កូដករចោទប្រកាន់ក្រុមហ៊ុនបនល្បែងណាហ្គាវើលដ៍ (NAGAWORLD) ថា នៅតែបន្តធ្វើទុក្ខបុកម្នេញ និងគំរាមកំហែងលើសមាជិកសហជីព ដែលកំពុងធ្វើការនៅក្នុងក្រុមហ៊ុន។ ពួកគាត់អះអាងថា ថៅកែណាហ្គាវើលដ៍ ដាក់សម្ពាធលើសមាជិកសហជីពឱ្យលាលែងចេញពីសហជីព និងបង្ខំឱ្យពួកគាត់សរសេរលិខិតស្នើសុំដកវិភាគទាន ដែលក្រុមហ៊ុនបានបង្កករយៈពេលជិត ២ឆ្នាំ ដោយខុសនីតិវិធីច្បាប់។
សមាជិកសហជីពណាហ្គាវើលដ៍ប្រមាណ ៤០០នាក់ ដែលកំពុងធ្វើការនៅក្នុងក្រុមហ៊ុនបនល្បែងកាស៊ីណូណាហ្គាវើលដ៍ ត្រូវបានថៅកែបង្ខំឱ្យលាលែងពីសមាជិកសហជីព និងគំរាមបណ្ដេញពីកន្លែងការងារ។
អនុប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនបនល្បែងកាស៊ីណូណាហ្គាវើលដ៍ (Naga World) កញ្ញា ឈឹម សុខន ប្រាប់វិទ្យុអាស៊ីសេរី នៅថ្ងៃទី២០ ខែកុម្ភៈ ថា សមាជិកសហជីពនៅក្នុងក្រុមហ៊ុនណាហ្គាវើលដ៍ប្រមាណ ៤០០នាក់ ត្រូវបានថៅកែហៅឱ្យលាលែងពីសមាជិកសហជីពទាំងបង្ខំ និងបង្គាប់បញ្ជាឱ្យពួកគាត់ដកប្រាក់វិភាគទានរបស់ក្រុមសហជីពថែមទៀត។
កញ្ញា ឈឹម សុខន៖«ចង់ឱ្យក្រុមហ៊ុនគិតសាឡើងវិញ ក្នុងការកាត់លុយវិភាគទានពីសមាជិក ហើយផ្ដល់ប្រាក់បង្កកហ្នឹងមកឱ្យសហជីពវិញ មិនមែនផ្ដល់ឱ្យសមាជិកសហជីពទេ ពីព្រោះនេះជាការជ្រៀតជ្រែក ហើយពាក្យស្នើសុំឈប់ពីសមាជិកសហជីព ជាក់ស្ដែងគាត់អត់មានយាយី គាត់ត្រូវដឹងហើយ។ ប្រសិនបើសមាជិកគាត់លាឈប់ គេទៅលាឈប់យូរហើយ មិនបាច់ដល់ក្រុមហ៊ុនកោះហៅទេអាហ្នឹង ទោះចង់ ឬមិនចង់ ក៏យើងមើលឃើញថា ក្រុមហ៊ុនយាយីដែរ»។
កញ្ញា ឈឹម សុខន បន្ថែមថា សកម្មភាព ដែលថៅកែក្រុមហ៊ុនណាហ្គាវើលដ៍ហៅបុគ្គលិកទៅគំរាមកំហែងនេះ គឺជាការរំលោភសិទ្ធិការងារ និងជ្រៀតជ្រែកក្នុងការងាររបស់ថ្នាក់ដឹកនាំសហជីព។ ចំណែក ប្រាក់វិភាគទាន ដែលក្រុមហ៊ុនបានបង្កកទុក គឺក្រុមហ៊ុនគ្មានសិទ្ធិចាត់ចែងឱ្យទៅបុគ្គលិករូបណាមួយឡើយ ពីព្រោះវិភាគទាននេះ គឺជាប្រាក់រួមរបស់សមាជិកសហជីពទាំងអស់។
ប្រតិកម្មរបស់សកម្មជនសហជីពរូបនេះ គឺក្រោយពីថៅកែក្រុមហ៊ុនណាហ្គាវើលដ៍ ដែលកាលពីថ្ងៃទី១៦ ខែកុម្ភៈ បានហៅបុគ្គលិកមកប្រជុំដាក់លក្ខខណ្ឌឱ្យបុគ្គលិកត្រូវសរសេរពាក្យលាឈប់ពីសមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនបនល្បែងកាស៊ីណូណាហ្គាវើលដ៍ ដែលមានកញ្ញា ឈឹម ស៊ីថរ ជាប្រធាន។ លើសពីនេះ ថៅកែក្រុមហ៊ុនក៏បានបង្ខំឱ្យបុគ្គលិកសរសេរលិខិតស្នើសុំដកវិភាគទានរបស់ក្រុមសហជីព ដែលក្រុមហ៊ុនបានបង្កកទុក កាលពីថ្ងៃទី២៩ ខែមិថុនា ឆ្នាំ២០២២។
