ពលរដ្ឋខ្មែររស់នៅក្រៅប្រទេសមួយចំនួនរិះគន់ចំណាត់ការរបស់រដ្ឋាភិបាលលោក ហ៊ុន ម៉ាណែត ដែលរឹតត្បិតសេរីភាពពលរដ្ឋមិនឱ្យបញ្ចេញមតិ និងប្រើប្រព័ន្ធតុលាការដើម្បីចាប់ចងក្រុមយុវជនសង្គមដាក់ពន្ធនាគារ ថាជាការដឹកនាំប្រទេសបែបផ្ដាច់ការដែលផ្ទុយពីច្បាប់ជាតិ និងអន្តរជាតិ។ ប្រតិកម្មនេះគឺបន្ទាប់ពី លោក ហ៊ុន ម៉ាណែត បើកការបង្ក្រាបលើពលរដ្ឋ និងយុវជនដែលហ៊ាននិយាយការពិតពីបញ្ហាសង្គមដាក់ពន្ធនាគារជាបន្តបន្ទាប់។
ពលរដ្ឋខ្មែររស់នៅ និងធ្វើការនៅក្រៅប្រទេសនាំគ្នាថ្កោលទោសរដ្ឋាភិបាល លោក ហ៊ុន ម៉ាណែត ថាធ្វើឱ្យលំហសិទ្ធិសេរីភាពរួមតូច និងធ្វើឱ្យប៉ះពាល់ដល់សិទ្ធិជាមូលដ្ឋានរបស់ពលរដ្ឋ។
ពលរដ្ឋរស់នៅប្រទេសជប៉ុន លោក ឆនចិន្តា ណាដូ ប្រាប់វិទ្យុអាស៊ីសេរីនៅថ្ងៃទី២៥ ខែសីហា ថា លោកហួសចិត្តនឹងរដ្ឋាភិបាល លោក ហ៊ុន ម៉ាណែត ដែលចាប់យុវជនសង្គមដាក់ពន្ធនាគារទាំងគ្មានកំហុស និងបង្កើតបទចោទតាមអំពើចិត្តដើម្បីចោទប្រកាន់លើក្រុមយុវជន។ លោកចាត់ទុកទង្វើរបស់រដ្ឋាភិបាលដែលចាប់យុវជនដាក់ពន្ធនាគារគឺជារឿងដ៏អាម៉ាស់ និងជាការដឹកនាំប្រទេសឆ្ពោះទៅរករបបផ្ដាច់ការ។
លោក ឆនចិន្តា ណាដូ៖«វាឆ្លុះបញ្ចាំងឱ្យឃើញថា រដ្ឋាភិបាលកម្ពុជាដើរទៅរករបបផ្ដាច់ការដោយសារតែការបញ្ចេញមតិនៅលើបណ្ដាញសង្គមដែលច្បាប់ត្រូវបានការពារដោយច្បាប់ដូច្នេះ នៅពេលដែលគ្រាន់តែជាការបញ្ចេញមតិបន្តិចបន្តួចបែរជាឱ្យគាត់មានទោសធ្ងន់ធ្ងរអានេះវាជារឿងដែលបង្ហាញថា សង្គមកម្ពុជាដើរទៅរកកុម្មុយនិស្ត»។
ស្រដៀងគ្នានេះដែរ អនុប្រធានចលនាសង្គ្រោះជាតិនៅប្រទេសជប៉ុន លោកស្រី មាស ភារ៉ា កត់សម្គាល់ឃើញថា ការដឹកនាំរបស់លោក ហ៊ុន ម៉ាណែត បច្ចុប្បន្នគឺជាមិនបានផ្ដល់ដំណោះស្រាយសមរម្យសម្រាប់ពលរដ្ឋដែលកំពុងជួបទុក្ខលំបាកនោះទេ ផ្ទុយទៅវិញលោក ហ៊ុន ម៉ាណែត បែរជាចាប់យុវជន និងពលរដ្ឋណាដែលហ៊ានរិះគន់ពីភាពអសកម្មរបស់លោកទៅវិញ។
លោកស្រី មាស ភារ៉ា៖«ខ្ញុំក៏មិនយល់ពីរដ្ឋាភិបាលមិនដឹងថា គាត់ចង់ដើរទៅផ្លូវណាក្នុងចិត្តគាត់មិនឱ្យមានអ្នកប្រឆាំងនឹងគាត់ ក៏ប៉ុន្តែគាត់ព្យាយាមធ្វើអំពើឈឺចាប់ដល់យុវជនដល់ក្រុមគ្រួសារយុវជននៅពេលដែលចាប់មនុស្សម្នាក់គឺឈឺចាប់ដល់មួយគ្រួសារអាចហៅថា ឈឺចាប់មួយពូជក៏បានដែរ។ ហើយគាត់ដាក់គោលការណ៍អ្នកដែលមានគំនិតប្រឆាំងនឹងគាត់ ក៏ប៉ុន្តែគាត់អត់ធ្វើឱ្យពលរដ្ឋស្រឡាញ់ផង។ តើថ្ងៃណាទើបអស់អ្នកប្រឆាំងខ្ញុំចង់សួរទៅរដ្ឋាភិបាលអ៊ីចឹងវិញ?»
