អតីតព្រះសង្ឃដែលជាសកម្មជនការពារព្រៃឡង់ និងជាសកម្មជននយោបាយម្នាក់ គឺលោក វឿន វាសនា ដែលកំពុងភៀសខ្លួននៅប្រទេសថៃ រក្សាជំហរថា នឹងបន្តសកម្មភាពសង្គម និងការពារព្រៃឈើ ដើម្បីផលប្រយោជន៍ជាតិ បើទោះបីជាលោក ហ៊ុន សែន ប្រកាសតាមចាប់ខ្លួនលោកក្តី។ លោក វឿន វាសនា បានលាចាកសិក្ខាបទ (សឹក) ក្នុងពេលកំពុងភៀសខ្លួននៅប្រទេសថៃ ដោយសារព្រះសង្ឃនៅប្រទេសនេះ ពុំអនុញ្ញាតឱ្យគង់ស្នាក់នៅក្នុងវត្តឡើយ ព្រោះខ្លាចឆ្លង រាលដាលជំងឺកូវីដ-១៩ ។ តើអតីតសង្ឃជាសកម្មជនព្រៃឡង់រូបនះ មានប្រវត្តិតស៊ូបែបណាដើម្បីការពារព្រៃឈើ?
ជាកូនកំព្រាឪពុកម្ដាយតាំងពីកុមារភាព មានស្រុកកំណើតក្នុងខេត្តស្ទឹងត្រែង គឺលោក វឿន វាសនា រស់នៅជាមួយម្តាយអ៊ុំ និងឪពុកអ៊ុំបង្កើត នៅតំបន់ដាច់ស្រយាលមួយ ជាប់ដែនជម្រកសត្វព្រៃឡង់ស្រុកថាឡាបរិវ៉ាត់ ខេត្តស្ទឹងត្រែង។ លោកកើតបាន ៧ថ្ងៃ ម្តាយស្លាប់ចោលទាំងគ្មានទឹកដោះឱ្យបៅ ហើយម្តាយធំរបស់លោកបានបំបៅផ្លែចេកទុំជំនួសទឹកដោះ រហូតដល់វ័យ ១៥ឆ្នាំ ទើបលោកដុះធ្មេញ ដូចកុមារធម្មតា ដោយសារបៀមជញ្ជក់តែផ្លែចេក។
បុរសសម្បុរខ្មៅស្រអែម ជាម្ចាស់ហ្វេសបុកក្រញូងព្រៃឡង់ បានបួសជាសង្ឃរយៈពេល២ដងមកហើយ ដោយលើកទីមួយបួសនៅវត្តចម្ការលើ ក្នុងស្រុកថាឡាបរិវ៉ាត់នៅឆ្នាំ ២០០០ រហូតដល់ឆ្នាំ២០០៨ លោកបានលាចាកសិក្ខាបទ។លោក វឿន វាសនា មានវ័យ ៤១ឆ្នាំ មានបងប្អូន ៤នាក់ហើយលោកជាកូនពៅ រស់នៅខេត្តស្ទឹងត្រែង។ឪពុកបង្កើតរបស់លោកបានស្លាប់ ដោយជាន់មីននៅស្រុកថាឡាបរិវ៉ាត់ កាលពីឆ្នាំ១៩៩៥ ក្នុងពេលធ្វើទាហានរបស់រដ្ឋាភិបាលក្រុងភ្នំពេញ។
អតីតព្រះសង្ឃ និងជាសកម្មជនព្រៃឡង់លោក វឿន វាសនា ប្រាប់វិទ្យុអាស៊ីសេរីនៅថ្ងៃទី១៩ ខែតុលាថា លោកនៅតែក្រាញននៀល តស៊ូមតិរិះគន់រដ្ឋាភិបាល ដើម្បីស្ថាបនាចំណុចខ្វះចន្លោះរបស់អាជ្ញាធរក្នុងន័យស្ទួយសង្គមជាតិ ដោយមិនចុះញ៉មនោះឡើយ។ លោកថា