គណៈកម្មាធិការនៃអង្គការក្រៅរដ្ឋាភិបាលកម្ពុជាដើម្បីអនុសញ្ញាលុបបំបាត់រាល់ទម្រង់នៃការរើសអើងលើស្ត្រីភេទហៅកាត់ថា ស៊ី-ដ (NGO-CEDAW)បានចេញរបាយការណ៍នៅថ្ងៃទី២៧ ខែធ្នូ ដោយរកឃើញថា ក្រុមស្ត្រីភាគច្រើននៅកម្ពុជា រងអំពើហិង្សាជាញឹកញាប់ ដោយពុំមានការអើពើទប់ស្កាត់ពីសំណាកអាជ្ញាធរពាក់ព័ន្ធនោះទេ ជាពិសេសស្ត្រីដែលតស៊ូមតិទាមទាររកយុត្តិធម៌សង្គម។
របាយការណ៍របស់ក្រុមអង្គការស៊ី- ដ កម្រាស់៤២ទំព័រ បានរកឃើញថា អត្រានៃអំពើហិង្សាផ្អែកលើយេនឌ័របន្តកើនឡើងខ្ពស់ ចំណែកការទទួលបានយុត្តិធម៌ សម្រាប់ជនរងគ្រោះនៅមានកម្រិតនៅឡើយ។ ពួកគាត់ថា បញ្ហានេះធ្វើឱ្យស្រីភាគច្រើនរស់នៅក្នុងការភ័យខ្លាច។
របាយការណ៍ដដែលបង្ហាញថា ការរំលោភបំពានផ្លូវភេទលើកុមារតាមប្រព័ន្ធអនឡាញ បានប៉ះពាល់ជាង ១១ភាគរយ (១១%) ដែលមានអាយុចាប់ពី ១២ ដល់១៧ឆ្នាំ។ ចំណែក ស្ត្រីពេញវ័យ ក៏ធ្លាក់ចូលក្នុងអន្ទាក់បំណុល និងងាយរងគ្រោះដោយការគំរាមកំហែងបញ្ចេញរូបអាសអាភាសតាមអនឡាញ់ ដោយក្រុមអ្នកផ្ដល់កម្ចីអនឡាញ់។
របាយការណ៍បានបញ្ជាក់ថា ក្នុងចំណោម កម្មកររោងចក្រជាង ១ពាន់នាក់(១.១០០នាក់) មានជាង៩០ភាគរយ (៩៣.៦៥) ពួកគេធ្លាប់ឮ និងឃើញករណីរំលោភបំពានផ្លូវភេទនៅក្នុងកន្លែងធ្វើការ។ដោយឡែក ក្រុមស្ត្រីជនជាតិដើមភាគតិច អ្នកស្រឡាញ់ភេទដូចគ្នា និងស្ត្រីមានពិការភាពធ្លាប់ឆ្លងកាត់អំពើហិង្សាកម្រិតខ្ពស់ ហើយពុំទទួលបានយុត្តិធម៌ត្រឹមត្រូវនោះទេ។
ការបង្ហាញរបាយការណ៍នេះ ធ្វើឡើងនៅក្នុងកម្មវិធីផ្សព្វផ្សាយរបាយការណ៍ ក្រោមចំណងជើងថា«ពិនិត្យតាមដានការអនុវត្តអនុសញ្ញា ស៊ី-ដ ឆ្នាំ២០២២» ដែលមានអ្នកចូលជាង ៦០នាក់ មកពីតំណាងក្រសួងកិច្ចការនារី អង្គការសង្គមស៊ីវិល និងអ្នកសារព័ត៌មាន នៅរាជធានីភ្នំពេញនៅថ្ងៃទី២៧ ខែធ្នូ។
អគ្គលេខាធិការ នៃអង្គការស៊ី-ដ លោកស្រី ជឹម ចាន់នាង ប្រាប់វិទ្យុអាស៊ីសេរីនៅថ្ងៃទី២៧ ខែធ្នូថា ការផ្សព្វផ្សាយរបាយការណ៍នេះ ក្នុងគោលបំណង់ដើម្បីតាមដានការអនុវត្តអនុសញ្ញា ស៊ី-ដ ឆ្នាំ២០២២ របស់កម្ពុជា ដើម្បីជំរុញឱ្យរដ្ឋាភិបាលគោរព និងមានវិធានការទប់ស្កាត់គ្រប់ទម្រង់នៃអំពើហិង្សាលើស្ត្រី ក្មេងស្រី និងអ្នកស្រឡាញ់ភេទដូចគ្នា។
