តុលាការ​ផ្ដន្ទាទោស​អ្នក​កាសែត​ម្នាក់​នៅ​កំពង់ឆ្នាំង ២០​ខែ និង​បង់​ប្រាក់​២០​លាន​រៀល​​ទៅ​ដើម​បណ្ដឹង

0:00 / 0:00

សាលាដំបូង​ខេត្ត​កំពង់ឆ្នាំង សម្រេច​ផ្ដន្ទាទោស ម្ចាស់​ស្ថានីយ​វិទ្យុ និង​គេហទំព័រ​រិទិ្ធសែន លោក សុខ ឧត្តម ឱ្យ​ជាប់​ពន្ធនាគារ ២០​ខែ និង​ពិន័យ​ជា​ប្រាក់​ចំនួន​២០​លាន​រៀល​ឱ្យ​ដើម​បណ្ដឹង ពី​បទ​ញុះញង់ ពាក់ព័ន្ធ​នឹង​ការផ្សាយ​ព័ត៌មាន​ជម្លោះដីធ្លី​នៅ​ស្រុក​ទឹកផុស ក្នុង​ដែន​ជម្រក​សត្វព្រៃ​ភ្នំ​ឱរ៉ាល់​។ អ្នកឃ្លាំមើល​សេរីភាព​សារព័ត៌មាន​នៅ​កម្ពុជា ថា សាលក្រម​នេះ ជា​រឿង​អយុត្តិធម៌ និង​មិន​អាច​ទទួល​បាន ចំពោះ​អ្នកសារព័ត៌មាន​ដែល​ផ្សាយ​រឿង​ពិត ដោយសារតែ​តុលាការ​មិន​ប្រើ​ច្បាប់​ស្ដីពី​របប​សារព័ត៌មាន ដើម្បី​ជម្រះក្ដី។

ភរិយា​របស់​លោក សុខ ឧត្តម គឺ​លោកស្រី នុត សុវន្ធូរ ឱ្យ​ដឹង​ថា ស្វាមី​លោកស្រី​ខកចិត្ត​ជា​ខ្លាំង ក្រោយពី​ស្ដាប់​ការ​ការប្រកាស​សាលក្រម​របស់​តុលាការ នៅ​ថ្ងៃ​ទី២២ ធ្នូ ដោយ​ចាត់ទុកថា នេះ​ជា​រឿង​អយុត្តិធម៌​ចំពោះ​រូប​គាត់។

លោកស្រី​បន្ត​ថា លោក សុខ ឧត្ដម មិន​បាន​ប្រព្រឹត្ត​កំហុស​ដូច​ការចោទប្រកាន់​របស់​តុលាការ ព្រោះ​ពេល​គាត់​ចុះ​ទៅ​យក​ព័ត៌មាន​និង​ផ្សព្វផ្សាយ​ករណី​ជម្លោះដីធ្លី​មួយ​កន្លែង​ជាមួយ​មន្ត្រី​យោធា​នៅ​ក្នុង​តំបន់​ដែន​ជម្រក​សត្វព្រៃ​ភ្នំ​ឱរ៉ាល់ គឺ​មាន​អ្នកសារព័ត៌មាន​ប្រមាណ ២០​នាក់​ទៅ​ជាមួយគ្នា ប៉ុន្តែ​បែរ​មាន​បណ្ដឹង​ឡើង​តុលាការ មក​លើ​គាត់​ម្នាក់ឯង​ទៅវិញ។