អាជ្ញាធរមូលដ្ឋានខេត្តស្ទឹងត្រែង និងនគរបាល បានមកចរចាជាមួយលោកម្ដងហើយម្ដងទៀតដើម្បីឱ្យលោកចុះចូលជាមួយគណបក្សកាន់អំណាច ប៉ុន្តែលោកបដិសេធរហូតមានការគំរាមចាប់ខ្លួនជាញឹកញាប់ទើបលោកបង្ខំចិត្តរត់ភៀសខ្លួនទៅប្រទេសថៃ។ ក្នុងពេលលោកភៀសខ្លួនរយៈពេលជាង ១ឆ្នាំកន្លងទៅនេះ លោកបានទទួលអាហារពីព្រះសង្ឃខ្មែរនៅប្រទេសថៃ ដើម្បីចិញ្ចឹមជីវិតនិងទទួលជំនួយមនុស្សធម៌បន្តិចបន្តួច ពីសប្បុរសជនក្នុងនិងក្រៅប្រទេស៖ «ទោះក្នុងតម្លៃណា ក៏ខ្ញុំនៅតែការពារព្រៃឈើ និងការពារអាយុជីវិតប្រទេសជាតិខ្ញុំដែរ ព្រោះខ្ញុំមិនចង់ឃើញ ពលរដ្ឋរងគ្រោះដូចរបបសព្វថ្ងៃ»។
ដោយសារតែសម្លឹងឃើញ ពីបទល្មើសព្រៃឈើកើតឡើងពេញទំហឹង ក្នុងដែនជម្រកសត្វព្រៃឡង់ អតីតព្រះសង្ឃរូបនេះ បានចូលជាសមាជិកបណ្ដាញសហគមន៍ព្រៃឡង់ខេត្តស្ទឹងត្រែងនៅឆ្នាំ២០១៣ ដល់ឆ្នាំ២០១៧។នៅកំឡុងឆ្នាំ២០១៧ លោកបានឈរឈ្មោះបោះឆ្នោតជ្រើសរើសសមាជិកក្រុមប្រឹក្សាអន្លង់ភេ ស្រុកថាឡាបរិវ៉ាត់កូតាពីគណបក្សសង្គ្រោះជាតិ។ លោកបានទៅបួសលើកទី២ នៅវត្តត្រពាំងធំក្នុងខេត្តកំពង់ស្ពឺ រួចទៅសិក្សាព្រះវិន័យ នៅពោធិព្រឹក្សក្នុងស្រុកកៀនស្វាយ ខេត្តកណ្តាល ហើយបានចូលរួមជាសមាជិកបណ្ដាញព្រះសង្ឃឯករាជដើម្បីយុត្តិធម៌សង្គម នៅឆ្នាំ២០១៧។
អតីតព្រះសង្ឃរូបនេះបន្ថែមថា ការបួសលើកទី២នេះ លោកមានឱកាសច្រើនបន្តការសិក្សារហូតចប់បរិញ្ញាប័ត្ររងនៅសកវិទ្យាល័យមួយ ក្នុងក្រុងភ្នំពេញ ប៉ុន្តែដោយសារលោករិះគន់រដ្ឋាភិបាលតាមបណ្តាញសង្គម និងចូលរួមសកម្មភាពការពារព្រៃឈើអាជ្ញាធរតាមគំរាមចាប់ខ្លួនលោក ដល់ផ្ទះនៅខេត្តស្ទឹងត្រែងហើយលោកក៏បង្ខំចិត្តរស់ភៀសខ្លួននៅប្រទេសថៃ នៅដើមឆ្នាំ២០២០។