ដោយឡែក ពលករខ្មែរនៅកូរ៉េខាងត្បូង លោក រ៉េត សុផាត មើលឃើញថា ការបង្កើនការចាប់ខ្លួនក្រុមយុវជនដាក់ពន្ធនាគារមិនបានផ្ដល់ផលចំណេញដល់រដ្ឋាភិបាលឡើយ ផ្ទុយទៅវិញលោក ហ៊ុន ម៉ាណែត កំពុងធ្វើឱ្យពលរដ្ឋខ្មែរផ្ទុះកំហឹងកាន់តែខ្លាំង។ លោកព្រមានថា វាសនារបស់លោក ហ៊ុន ម៉ាណែត អាចនឹងដូចមេដឹកនាំនៃប្រទេសបង់ក្លាដេស (Bangladesh )។
លោក រ៉េត សុផាត៖ «គួរតែមានការកែប្រែឡើងវិញបើកលំហសិទ្ធិសេរីភាពឱ្យពលរដ្ឋមានសិទ្ធិបញ្ចេញមតិ មានសិទ្ធិជួបជុំ និងបើកលំហសិទ្ធិនយោបាយឱ្យគណបក្សនយោបាយឱ្យពួកគាត់មានសិទ្ធិធ្វើនយោបាយ។ កុំឱ្យមានការចាប់ខ្លួន គំរាមកំហែង បំភិតបំភ័យធ្វើឱ្យពួកគាត់មិនហ៊ានក្នុងការធ្វើនយោបាយមិនហ៊ានបញ្ចេញមតិ មិនហ៊ានតតាំងទៅនឹងរដ្ឋអំណាច ដែលពួកគាត់បំភិតបំភ័យយ៉ាងធ្ងន់ធ្ងរ។ សកម្មជនដែលសកម្មក្នុងរឿងនយោបាយក្នុងរឿងសិទ្ធិមនុស្សត្រូវបានជាប់គុកជាបន្តបន្ទាប់ទាំងអស់នេះជាអ្វីដែលយើងមានឃើញថា ជាការបំបិទសិទ្ធិសេរីភាពដោយគ្មានការកែប្រែ»។
ក្រុមពលរដ្ឋខ្មែររស់នៅប្រទេសកូរ៉េខាងត្បូងគ្រោងធ្វើបាតុកម្មប្រឆាំងនឹងគម្រោងកិច្ចប្រតិបត្តិការCLV ជាលើកទី២នៅថ្ងៃទី០១ ខែកញ្ញា នៅទីលានប្រជាធិបតេយ្យជុងកាក់ (Jonggak) ក្នុងក្រុងសេអ៊ូល (Seoul) ដែលអះអាងថា នឹងមានអ្នកចូលរួមធ្វើបាតុកម្មប្រមាណ១ម៉ឺននាក់។
ប្រតិកម្មរបស់ពលរដ្ឋទាំងនេះ ធ្វើឡើងបន្ទាប់ពីឪពុកនាយករដ្ឋមន្ត្រីលោក ហ៊ុន សែន និងនាយករដ្ឋមន្ត្រីកូនលោក ហ៊ុន ម៉ាណែត បើកយុទ្ធនាការបង្ក្រាបលើពលរដ្ឋ និងក្រុមយុវជនដែលមិនគាំទ្រគម្រោងកិច្ចសហប្រតិបត្តិការCLVដាក់ពន្ធនាគារជាបន្តបន្ទាប់ និងចោទប្រកាន់លើយុវជនទាំងនោះពីបទ«រួមគំនិតក្បត់ និងញុះញង់»ដើម្បីផ្ដួលរលំរដ្ឋាភិបាល។ ជាក់ស្ដែងក្រុមយុវជនសង្គមចំនួន៨នាក់ ក្នុងនោះរួមមាន កញ្ញា រៀម ស្រីពេជ្ររតនា កញ្ញា សើន ស្រីម៉ៃ កញ្ញា កាត់ ស៊ីណាត លោក ធី ថន និងកញ្ញា នឿន ស្រីណែត ព្រមទាំងក្រុមយុវជននៃអង្គការកម្មវិធីអភិវឌ្ឍន៍ធនធានយុវជន៣នាក់ ដែលរដ្ឋាភិបាល លោក ហ៊ុន ម៉ាណែត ចាប់ខ្លួនទាំងបង្ខំ និងបញ្ជូនពួកគាត់យកទៅឃុំនៅពន្ធនាគារផ្សេងៗពីគ្នា។ ក្រុមយុវជនទាំងនោះភាគច្រើនគឺតែងតែចេញមុខឈឺឆ្អាលអំពីរឿងអយុត្តិធម៌សង្គម និងទាមទារឱ្យរដ្ឋាភិបាលដោះស្រាយបញ្ហាប្រឈមរបស់ពលរដ្ឋ។ ពួកគាត់មិនបានបង្ហាញអំពីគម្រោងចូលរួមធ្វើបាតុកម្ម ដើម្បីផ្ដួលរំលំរដ្ឋាភិបាលពាក់ព័ន្ធនឹងរឿងCLVនោះឡើយ។