លោក​លើក​ឡើង​ថា ការ​សម្រេច​របស់​តុលាការ ដោយ​ប្រើ​ច្បាប់ក្រម​ព្រហ្មទណ្ឌ​កាត់ទោស​ស្វាមី​លោកស្រី គឺជា​រឿង​អយុត្តិធម៌ ។ លោកស្រី យល់​ថា តុលាការ​គួរ​យក​ច្បាប់​ស្ដីពី​របប​សារព័ត៌មាន​មក​កាត់ក្ដី​ក្នុង​សំណុំរឿង​មួយ​នេះ ព្រោះ​លោក សុខ ឧត្តម គឺជា​អ្នក​សារព័ត៌មាន ដែល​បាន​ផ្សព្វផ្សាយ​ទំនាស់​ដីធ្លី​មួយ​កន្លែង តាម​ការ​ស្នើសុំ​របស់​ប្រជាពលរដ្ឋ៖ «សម្ដេច​បាន​លើកឡើង​ថា អ្នកសារព័ត៌មាន​ត្រូវ​ហ៊ាន​និយាយ​ការពិត កុំ​បំផ្លើស​ព័ត៌មាន តែ​អ្វី​ដែល​គាត់​និយាយ​ការពិត បែរជា​គេ​ចាប់​គាត់​ដាក់គុក​។ អ៊ីចឹង​ !​ គាត់​ក៏​មិន​រំពឹង​លើ​អ្វី​ដែរ ហើយ​គាត់​ធ្វើ​សារព័ត៌មាន គាត់​មាន​ច្បាប់​ត្រឹមត្រូវ​។ ក្នុង​ការងារ​គាត់​ក៏​មាន​ច្បាប់​ស្ដីពី​របប​សារព័ត៌មាន​ដែរ​។ ដល់​ឥឡូវ​បែរជា​មក​ចាប់​គាត់ ហើយ​ដាក់​ពី​បទ​ព្រហ្មទណ្ឌ ។ សួរ​ថា​គាត់​ទៅ​ធ្វើ​ទោស​អ្វី​ខ្លាំង ដល់​ថ្នាក់​ព្រហ្មទណ្ឌ​ហើយ​មិន​យក​ច្បាប់​ស្ដីពី​របប​សារព័ត៌មាន​អនុវត្ត​ជាមួយ​គាត់​ផង​ហ្នឹង​។ គាត់​រំពឹង​អ្វី​ទៀត​។ លទ្ធភាព​បន្ទាប់​ទៀត មានតែ​ប្ដឹង​ទាស់​ទៅ​ឧទ្ធរណ៍​ទេ។ គ្មាន​អ្នកណា​គេ​មក​ជួយ​យើង​អី​បាន​ដែរ​។ យើង​គ្មាន​លុយ​គ្មាន​អំណាច​អី​ទៅ​តតាំង​ជាមួយ​គេ​ទេ»។

កាលពី​ថ្ងៃ​ទី​១៣ ខែ​ឧសភា សមត្ថកិច្ច​ខេត្ត​កំពង់ឆ្នាំង បាន​ចាប់ខ្លួន លោក សុខ ឧត្ដម ដោយ​ចោទ​ប្រកាន់​ថា បាន​ញុះញង់​ពលរដ្ឋ​មាន​ជម្លោះដីធ្លី ក្រោយពី​លោក​បាន​ផ្សាយ​បន្ត​ផ្ទាល់ តាមរយៈ​គេហទំព័រ​ហ្វេសប៊ុក​ឈ្មោះ «​រិទ្ធិសែន​» កាលពី​ថ្ងៃ​ទី​១២ ខែ​ឧសភា អំពី​ជម្លោះដីធ្លី​រវាង​ប្រជាពលរដ្ឋ និង​មន្ត្រី​យោធា​មាន​អំណាច​ម្នាក់​។​

អ្នកនាំពាក្យ​អគ្គស្នងការ​នគរបាល​ជាតិ លោក ឆាយ គឹមឃឿន ធ្លាប់​ប្រាប់​អាស៊ីសេរី​ថា លោក សុខ ឧត្តម ធ្វើ​ខុស​តួនាទី​ជា​អ្នកកាសែត ហើយ​ទៅ​បំផុស​ប្រជា​ពលរដ្ឋ ឱ្យ​ប្រឆាំង​ជាមួយ​អាជ្ញាធរ​។ មន្ត្រី​ប៉ូលិស​ជាន់ខ្ពស់​រូប​នេះ អះអាង​ថា ការ​ចាប់ខ្លួន លោក សុខ ឧត្ដម មិនមែន​ជា​ការរំលោភ​លើ​សេរីភាព​សារព័ត៌មាន​នោះ​ទេ តែ​ជា​ការ​អនុវត្ត​ច្បាប់។

ចំណែក រដ្ឋមន្ត្រី​ក្រសួង​ព័ត៌មាន លោក ខៀវ កាញ្ញារីទ្ធិ ក៏បាន​ដក​អាជ្ញាប័ណ្ណ​វិទ្យុ និង​គេហទំព័រ​សារព័ត៌មាន រិទ្ធិសែន របស់​លោក សុខ ឧត្ដម ដែរ​។ ក្រសួង​ព័ត៌មាន​ចោទ​ប្រកាន់​លោក សុខ ឧត្ដម ថា ផ្សព្វផ្សាយ​ព័ត៌មាន​បំផ្លើស​ការ​ពិត ញុះញង់​ឱ្យ​កើតមាន​អំពើ​ហិង្សា បង្ក​ការរើសអើង​ពូជសាសន៍ បង្ក​អសន្តិសុខ និង​ចលាចល​សង្គម ដែល​ជា​ការ​រំលោភបំពាន​វិជ្ជាជីវៈ និង​កិច្ចសន្យា ដែល​សាមីខ្លួន​បាន​តម្កល់​ទុក​នៅ​ក្រសួង​ព័ត៌មាន។