កាលពីថ្ងៃទី៩ ខែតុលាកន្លងទៅ ម្ចាស់ហ្វេសប៊ុកគ្រញូងព្រៃឡង់លោក វឿន វាសនា បានចូលទៅបញ្ចេញមតិជាអត្តបទកំណាព្យ (Comment)លើហ្វេសប៊ុកលោក ហ៊ុន សែន ដោយសរសេរកំណាព្យរិះគន់ថា លោក ហ៊ុន សែន កែច្បាប់បំផ្លាញជាតិនិងដឹកនាំប្រទេសធ្វើឲ្យរលាយទឹកដីព្រៃឈើ៖ «សំណូមពរទៅលោក ហ៊ុន សែន ការកាន់អំណាច រស់ក្នុងភាពមានបាន ស្ដុកស្ដម្ភស្កឹមស្កៃ ប្រសើរជាងរាស្ត្រ ដើរសុំទានតាមចិញ្ចើមថ្នល់វាលើសលុបទៅហើយ។ អ៊ីចឹងគួរណាស់តែ លោក ហ៊ុន សែន ហ្នឹងយកអំណាច និងមាសប្រាក់ ទ្រព្យរបស់ខ្លួន ចែករំលែកឱ្យពលរដ្ឋរស់ផង។ លោកត្រូវចេះទទួលភាពរិះគន់ របស់ប្រជារាស្ត្រ»។
ក្រោយមកលោក ហ៊ុន សែន បានប្រកាសតាមចាប់ខ្លូនអតីតព្រះសង្ឃរូបនេះ។ លោក ហ៊ុន សែន ចាត់ទុកកំណាព្យរបស់សកម្មជនរូបនេះពោរពេញដោយហិង្សា ហើយត្រូវតែផ្ដាច់ប្ដូរបំបាត់ចោលទ្រឹស្ដី និងសកម្មភាពជ្រុលនិយមនេះឲ្យខាងតែបាន ទោះក្នុងតម្លៃណាក៏ដោយ។ លោកបញ្ជាឲ្យនគរបាលស្វែងរកលោក វឿន វាសនា នៅប្រទេសថៃ។
ភ្លាមៗក្រោយពីបញ្ជារបស់មេដឹកនាំរបបឯកបក្ស ចៅក្រមអមសាលាដំបូងរាជធានីភ្នំពេញលោក ពេជ្រ វិជ្ជាធរ បានចេញដីកាបញ្ជាឲ្យសមត្ថកិច្ចតាមចាប់ខ្លួនលោក វឿន វាសនា ដោយចោទប្រកាន់ជាបទល្មើសតម្រូវផ្ដន្ទាទោសដាក់ពន្ធនាគារដើម្បីធានាដល់ការស៊ើបសួរឲ្យបានពេញលេញ។ ចៅក្រមស៊ើបសួរបញ្ជាឲ្យកម្លាំងសាធារណៈស្រាវជ្រាវរកចាប់ និងនាំខ្លួនលោក វឿន វាសនា មកប្រគល់ជូនសាលាដំបូងរាជធានី ភ្នំពេញដើម្បីចាត់ការតាមផ្លូវច្បាប់។
បើទោះបីជាមានដីកាបញ្ជាឱ្យចាប់ខ្លួនលោកក្តីក៏លោកនៅតែមិនបោះបង់ភារកិច្ចបម្រើសង្គមជាតិនិងបរិស្ថាន ក្នុងនាមជាយុវជនខ្មែរ។ លោក វឿន វាសនា ប្តេជ្ញាថាក្នុងនាមកូនខ្មែរមិនត្រូវឈរឱបដៃមើលប្រទេសជាតិជួបគ្រោះថ្នាក់នោះទេ ហើយលោកនៅតែបន្តរិះគន់រដ្ឋាភិបាល ដើម្បីស្ថាបនាប្រទេសជាតិ។ លោកបន្ថែមថា ក្នុងពេលលោកភៀសខ្លួននៅប្រទេសថៃជិត ២ឆ្នាំកន្លងទៅនេះ លោកមានជំងឺដុះសាច់តម្រងនោម ដែលតម្រូវឱ្យវះកាត់២ដងមកហើយហើយមកទល់ពេលនេះ ស្ថានភាពជំងឺរបស់លោក បានធូរស្រាលហើយ៖ «យើងនៅតែខ្លាចគឺអត់បានជោគជ័យទេ អត់បានផលប្រយោជន៍អីល្អសម្រាប់ប្រទេសជាតិទេ ! ក្នុងនាមយើងជាពលរដ្ឋខ្មែរមួយរូប ឃើញពលរដ្ឋរងគ្រោះ ឃើញប្រទេសជាតិរងគ្រោះ យើងមិនត្រូវឈរឱបដៃមើលទេ ទោះបីជាយើងគ្រោះថ្នាក់ដល់អាយុជីវិតមើលទេ បើយើងមានឱកាស មានពេលវេលា យើងត្រូវតែធ្វើ»។
