សកម្មជនសង្គមច្រើនក្រុម នឹងរួបរួមគ្នាជាក្រុមធំតែមួយ ដើម្បីធ្វើសកម្មភាពរួមគ្នាជាទ្រង់ទ្រាយធំ និងដោយគ្មានការភ័យខ្លាច។ ការតាំងចិត្តនេះធ្វើឡើងក្នុងកម្មវិធីជួបជុំគ្នាហូបអាហារសាមគ្គីនៅថ្ងៃទី៦ ខែធ្នូ។ សង្គមស៊ីវិល ថាការរួបរួមគ្នាជាក្រុមធំនេះ នឹងជួយឲ្យការតវ៉ារបស់ពួកគាត់មានប្រសិទ្ធភាពល្អ។
ក្រុមអ្នកធ្វើការសង្គមប្រមាណ ៥០ នាក់ ដែលធ្លាប់រងគ្រោះដោយសារការចាប់ឃុំខ្លួន និងត្រូវអាជ្ញាធរវាយធ្វើបាបពេលតវ៉ា បានជួបជុំគ្នាជាទ្រង់ទ្រាយធំលើកដំបូង ក្នុងគោលបំណងចែករំលែកពីការលំបាក និងសកម្មភាពតវ៉ាកន្លងមក។ ពួកគាត់បានជួបជុំគ្នានៅទីតាំងមួយកន្លែងក្នុងក្រុងតាខ្មៅ ខេត្តកណ្ដាល នៅថ្ងៃទី៦ ខែធ្នូ។
សមាជិកក្រុមខ្មែរថាវរៈលោក ហ៊ុន វណ្ណៈ ឲ្យដឹងថា បណ្ដាញសកម្មជនចេញមុខតវ៉ាទាមទាររកយុត្តិធម៌គ្រប់ក្រុមកន្លងមក មិនដែលបានជួបជុំគ្នាទេ ហើយពួកគាត់តែងតែធ្វើសកម្មភាពតវ៉ាតាមក្រុមរៀងៗខ្លួន និងសុទ្ធសឹងតែជាជនរងគ្រោះដូចគ្នា។ លោកបន្តថា សកម្មជនទាំងអស់ចង់ជជែកគ្នាជាក្រុមធំម្ដង ហើយលោកនឹងស្វះស្វែងរកការចងក្រងគ្នាជាក្រុមធំ ដើម្បីជួយគ្នាទៅវិញទៅមក៖ «ធ្លាប់ចូលរួមតស៊ូជាមួយគ្នាហ្នឹងដើម្បីឲ្យបានស្គាល់គ្នា ជជែកគ្នាហ្នឹងឲ្យបានស្និទ្ធស្នាលបន្តិច ព្រោះអាចទៅថ្ងៃមុខបន្តិច គឺអាចយើងត្រូវរួមសហការគ្នាបន្តទៀត»។
សមាជិកក្រុមស្ត្រីថ្ងៃសុក្រលោកស្រី សេង ចាន់ថន ឲ្យដឹងថា ពួកគាត់តែងតែលឺពីសកម្មភាពគ្នាទៅវិញទៅមក ហើយមិនដែលបានជួបគ្នាទេ ដោយសារអ្នកខ្លះត្រូវបានចាប់ឃុំក្នុងពន្ធនាគារ ឯអ្នកខ្លះទៀតរងរបួសក្នុងពេលតវ៉ាជាដើម។ ប្រពន្ធរបស់សកម្មជននយោបាយម្នាក់នេះ មានជំនឿថា ពួកគាត់នឹងអាចស្វះស្វែងរកការយល់ចិត្តគ្នាមួយ ហើយរួបរួមគ្នាជាក្រុមធំដើម្បីពង្រីកសេរីភាពបញ្ចេញមតិឲ្យបានទូលាយ និងមានប្រសិទ្ធភាព៖ « គ្រាន់តែជួបជុំគ្នាដើម្បីឲ្យស្គាល់គ្នាដោយសារយើងធ្វើការតស៊ូយូរហើយដើម្បីឲ្យពួកគាត់បានចេញមកអ៊ីចឹងណា។ ដល់ពេលគាត់បានចេញមកហើយ គាត់ចង់ជួបពួកយើងដើម្បីសំណេះសំណាលគ្នា សួរសុខទុក្ខគ្នាតែប៉ុណ្ណឹង»។