នាយក​ប្រតិបត្តិ​សម្ព័ន្ធ​អ្នកសារព័ត៌មាន​កម្ពុជា ហៅ​កាត់​ខេមបូចា (CamboJA) លោក ណុប វី សង្កេត​ឃើញ​ថា ស្ថាប័ន​តុលាការ នៅតែ​បន្ត​ប្រើ​ច្បាប់ក្រម​ព្រហ្មទណ្ឌ យក​មក​ជំនុំ​ជម្រះក្ដី ចំពោះ​អ្នក​សារព័ត៌មាន ដោយ​មិន​ព្រម​យក​ច្បាប់​ស្ដី​របប​សារព័ត៌មាន​មក​អនុវត្ត​ជំនួស​វិញ។

​លោក​បន្ត​ថា ករណី​លោក សុខ ឧត្តម នេះ គឺ​លោក​បាន​ផ្សព្វផ្សាយ​ព័ត៌មាន​ពិត​ជាក់ស្ដែង ដែល​ស្របតាម​វិជ្ជាជីវៈ​សារព័ត៌មាន ប៉ុន្តែ​តុលាការ​បែរជា​សម្រេច​កាត់ទោស​ឱ្យ​លោក​ជាប់ពន្ធនាគារ​ទៅវិញ​។ លោក​យល់ថា រដ្ឋាភិបាល និង​ស្ថាប័ន​តុលាការ​គួរ​យក​ច្បាប់​ស្ដីពី​របប​សារព័ត៌មាន យក​មក​អនុវត្ត​ឱ្យ​បាន​ត្រឹមត្រូវ ដើម្បី​លើកកម្ពស់​សិទ្ធិ​សេរីភាព​សារព័ត៌មាន​នៅ​កម្ពុជា និង​បើក​លំហ​សេរីភាព​ដល់​អ្នកសារព័ត៌មាន​បំពេញ​ការងារ៖ «ការប្រើប្រាស់​ក្រមព្រហ្មទណ្ឌ​នៅតែ​បង្ហាញ​ឱ្យ​ឃើញ​ពី​ចេតនា​មួយ​ថា ការ​យក​អ្នកសារព័ត៌មាន​នេះ ជាស​ត្រូវ គឺជា​អ្នក​ដែល​មន្ត្រី​អាជ្ញាធរ​មូលដ្ឋាន ឬក៏​មន្ត្រី​អ្នក​មាន​អំណាច អាច​នឹង​មាន​លេស​សម្រាប់​ធ្វើ​ទុក្ខទោស ឬ​សម្រាប់​ធ្វើ​ទុក្ខបុកម្នេញ​ទៅ​លើ​អ្នកសារព័ត៌មាន​ដដែល​។ អ៊ីចឹង​ ! ករណី លោក សុខ ឧត្ដម នេះ ជា​ជា​រឿង​មួយ​ដែល​មាន​ភាព​អយុត្តិធម៌​ណាស់ សម្រាប់​ខ្លួន​គាត់ ដែល​គាត់​គ្រាន់តែ​បាន​បំពេញ​តួនាទី​ជា​អ្នកសារព័ត៌មាន ហើយ​ត្រូវ​បាន​ទទួលទោស​ដោយ​ការប្រើប្រាស់​ក្រមព្រហ្មទណ្ឌ​នេះ»។

របាយការណ៍​របស់​សម្ព័ន្ធអ្នកសារព័ត៌មាន​កម្ពុជា រក​ឃើញ​ថា រយៈពេល ១០​ខែ ឆ្នាំ​២០២០ មាន​អ្នក​កាសែត ៥៩​នាក់ រងគ្រោះ​ដោយសារ​ការ​ប្រើ​អំពើ​ហិង្សា ការ​ចាប់ខ្លួន ការ​ស្លាប់ និង​រង​បណ្ដឹង​តាម​ផ្លូវ​តុលាការ។

ក្នុងចំណោម​អ្នក​ទាំង ៥៩​នាក់​នោះ មាន ២៧​នាក់ ត្រូវ​បាន​ចាប់ខ្លួន អ្នកកាសែត ៧​នាក់​ទៀត រង​ការប្រើប្រាស់​អំពើ​ហិង្សា​ពី​ជន​មិន​ស្គាល់​មុខ និង​មាន​អ្នកកាសែត​ម្នាក់​ស្លាប់ ក្នុង​ពេល​ធ្វើដំណើរ​។ ករណី​ទាំង​នេះ​ឆ្លុះបញ្ចាំង​ថា សេរីភាព​សារព័ត៌មាន និង​អ្នកសារព័ត៌មាន នៅតែ​បន្ត​រង​ការ​ធ្វើ​ទុក្ខបុកម្នេញ​ជា​បន្តបន្ទាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។