គ្រួសារសកម្មជនខ្មែរក្រោមអះអាងថា អាជ្ញាធរវៀតណាមមិនអនុញ្ញាតឱ្យពួកគាត់ទៅជួបផ្ទាល់ជាមួយសកម្មជនខ្មែរក្រោមទាំង ៤នាក់ដែលកំពុងជាប់ឃុំក្នុងពន្ធនាគារអស់រយៈពេលជាង៣ខែមកហើយនោះទេ។ ពួកគាត់ព្រួយបារម្ភថាអាជ្ញាធរវៀតណាមធ្វើបាបសកម្មជនទាំងនោះ និងបន្តទាមទារឱ្យអាជ្ញាធរវៀតណាមដោះលែងពួកគេឱ្យមានសេរីភាពវិញជាបន្ទាន់។
គ្រួសារសកម្មជនខ្មែរក្រោមលើកឡើងថា ការចាប់ខ្លួនសកម្មជនខ្មែរក្រោមទាំងបួននាក់ គឺជាយុទ្ធនាការបង្ក្រាបរបស់អាជ្ញាធរវៀតណាមមកលើពលរដ្ឋខ្មែរក្រោម មិនឱ្យធ្វើសកម្មភាពផ្សព្វផ្សាយពីសិទ្ធិ និងវប្បធម៌ខ្មែរ។ គ្រួសារសកម្មជនក៏ស្នើដល់ពលរដ្ឋខ្មែរទាំងក្នុង និងក្រៅប្រទេស ចូលរួមធ្វើយុទ្ធនាការទាមទារឱ្យអាជ្ញាធរវៀតណាមដោះលែងសកម្មជន។
ម្ដាយសកម្មជនខ្មែរក្រោមលោក ថាច់ កឿង គឺលោកស្រី ថាច់ យឿង ថា លោកស្រីមានការព្រួយបារម្ភជាខ្លាំង ដោយសារអស់រយៈពេលជាង ៣ខែមកនេះ លោកស្រីមិនទាន់បានជួបមុខកូន ហើយតុលាការក៏មិនទាន់បញ្ជាក់កាលបរិច្ឆេទជាក់លាក់ថា ត្រូវថ្ងៃបើកសវនាជំនុំជម្រះ ឬក៏ត្រូវដោះលែងកូនលោកស្រីវិញ បើទោះជាលោក ថាច់ កឿង និងសកម្មជនផ្សេងទៀតត្រូវបានឃុំខ្លួនដល់ពេលវេលា ៣ខែរួចហើយក្តី កាលពីថ្ងៃទី២៨ តុលា ជាកាលកំណត់ដែលអាជ្ញាធរវៀតណាមអះអាងថា នឹងត្រូវដោះលែង ឬត្រូវបញ្ជូនពួកគេទៅជំនុំជម្រះ។ លោកស្រី ថាច់ យឿង ឱ្យដឹងទៀតថា កន្លងមកកូនលោកស្រីមិនបានធ្វើខុសច្បាប់ប្រទេសវៀតណាមនោះទេ គឺគ្រាន់ធ្វើសកម្មភាពផ្សព្វផ្សាយអំពីវប្បធម៌ និងសិទ្ធិជនជាតិដើម ដូចជាការចែករំលែកសៀវភៅសិទ្ធិជនជាតិដើម និងចូលរួមរៀបចំកម្មវិធីបុណ្យក្នុងវត្តប៉ុណ្ណោះ គឺមិនបានធ្វើសកម្មភាពណាមួយដែលជាបទល្មើសដូចអាជ្ញាធរវៀតណាមចោទប្រកាន់នោះឡើយ។
លោកស្រី ថាច់ យឿង៖ «បារម្ភដែរ អាណិតកូនដែរ ចេះតែទន្ទឹងដែរថា គ្រប់៣ខែ គេហៅឡើងតុលាការដើម្បីជួបកូនយើង ថាកូនយើងរួច ឬក៏កូនយើងជាប់ ដើម្បីឱ្យយើងដឹងទៅមុខទៀត អីចឹងយើងគ្មានដឹងអីសោះ អ៊ីចឹងបារម្ភណាស់»។