លោកស្រី ជឹម ចាន់នាង៖ «វាជារឿងមួយដែលព្រួយបារម្ភមែនទែន ព្រោះបើទោះបីជារដ្ឋាភិបាលរបស់យើងលោកបានទទួលស្គាល់ក៏ដោយថា បញ្ហានៃការប្រើអំពើហិង្សាលើស្ត្រីវាជាបញ្ហារបស់សង្គម ហើយវាធ្វើឱ្យប៉ះពាល់ទៅដល់ការអភិវឌ្ឍសង្គមក៏ដោយ ប៉ុន្តែយើងឃើញជាក់ស្ដែងគឺដំណោះស្រាយជាក់លាក់ដើម្បីឈានទៅរកការបញ្ចប់ការប្រើអំពើហិង្សាទាំងនោះគឺ នៅមានកម្រិតនៅឡើយ»។
របាយការណ៍ដដែលបង្ហាញថា នៅឆ្នាំ២០២២ បានរកឃើញក្ដីព្រួយបារម្ភជាច្រើនជុំវិញការបង្ក្រាបដោយអយុត្តិធម៌មកលើក្រុមកូដករជាស្ត្រី ដែលពួកគាត់បានទាមទារឱ្យក្រុមហ៊ុន គោរពច្បាប់ការងារ ។ ជាក់ស្ដែង ករណីក្រុមកូដករណាហ្គាវើល៍ រងអំពើហិង្សាធ្ងន់ធ្ងរមកលើស្ត្រីមានផ្ទៃពោះ ស្ត្រីបំបៅដោះកូន និងស្ត្រីជាសហជីពជាដើម។
ប្រធានសហជីពចំណីអាហារ និងសេវាកម្មកម្ពុជា(CFSWF) អ្នកស្រី អ៊ូ ទេពផល្លីន លើកឡើងថា ករណីអំពើហិង្សាមកលើក្រុមកម្មករសហជីពជាស្ត្រី នៅពេលបច្ចុប្បន្ន និងឆ្នាំ២០២២កន្លងទៅ ពុំមានការថយចុះនោះទេ។ លោកស្រីថា ទម្រង់នៃអំពើហិង្សាទាំងនោះ តាមរយៈការរំលោភបំពានផ្លូវភេទ អំឡុងពេលពួកគាត់ធ្វើកូដកម្ម និងការប្រើប្រាស់ប្រព័ន្ធតុលាការរឹតត្បិត ហើយឈានដល់ការបញ្ឈប់ពួកគាត់ពីការងារ ដែលធ្វើឱ្យប៉ះពាល់សេដ្ឋកិច្ចគ្រួសារ។
អ្នកស្រី អ៊ូ ទេពផល្លីន៖ «តួយ៉ាងឃើញមានការប្រើប្រាស់ប្រព័ន្ធតុលាការដដែលអត់មានអ្វីថ្មី ហើយមានការចាប់ដាក់ពន្ធនាគារ ជាការគំរាមកំហែង ទៅដល់កម្មករនិយោជិកដទៃទៀត កុំឱ្យប្រើប្រាស់សិទ្ធិ។ រឿងនឹងកើតឡើងដដែល តែក៏មិនអាចបញ្ឈប់ការទាមទាររបស់កម្មករនិយោជិកបានដែរ ទោះបីមានការបញ្ឈប់ មានការរឹតត្បិត»។
វិទ្យុអាស៊ីសេរីពុំអាចទាក់ទងអ្នកនាំពាក្យក្រសួងការងារ លោក កត្តា អន និង អ្នកនាំពាក្យក្រសួងកិច្ចការនារី អ្នកស្រី ស ស៊ីណែត ដើម្បីសាកសួរជុំវិញរឿងនេះបានទេ នៅថ្ងៃទី២៧ ខែធ្នូ។
របាយការណ៍ដដែលក៏បានអំពាវនាវ និងផ្ដល់អនុសាសន៍ឱ្យរដ្ឋាភិបាល ក្រោមការដឹកនាំដោយលោកនាយករដ្ឋមន្ត្រី ហ៊ុន ម៉ាណែត គួរតែចាត់វិធានការទប់ស្កាត់អំពើហិង្សាលើស្ត្រីឱ្យមានប្រសិទ្ធភាព តាមរយៈការទទួលបានការកាត់ក្ដីនៅតុលាការ។ បន្ថែមពីនេះ រដ្ឋាភិបាល ក៏គួរតែអនុម័តជាបន្ទាន់នូវអនុសញ្ញារបស់អង្គការពលកម្មអន្តរជាតិ លេខ១៩០ ស្ដីពីអំពើហិង្សា និងការបៀតបៀននៅក្នុងពិភពការងារ ហើយបញ្ចប់ការដាក់ទោសព្រហ្មទណ្ឌ និងការរឹតត្បិតប្រឆាំងមកលើស្ត្រីពពោះជំនួស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។