សាលាដំបូងខេត្តសៀមរាបប្រកាសសាលក្រមផ្ដន្ទាទោសយុវជនពីរនាក់ដែលច្រៀងរ៉ែប (Rap) រិះគន់បញ្ហាក្នុងសង្គមឱ្យជាប់ពន្ធនាគារម្នាក់រយៈពេល១ឆ្នាំកន្លះ ហើយម្នាក់ទៀតរយៈពេល៥ខែពីបទញុះញង់ឱ្យប្រព្រឹត្តបទល្មើសឧក្រិដ្ឋជាអាទិ៍ នៅព្រឹកថ្ងៃទី២២ ខែធ្នូ។ សាច់ញាតិយុវជនពីររូបនេះ ចាត់ទុកសេចក្តីសម្រេចរបស់តុលាការថាជារឿងអយុត្តិធម៌ និងគំរាមកំហែងលើសេរីភាពសិល្បករ។
តុលាការខេត្តសៀមរាប បានផ្ដន្ទាទោសយុវជន គា សុគន្ធ វ័យ២២ឆ្នាំ ឱ្យជាប់ពន្ធនាគាររយៈពេល១ឆ្នាំ៦ខែ។ ចំណែកយុវជន ឡុង ពុទ្ធារ៉ា វ័យ១៧ឆ្នាំ ឲ្យជាប់ពន្ធនាគាររយៈពេល ៥ខែ ប៉ុន្តែតុលាការសម្រេចឲ្យដោះលែងយុវជនរូបនេះនៅថ្ងៃទី២២ ខែធ្នូ តែម្តង បន្ទាប់ពីអនុវត្តទោសជាប់ពន្ធនាគាររយៈពេល៣ខែនិង១១ថ្ងៃ និងទោសនៅសល់ត្រូវបានព្យួរ។
ការសម្រេចផ្ដន្ទាទោសឲ្យយុវជន គា សុគន្ធ បន្តជាប់ពន្ធនាគារហើយមានរយៈពេលយូរជាងយុវជន ឡុង ពុទ្ធារ៉ា ក្នុងសំណុំរឿងដូចគ្នានេះ ដោយសារតែយុវជន គា សុគន្ធ នៅតែរក្សាជំហរមិនសុំទោសរដ្ឋាភិបាលដោយអះអាងថា ខ្លួនមិនបានប្រព្រឹត្តិកំហុសដូចតាមការចោទប្រកាន់។ រីឯយុវជន ឡុង ពុទ្ធារ៉ា បានទទួលស្គាល់កំហុស និងសុំទោសរដ្ឋាភិបាល ហើយត្រូវបានតុលាការសម្រាលទោស។
បងស្រីបង្កើតយុវជន គា សុគន្ធ គឺកញ្ញា គា ចាន់ណា ចាត់ទុកសេចក្ដីសម្រេចរបស់តុលាការថាជារឿងអយុត្តិធម៌។ កញ្ញាបន្ថែមថា កន្លងទៅតុលាការបានដាក់សម្ពាធឱ្យប្អូនប្រុសកញ្ញាសារភាពកំហុសជាច្រើនសារ ក៏ប៉ុន្តែ យុវជន គា សុគន្ធ នៅតែបដិសេធដោយសារតែខ្លួនមិនបានប្រព្រឹត្តកំហុសដូចការចោទប្រកាន់។ កញ្ញាបន្ថែមថា ក្រុមគ្រួសារកញ្ញាកំពុងពិចារណាប្តឹងទាស់សំណុំរឿងនេះទៅសាលាឧទ្ធរណ៍៖ «ការណ៍ដែល ចាប់ ឃាត់ខ្លួន ដំបូង ប្រសិនបើ គាត់ មាន ការអប់រំ ណែនាំ ហើយ គាត់ ដោះលែង មកវិញ ហើយ គាត់ ឱ្យ ណែនាំ បន្ថែម ហើយ។ យើង ណែនាំ លើ យុវជន មិន ឱ្យ ក្មេង មាន សម្ពាធ អ៊ីចឹង បង ហើយ ដល់ពេល នេះ គាត់ បាន ចាប់ឃុំឃាំង រយៈពេល ៣ខែ ហើយ បាន ឡើង កាត់ក្តី ។ ពេលខ្លះ គាត់ ឱ្យ ក្មេង សុំទោស ប៉ុន្តែ ខ្ញុំ គិតថា ចាប់ គេ ដាក់ ឃុំ ខ្លូ ន ឱ្យ គេ សុំទោស ទាំង គេ មិនមាន កំហុស ហើយ ការណ៍ដែល ចាប់ ហ្នឹង គឺ ចាប់ មិន ត្រឹមត្រូវ ទៀត។ ខ្ញុំ គិតថា វា មិន យុត្តិធម៌ សម្រាប់ សុ គុណ »។
ការប្រកាសសាលក្រមនេះ ធ្វើឡើងបន្ទាប់ពីសាលាដំបូងខេត្តសៀមរាបបានបើកសវនាការជំនុំជម្រះលើសំណុំរឿងចោទប្រកាន់យុវជនទាំងពីរកាលពីថ្ងៃទី២៦ ខែវិច្ឆិកា។ នៅក្នុងសវនាការពេលនោះ លោកចៅក្រម និងព្រះរាជអាជ្ញា បានចោទសួរយុវជនទាំងពីរទៅលើខ្លឹមសារ និងអត្ថន័យបទចម្រៀងមួយចំនួនដូចជាបទ ''សាសន៍កំសត់'' និងបទ ''ដីខ្មែរ'' ដែលតុលាការចាត់ទុកថា មានពាក្យអុចអាលឱ្យប្រជាពលរដ្ឋងើបឡើងប្រឆាំងនឹងអាជ្ញាធរ ឬរាជរដ្ឋាភិបាល។ ប៉ុន្តែទាំងមេធាវី និងជនជាប់ចោទបដិសេធការចោទប្រកាន់ ដោយអះអាងថា ពួកគេគ្មានបំណងញុះញង់នោះទេ។