លោកស្រី ថាច់ យឿង ស្នើឱ្យពលរដ្ឋខ្មែរនៅក្រៅប្រទេសចូលរួមធ្វើយុទ្ធនាការទាមទារឱ្យមានការដោះលែងកូនលោកស្រី និងសកម្មជនផ្សេងទៀត ឱ្យមានសេរីភាពឡើងវិញ។
ចំណែកបងថ្លៃរបស់សកម្មជនខ្មែរក្រោម លោក តោ ហ្វាងចឿង គឺលោក ចៅ អ៉ិនតាំ ថាលោកសោកស្ដាយដែលអាជ្ញាធរវៀតណាមមិនឱ្យក្រុមគ្រួសារ និងសាច់ញាតិជួបសួរសុខទុក្ខ លោក តោ ហ្វាងចឿង ក្នុងពន្ធនាគារ ហើយអាជ្ញាធរហាក់ព្យាយាមបិទមិនឱ្យសាច់ញាតិដឹងព័ត៌មានពីសកម្មជនដែលកំពុងជាប់ឃុំឃាំង។ លោក ចៅ អ៊ិនតាំ បន្តថា ក្នុងរបបកុម្មុយនិស្ត អាជ្ញាធរវៀតណាមបានបង្ក្រាបទៅលើ លោក តោ ហ្វាងចឿង និងសកម្មជនផ្សេងទៀតមិនឱ្យធ្វើសកម្មភាពផ្សព្វផ្សាយពីសិទ្ធិជនជាតិដើមនោះឡើយ។
លោក ចៅ អ៊ិនតាំ៖ «គាត់មិនបានធ្វើអីឱ្យខុសឆ្គងអីទេ គ្រាន់តែគាត់ជាអ្នកចែកចាយនូវសៀវភៅសិទ្ធជនជាតិដើមដែលទទួលស្គាល់ដោយអង្គការសហប្រជាជាតិហ្នឹង ហើយវៀតណាមយើងក៏ទទួលស្គាល់សិទ្ធិជនជាតិដើមដែរ ហើយបានចែករំលែកនូវអាវយឺតដែលមានមានស្លាកបាត់បង់ទឹកដីដូចជា ១០ ធ្នូ សិទ្ធិមនុស្ស សិទ្ធិនារី គេឃើញសកម្មភាពហ្នឹងទៅ គេខ្លាចយើងបំផុសបំផុលបះបោរក៏គេចាប់យើងទៅ»។
លោក ចៅ អ៊ិនតាំ ឱ្យដឹងទៀតថា លោក តោ ហ្វាងចឿង មានប្រពន្ធ និងកូនចំនួនពីរនាក់ដែលកំពុងទន្ទឹងរងចាំផ្លូវ លោក តោ ហ្វាងចឿង ត្រលប់មកផ្ទះវិញ ចំណែកឪពុកម្ដាយ លោក តោ ហ្វាងចឿង ក៏កំពុងមានជំងឺប្រចាំកាយផងដែរ។ លោក ចៅ អ៊ិនតាំ ទទូចដល់ពលរដ្ឋខ្មែរគ្រប់រូបប្រើប្រាស់សិទ្ធិ និងជួយចូលរួមតវ៉ាដោយសន្តិវិធីទាមទារអាជ្ញាធរវៀតណាមដោះលែងសកម្មជនខ្មែរក្រោមដែលកំពុងជាប់ឃុំទាំងអស់។