ប្រធានសហភាពសហជីពកម្ពុជាលោក រ៉ុង ឈុន ស្វាគមន៍ចំពោះជំនួបនេះ។ លោកមានមោទនភាពចំពោះសកម្មភាពការចូលរួមក្នុងសង្គមរបស់យុវជន និងពលរដ្ឋកន្លងមក។
មន្ត្រីរដ្ឋាភិបាល ថាការជួបជុំគ្នាក្នុងន័យធ្វើសកម្មភាពស្របច្បាប់ គឺជារឿងត្រឹមត្រូវរបស់ពលរដ្ឋក្នុងសង្គមប្រជាធិបតេយ្យ។ សមាជិកគណៈកម្មាធិការសិទ្ធិមនុស្សកម្ពុជាលោក កត្តា អ៊ន ជឿជាក់ថា សកម្មជនសង្គមភាគច្រើនធ្លាប់អនុវត្តទោស និងកំពុងស្ថិតក្នុងផ្លូវតុលាការ ដូច្នេះពួកគាត់លែងហ៊ានល្មើសច្បាប់តទៅទៀតហើយ៖ « ពួកគាត់មួយចំនួនធ្លាប់បានប្រព្រឹត្តខុស ធ្លាប់បានត្រូវតុលាការផ្ដន្ទាទោស ធ្លាប់បានស្ថិតនៅក្រោមការត្រួតពិនិត្យរបស់តុលាការ។ ដូច្នេះហើយគាត់ពិតជាមានបទពិសោធន៍នៅក្នុងការប្រើប្រាស់សិទ្ធិសេរីភាពរបស់ខ្លួន មិនឲ្យបំពានច្បាប់តទៅទៀតទេ»។
ប៉ុន្តែសម្រាប់ក្រុមអ្នកការពារសិទ្ធិមនុស្សជាតិ អន្តរជាតិ និងក្រុមអ្នកជំនាញសិទ្ធិមនុស្សរបស់អង្គការសហប្រជាជាតិផងនោះ ហៅការចាប់ខ្លួនសកម្មជនកន្លងមកថា អាជ្ញាធរបំពានច្បាប់។
ពាក់ព័ន្ធនឹងការជួបជុំរបស់សកម្មជនសង្គមនេះដែរ អ្នកនាំពាក្យសមាគមសិទ្ធិមនុស្សអាដហុកលោក ស៊ឹង សែនករុណា យល់ថា គឺជាសិទ្ធិរបស់ពលរដ្ឋក្នុងការចងក្រងគ្នា។ លោកបន្តថា ការចងក្រងគ្នាជាក្រុមធំ ឬច្រើន នឹងអាចជួយឲ្យការតស៊ូមតិនោះមានប្រសិទ្ធភាពខ្ពស់។
ក្រុមសកម្មជនសង្គមដែលជួបជុំគ្នានេះ មានដូចជា ប្រធានសហភាពសហជីពកម្ពុជាលោក រ៉ុង ឈុន បណ្ដាញគ្រូបង្រៀន ក្រុមយុវជនខ្មែរថាវរៈ ក្រុមស្ត្រីក្លាហាន ក្រុមស្ត្រីថ្ងៃសុក្រ ចលនាមាតាធម្មជាតិ និងយុវជនផ្សេងៗទៀត។ ពួកគាត់សុទ្ធសឹងតែជាអ្នកហ៊ានចេញតវ៉ាប្រឆាំងនឹងការចាប់ខ្លួនសកម្មជននយោបាយ សកម្មជនសង្គម និងតវ៉ាប្រឆាំងភាពអយុត្តិធម៌ក្នុងសង្គមកន្លងមក។ ពួកគាត់មួយចំនួនធំ ទើបត្រូវបានដោះលែង និងស្ថិតក្រោមការត្រួតពិនិត្យតាមផ្លូវតុលាការ។ តែយ៉ាងណា ពួកគេប្ដេជ្ញាមិនតក់ស្លុតនឹងការចាប់ខ្លួននេះឡើយ ហើយពួកគាត់នៅតែតាំងចិត្តថា បន្តការចូលរួមស្វែងរកយុត្តិធម៌ក្នុងសង្គមដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។