វិទ្យុអាស៊ីសេរីមិនអាចទាក់ទង អ្នកនាំពាក្យនាយករដ្ឋមន្ត្រី លោក មាស សោភ័ណ្ឌ និងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការបកស្រាយជុំវិញបញ្ហានេះបានទេនៅថ្ងៃទី២៥ ខែសីហា។
អ្នកឃ្លាំមើលបញ្ហាសិទ្ធិមនុស្ស និងសង្គម លោក ស៊ឹង សែនករុណា កត់សម្គាល់ថា រដ្ឋាភិបាលតែងតែអួតអាងពីការអនុវត្តតាមគោលការណ៍លទ្ធិប្រជាធិបតេយ្យប៉ុន្តែធាតុពិតរដ្ឋាភិបាលបែរជាដើរផ្ទុយពីច្បាប់ជាតិ និងអន្តរជាតិដែលនាំឱ្យមានការរំលោភសិទ្ធិមនុស្សធ្ងន់ធ្ងរទៅវិញ។
លោក ស៊ឹង សែនករុណា៖«ភាពកម្សោយនៅក្នុងការអនុវត្តប្រជាធិបតេយ្យនៅក្នុងតំបន់ ឬក៏នៅប្រទេសកម្ពុជាហ្នឹងយើងឱ្យប្រទេសផ្សេងៗគេមើលឃើញថា គឺរញ៉េរញ៉ៃ និងមានការរំលោភសិទ្ធិមនុស្សបែបហ្នឹងហើយគ្មានអ្នកណាធ្វើអីទេ។ អ៊ីចឹងធ្វើឱ្យប្រទេសផ្សេងៗ ទៅប្រព្រឹត្តអំពើបែបហ្នឹងបន្តទៀត លេងមានការគោរពសិទ្ធិមនុស្ស លេងមានការគោរពប្រជាធិបតេយ្យហើយ។ អ៊ីចឹងទាល់តែមានវិធានការជាក់លាក់ណាមួយដែលអាចធ្វើឱ្យពួកគេមានកែប្រែ គេអាចបញ្ឈប់នូវអំពើ ដែលរំលោភបំពានទៅលើសិទ្ធិសេរីភាពពលរដ្ឋរបស់ខ្លួនបាន»។
ទាក់ទងនឹងការចាប់ខ្លួនយុវជននេះដែរ អង្គការសម្ព័ន្ធភាពការពារសិទ្ធិមនុស្សហៅកាត់ថា ច្រាក់ នៅថ្ងៃទី២៥ ខែសីហា បានចេញលិខិតចំហមួយស្នើឱ្យរដ្ឋាភិបាលបន្ធូរបន្ថយស្ថានភាពនៃសិទ្ធិសេរីភាពបញ្ចេញមតិនៅកម្ពុជា។ អង្គការសង្គមស៊ីវិលនេះសង្កេតឃើញថា អ្នកបញ្ចេញមតិមួយចំនួនត្រូវបានឃាត់ខ្លួន និងចាប់ឃុំខ្លួននៅពន្ធនាគារដូច្នេះរដ្ឋាភិបាលគួរតែអនុវត្តច្បាប់ឱ្យស្របតាមរដ្ឋធម្មនុញ្ញ និងកតិកាសញ្ញាអន្តជាតិ។
ផ្នែកតាមរបាយការណ៍របស់សមាគមការពារសិទ្ធិមនុស្សអាដហុក គិតមកទល់ពេលនេះរដ្ឋាភិបាលបានបង្កើនការចាប់ខ្លួនយុវជន ពលរដ្ឋ និងសកម្មជនបក្សប្រឆាំងប្រមាណ៤២នាក់ហើយដែលរដ្ឋាភិបាលអះអាងថា ពួកគាត់មានគម្រោងធ្វើបាតុកម្មផ្ដួលរលំរដ្ឋាភិបាលជុំវិញរឿងកិច្ចប្រតិបត្តិការCLV។
ពលរដ្ឋ និងមន្ត្រីសង្គមស៊ីវិលជំរុញឱ្យលោកនាយករដ្ឋមន្ត្រី ហ៊ុន ម៉ាណែត ដោះលែងសកម្មជនសង្គម និងសកម្មជននយោបាយដើម្បីឱ្យពួកគាត់អាចរស់នៅជួបជុំក្រុមគ្រួសារឡើងវិញ។ លើសពីនេះពួកគាត់ចង់ឃើញរដ្ឋាភិបាលចេះបង្រួបបង្រួមជាតិ និងផ្សះផ្សាជាតិដើម្បីរួមគ្នាដោះស្រាយវិបត្តិសង្គម វិបត្តិនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។