័យទេរកស៊ីអីធម្មតា ឬមួយម៉េចឯងកុំភ័យអីចេះដល់អ៊ីចឹងខ្ញុំមានអារម្មណ៍មួយភ័យដែរ ប្រសិនបើយើងធ្វើអីខុសគាត់ត្រូវជូនដំណឹងឱ្យពលរដ្ឋដឹងពីកំហុសខ្លួនឯង»។
សកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន និងកញ្ញា ភឹង សោភា ដែលបានលើកឡើងនៅក្នុងវីដេអូជាង ១១នាទីដែលបង្ហោះនៅលើទំព័រហ្វេសប៊ុករបស់លោក នៅព្រឹកថ្ងៃទី២៣ ខែកក្កដា ថា រដ្ឋាភិបាលបានដាក់ខេត្តចំនួន៤ រួមមាន ក្រចេះ ស្ទឹងត្រែង រតនគិរី និងមណ្ឌលគិរី ក្នុងគ្រោងតំបន់ត្រីកោណពិសេសដើម្បីធ្វើពាណិជ្ជកម្មរួមជាមួយវៀតណាម និងឡាវ។ ប៉ុន្តែលោក ស្រ៊ុន ស្រ៊ន មើលឃើញថា កម្ពុជានឹងបាត់បង់ទឹកដីឱ្យទៅវៀតណាមគ្រប់គ្រងពីព្រោះពលរដ្ឋកម្ពុជាដែលរស់នៅចំនួន៤ខេត្តនេះ មានប្រជាពលរដ្ឋរស់នៅតិចជាងពលរដ្ឋវៀតណាមពោលគឺកម្ពុជាមានពលរដ្ឋខ្មែរប្រមាណ ៥សែននាក់ និងប្រទេសវៀតណាមមានពលរដ្ឋប្រមាណជាង៧លាន់នាក់ ហើយប្រទេសឡាវមានពលរដ្ឋប្រមាណ៥សែននាក់ ដែលប្រទេសឡាវបច្ចុប្បន្នចំណុះឱ្យប្រទេសវៀតណាម ដូច្នេះប្រទេសវៀតណាមនឹងដាក់បញ្ចូលពលរដ្ឋរបស់ខ្លួនក្នុងទឹកដីកម្ពុជា។ ក្រៅពីនេះលោកថ្លែងថា កម្ពុជាអាចប្រឈមនឹងវិបត្តិសង្គ្រាមប្រសិនបើពលរដ្ឋវៀតណាមមករស់នៅលើទឹកដីកម្ពុជាកាន់តែច្រើន ជាពិសេសបញ្ហាអត់ការងារធ្វើ និងបាត់បង់ធនធានធម្មជាតិជាដើម។
លោក ស្រ៊ុន ស្រ៊ន៖«៤ខេត្តនេះមានកន្លះលាន ហើយភាគច្រើនជាជនជាតិដើមភាគតិចដែលអត់មានចំណេះដឹងទេខាងសង្គម នយោបាយ ខាងយោធា ខាងវប្បធម៌អ៊ីចឹងយួន នឹងបញ្ជូនប្រជាជន៧លានជាងអាចនឹង ១០លាននាក់នោះចូលមកដល់ទឹកដីតំបន់ត្រីកោណមុន និងក្រោយគេនឹងកាត់យកខេត្តទាំង៤។ ហើយពង្រីងចូលមកដល់ត្បូងឃ្មុំ កំពង់ចាម កំពង់ធំ សៀមរាប ព្រះវិហារ ឧត្តរមានជ័យក៏មិននៅដែរ រីកហើយពីព្រោះគេមានកិច្ចព្រមព្រៀងមួយដែលពលរដ្ឋគេចូលមករស់នៅក្នុងទឹកយើងបាន»។
វិទ្យុអាស៊ីសេរីមិនអាចទាក់ទង ស្នងការនៃស្នងការដ្ឋាននគរបាលខេត្តសៀមរាប លោក ហួត សុធី និងស្នងការនគរបាលរាជធានីភ្នំពេញ លោក ជួន ណារិន្ទ ដើម្បីសុំការបកស្រាយជុំវិញបញ្ហានេះបានទេនៅថ្ងៃទី២៣ ខែកក្កដា។
ទាក់ទងនឹងរឿងនេះ អ្នកឃ្លាំមើលសិទ្ធិមនុស្ស និងសង្គម លោក ស៊ឹង សែនករុណា មានប្រសាសន៍ថា ការចាប់ខ្លួនសកម្មជនកិច្ចព្រមព្រៀងទីក្រុងប៉ារីសចំនួន៣នាក់នេះ គឺជារំលោភសិទ្ធិមនុស្សធ្ងន់ធ្ងរ និងធ្វើឱ្យកម្ពុជាឆ្ពោះទៅរករបបផ្ដាច់ការ។
លោក ស៊ឹង សែនករុណា៖«ការគំរាមកំហែងទៅលើការបញ្ចេញមតិហើយក្នុងករណីធ្វើអ្វីទៅតាមអំពើចិត្តបែបនេះ វាហានិភ័យទៅដល់ប្រទេសជាតិពីព្រោះថា រឿងទាំងអស់នេះគឺជារឿងទឹកដី ជារឿងវាសនារបស់ប្រទេសជាតិ មិនឱ្យប្រជាពលរដ្ឋ ឬមិនឱ្យអ្នកដែលធ្វើកិច្ចការងារសង្គម និងនយោបាយគេបញ្ចេញមតិអាហ្នឹងគឺជាការរឹតត្បិត ទៅលើសិទ្ធិសេរីភាពរបស់ប្រជាពលរដ្ឋ។ អ៊ីចឹងប្រសិនបើអ្នកដឹកនាំប្រទេសមានទស្សនបែបហ្នឹងវាជាគ្រោះថ្នាក់ដល់អ្នកធ្វើការងារសង្គមជាតិ»។
ការបង្កើតតំបន់ត្រីកោណអភិវឌ្ឍន៍សេដ្ឋកិច្ចពិសេសរួមគ្នាជាមួយប្រទេសវៀតណាម និងឡាវ ដែលមានលោក ហ៊ុន សែន ជាមេគំនិតនេះ បានរងការរិះគន់ជាយូរឆ្នាំមកហើយពីប្រជាពលរដ្ឋ មន្ត្រីបក្សប្រឆាំង និងអ្នកឃ្លាំមើល ដោយថា គម្រោងនេះ នឹងអាចនាំឱ្យកម្ពុជាបាត់បង់ធនធានធម្មជាតិ និងទឹកដីរបស់ខ្លួនដ៏ធំធេងទៅឱ្យប្រទេសវៀតណាមនៅថ្ងៃមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។