កាលពីថ្ងៃទី១៩ ខែកុម្ភៈ សហជីពទ្រទ្រង់សិទ្ធិការងារបុគ្គលិកកម្មករខ្មែរប្រចាំក្រុមហ៊ុនណាហ្គាវើលដ៍បានចេញលិខិតចំហមួយបង្ហាញពីការបន្ត ធ្វើទុក្ខបុកម្នេញ ការគំរាមកំហែង និងការបញ្ឈប់កម្មករពីកន្លែងការងារ។ ក្រុមសហជីពបញ្ជាក់ថា ការយាយីបុគ្គលិក និងការរងនូវភាពអយុត្តិធម៌ផ្ទួនៗ គ្នា ពីសំណាក់ថៅកែណាហ្គាវើលដ៍ ក៏មានការជ្រៀតជ្រែកពីក្រសួងការងារផងដែរ ដោយក្រសួងបង្កលក្ខណៈងាយស្រួលឱ្យថៅកែបរទេសរំលោភសិទ្ធិកម្មករបានតាមអំពើចិត្ត។
គិតមកទល់ពេលនេះ តំណាងសហជីពទ្រទ្រង់សិទ្ធិការងារបុគ្គលិកកម្មករខ្មែរប្រចាំក្រុមហ៊ុនណាហ្គាវើលដ៍ឱ្យដឹងថា ពួកគាត់មិនទាន់ទទួលបានចំនួនតួលេខ ដែលសមាជិកសហជីពទាំងនោះដកខ្លួនចេញពីសមាជិកសហជីព និងបង្ខំឱ្យសរសេរលិខិតស្នើសុំវិភាគទាននៅឡើយទេ។
វិទ្យុអាស៊ីសេរីមិនអាចទាក់ទង តំណាងក្រុមហ៊ុនណាហ្គាវើលដ៍ និងអ្នកនាំពាក្យក្រសួងការងារ លោក កត្តា អ៊ន ដើម្បីសុំការឆ្លើយតបជុំវិញបញ្ហានេះបានទេ នៅថ្ងៃទី២០ ខែកុម្ភៈ។
ជុំវិញបញ្ហានេះ ប្រធានសហព័ន្ធសហជីពសេរីកម្មករ នៃព្រះរាជាណាចក្រកម្ពុជា អ្នកស្រី ទូច សេរី មានប្រសាសន៍ថា ការបង្ខំឱ្យកម្មករលាលែងចេញពីសមាជិកសហជីព គឺរំលោភបំពានសិទ្ធិ និងជាការរើសអើងសហជីព។ អ្នកស្រីបារម្ភថា បញ្ហា នេះ នឹងធ្វើឱ្យបុគ្គលិកមួយចំនួនប្រឈមនឹងសម្ពាធផ្លូវចិត្តនៅកន្លែងការងារ។
អ្នកដ្រី ទូច សេរី៖«យើងមើលឃើញហើយ ប្រទេសគេនៅជិតខាង គេតែងតែមានសហជីព ដើម្បីមានដំណោះស្រាយ ដើម្បីរកយុត្តិធម៌ឱ្យកម្មករ ប៉ុន្តែចំណែកនៅកម្ពុជាវិញ យើងមើលហើយកាលណាមានអ្នកបង្កើតសហជីព ដូចជាប្រឈមថ្នាក់ដឹកនាំ យើងបង្កើតហើយគេដេញចេញ ហើយកម្មករណាតវ៉ាច្រើន គេឱ្យលាលែងឈប់ពីសហជីព កុំឱ្យចូលសហជីព ខ្ញុំគិតថា មិនល្អ។ ត្រង់ហ្នឹង ដែលធ្វើឱ្យកម្មករនៅស្រុកខ្មែរមិនហ៊ាន ចេះតែនឹកឃើញខ្លាច»។
នេះជាលើកទី៣ ហើយ ដែលថៅកែក្រុមហ៊ុនបនល្បែងកាស៊ីណូណាហ្គាវើលដ៍ ធ្វើទុក្ខបុកម្នេញលើសមាជិកសហជីព បន្ទាប់ពីបញ្ឈប់បុគ្គលិកទ្រង់ទ្រាយធំ ដែលក្រុមកម្មករចាត់ទុកថា ជារឿងអយុត្តិធម៌ និងបំពានច្បាប់ការងារ ព្រោះតែមានការរើសអើងសហជីព ដែលដឹកនាំដោយកញ្ញា ឈឹម ស៊ីថរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។