អាជ្ញាធរវៀតណាមនៅខេត្តព្រះត្រពាំង និងខេត្តឃ្លាំង កាលពីថ្ងៃទី៣១ ខែកក្កដា បានចាប់ខ្លួនសកម្មជនខ្មែរក្រោម៣នាក់រួមមានលោក តោ ហ្វាងចឿង លោក ថាច់ កឿង និងលោក យ័ញ មិញក្វាង ក្រោមការចោទប្រកាន់ពីបទ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ បំពានលើផលប្រយោជន៍របស់រដ្ឋ និងសិទ្ធិសេរីភាពស្របច្បាប់ នៃអង្គការចាត់តាំង និងបុគ្គល» តាមមាត្រា៣៣១ នៃក្រមព្រហ្មទណ្ឌរបស់ប្រទេសវៀតណាម។ ដោយឡែក កាលពីថ្ងៃទី៣ ខែសីហា អាជ្ញាធរវៀតណាមបានចាប់ឃុំខ្លួន សកម្មជនខ្មែរក្រោមជាស្ត្រីម្នាក់ទៀត គឺលោកស្រី ឌិន ធីហ្វិន រស់នៅខេត្តឃ្លាំង ក្រោមបទចោទ «មិនអនុវត្តតាមសាលក្រមរបស់តុលាការ» ដែលពាក់ព័ន្ធនឹងបញ្ហាដីធ្លី។ ទោះជាយ៉ាងណា ខ្មែរក្រោមអះអាងថា ការចាប់ខ្លួនសកម្មជនទាំង ៤នាក់នេះ ដោយសារតែអាជ្ញាធរវៀតណាមមិនសប្បាយចិត្តចំពោះសកម្មភាពផ្សព្វផ្សាយសៀវភៅប្រវត្តិសាស្ត្រ សិទ្ធិមនុស្ស សិទ្ធិជនជាតិដើម និងការបោះពុម្ពអាវយឺតដែលមានទង់ជាតិខ្មែរក្រោមចែកចាយទៅឱ្យពលរដ្ឋខ្មែរក្រោមជាដើម។
កម្មកររោងចក្រនៅខេត្តទួលតាមោក និងជាសកម្មជនខ្មែរក្រោម លោក ថាច់ ង៉ា លើកឡើងថាលោកបានចូលរួមផ្សព្វផ្សាយសៀវភៅសិទ្ធិមនុស្ស និងទង់ជាតិខ្មែរក្រោមឱ្យពលរដ្ឋផ្សេងយល់ដឹងក្នុងរយៈពេលជាង ៣ឆ្នាំមក។ លោក ថាច់ ង៉ា ថា ទោះជាអាជ្ញាធរវៀតណាមបានធ្វើទុក្ខបុកម្នេញ និងបានចាប់ខ្លួនសកម្មជនខ្មែរក្រោមទាំង ៤នាក់ហើយក្ដី ក៏លោកនៅតែបន្តសកម្មភាពផ្សព្វផ្សាយពីសិទ្ធិមនុស្សដល់ពលរដ្ឋខ្មែរក្រោមដដែល។
លោក ថាច់ ង៉ា៖ «ទោះបីការកៀបសង្កត់បិតបាំងយ៉ាងណាក៏ដោយ យើងខ្ញុំជាសកម្មជនខ្មែរក្រោមគ្រប់រូបនេះ តែងតែធ្វើដើម្បីឱ្យពិភពលោកគេបានស្គាល់ថា យើងខ្ញុំជាខ្មែរក្រោមជនជាតិដើម សិក្សាសិទ្ធិមនុស្ស និងសិទ្ធិជនជាតិដើមនេះឱ្យវៀតណាមត្រូវទទួលការពិត»។
លោក ថាច់ ង៉ា បន្ថែមទៀតថាពលរដ្ឋ និងសកម្មជននៅកម្ពុជាក្រោមក៏បានធ្វើយុទ្ធនាការផុលផុសតាមបណ្ដាញសង្គមរួមមានការបង្ហោះ សារ និងរូបភាព ក្នុងគោលបំណងទាមទារឱ្យអាជ្ញាធរវៀតណាមដោះលែងសកម្មជន។ ទោះជាយ៉ាងណា លោក ថាច់ ង៉ា ថា ដើម្បីឱ្យការទាមទារមានប្រសិទ្ធិភាពទាល់តែមានពលរដ្ឋខ្មែរផ្សេងទៀតចូលរួមឱ្យបានច្រើនជាងនេះ។