ព្រះសង្ឃអ្នកស្រឡាញ់បរិស្ថាន ដែលធ្លាប់ធ្វើការងារជាមួយលោក វឿន វាសនា គឺព្រះតេជគុណ បូរ បេត មានថេរដីកាថា អតីតព្រះសង្ឃរូបនេះ មានភាពក្លាហាន រឹងមាំមោះមុតហានចេញមុខតវ៉ាទាមទារឱ្យដោះលែងសកម្មជនបរិស្ថានដែលអាជ្ញាធរចាប់ខ្លួននៅខេត្តក្រចេះកាលពីពេលកន្លងទៅ។ ព្រះអង្គបន្ថែមថា លោក វឿន វាសនា បានលះបង់ច្រើនណាស់ ដើម្បីអាយុជីវិតជាតិនិងព្រៃឈើ បើទោះបីជាគណបក្សកាន់អំណាចផ្តល់តួនាទី និងតំណែងជូនលោកក្តីក៏លោកមិនត្រូវការដែរ។លើសពីនេះ អតីតព្រះសង្ឃរូបនេះ មានភាពសកម្មក្នុងការការពារព្រៃឈើនិងសម្តែងមតិរិះគន់អាជ្ញាធរដែលបណ្តោយឱ្យមានការកាប់បំផ្លាញព្រៃឈើធំធេង៖ «គាត់មោះមុតមែនទែន សូម្បីជីវិតរបស់គាត់ គឺគាត់អត់ខ្លាចស្លាប់។ គាត់ហ៊ានពលីតវ៉ាទាមទារជាមួយអាត្មាជាមួយនឹងព្រះសង្ឃនិងសកម្មជនព្រៃឈើដទៃទៀត។ ថែមទាំងនាំគ្នាចុះការពារព្រៃឡង់ និងព្រៃព្រះរកា គឺមោះមុត ទោះបីគេរារាំងមិនឱ្យចូល ក៏គាត់នៅតែមោះមុតធ្វើ»។
លោក វឿន វាសនា រំពឹងថា ថ្ងៃណាមួយ លោកនឹងមានឱកាសបម្រើសង្គមជាតិក្នុងប្រទេសឡើងវិញ ដោយមិនប្រកាន់និន្នាការនយោបាយ និងបក្ខពួកនិយម ហើយលោកស្អប់បំផុតគឺអំពើពុករលួយបំផ្លាញសង្គមជាតិ។ លើសពីនេះលោកប្រកាសមិនដកថយភារកិច្ចការពារព្រៃឈើ ដែលច្បាប់ផ្តល់សិទ្ធិឱ្យនោះទេ បើទោះបីជារងការរឹតត្បិត និងគំរាមចាប់ខ្លួនពីលោក ហ៊ុន សែន ក្តី។ លោកចាំថា ទឹកដីព្រៃឈើ គឺជាទីជម្រកសុខសាន្តរបស់លោកហើយផ្តល់ជាសន្តិសុខស្បៀងដល់ពលរដ្ឋជាច្រើនជំនាន់មកហើយ ក៏ប៉ុន្តែបច្ចុប្បន្នព្រៃឈើត្រូវបានជនល្មើសកាប់បំផ្លិចបំផ្លាញហិនហោច ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។