អាស៊ីសេរី បានព្យាយាមទាក់ទងអ្នកនាំពាក្យតុលាការខេត្តសៀមរាប លោក ជូន សុបញ្ញា ដើម្បីសុំការបំភ្លឺរឿងនេះ តែទូរសព្ទហៅចូលច្រើនដងគ្មានអ្នកទទួលនៅថ្ងៃទី២២ ធ្នូ។ ចំណែកមេធាវីការពារក្តីឱ្យយុវជនទាំងពីររូបនេះ ក៏មិនទាន់អាចទាក់ទងបានដែរនៅថ្ងៃដដែលនេះ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការសិទ្ធិមនុស្សលីកាដូ លោក អំ សំអាត ចាត់ទុកសេចក្តីសម្រេចរបស់តុលាការថា ជាការបំបាក់ស្មារតីលើយុវជនដែលស្នេហាវិស័យសិល្បៈ។លោកថា សំណុំរឿងនេះមិនគួរឈានដល់តុលាការចោទប្រកាន់និងផ្តន្ទាទោសនោះទេ គួរត្រឹមតែអប់រំណែនាំ និងបណ្តុះបណ្តាលពង្រឹងសមត្ថភាពបន្ថែម៖ « ការ សម្រេច នេះ វា ធ្ងន់ធ្ងរ ណាស់ សម្រាប់ យុវជន ទាំងពីរ រូប។ ករណី នេះ ខ្ញុំ មើលទៅ វា ហាក់ជា ការបំបាក់ ឬក៏ បំភិតបំភ័យ ដល់ អ្នក ទាំងពីរ ហើយក៏ ជា ការបំបាក់ ស្មារតី ដល់ យុវជន ផ្សេងទៀត ដែលគាត់ មាន ស្នាដៃ ខាង និពន្ធ ជាដើម ដើម្បី ចូលរួម សង្គម យើង។ អ៊ីចឹង បើ យើង មើលទៅ ករណី នេះ ការចាប់ខ្លួន អ្នក ទាំងពីរ បទល្មើស និង ការចោទប្រកាន់ ហ្នឹង វា កើតឡើង ក្រោយពី យុវជន មួយ ចំនួន ត្រូវ បាន ចាប់ខ្លួន និង ចោទប្រកាន់ ពី បទ ញុះញង់ ហ្នឹង ផងដែរ »។
អាជ្ញាធរបានចាប់ខ្លួនយុវជន គា សុគន្ធ និង ឡុង ពុទ្ធារ៉ា កាលពីដើមខែកញ្ញា ឆ្នាំ២០២០ ពាក់ព័ន្ធនឹងការនិពន្ធ និងច្រៀងចម្រៀងរែប បង្ហោះតាមបណ្ដាញសង្គមយូធូប (YouTube) និងហ្វេសប៊ុក (Facebook) រៀបរាប់ពីរឿងរ៉ាវឈឺចាប់នៅក្នុងសង្គមដូចជា អំពើអយុត្តិធម៌សង្គម បញ្ហាសេដ្ឋកិច្ចធ្លាក់ចុះ ពលរដ្ឋក្រីក្រដើរសុំទាន និងចំណាកស្រុកកាន់តែច្រើន បញ្ហាព្រំដែន សង្គមជាតិទន់ខ្សោយ និងការធ្លាក់ចុះគុណធម៌ជាដើម។ វីដេអូចម្រៀងដែលបង្ហោះជាលើកចុងក្រោយមានចំណងជើងថា «ដីខ្មែរ» មានមនុស្សចូលទស្សនារាប់លានដង និងមានការចែករំលែកយ៉ាងច្រើនតាមបណ្ដាញសង្គមហ្វេសប៊ុក។ អាជ្ញាធរបានចោទយុវជនទាំងពីរពីបទញុះញង់ឲ្យប្រព្រឹត្តិបទឧក្រិដ្ឋជាអាទិ៍។
ទោះយ៉ាងណា កន្លងមក អង្គការសង្គមស៊ីវិលជាតិ និងអន្តរជាតិជាច្រើនស្ថាប័នបានថ្កោលទោសជាបន្តបន្ទាប់ចំពោះការចាប់ខ្លួនយុវជនទាំងពីរនាក់ ដោយចាត់ទុកថា អ្នកទាំងពីរគ្រាន់តែបញ្ចេញមតិតាមបែបសិល្បៈចម្រៀងប៉ុណ្ណោះ ព្រមទាំងបានស្នើឱ្យរដ្ឋាភិបាលដោះលែងយុវជនទាំងពីរ រួមទាំងសកម្មជនសិទ្ធិមនុស្ស និងយុវជនសង្គមដទៃទៀត ដែលត្រូវបានអាជ្ញាធរចាប់ និងឃុំខ្លួនទាំងបំពានច្បាប់នាពេលកន្លងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។