ជុំវិញរឿងនេះ អគ្គលេខាធិការសមាគមខ្មែរកម្ពុជាក្រោមដើម្បីសិទ្ធិមនុស្សនិងអភិវឌ្ឍន៍ លោកបណ្ឌិត សឺន ជុំជួន មានប្រសាសន៍នៅថ្ងៃទី១ វិច្ឆិកា ថាអង្គការ សមាគម និងសកម្មជនខ្មែរក្រោមដែលកំពុងរស់នៅប្រទេសកម្ពុជា បានធ្វើយុទ្ធនាការជារៀងរាល់កន្លះខែម្ដង ដោយបានដាក់ញត្តិ ឬលើកឡើងពីការចាប់ខ្លួនសកម្មជនខ្មែរក្រោមទាំង៤នាក់ទៅកាន់ទូតបទេស និងអង្គការការពារសិទ្ធិមនុស្សនានា។ លោកបណ្ឌិត សឺន ជុំជួន ថាតាមរយៈយុទ្ធនាការទាមទារនេះ អង្គទូតនៃប្រទេសប្រជាធិបតេយ្យខ្លះ បានទទួលយកញត្តិ និងសន្យាថា នឹងលើកឡើងពីបញ្ហារំលោភសិទ្ធិមនុស្សខ្មែរក្រោមជាមួយទៅប្រទេសវៀតណាម។
លោក សឺន ជុំជួន៖ «យើងចាត់ទុកថាការដែលចាប់ ការដែលឃុំខ្លួនហ្នឹងគឺមិនត្រឹមត្រូវទៅតាមគោលការណ៍សិទ្ធិមនុស្សទេ ហើយអនុវត្តទៅតាមនីតិវិធី អនុវត្តទៅតាមច្បាប់វៀតណាម។ ច្បាប់ដែលយើងមើលស្ថិតមាត្រា ការចោទប្រកាន់ទៅលើសកម្មជនទាំង ៤នាក់ គឺមិនឆ្លើយតាមតាមគោលការណ៍សិទ្ធិមនុស្សទេ ដូច្នេះទើបយើងចាត់ថា ជាការរំលោភសិទ្ធិមនុស្សរបស់សកម្មជនយើងដែលនៅកម្ពុជាក្រោមហ្នឹង»។
ព្រះសង្ឃ និងពលរដ្ឋខ្មែរក្រោមដែលឈឺឆ្អាលពីបញ្ហាសង្គមតែងត្រូវបានអាជ្ញាធរវៀតណាមធ្វើទុក្ខបុកម្នេញ តាមរយៈការឃ្លាំមើលក្នុងជីវភាពរស់នៅប្រចាំថ្ងៃ ការសម្លុតបំភ័យ គំរាមកំហែង និងចាប់ខ្លួនដាក់ពន្ធនាគារជាដើម រហូតពេលខ្លះពួកគេត្រូវបង្ខំចិត្តរត់ចោលស្រុកកំណើតឡើងមករស់នៅប្រទេសកម្ពុជា ឬសុំសិទ្ធិជ្រកកោននៅប្រទេសទី៣ផ្សេងទៀតក៏មាន។ ពលរដ្ឋខ្មែរក្រោមលើកឡើងថា អាជ្ញាធរវៀតណាមចាប់ខ្លួនសកម្មជនខ្មែរក្រោម ៤នាក់ដាក់ពន្ធនាគារនៅពេលនេះ គឺដើម្បីបំបាក់ស្មារតីពលរដ្ឋខ្មែរក្រោមផ្សេងទៀត កុំឱ្យឈឺឆ្អាលពីបញ្ហាសង្គម និងទាមទារសិទ្ធិជនជាតិដើមនៅកម្ពុជាក្រោម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។